ୱେ଼ ବ଼ଲୁ

ଯୋହନଙ୍କ ପ୍ରତି ପ୍ରକାଶିତ ବାକ୍ୟ

ଜହନଇଁ ତ଼ସାହାଁ ୱେ଼କ୍‌ହି ବ଼ଲୁ

ମୂଲୁ ହା଼ଡା

ୱେ଼କ୍‌ହି ବ଼ଲୁ ପୁଃନି ମେ଼ରାତି ରା଼ତି ପତି । ଈଦି ଜିକେଏ ଜହନ ତା଼ଣାଟି ଜୀସୁ କ୍ରୀସ୍ତ ଜାର୍ନାଆ଼ତି ୯୫ ବାର୍ସା ଡା଼ୟୁ ରା଼ସ୍‌କି ଆ଼ହାମାଚେ

ଜୀସୁ ୱେଣ୍ତା ୱା଼ନି ଦିନା ଡାଗେ ୱା଼ହି ମାନାକି ଜୀସୁ କ୍ରୀସ୍ତ ତା଼ଣା ନାମୁତଲେ ମାଞ୍ଜାଲି ପ଼ଡ଼ୱି ଆ଼ନାରାକି ସା଼ସା ଅ଼ଡ଼େ ଆ଼ସା ହୀହାଲିତାକି ଈ ୱେ଼କ୍‌ହି ବ଼ଲୁ ରା଼ଚିତେସି

ୱେ଼କ୍‌ହି ବ଼ଲୁ ରା଼ନି ବେ଼ଲାତି କାତା ୱେସିମାନେ, ଜୀସୁ ଡା଼ୟୁ ଜୀଣା ଆ଼ନେସି ଅ଼ଡ଼େ ଆମିନି ଗାଟାରି ଏ଼ୱାଣି ତା଼ଣା ବା଼ର୍ସୁ ଇଟିନେରି ଏ଼ୱାରି ବାରେବେ଼ଲା ଏ଼ୱାଣିତଲେ ଡ଼ୟିନେରି । ଈ ପତି ନିଙ୍ଗେ ଜାଗ୍ରାତା କିୟାପେ ଅ଼ଡ଼େ ଆ଼ସା ହିୟାପେ, ଇଚିହିଁ ଜୀସୁ ତବେ ୱେଣ୍ତା ୱା଼ହିମାନେସି ।

ପତିତା ମାନାୟି

୧. ଜହନ ତାଙ୍ଗେ ପୁଣ୍‌ମ୍ବିକିନାୟି ଅ଼ଡ଼େ ଡା଼ୟୁତି କାତା ମେହ୍‌ନାୟି ।

୨. ସା଼ତାଗଟା କୁଲମିକାକି ଜୀସୁ କ୍ରୀସ୍ତ ତା଼ଣାଟି ଜହନତି କାବ୍ରୁ ।

୩. ସା଼ତାଗଟା ବୁଟୁ ମୁଦ୍ରା ଅ଼ଡ଼େ ସା଼ତାଗଟା ତୀତ୍ରି ।

୪. ମୀର୍‌କା ଅ଼ଡ଼େ ସା଼ତାଗଟା ତା଼ର୍କାଗାଟି ରା଼ଚୁ ତଲେ ଜୁଜୁ ।

୫. ସା଼ତାଗଟା କ଼ପାଗାଟି ଗିନାୟାଁ ।

୬. ମାହାପୂରୁ ଲାକପୂରୁ ତାନି ସାତ୍ରୁଇଁ ଜୀଣା ଆ଼ନାୟି ।

୭. ପୁଃନି ଲାକପୂରୁ ଅ଼ଡ଼େ ପୁଃନି ଦାର୍‌ତି ।