Kuvi Bible
ନେ ଜା଼ 24
ମୀରୁ ଲାଗେଏ ଲ଼କୁଣି ଡା଼ହାରା ଆ଼ଆଦୁ, ଇଞ୍ଜାଁ ଏ଼ୱାରି ତ଼ଣେ ଆ଼ହାଲି ମ଼ନ କିଆଦୁ। ଇଚିହିଁ ଏ଼ୱାରି ହିୟାଁ ଡା଼ହାରା ଅଣ୍ପୁ ଅଣ୍ପିନେ, ଇଞ୍ଜାଁ ତାମି ଗୂତି ଲାଗେଏତି କାତା ଜ଼ଲିନେ। ବୁଦି ତଲେ ଇଲୁ ତିୟାରା ଆ଼ନେ ଅ଼ଡ଼େ ତେଲ୍ହିନାଣି ତଲେ ଏ଼ଦି ତୀରି ଆ଼ନେ; ବୁଦିତଲେ ତାନି ବାକ୍ରାୟାଁ ବାରେ ଦାରାଗାଟାଇ ଅ଼ଡ଼େ ଅ଼ଜିତି ଦିଣ୍ସୁ ତଲେ ନେଞ୍ଜିନେ।
ବୁଦିଗାଟି ଲ଼କୁ ବା଼ଡ଼୍ୟୁ ଗାଟାସି, ଇଞ୍ଜାଁ ତେଲ୍ହିନି ଲ଼କୁ ବା଼ଡ଼୍ୟୁ ପାଡି କିନେସି। ସାତେଏ ନୀନୁ ନେହେଁ ହା଼ଡା ଆସାହାଁ ନୀ ଜୁଜୁ କିଦି; ଅ଼ଡ଼େ, ହା଼ରେକା ମନ୍ତ୍ରିୟାଁ ତଲେ ଗେଲ୍ପି ଆ଼ନେ।
ବୁଦି ହିଲାଆ ଲ଼କୁ ତାକି ବୁଦିତି କାତା ହା଼ରେକା କାଜାୟି; ଏ଼ୱାସି ଗା଼ଡ଼ା ଦୁୱେରିତା ତାନି ଗୂତି ଏ଼କ୍ଅସି।
ଏମିନି ଲ଼କୁ ଲାଗେଏ କାମା କିହାଲି ଅଣ୍ପିନେସି, ଲ଼କୁ ଏ଼ୱାଣାଇଁ ଲାଗେଏ କିନାସି ଇଞ୍ଜିଁ ଏଲେଇନେରି। ବୁଦି ହିଲାଆ ଲ଼କୁତି ଅଣ୍ପୁ ପା଼ପୁଗାଟାୟି, ଇଞ୍ଜାଁ, ନିନ୍ଦା କିନି ମାଣ୍ସିଇଁ ଲ଼କୁ ଅ଼ପଅରି।
କସ୍ତତି ଦିନାତା ନୀନୁ ଏଚେ଼ତା ସା଼ସା ହିଲାଆଗାଟାତି ଆ଼ଦି, ଆତିହିଁ ନୀ ବା଼ଡ଼୍ୟୁ ହା଼ରେକା ଊଣା।
ହା଼ହାଲି ତାକି ଅ଼ୱି ଆ଼ନି ଲ଼କୁଣି ଗେଲ୍ପାମୁ ଅ଼ଡ଼େ ପା଼ୟ୍ୱି ଆ଼ହାଲି ତାକି ଅଣ୍ପାମାନି ଲ଼କୁଣି ଗେଲ୍ପାଲି ତାକି ପାଲେଏ ଆ଼ଆନି। ନୀନୁ ଏଲେଇଞ୍ଜି, ମେହ୍ମୁ, ମା଼ମ୍ବୁ ଈଦାଆଁ ପୁଞ୍ଜାହିଲଅମି, ଆତିହିଁ ହିୟାଁତି ତୂକ୍ନାସି ଏ଼ନାଆଁ ଏ଼ଦାଆଁ ତେଲ୍ହଅସି ? ଇଞ୍ଜାଁ, ନୀ ଜୀୱୁ ଗେଲ୍ପିନାସି ଏ଼ନାଆଁ ଏ଼ଦାଆଁ ପୁନଅସି ? ଅ଼ଡ଼େ, ଏ଼ୱାସି ଏ଼ନାଆଁ ବାରେ ତାକି ତାମି କାମାତି ଲେକା ତଲେ ପା଼ଡ଼େୟି ହୀଅସି ?
