Kuvi Bible
ଜିସା 36
ଜୀହୁଦା ଲାକ ଅସୁରତି ରାଜାତି ଅଦିକାରା
(୨ରାଜା ୧୮:୧୩-୨୭; ୨କୂଡ଼ା ୩୨:୧-୧୯)
ହିଜକିୟ ରାଜା ଅଦିକାରାତି ସଦ ବାର୍ସା ଆ଼ହାମାଚାଟି ଅସୁରତି ରାଜା ସନ୍ହେରିବ ଜୀହୁଦାତି ଗୂର୍ଚାମାନି ବାରେ ଗା଼ଡ଼ା କ଼ପାଟି ୱା଼ହାଁ ଏ଼ଦାଆଁ ବାରେ ତାନି କେୟୁତା ଅ଼ତେସି। ଏଚେଟିଏ ଅସୁରତି ରାଜା ରବ୍ସାକିଇଁ ଜୁଜୁ କିନାରି ତଲେ ଲାକିସ୍ଟିଏ ଜିରୁସାଲମତା ହିଜକିୟ ରାଜା ତା଼ଣା ପାଣ୍ତିତେସି। ଅ଼ଡ଼େ, ଏ଼ୱାସି ହିମ୍ବରିକା ରା଼ଚିନାରା ବୂମିତି ଜିରୁ ଦାରିତି ଲାକନି ବାନ୍ଦା ନା଼ଡ଼ା ଟଟତା ନିତେସି। ଆତିହିଁ ହିଲ୍କିୟ ମୀର୍ଏସି ଇଲିୟାକିମ୍ ଇନି ରାଜାତି କାଜାସି, ସିବ୍ନ ରା଼ଚିନାସି ଅ଼ଡ଼େ ଆସପ ମୀର୍ଏସି ଜୟାହ ଇନି ଆ଼ତି କାତା ରା଼ଚିନାସି ହ଼ଚାହାଁ ତାନି ତା଼ଣା ୱା଼ତେସି। ଏମ୍ବାଟିଏ ରବ୍ସାକି ଏ଼ୱାରାଇଁ ଏଲେଇଚେସି, “ନୀଏଁ ମୀରୁ ହିଜକିୟଇଁ ଏଲେଇଞ୍ଜୁ, ‘ରାଜା ଅସୁରତି ରାଜା ଈ କାତା ଏଲେଇଞ୍ଜି ମାନେସି, ନୀନୁ ଈ ଏମିନି ନାମୁ ନାମିମାଞ୍ଜି, ଏ଼ଦି ଏ଼ନିଲେହେଁତି ନାମୁ ? ନା଼ନୁ ଏଲେଇଞ୍ଜିମାଇଁ, ଜୁଜୁ କିହାଲି ତାକି ନୀ ଅଣ୍ପୁ ଅ଼ଡ଼େ ବା଼ଡ଼୍ୟୁ ୱାର୍ଇ ଉଜେଏତାୟି; ନୀନୁ ଆମ୍ବାଆରି ଲାକ ବା଼ର୍ସୁ କିହାଁ ନା଼ କ଼ପାଟି ନିଙ୍ଗାମାଞ୍ଜି ? ମେହ୍ଦୁ, ମୀରୁ ଈ କୁଟୁକୁଟା କିତି ନା଼ଡାତି ବାଡ଼୍ଗା ଲେହେଁତି ମିସର ଲାକ ବା଼ର୍ସୁ କିହିମାଞ୍ଜେରି; ସାମା ଆମ୍ବାଆସି ଏ଼ଦାନି ଲାକ ଗେ଼ଣ୍ତିସାରେ, ଏ଼ଦି ଏ଼ୱାଣି କେୟୁତା ରିହାଁ ତୁତ୍ହା ତୁହ୍ନେ; ଆମ୍ବାଆରି ମିସରତି ରାଜା ପା଼ର ଲାକ ବା଼ର୍ସୁ କିନେରି, ଏ଼ ବାରେତି ଏ଼ୱାସି ଏଲେକିନେସି।
