Kuvi Bible
ନେ ଜା଼ 10
ସଲମନତି ନେହିଁ ଜା଼ପ୍ନି ବ଼ଲୁ
ସଲମନତି ଜା଼ପ୍ନି ବ଼ଲୁ।
ବୁଦିଗାଟି ମୀର୍ଏସି ତାଞ୍ଜିତି ରା଼ହାଁ କିନେସି; ସାମା ବୁଦି ହିଲାଆ ମୀର୍ଏଣି କ଼ସମି ତାଲି ଦୁକୁ ଆ଼ନେ।
ଲାଗେଏ ତଲେ ଅର୍ଜିକିତି ଦ଼ନ ଏ଼ନି ଲା଼ବା ହିଲେଏ; ସାମା ଦାର୍ମୁ ହା଼କିଟି ଗେଲ୍ପାନେ।
ପ୍ରବୁ ଦାର୍ମୁଗାଟାଣି ଜୀୱୁତି ହାକି ତଲେ ହା଼ହାଲି ହୀଅସି; ସାମା ଏ଼ୱାସି ଲାଗେଏ ଲ଼କୁତି ଅଣ୍ପୁ ପୂରା କିଅସି।
ଆମିନି ଲ଼କୁ ନିସ୍ତା ତଲେ କାମା କିନେସି, ଏ଼ୱାସି କା଼କୁଲି ଆ଼ନେସି; ସାମା କାମା କିନି ଲ଼କୁ ତାମି କେୟୁତି କାମା ତଲେ ବାତ୍କିନେସି।
କାରା ବେ଼ଲାତା ଆମ୍ବାଆସି କୂଡ଼ି କିନେସି ଏ଼ୱାସି ବୁଦିଗାଟି ମୀର୍ଏସି; ସାମା ଆର୍ନା ଦା଼ଃନି ବେ଼ଲାତା ଆମ୍ବାଆସି ଇଦା କିନେସି, ଏ଼ୱାସି ଲାଜାତି କାତା।
ଦାର୍ମୁ ଲ଼କୁକି ହା଼ରେକା ବ଼ର ଡ଼ୟିନେ; ସାମା ଲାଗେଏ ଲ଼କୁତି ଗୂତି ଲାଗେଏତାଣି ପ୍ଡିକ୍ନେ।
ଦାର୍ମୁଗାଟାଣାଇଁ ଅଣ୍ପିହିଁ ବ଼ର ହୀନେରି, ସାମା ଲାଗେଏ ଲ଼କୁତି ଦ଼ରୁ ମେଣ୍ଙ୍ଗିନେ।
ଆମ୍ବାଆସି ହିୟାଁତା ବୁଦିଗାଟାସି, ଏ଼ୱାସି ହୁକୁମି ମା଼ନୱି ଆ଼ନେସି; ସାମା ବୁଦି ହିଲାଆଗାଟାସି ନା଼ସା ଆ଼ନେସି।
ସ଼ଜେତି ଲ଼କୁ ଆଜାଆନା ତା଼କିନାସି, ସାମା ଆମ୍ବାଆସି ଆଡେୟି ତା଼କିନେସି ଏ଼ୱାଣି ମାଣ୍କି ପୁଣ୍ମ୍ବିଆ଼ନେ।
ଆମ୍ବାଆସି ଲାଗେଏ କାମାତାକି କାନୁ ଗିଟିନେସି, ଏ଼ଦାଣି ତଲେ ଏଟ୍କାତାରାକି ଦୁକୁ ହ଼ନେ, ଇଞ୍ଜାଁ, ବୁଦି ହିଲାଆ ଜାକ୍ଡ଼ୁ ନା଼ସା ଆ଼ନେସି।
ଦାର୍ମୁଗାଟାଣି ଗୂତି ଜୀୱୁତି ଜାର୍ଣା, ସାମା ଲାଗେଏ ଲ଼କୁତି ଗୂତି ଲାଗେଏତାଣି ପ୍ଡିକ୍ନେ।
ଡା଼ହାରାଟି ଗଡ଼୍ହା ହ଼ନେ, ସାମା ଜୀୱୁନ଼ନାୟି ବାରେ ଲାଗେଏତାଣି ପ୍ଡିକ୍ନେ।
ନେହିଁ ଅଣ୍ପୁ ଅଣ୍ପିନାଣା ବ଼ଲୁତା ବୁଦି ଡ଼ୟିନେ, ସାମା ବୁଦି ହିଲାଆଗାଟାଣି ଜେ଼ନୁ ତାକି ବାଡ଼୍ଗା।
ବୁଦିଗାଟି ଲ଼କୁ ବୁଦିତି କୂଡ଼ି କିନେରି, ସାମା ବୁଦି ହିଲାଆଗାଟାଣି ବ଼ଲୁଟି ନା଼ସା ଆ଼ନାୟି ହ଼ନେ।
ବାତ୍କୁଗାଟାଣି ଦ଼ନ ତାନି ଆ଼ଟ୍ୱା ଗା଼ଡ଼ା, ସାମା କା଼କୁଲିଗାଟାରି କା଼କୁଲି ଏ଼ୱାରି ନା଼ସା ଆ଼ନାୟି ଆ଼ନେ।
ଦାର୍ମୁଗାଟାଣି କାମାତି କସ୍ତ ଜୀୱୁ ହୀନେ, ସାମା ଲାଗେଏ ଲ଼କୁତି ଲା଼ବା ପା଼ପୁଗାଟାୟି।