ହେ଼ ନା଼ ମୀର୍ଏଣା, ନୀନୁ କିର୍ୟାଁ ତିନାମୁ, ଇଚିହିଁ ଏ଼ଦି ନେହେଁ; ଇଞ୍ଜାଁ, ଟାଟିଟି ରେ଼ଚିମାନି କିର୍ୟାଁ ନିୟୁଁ ତିନାମୁ, ଇଚିହିଁ ଏ଼ଦି ନୀ ଗୂତି ତାକି ହେତାନେ। ବୁଦି ନୀ ଜୀୱୁ ତାକି ଏଲେକିହିଁଏ ଇଞ୍ଜିଁ ନୀନୁ ପୁଞ୍ଜି; ନୀନୁ ବୁଦି ବେଟାଆ଼ତିସାରେ, ଡା଼ୟୁ ନୀ ଦା଼ନା ଜିକେଏ ବେଟାଆ଼ଦି, ଅ଼ଡ଼େ ନୀ ବା଼ର୍ସୁ ନା଼ସା ଆ଼ଏ।
ହେ଼ ଲାଗେଏତି ଲ଼କୁ, ନୀନୁ ଦାର୍ମୁ ଲ଼କୁତି ବାସା ଟା଼ୟୁ କ଼ପାଟି ଡ଼ୁଗାହାଁ କା଼ଆନି; ତାନି ଜ଼ମିନି ଟା଼ୟୁ ନା଼ସା କିଆନି। ଦାର୍ମୁ ଲ଼କୁ ସା଼ତା ଦେବା ରିତି ଜିକେଏ ୱେଣ୍ତେ ନିଙ୍ଗିନେସି ସାମା ଲାଗେଏ ଲ଼କୁ କସ୍ତତା ପୁଟି କିନେସି।
ନୀ ସାତ୍ରୁ ରିତିହିଁ ରା଼ହାଁ କିଆନି, ଅ଼ଡ଼େ ଏ଼ୱାସି ପୁଟି କିତିହିଁ ନୀ ହିୟାଁ ରା଼ହାଁ ଆ଼ଆପେ; ପ୍ରବୁ ଏ଼ଦାଆଁ ମେସାହାଁ ରା଼ହାଁ ଆ଼ଅସି ଅ଼ଡ଼େ ଏ଼ୱାଣି ତା଼ଣାଟି ତାନି କାର୍ବି ୱେଟ୍ନେସି।
ଲାଗେଏ କାମାକିନାରି ତାକି କିଲିବିଲି ଆ଼ଆନି; ଇଞ୍ଜାଁ, ଲାଗେଏ ଲ଼କୁ ତାକି ଡା଼ହାରା ଆ଼ଆନି। ଇଚିହିଁ ଲାଗେଏ ଲ଼କୁ ତାକି ଏ଼ନି ଦା଼ନା ମେ଼ଡ଼ା ଆ଼ଏ ଅ଼ଡ଼େ ଲାଗେଏ ଲ଼କୁତି ଦୀୱଁ ଡୁପ୍ୱିଆ଼ନେ।
ହେ଼ ନା଼ ମୀର୍ଏଣା, ପ୍ରବୁ ଅ଼ଡ଼େ ରାଜାଇଁ ଆଜାମୁ, ଇଞ୍ଜାଁ ଲାଗେଏ ଲ଼କୁ ତଲେ ଆଣ୍ତାଆନି। ଇଚିହିଁ ଦେବୁଣିଏ ଏ଼ୱାରି ନା଼ସା ଆ଼ନାୟି ୱା଼ନେ; ଇଞ୍ଜାଁ, ଏ଼ ରିଆରି କୁଡ଼୍ପୁନା଼ସା ଆ଼ନାଣି ଆମ୍ବାଆସି ପୁନେସି ?