ସାମା ନୀନୁ ନାଙ୍ଗେ ଏଲେଇଞ୍ଜାଦେରି, “ମା଼ମ୍ବୁ ପ୍ରବୁ ମା଼ ମାହାପୂରୁ ଲାକ ବା଼ର୍ସୁ ଇଟାମାନମି; ଆତିହିଁ ହିଜକିୟ ଆମ୍ବାଆରି କାଜା ଟା଼ୟୁ ଅ଼ଡ଼େ ଆମ୍ବାଆରି ପୂଜାପିଣ୍ତା ବାରେ ହେକ କିହାମାନେସି, ଅ଼ଡ଼େ ଜୀହୁଦା ଇଞ୍ଜାଁ ଜିରୁସାଲମତି ଏଲେଇଞ୍ଜାମାନେସି, ମୀରୁ ଈ ପୂଜାପିଣ୍ତା ନ଼କିତା ଜହରା କିଦେରି, ଈୱାସି ଏ଼ନାଆଁ ଏ଼ୱାସି ଆ଼ଏ ?” ଈଦାଆଁ ତାକି ନା଼ନୁ ବାତିମା଼ଲିମାଇଁ, ନା଼ ପ୍ରବୁ ଅସୁରତି ରାଜା ତଲେ ରା଼ଜିମା଼ନା କିମୁ, ନା଼ନୁ ନିଙ୍ଗେ ରୀ ମା଼ଣା ଗ଼ଡ଼ାୟାଁ ହିୟାଇଁ, ନୀନୁ ଆ଼ଡିଦି, ଆତିହିଁ ଏ଼ୱାରି ଲାକ ହ଼ଚାଲି ତାକି ମୀ ୱାକିଟି ଲ଼କୁ ତାମୁ। ଆତିହିଁ ଏ଼ନିକିଁ ନୀନୁ ନା଼ ପ୍ରବୁତି ହ଼ଲିୟାଙ୍ଗା ବିତ୍ରାଟି ର଼ ଊଣା କ଼ସ୍କା ମୁହେଁ କାଜାଣାଇଁ ଏଟ୍କା କିହାଲି ଆ଼ଡିଦି, ଅ଼ଡ଼େ ରାତା ଅ଼ଡ଼େ ଗ଼ଡ଼ାୟାଁ ସା଼ଲୱି କିନାରା ତାକି ମିସର ଲାକ ନାମିଦି ? ନା଼ନୁ ଏ଼ନାଆଁ ପ୍ରବୁତି ପିସ୍ପେ ଈ ଟା଼ୟୁ ନା଼ସା କିହାଲି ୱା଼ହାମାଇଁ ? ପ୍ରବୁ ନାଙ୍ଗେ ଏଲେଇଞ୍ଜାତେସି, ଈ ଦେ଼ସା କ଼ପାଟି ହାଜାହାଁ ଏ଼ଦାଆଁ ନା଼ସା କିମୁ।’”
ଏଚେଟିଏ ଇଲିୟାକିମ୍, ସିବ୍ନ ଅ଼ଡ଼େ ଜୟାହ ରବ୍ସାକିଇଁ ଏଲେଇଚେସି, “ବାତିମା଼ଲି ମାଞ୍ଜାଇଁ, ନୀନୁ ଅରାମିୟ ହା଼ଡା ତଲେ ନୀ ହ଼ଲିୟାଙ୍ଗାଣି ଏଲେଇନାମୁ; ଇଚିହିଁ ମା଼ମ୍ବୁ ଏ଼ଦାଆଁ ତେଲ୍ହିମାନମି; ଇଞ୍ଜାଁ, କ଼ଟା ଲାକତି ଲ଼କୁତି କିର୍ୟୁଁତା ମାଙ୍ଗେ ଜୀହୁଦି ହା଼ଡା ତଲେ ଏଲେଇଞ୍ଜାଆପେରି।”
ସାମା ରବ୍ସାକି ଏ଼ୱାରାଇଁ ଏଲେଇଚେସି, “ନା଼ ପ୍ରବୁ କି ମୀ ପ୍ରବୁଇଁ ଅ଼ଡ଼େ ମିଙ୍ଗେ ଈ ବାରେ କାତା ୱେସାଲି ତାକି ନାଙ୍ଗେ ପାଣ୍ତା ମାଞ୍ଜାନେସି ? ଈ ଏମିନି ଲ଼କୁ ମୀ ତଲେ ଜାହା ଜାହାରା ଗାତ୍ରା ତିଞ୍ଜାଲି ଅ଼ଡ଼େ ମୂଣ୍କା ଗସାଲି ତାକି କ଼ଟା ଲାକ କୁଗାମାନେରି, ଏ଼ୱାରି ତା଼ଣା ଏ଼ନାଆଁ ନାଙ୍ଗେ ପାଣ୍ତା ମାଞ୍ଜଅସି ?”
