Kuvi Bible
ଜିସା 15
ମୟାବ ତାକି ନ଼କିତା ଆ଼ନି ହା଼ଡା
ମୟାବ ତାକି ନ଼କିତା ଆ଼ନି ହା଼ଡା। ମୟାବତି ଅ଼ର ଗା଼ଡ଼ା ର଼ ଲା଼ଆଁୟାଁ ବିତ୍ରା ନା଼ସା ଆ଼ତେ; ର଼ ଲା଼ଆଁୟାଁ ବିତ୍ରା ମୟାବତି କିର୍ ଗା଼ଡ଼ା ବୀଡ଼୍ହେ ଅ଼ଡ଼େ କୁଡ଼୍ପୁନା଼ସା ଆ଼ତେ। ଏ଼ୱାସି ଡ଼ୀହାଲି ତାକି ବେୟିତତ୍ ଅ଼ଡ଼େ ଦିବନ୍ତା, ପାଡାଆ଼ତି ଟା଼ୟୁତା ହାଜାମାନେସି; ନବ ଅ଼ଡ଼େ ମେଦବା କାତାତା ମୟାବ ଦୁକୁତଲେ ଡ଼ୀହିଁ କା଼ଲୱି ଆ଼ହିମାନେ; ଏ଼ ବାରେତି ତା଼ର୍ୟୁଁ ହିଣ୍ୱି ଆ଼ହାମାନେ, ବାରେତି ହ଼ଡ଼ାୟାଁ ରାତ୍ପି ଆ଼ହାମାନୁ। ତାମି ବାରେ ପା଼ହେରିତା ଲ଼କୁ ଗ଼ଣି ତୁର୍ହି ମାନେରି; ଜାହା ଜାହାରା ଇଲୁତି ତେ଼ପରି ଲାକ ଅ଼ଡ଼େ ଡେ଼ଡ଼ା ଟା଼ୟୁତା ବାରେ ଲ଼କୁ ହା଼ରେକା ଦୁକୁଟି ଡ଼ୀହିଁ କା଼ଲୱି ଆ଼ହିମାନେରି। ହିସ୍ବନ ଅ଼ଡ଼େ ଇଲିୟାଲି ଡ଼ୀହି ମାନେରି; ଏ଼ୱାରି ହା଼ଡା ଜହସ୍ ପାତେକା ୱେ଼ଙ୍ଗିମାନେ; ଏ଼ଦାଆଁତାକି ମୟାବତି ଜୁଜୁ ସାଜୁ ତୁର୍ହା ମାନାରି କା଼ଲୱି ଆ଼ହିମାନେରି; ତାନି ଜୀୱୁ ତାନି ବିତ୍ରା ତୀର୍ଗି ମାନେ। ନା଼ ହିୟାଁ ମୟାବ ତାକି ଡ଼ୀହିମାନେ; ତାନି ଡ଼ୁଗାହାଁ ହଣ୍ନି ଲ଼କୁ ସୟର ପାତେକା ଇଗ୍ଲତ୍-ସଲିସିୟାତା ହଟି ମାନେରି; ଇଚିହିଁ ଏ଼ୱାରି ଡ଼ୀହି ଡ଼ୀହିଁ ଲୁହିତ-ଗା଼ଟି ଲାକ ହାଜିମାନେରି; ହରନୟିମ ଜିରୁତା ନା଼ସା ତାକି ଏ଼ୱାରି ଡ଼ୀହି ମାନେରି। ଇଚିହିଁ ନିମ୍ରିମତି ଏ଼ୟୁ ବାରେ ସୀକାହାନୁ; ଗାର୍କି ୱା଼ୟାମାନେ, ପୁଃନି ଗାର୍କି ହା଼ଲି ହିଲେଏ, ହିଃଲିୱା଼ଣା ରଚାୟିୱା ହିଲେଏ। ଏ଼ଦାଆଁତାକି ଏ଼ୱାରି ଜାହାରା ବେଟାଆ଼ନି ଦ଼ନ ଅ଼ଡ଼େ ଇଟିତି ଦିଣ୍ସୁ ବାଇସି ମା଼ର୍ନୁତି ଜାର୍ଣା ଟଟତା ଅ଼ନେରି। ଇଚିହିଁ ମୟାବତି ସା଼ରିୱାକି ହାନ୍ଦିତା ଡ଼ୀକିତି ହା଼ଡା ହାଜାମାନେ; ଏମ୍ବାତି ଦୁକୁଟି ଡ଼ୀହିଁ କା଼ଲୱି ଆ଼ନାୟି ଇଗ୍ଲୟିମ୍ ଅ଼ଡ଼େ ବେରେଲିମ୍ ପାତେକା ହାଜାମାନେ। ଇଚିହିଁ ଦିମନତି ଏ଼ୟୁ ବାରେ ନେତେରି ଆ଼ହାମାନୁ; ଇଞ୍ଜାଁ, ନା଼ନୁ ଦିମନତି ଲାକ ଗାଡି ଦୁକୁ ଅ଼ଡ଼େ ମୟାବତି ଡ଼ୟାମାନି ଲ଼କୁ ଅ଼ଡ଼େ ଏ଼ ଦେ଼ସାଟି ହଣ୍ନି ଲ଼କୁ କ଼ପାଟି ର଼ ସିହଁ କ୍ଡାଃନି ପାଣ୍ତିଇଁ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.