ବୁଦିତି କାତାୟାଁ
ଈ ବାରେ ଜିକେଏ ବୁଦି ଗାଟାରି କାତା। ବିଚାରା କିନାଟି ମାଣ୍ସିତି ମୂମ୍ବୁ ମେସାହାଁ ବିଚାରା କିନାୟି ନେହେଁ ଆ଼ଏ। ଦାର୍ମୁ ହିଲାଆ ଲ଼କୁଇଁ ଆମ୍ବାଆସି ଏଲେଇନେସି, ନୀନୁ ଦାର୍ମୁ ଗାଟାତି, ଲ଼କୁ ଏ଼ୱାଣାଇଁ ବା଼କା ଇଟିନେରି, ଦେ଼ସାତି ଲ଼କୁ ଏ଼ୱାଣାଇଁ ଅ଼ପଅରି। ସାମା ଆମ୍ବାଆରି ଲାଗେଏତାଣାଇଁ ଲା଼ଗିନେରି, ଏ଼ୱାରି ରା଼ହାଁ ଆ଼ନେ; ଇଞ୍ଜାଁ, ନେହିଁ ବ଼ର ଏ଼ୱାରି ମୁହେଁ ୱା଼ନେ।
ଆମ୍ବାଆସି ପା଼ଡ଼ା ଆ଼ତି କାତା ୱେହ୍ନେସି, ଏ଼ୱାସି ଲୂଡ଼ାତା ନଣ୍ତିନାସି ସମାନା।
ପାଙ୍ଗାତି ନୀ କାମା ନେହିଁ କିମୁ, ନୀ ବୂମିତି କାମା କିମୁ; ଏଚେଟିଏ ନୀ ଇଲୁ କେ଼ପାମୁ।
ଉଜେ ଉଜେଏ ନୀ ପା଼ଡ଼ିତାଣା କ଼ପାଟି ସା଼କି ଆ଼ଆନି ଅ଼ଡ଼େ ନୀ ଗୂତି ତଲେ ନା଼ଡ଼ି କିଆନି। “ଏ଼ୱାସି ନାଙ୍ଗେ ତାକି ଏ଼ନିକିଁ କିହାମାଞ୍ଜାନେସି, ଏ଼ୱାଣାକି ଜିକେଏ ନା଼ନୁ ଏଲେକିହିଁ କିଇଁ ଅ଼ଡ଼େ ତାନି କାମାତି ଲେକା ତଲେ ନା଼ନୁ ଏ଼ୱାଣାଇଁ ୱେଟ୍ଇଁ, ଇଲେକିଁ ଜ଼ଲାଆନି।”
ନା଼ନୁ ନିସ୍ତା ଗାଟାଣି ବୂମି ଅ଼ଡ଼େ ବୁଦି ହିଲାଆ ମାଣ୍ସିତି ଅଙ୍ଗୁରି ବା଼ଡ଼ା ଡାଗେଟି ହାଚେଏଁ। ଇଞ୍ଜାଁ ମେହ୍ଦୁ, ଏମ୍ବାତି ବାରେ ୱାକି ହା଼ପ୍କା ପାଡା ଆ଼ହାମାନୁ ଅ଼ଡ଼େ କା଼ଜାୱାଣିଁ ଏମ୍ବାଆଁ ନେଞ୍ଜା ମାନୁ, ଏମ୍ବାତି ୱାଲ୍କା କାତି ବାରେ ଡୀହାମାନେ। ଏଚେଟିଏ ନା଼ନୁ ସିନିକିତେଏଁ, ଇଞ୍ଜାଁ ମ଼ନ ହୀହାଁ ବିଚାରା କିତେଏଁ; ନା଼ନୁ ମେସାହାଁ ଈ ଜା଼ପିନାଣି ବେଟାଆ଼ତେଏଁ। ଅ଼ଡ଼େ ଗା଼ଡ଼େକା ଡୂରିତିହିଁ, ଅ଼ଡ଼େ ଗା଼ଡ଼େକା କଟଣି ହ଼ତିହିଁ, ଅ଼ଡ଼େ ଗା଼ଡ଼େକା ଇଦା ହାଜାଲି ତାକି କେୟୁ ମୁଦୁମାଦା କିତିହିଁ, ନୀ କା଼କୁଲିତି ଦିନା କାଂଗ୍ରେଏସି ସମାନା, ଇଞ୍ଜାଁ ହାକି, ସାଜୁ ଆ଼ହାମାନି ଲ଼କୁ ସମାନା ୱା଼ନେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.