Kuvi Bible
ଜିସା 38
ହିଜକିୟତି ର଼ଗ ଅ଼ଡ଼େ ନେହିଁ ଆ଼ନାୟି
(୨ରାଜା ୨୦:୧-୧୧; ୨କୂଡ଼ା ୩୨:୨୪-୨୬)
ଏଚିବେ଼ଲାତା ହିଜକିୟ ହା଼ରେକା ର଼ଗ ଆ଼ତେସି ଏ଼ୱାସି ହା଼ନି ଲେହେଁ ଆ଼ହାମାଚେସି। ଏଚେଟିଏ ଆମସ ମୀର୍ଏସି ଜିସାୟ ନ଼କିତା ଆ଼ନି କାତା ୱେହ୍ନାସି ଏ଼ୱାଣି ତା଼ଣା ୱା଼ହାଁ ଏଲେଇଚେସି, “ପ୍ରବୁ ଈ କାତା ଏଲେଇଞ୍ଜି ମାନେସି, ନୀନୁ ନୀ ଇଲୁତି କାତା ୱେହ୍ନାୟି ମାନେ ୱେହ୍ମୁ; ଇଚିହିଁ ନୀନୁ ହା଼ଦି, ନୀଡଅତି।”
ଏଚେଟିଏ ହିଜକିୟ କୂଡୁୱାକି ମୂମ୍ବୁ କିହାଁ ପ୍ରବୁ ତା଼ଣା ପ୍ରା଼ତାନା କିହାଁ ଏଲେଇଚେସି, “ଏ଼ ପ୍ରବୁ, ନା଼ନୁ ବାତିମା଼ଲି ମାଞ୍ଜାଇଁ, ନା଼ନୁ ଏ଼ନିକିଁ ସାତାତଲେ ଅ଼ଡ଼େ ନେହିଁ ହିୟାଁ ତଲେ ନୀ ନ଼କିତା ତା଼କାମାଇଁ ଅ଼ଡ଼େ ନେହେଁ କାମା କିହାମାଇଁ, ଈଦାଆଁ ନୀଏଁ ଅଣ୍ପାମୁ।” ଅ଼ଡ଼େ, ହିଜକିୟ ହା଼ରେକା ଡ଼ୀତେସି।
ଏଚିବେ଼ଲା ଜିସାୟ ତା଼ଣା ପ୍ରବୁତି ବ଼ଲୁ ୱା଼ତେ। “ନୀନୁ ହାଜାହାଁ ହିଜକିୟଇଁ ୱେହ୍ମୁ, ‘ପ୍ରବୁ, ନୀ ଆକୁ ଆ଼ବାୟାଁ ଦାୱୁଦତି ମାହାପୂରୁ ଈ କାତା ଏଲେଇଞ୍ଜି ମାନେସି, ନା଼ନୁ ନୀ ପ୍ରା଼ତାନା ୱେଞ୍ଜାମାଇଁ, ନୀ କାଣ୍ତ୍ରୁ ମେସାମାଇଁ, ମେହ୍ମୁ, ନା଼ନୁ ନୀ ବାର୍ସା ପନ୍ଦର ବାର୍ସା ପାଡିକିୟାଇଁ। ଇଞ୍ଜାଁ, ନା଼ନୁ ନିଙ୍ଗେ ଅ଼ଡ଼େ ଈ ଗା଼ଡ଼ା ଅସୁରତି ରାଜା କେୟୁଟି ଗେଲ୍ପାଇଁ ଅ଼ଡ଼େ ନା଼ନୁ ଈ ଗା଼ଡ଼ା ୱାକିଟି ଆ଼ଇଁ।’”
ଅ଼ଡ଼େ, ପ୍ରବୁ ତାନି ୱେସାମାନି ବ଼ଲୁ ପୂରା କିନେସି, ନିଙ୍ଗେ ତାକି ପ୍ରବୁ ତା଼ଣାଟି ଈ ସିନା ଆ଼ନେ; ମେହ୍ମୁ ନା଼ନୁ ଆହସ୍ ଗ଼ଣ୍ଟାତଲେ ୱେ଼ଡ଼ାତି ସା଼ୟିଁ ଏଚେକା ନ଼କିତା ହାଜାମାନେ, ଏ଼ଦାଆଁ ଦସ ପା଼ୱୁଲି ଡା଼ୟୁୱାକି ତାଇଁ। ଏଚେଟିଏ ଗ଼ଣ୍ଟାତି ୱେ଼ଡ଼ା ଏଚେକା ନ଼କିତା ହାଜାମାଚେ, ଡା଼ୟୁୱାକି ଏଚେକା ୱେଣ୍ତା ୱା଼ତେ।