ଏଚେଟିଏ ରବ୍ସାକି ନିଚାହାଁ କାଜା ଗିୟାଁଟି ଜୀହୁଦି ହା଼ଡା ତଲେ ଈ କାତା ଏଲେଇଚେସି, “ମୀରୁ ରାଜା ଅସୁରତି ରାଜାତି କାତା ୱେଞ୍ଜୁ। ରାଜା ଈ କାତା ଏଲେଇଞ୍ଜି ମାନେସି, ‘ମିଙ୍ଗେ ନା଼ଡ଼ି କିହାଲି ତାକି ହିଜକିୟଇଁ ହୀଆଦୁ; ଇଚିହିଁ ଏ଼ୱାସି ମିଙ୍ଗେ ଗେଲ୍ପାଲି ଆ଼ଡଅସି; କି, ପ୍ରବୁ ସାତେଏ ମାଙ୍ଗେ ଗେଲ୍ପାନେସି ଅ଼ଡ଼େ ଈ ଗା଼ଡ଼ା ଅସୁରତି ରାଜା କେୟୁତା ଆ଼ଏ, ଈ କାତା ଏଲେଇଞ୍ଜାହାଁ ହିଜକିୟ ମିଙ୍ଗେ ପ୍ରବୁ ତା଼ଣା ନାମି କିୟାଆପେସି। ହିଜକିୟ କାତା ୱେନାଆଦୁ; ଇଚିହିଁ ଅସୁରତି ରାଜା ଈ କାତା ଏଲେଇଞ୍ଜି ମାନେସି, ମୀରୁ ନା଼ ତଲେ ପାର୍ମାଣା ହାନ୍ଦି ତୀରି କିଦୁ ଅ଼ଡ଼େ ନା଼ ତା଼ଣା ହ଼ଚା ୱା଼ଦୁ ଅ଼ଡ଼େ ବାରେ ଜାହାରା ଅଙ୍ଗୁରି ପା଼ଡ଼େୟି ଅ଼ଡ଼େ ବାରେ ଜାହାରା ତ଼ୟା ପା଼ଡ଼େୟି ତିଞ୍ଜୁ, ଅ଼ଡ଼େ ବାରେ ଜାହା ଜାହାରା କୁହିତି ଏ଼ୟୁ ଗହ୍ଦୁ; ଡା଼ୟୁ ନା଼ନୁ ୱା଼ହାଁ ମୀ ଜାହାରା ଦେ଼ସା ଲେହେଁ ର଼ ଦେ଼ସାତା, ଇଚିହିଁ, ଆର୍ନା ଅ଼ଡ଼େ ଅଙ୍ଗୁରି ରାସା ଦେ଼ସା, ଅ଼ଡ଼େ ରୂଟି ଅ଼ଡ଼େ ଅଙ୍ଗୁରି ବା଼ଡ଼ାଗାଟି ଦେ଼ସାତା ମିଙ୍ଗେ ଅୟାଇଁ। ପ୍ରବୁ ମାଙ୍ଗେ ଗେଲ୍ପାନେସି ଇଞ୍ଜିଁ ହିଜକିୟ ଏ଼ନିକିଁ ମିଙ୍ଗେ ନା଼ଡ଼ି କିୟଅସି, ଏ଼ଦାଆଁ ତାକି ଜାଗ୍ରାତା ଆ଼ଦୁ। ହା଼ରେକା କୂଡ଼ାତି ପେ଼ଣ୍କା ତା଼ଣାଟି ଏ଼ନି ପେ଼ନୁ ଏ଼ନାଆଁ ଅସୁରିୟ ରାଜା କେୟୁଟି ଜାହାରା ଦେ଼ସା ଗେଲ୍ପାମାନେ ? ହମାତ୍ ଅ଼ଡ଼େ ଅର୍ପଦ ପେ଼ଣ୍କା ଆମ୍ବିୟା ? ସପର୍ବୟିମତି ପେ଼ଣ୍କା ଆମ୍ବିୟା ? ଅ଼ଡ଼େ ଏ଼ୱି ଏ଼ନାଆଁ ନା଼ କେୟୁଟି ସମରିୟାତି ଗେଲ୍ପା ମାନୁ ? ଈ ବାରେ ଦେ଼ସାତି ପେ଼ଣ୍କା ବିତ୍ରାଟି ଏମିନି ପେ଼ଣ୍କା ନା଼ କେୟୁଟି ଜାହାରା ଦେ଼ସା ଗେଲ୍ପାମାନୁ, କି ପ୍ରବୁ ନା଼ କେୟୁଟି ଜିରୁସାଲମତି ଗେଲ୍ପିନେସି ?’”
ସାମା ଲ଼କୁ ପାଲେଏ ଆ଼ହାଁ ଡ଼ୟିତେରି, ଏ଼ୱାଣାଇଁ ର଼ ପଦୁ ଜିକେଏ ଜ଼ଲାଆତେରି; ଇଚିହିଁ ଏ଼ୱାଣାଇଁ ଜ଼ଲାଆଦୁ ଇଞ୍ଜିଁ ରାଜାତି ହୁକୁମି ମାଚେ। ଏଚେଟିଏ ହିଲ୍କିୟ ମୀର୍ଏସି ଇଲିୟାକିମ୍ ଇନି ରାଜା ଇଜତି କାଜାସି ଅ଼ଡ଼େ ସିବ୍ନ ରା଼ଚିନାସି ଅ଼ଡ଼େ ଆସପ ମୀର୍ଏସି ଜୟାହ ଇନି ଆ଼ତି କାତା ରା଼ଚିନାସି ଜାହାରା ବାସ୍ତେରି ଗେସାହାଁ ହିଜକିୟ ତା଼ଣା ୱା଼ହାଁ ରବ୍ସାକିତି କାତା ବାରେ ଏ଼ୱାଣାଇଁ ୱେସ୍ତେରି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.