Kuvi Bible
ନେ ଜା଼ 7
ଦା଼ରେଣି ତା଼ଣାଟି ଜାଗ୍ରାତା
ହେ଼ ନା଼ ମୀର୍ଏଣା, ନା଼ କାତା ବାରେ ମା଼ନୱି ଆ଼ମୁ ଅ଼ଡ଼େ ନା଼ ହୁକୁମି ବାରେ ନୀ ହିୟାଁତା କୂଡ଼ିକିହାଁ ଇଟାମୁ। ନା଼ ହୁକୁମି ବାରେ ମା଼ନୱି ଆ଼ମୁ, ଆତିହିଁ ନୀନୁ ନୀଡିଦି ଅ଼ଡ଼େ ନୀ କାନୁ ଗୁଡୁ ସମାନା ନା଼ ମେ଼ରା ଗେଲ୍ପାମୁ। ନୀ ବାରେ ୱାସ୍କାଣା ଏ଼ଦାଆଁ ଦହ୍ମୁ; ନୀ ହିୟାଁତି ପା଼ଟାତା ଏ଼ ବାରେ ରା଼ଚା ଇଟାମୁ। ବୁଦିତି ଏଲେଇନାମୁ, “ନୀନୁ ନା଼ ତାଙ୍ଗି,” ଅ଼ଡ଼େ ନେହିଁ ଅଣ୍ପୁତି ନା଼ କୁଟମିତି ଲ଼କୁ ଇନାମୁ। ଏଚେଟିଏ ଏ଼ୱି ଦା଼ରେଣି ତା଼ଣାଟି ଇଚିହିଁ, ଡ଼ାକ୍ନି ହା଼ଡା ଜ଼ଲିନି ଆୟା ତା଼ଣାଟି ନିଙ୍ଗେ ଗେଲ୍ପାନୁ।
ନା଼ନୁ ନା଼ କିଡ଼୍କି ଜା଼ଲି ହିମ୍ବରିଟି ସିନିକିହି ମାଚେଏଁ; ଏଚେଟିଏ ନା଼ନୁ ମେସ୍ତେଏଁ, ବୁଦି ହିଲାଆ ଲ଼କୁ ବିତ୍ରା ଅ଼ଡ଼େ ଦାଂଗ୍ଣାୟାଁ ବିତ୍ରା ରଅସି ବୁଦି ହିଲାଆ ଦାଂଗ୍ଣେଣାଇଁ ମେସ୍ତେଏଁ, ଦା଼ରେଣି ଇଲୁ କନ ଦାରିତି ସାହ୍ଡ଼ାଟି ହାଜି ହାଜିହିଁ ତାନି ଇଜ ହାନି ଜିରୁତା ହାଚେସି। ଏଚିବେ଼ଲା ମିଡ଼୍ଅଲା ମାସ୍କା ଆ଼ହିମାଚେ, ଲା଼ଆଁତି ଆନ୍ଦେରି ଆ଼ହାମାଚେ। ଏଚେଟିଏ ମେହ୍ଦୁ, ର଼ ଆୟା ଏ଼ୱାଣାଇଁ ବେଟାଆ଼ତେ, ଏ଼ଦି ଦା଼ରେଣି ସାଜୁ ତୁର୍ହାମାନେ ଅ଼ଡ଼େ ହିୟାଁତା ହା଼ରେକା ସୁତରିଗାଟାୟି। ଏ଼ଦି ହା଼ରେକା କାତା ଜ଼ଲିନାୟି ଅ଼ଡ଼େ କାତା ମା଼ନୱି ଆ଼ଆଗାଟାୟି, ଏ଼ଦାଣି କଡା ଇଜ ଟିକେଏ। ଏ଼ଦି ଏଚେ ଏଚେଲା ପା଼ହେରିତା, ଏଚେ ଏଚେଲା ଡେ଼ଡ଼ା ଜିରୁତା ଡ଼ୟିନେ ଅ଼ଡ଼େ ବାରେ କନୟାଁ ୱାକି କା଼ଚାହାଁ କୁଗା ଡ଼ୟିନେ। ଏ଼ ଆୟାଟି ଏ଼ୱାଣାଇଁ ଆସାହାଁ ନଣ୍ତିତେ, ଅ଼ଡ଼େ ଲାଜା ହିଲାଆ ଗୂତିଟି ଏଲେଇଚେ, “ନେହିଁ ପୂଜା ନା଼ ତା଼ଣା ମାନେ; ନା଼ ଆ଼ଞ୍ଜାମାନାଣି ନୀଞ୍ଜୁ ପୂରା କିହାମାଇଁ। ଏ଼ଦାଆଁତାକି ନୀ ତଲେ କାତା