Kuvi Bible
ଜିସା 13
ବାବିଲତି ଡଣ୍ତ
ବାବିଲ କାତାତି କାବ୍ରୁ, ଆମସତି ମୀର୍ଏସି ଜିସାୟ ଈ ସେୟାଁଣା ହାପାନାତା ମେସ୍ତେସି।
ମୀରୁ ମା଼ର୍କା ହିଲାଆ ହ଼ରୁ ଲାକ ଗ଼ଞ୍ଜାମାନି ସିରେଲି ପେ଼ର୍ଦୁ, ଲ଼କୁଣି କାଜା ଗିୟାଁତଲେ ହା଼ଟାମୁ, କେୟୁ ଜୀଞ୍ଜାମୁ, ଏ଼ୱାରି ସା଼ଲୱି କିନାରି ଗା଼ଡ଼ା ଦୁୱେରିତା ହ଼ଡ଼୍ପେରି। ନା଼ନୁ ନା଼ ସୁଦୁ ଲ଼କୁଣି ହୁକୁମି ହୀହାମାଇଁ, ହାଅ, ନା଼ନୁ ନା଼ କାର୍ବି ପୂରା କିହାଲି ନା଼ ଜୁଜୁ କିନାରାଇଁ, ଇଚିହିଁ, ନା଼ ବା଼ଡ଼୍ୟୁତା ରା଼ହାଁ କିନାରାଇଁ ହା଼ଟାମାଇଁ।
ହ଼ର୍କା ଲାକ ହା଼ରେକା ଲ଼କୁତି ସମାନା ଲ଼କୁତି ହା଼ଡା ୱେ଼ଙ୍ଗିମାନେ! ରହେଁଏ ଜାଟୁ ଆ଼ହାମାନି କୂଡ଼ାତି ରା଼ଜିୟାଁତି କା଼ଲୱି ଆ଼ହିମାନେ! ବା଼ଡ଼୍ୟୁଗାଟି ପ୍ରବୁ ଜୁଜୁ କିହାଲି ତାକି ଜୁଜୁ କିନାରାଇଁ କୂଡ଼ି କିହିମାନେସି। ଏ଼ୱାରି, ଇଚିହିଁ, ପ୍ରବୁ ଅ଼ଡ଼େ ତାନି କାର୍ବିତି ଆ଼ସ୍ତି ବାରେ ଦେ଼ସା ନା଼ସା କିହାଲି ତାକି ହେକ ଦେ଼ସାଟି, ହା଼ଗୁପା଼କା ମୁଟ୍ପେଟି ୱା଼ହିମାନେରି।
ମୀରୁ ଦୁକୁତଲେ ଡ଼ୀଦୁ ଇଚିହିଁ ପ୍ରବୁତି ଦିନା ଡାଗେ ୱା଼ହିମାନେ; ବାରେ ବା଼ଡ଼୍ୟୁ ଗାଟାଣି ତା଼ଣାଟି କ୍ଡୁପ୍ନି ଲେହେଁ ଏ଼ଦି ୱା଼ନେ। ଏ଼ଦାଆଁତାକି ବାରେ କେସ୍କା ବା଼ଡ଼୍ୟୁ ହିଲାଆଗାଟାଇ ଆ଼ନୁ ଅ଼ଡ଼େ ବାରେ ମାଣ୍ସିତି ହିୟାଁ ଆଜି ତାକି ରୂୟା ହାନେ; ଇଞ୍ଜାଁ, ଏ଼ୱାରି ଆଜିନେରି; କସ୍ତ ଅ଼ଡ଼େ ବୀସା ଏ଼ୱାରାକି ଆ଼ନେ; ଏ଼ୱାରି ଜାର୍ନି କିନି ଆୟାନି ଲେହେଁ ବୀସା ଗାଟାରି ଆ଼ନେରି; ଏ଼ୱାରି ଜାହା ଜାହାରା କାତାତାକି କାବା ଆ଼ନେରି; ଏ଼ୱାରି ମୂମ୍ବୁ ହିଚୁ ଗୁଦ୍ୱା ଲେହେଁ ଆ଼ନେ। ମେହ୍ଦୁ, ଦେ଼ସା ନା଼ସା କିହାଲି ଅ଼ଡ଼େ ଏମ୍ବାଟି ପା଼ପୁ ଗାଟାରାଇଁ ନା଼ସା କିହାଲି ପ୍ରବୁତି ଆଜିହ଼ପେତି ଦିନା; କାର୍ବି ଅ଼ଡ଼େ ହା଼ରେକା କାର୍ବି ଆଣ୍ତାହାଁ ୱା଼ହିମାନେ। ଇଚିହିଁ ହା଼ଗୁପା଼କାତି ହୁକାୟାଁ ଉଜେଡ଼ି ହୀଉ; ୱେ଼ଡ଼ା ତାନି ହ଼ନି ବେ଼ଲାତା ଆନ୍ଦେରି ଆ଼ନେ ଅ଼ଡ଼େ ଲେ଼ଞ୍ଜୁ ତାନି ଉଜେଡ଼ି ହୀଏ।
ଇଞ୍ଜାଁ, ନା଼ନୁ ଦାର୍ତିତି ଲାଗେଏତି କାମା ତାକି ଅ଼ଡ଼େ ଲାଗେଏତାରାଇଁ ତାମି ଲାଗେଏତି କାମା ତାକି ଡଣ୍ତ ହୀଇଁ ଅ଼ଡ଼େ ନା଼ନୁ ଡା଼ହାରାଗାଟାରା ବଡପଣ ସାପି କିୱିକିଇଁ ଅ଼ଡ଼େ ଆଜିହ଼ପେତି ଲ଼କୁତି ବଡପଣ ