Kuvi Bible
ଜିସା 20
ମିସର ଅ଼ଡ଼େ କୂସ ଦେ଼ସା ତାକି ର଼ ସିନା
ଅସୁରତି ରାଜା ସର୍ଗନତି ପାଣ୍ତ୍ୱି ଆ଼ତି ତର୍ତାନ ସା଼ଲୱି କିନାସି ଏମିନି ବାର୍ସା ଅସ୍ଦଦତା ୱା଼ହାଁ ଏ଼ଦାଆଁ କ଼ପାଟି ଜୁଜୁ କିହାଁ ତାନି କେୟୁତା ଅ଼ତେସି; ଏ଼ ବେ଼ଲାତା ଆମସତି ମୀର୍ଏସି ଜିସାୟ ତା଼ଣାଟି ପ୍ରବୁ ଈ କାତା ଏଲେଇଚେସି, “ହାଜୁ, ମୀ ଟେଡେଲିଟି ଗ଼ଣି ବାସ୍ତେରି ହୁକ୍ମୁ ଅ଼ଡ଼େ ମୀ ପାଃନାଟି ପା଼ଣ୍ତେୟି ହୁକ୍ମୁ,” ଏଚେଟିଏ ଏ଼ୱାସି ଏ଼ଦାଆଁ କିହାଁ ବାସ୍ତେରି ହିଲାଆନା ଅ଼ଡ଼େ ୱାର୍ଇ କଡାୟାଁ ତଲେ ରେ଼ଚେସି। ଆତିହିଁ ପ୍ରବୁ ଏଲେଇଚେସି, “ନା଼ ହ଼ଲେଏସି ଜିସାୟ ମିସର ଅ଼ଡ଼େ କୂସ ଦେ଼ସା ତାକି ର଼ ସିନା ଅ଼ଡ଼େ କାବାଆ଼ନି ସିନା ଲେହେଁ ଆ଼ହାଲି ତାକି ଏ଼ନିକିଁ ତୀନି ବାର୍ସା ବାସ୍ତେରି ହିଲାଆନା ଅ଼ଡ଼େ ୱାର୍ଇ କଡାୟାଁ ତଲେ ରେ଼ଜାମାନେସି; ଏଲେକିହିଁ ଅସୁରତି ରାଜା ମିସରତାରା ଲାଜା ତାକି ଦାଂଗ୍ଣାଁ ବୁଡ଼୍ହାଁ ମିସର ଅ଼ଡ଼େ କୂସତି କା଼ୟିଦି ଲ଼କୁଣି ବାସ୍ତେରି ହିଲାଆନା, ୱାର୍ଇ ପାଃଆନା ୱାର୍ଇ ଟିକ୍ଉଣି ତଲେ ଅ଼ନେସି। ଏଚେଟିଏ ଲ଼କୁ ଜାହାରାତି ନାମୁତି ବୂମି କୂସ ଅ଼ଡ଼େ ଜାହାରାତି ବଡପଣ ଲେହେଁ ମିସର ତାକି ନୀରାସା ଅ଼ଡ଼େ ଲାଜା ଆ଼ନେରି। ଇଞ୍ଜାଁ, ଏ଼ ଦିନା ଈ ସାମ୍ଦୁରି ଦାରିମାରି ବାସା କିହାମାନାରି ଏଲେଇନେରି, ମେହ୍ଦୁ, ଅସୁରତି ରାଜା ତା଼ଣାଟି ମୁକ୍ଲୱି ଆ଼ହାଲି ତାକି ସା଼ୟେମି ତାକି ଆମ୍ବିୟା ହଟମି, ମା଼ ଏ଼ ନାମୁ ଇଲେକିଁ; ଆତିହିଁ ମା଼ର ଏ଼ନିକିଁ ନୀଡିନାୟି ?”
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.