ଜୀହୁଦାତି ରାଜା ହିଜକିୟ ର଼ଗ ଆ଼ହାଁ ତାନି ର଼ଗଟି ନେହିଁ ଆ଼ତି ଡା଼ୟୁ ଈ କାତା ରା଼ଚିତେସି,
ନା଼ନୁ ଏଲେଇଚେଏଁ, “ନା଼ନୁ ନା଼ ନୀଡାମାନି ମାଦେନା ବେ଼ଲାତା ତା଼ଡ଼େପୂରୁ ଦୁୱେରିତା ହ଼ଡ଼୍ଇଁ;
ନା଼ନୁ ନା଼ ନୀଡିନି ବାର୍ସାତା ବେଟାଆ଼ନାଣି ପିସ୍ତେଏଁ।
ନା଼ନୁ ଏଲେଇଚେଏଁ ନା଼ନୁ ପ୍ରବୁତି, ଜୀୱୁଗାଟି ଦେ଼ସାତା ପ୍ରବୁଇଁ ମେହ୍ଅଁ;
ନା଼ନୁ ଦାର୍ତିତା ମାନାରି ତଲେ ମାଣ୍ସିଇଁ ଅ଼ଡ଼େ ମେହ୍ଅଁ।
ନା଼ ନୀଡିନି ବାର୍ସା ହେକ ଆ଼ହାମାନେ ଅ଼ଡ଼େ ମେ଼ଣ୍ତା ଗ଼ଡ଼ୁତି ତୂମୁ ଲେହେଁ ନା଼ ତା଼ଣାଟି ଗୁଚିକିୱି ଆ଼ହାମାନେ;
ନା଼ନୁ ଲୂଲୁ ସମାନା ନା଼ ଜୀୱୁ ରୂପାମାଇଁ; ଏ଼ୱାସି ନାଙ୍ଗେ ଲୂଲୁ ତଲେ ଦା଼ତାନେସି;
ର଼ ଦିନା ଅ଼ଡ଼େ ଲା଼ଆଁୟାଁ ବିତ୍ରା ଏ଼ୱାସି ନାଙ୍ଗେ ରା଼ପ୍ହାନେସି।
ନା଼ନୁ ଲା଼ଇ ୱେ଼ୟେ କସ୍ତ ବେଟାଆ଼ତେଏଁ;
ଏ଼ନିକିଁ ସିହଁ କ୍ଡାଃନି, ଏଲେକିହିଁ ଏ଼ୱାସି ନା଼ ଡୁମ୍କା ପେ଼ଣ୍କା ବାରେ ଗୁଣ୍ତା କିହିମାଞ୍ଜାନେସି;
ର଼ ଲା଼ଆଁ ଅ଼ଡ଼େ ମାଦେନା ବିତ୍ରା ନୀନୁ ନାଙ୍ଗେ ରା଼ପ୍ହାଦି।
ଏ଼ନିକିଁ ହ଼ରୁ ପଟା ବାନ୍ଦାଗଣକଟି ଅ଼ଡ଼େ ପା଼ର୍ୱା ପଟା ଡ଼ୀନେ,
ଏଲେକିଁ ନା଼ନୁ ଚିଁ ଚିଁ କିତେଏଁ; ନା଼ନୁ କୁଗୁରି ଲେହେଁ ଦୁକୁ କିତେଏଁ;
ନା଼ କାଣ୍କା ଲାକ ସିନିକିହିଁ କିହିଁ କୂଡ଼୍ହା ହାଚୁ;
ହେ଼ ପ୍ରବୁ ନା଼ନୁ ହୀଣି ଆ଼ହାମାଇଁ ନୀନୁ ନା଼ ସା଼ୟେମି ଆୟାମୁ।