ଆ଼ହାଲି ୱା଼ତେଏଁ ଅ଼ଡ଼େ ନୀ ମୂମ୍ବୁ ଜାତ୍ନୁଟି ସିନି କିହାଲି ୱା଼ହାମାଇଁ, ଅ଼ଡ଼େ ନିଙ୍ଗେ ବେଟାଆୟାତେଏଁ। ନା଼ନୁ ନା଼ କାଟେଲିତା ମିସର ଦେ଼ସାତି ସିତ୍ରା କା଼ବ୍ରା ପା଼ସ୍ପନି ପା଼ସାମାଇଁ। ଇଞ୍ଜାଁ, ଗାନ୍ଦା ରାସା, ଅଗୁର, ଅ଼ଡ଼େ ଦାରୁଚିନି ତଲେ ନା଼ ପା଼ସ୍ପନି ଗାନ୍ଦା କିହାମାଇଁ। ୱା଼ମୁ, ମା଼ର ଲା଼ଇ ୱେ଼ୟେ ତାକି ରହେଁଏ ଡୂରିନ ଅ଼ଡ଼େ ରଅତୱି ରଅଣାଇଁ ଜୀୱୁନ଼ହାଁ ରା଼ହାଁ କିନ। ଇଚିହିଁ ନା଼ ଡକ୍ରା ଇଜ ହିଲଅସି, ଏ଼ୱାସି ହେକ ଦେ଼ସା ହାଜାମାନେସି। ଏ଼ୱାସି ଟାକାୟାଁ ଆସାହାଁ ହାଜାମାନେସି, ଲେ଼ଞ୍ଜୁତି ପୁନିତା ଏ଼ୱାସି ୱା଼ନେସି।” ଇଲେକିହିଁ ହା଼ରେକା ସୁୱାଲା ହା଼ଡା ଜ଼ଲାହାଁ ଏ଼ଦି ଏ଼ୱାଣି ମ଼ନତି ଜୀଣାଆ଼ନେ, ଅ଼ଡ଼େ ଗୂତିତି ଡ଼ାକ୍ହି ହା଼ଡା ତଲେ ଏ଼ୱାଣାଇଁ ପମାହାଁ ଅ଼ତେ। ଏ଼ନିକିଁ କ଼ଡି ପା଼ୟ୍ୱି ଆ଼ହାଲି ହାନେ ଅ଼ଡ଼େ ଏ଼ନିକିଁ ବୁଦି ହିଲାଆଗାଟାସି ପା଼ନ୍ଦାତା ହେର୍ୱାମାନି ଲ଼କୁ ଡଣ୍ତ ବେଟାଆ଼ହାଲି ହାନେସି, ଏଲେକିହିଁ ଏ଼ୱାସି ଏ଼ଦାଣି ଜେ଼ଚ ଜେ଼ଚ ହାଚେସି। ଅ଼ଡ଼େ ପଟା ଏ଼ନିକିଁ ପା଼ନ୍ଦାତା ଜୀୱୁ ହାନାଣି ପୁନାଆନା ଏମ୍ବାଆଁ ହେର୍ହାଲି ତବେ ହାନେ, ଡା଼ୟୁ ତାନି ତ୍ରାଃନାଣାଁ ଆମ୍ବୁ ଜୀୱି ଆ଼ତେ।
ଏ଼ଦାଆଁତାକି ହେ଼ ନା଼ ମୀର୍କାତେରି, ନା଼ କାତା ୱେଞ୍ଜୁ, ଅ଼ଡ଼େ ନା଼ ଗୂତିତି ହା଼ଡାତା ମ଼ନ ଗେ଼ଟ୍ଦୁ। ମୀ ହିୟାଁ ଏ଼ଦାଣି ଜିରୁତା ହାଲାଆପେ, ମୀରୁ ଏ଼ଦାଣି ଜିରୁତା ବା଼ଣା ଆ଼ହାଁ ଜିକେଏ ହାଲାଆଦୁ। ଇଚିହିଁ ଏ଼ଦି ହା଼ରେକା ଲ଼କୁଣି କାଣ୍ତିୟା କା଼ବ୍ରା କିହାମାନେ, ହାଅ, ତାନି ତା଼ଣାଟି ପା଼ୟିତି ଲ଼କୁ ହା଼ରେକା ଆ଼ହାମାନେରି। ତାନି ଇଲୁ ତା଼ଡ଼େପୂରୁ ହାନି ଜିରୁ, ଏ଼ଦି ହା଼କିତି ଇଲୁତା ଏପ୍ହାନେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.