ଆମ୍ବାଆସି ଜା଼ପ୍ନାଣି ମା଼ନି କିନେସି, ଏ଼ୱାସି ଜୀୱୁତି ଜିରୁତା ତା଼କିନେସି; ସାମା ଆମ୍ବାଆସି ଲା଼ଗିନାଣି ଅ଼ପଅସି, ଏ଼ୱାସି ଜିରୁ ବା଼ଣା ଆ଼ନେସି।
ଆମ୍ବାଆସି ଡା଼ହାରା ପ୍ଡିକ୍ନେସି, ଏ଼ୱାସି ମିଚି ଜ଼ଲିନେସି; ଇଞ୍ଜାଁ ଆମ୍ବାଆସି ଉଜେଏ ନିନ୍ଦା କିନେସି, ଏ଼ୱାସି ବୁଦି ହିଲାଆଗାଟାସି।
ହା଼ରେକା କାତାୟାଁ ଜ଼ଲିନି ତା଼ଣା ଲାଗେଏତାୟି ହ଼ନେ, ସାମା ଆମ୍ବାଆସି ତାନି ଗୂତିତି ଲକ୍ନେସି, ଏ଼ୱାସି ବୁଦିଗାଟାସି।
ଦାର୍ମୁଗାଟାଣି ବ଼ଲୁ ନେହିଁ ୱେଣ୍ତି ସମାନା, ସାମା ଲାଗେଏ ଲ଼କୁତି ହିୟାଁ ଊଣା ଦାରା।
ଦାର୍ମୁଗାଟାଣି ବ଼ଲୁ ହା଼ରେକା ଲ଼କୁଣି ପ଼ହିକିନେ, ସାମା ମୁର୍କୁଗାଟାରି ବୁଦି ହିଲାଆକି ହା଼ନେରି।
ମାହାପୂରୁତି ବ଼ର ବାତ୍କି କିନେ, ଇଞ୍ଜାଁ ଏ଼ୱାସି ଏ଼ଦାଣି ତଲେ ଦୁକୁ କାଲ୍ଅସି।
ଲାଗେଏ କାମା କିହାଁ ମୁର୍କୁ ଲ଼କୁ ରା଼ହାଁ ବେଟାଆ଼ନେସି, ସାମା ତେଲ୍ହିନି ଲ଼କୁ ବୁଦି ଲା଼ବା କିହାଁ ରା଼ହାଁ ବେଟାଆ଼ନେସି।
ଲାଗେଏତି ଲ଼କୁ ଏ଼ନାଆଁ ଆଜିନେସି, ଏ଼ୱାଣାକି ଏ଼ଦିଏ ଗଟୱି ଆ଼ନେ; ସାମା ଦାର୍ମୁଗାଟାଣି ମ଼ନତି ଅଣ୍ପୁ ପୂରା ଆ଼ନେ।
ରୁୱାଗା଼ଲି ୱା଼ତିହିଁ ଲାଗେଏତାରି ଊମ୍ବା ହାନେରି, ସାମା ଦାର୍ମୁଗାଟାସି କା଼ଲା କା଼ଲାତି ପୁନାଦି ସମାନା।
ଏ଼ନିକିଁ ପାଲ୍କା ତାକି ପୁଲା ରାସା ଅ଼ଡ଼େ କାନୁ ତାକି ବ଼ୟିଁ, ଏଲେକିହିଁଏ ଆମ୍ବାଆସି ନିସ୍ତାଗାଟାସି ଏ଼ୱାଣାଇଁ ପାଣ୍ତିନାଣାଇଁ ଅ଼ର୍ହାଲି ଆ଼ଡଅସି।
ପ୍ରବୁ ତା଼ଣା ଆଜିନାୟି ନୀଡିନି ବାର୍ସା ଗାଡି ଆ଼ନେ, ସାମା ଲାଗେଏ ଲ଼କୁତି ବାର୍ସା ଊଣା କିୱି ଆ଼ନେ।
ଦାର୍ମୁଗାଟାଣି ଆ଼ସା ରା଼ହାଁ ବେଟାଆ଼ନାୟି, ସାମା ଲାଗେଏ ଲ଼କୁତି ବା଼ର୍ସୁ ନା଼ସା ଆ଼ନେ।
ପ୍ରବୁତି ଜିରୁ ସ଼ଜେତି ଲ଼କୁ ତାକି ଆ଼ଟ୍ୱାତି କ଼ଟା; ସାମା ଲାଗେଏ କାମା କିନାରାକି ଏ଼ଦି ନା଼ସା କିନାୟି।
ଦାର୍ମୁଗାଟାସି ଏଚେଲା ଜିକେଏ ଗୁଚା ଆ଼ଅସି; ସାମା ଲାଗେଏତାସି ଦେ଼ସାତା ବାସା କିଅସି।
ଦାର୍ମୁଗାଟାଣି ଗୂତିଟି ବୁଦିତି କାତା ହ଼ନେ, ସାମା କୁଟୁ କାତା ଜ଼ଲିନି ୱେନ୍ଦରି ନା଼ସା ଆ଼ନେ।
ଦାର୍ମୁଗାଟାଣି ଗୂତି ରା଼ହାଁତି କାତା ଜ଼ଲିନେ, ସାମା ଲାଗେଏ ଲ଼କୁତି ଗୂତି କୁଟୁ କାତା ଜ଼ଲିନେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.