ନା଼ନୁ ଏ଼ନାଆଁ କିଇଁ ? ଏ଼ୱାସି ନାଙ୍ଗେ ଏଲେଇଞ୍ଜା ମାଞ୍ଜାନେସି, ଅ଼ଡ଼େ ତା଼ନୁ ଏ଼ଦାଆଁ କିହାମାନେସି;
ନା଼ନୁ ନା଼ ଜୀୱୁତି ହା଼ରେକା ଦୁକୁ ତାକି ନା଼ ବାର୍ସା ବାରେ ଦୀରେ ଦୀରେ ତା଼କିଇଁ।
ଏ଼ ପ୍ରବୁ, ଈ ବାରେ ତଲେ ଲ଼କୁ ନୀଡିନେରି, ଅ଼ଡ଼େ ଈ ବାରେ ତାକି ନା଼ ଜୀୱୁ ନୀଡାମାନେ,
ଈଦାଆଁତାକି ନୀନୁ ନାଙ୍ଗେ ନେହିଁ କିହାଁ ଜୀୱୁ ତଲେ ଇଟାମୁ।
ମେହ୍ମୁ ନା଼ନୁ ନା଼ ହିତ୍ଡ଼ି ତାକି ହା଼ରେକା ଦୁକୁ ବେଟାଆ଼ତେଏଁ;
ସାମା ନୀନୁ ନା଼ ଜୀୱୁ ତାକି ଜୀୱୁ ନ଼ହାଁ ନା଼ସାଆ଼ନି ତା଼ଣାଟି ଗେଲ୍ପାମାଞ୍ଜି;
ଇଚିହିଁ ନା଼ ବାରେ ପା଼ପୁତି ନୀନୁ ନୀ ଡା଼ୟୁ ୱାକି ମେତ୍ହାମାଞ୍ଜି।
ଇଚିହିଁ ତା଼ଡ଼େପୂରୁ ନିଙ୍ଗେ ଗା଼ୱୁରମି କିହାଲି ଆ଼ଡେଏ, ହା଼କି ନୀ ଗୂଣୁ ପା଼ଚାଲି ଆ଼ଡେଏ;
ମାହ୍ଣି ମାଣ୍ତାତା ହାଚାରି ନୀ ସାତାତି ଆ଼ସା କିହାଲି ଆ଼ଡଅରି।
ଏ଼ନିକିଁ ନୀଞ୍ଜୁ ନା଼ନୁ କିହିମାଇଁ, ଏଲେକିଁ ଜୀୱୁଗାଟି ଲ଼କୁ,
ୱାର୍ଇ ଜୀୱୁଗାଟି ଲ଼କୁ ନୀ ଗା଼ୱୁରମି କିନେରି;
ଆ଼ବା ମୀର୍କାଣି ନୀ ସାତାତି ପୁଣ୍ମ୍ବି କିୟାନେସି।
ପ୍ରବୁ ନା଼ ଗେଲ୍ପାନାସି; ଈଦାଆଁତାକି ମା଼ମ୍ବୁ ନୀଡାମାନି ପାତେକା
ପ୍ରବୁତି ଇଲୁତା ସେର୍ଙ୍ଗି ତଲେ ନା଼ କିହାମାନି ପା଼ଚୁ ପା଼ଚିହିଁ ଡ଼ୟିନମି।”
ଜିସାୟ ଏଲେଇଞ୍ଜାମାଚେସି, “ଏ଼ୱାରି ତ଼ୟା ରା଼କ୍ହାଁ ହିଜକିୟ କୂରୁତା ଦସ୍ପାରି, ଏଚେଟିଏ ଏ଼ୱାସି ନେହିଁ ଆ଼ନେସି।” ହିଜକିୟ ଜିକେଏ ଏଲେଇଞ୍ଜାମାଚେସି, “ନା଼ନୁ ପ୍ରବୁତି ଇଲୁତା ହାଇଁ, ଇମ୍ବାତି ସିନା ଏ଼ନାୟି ?”
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.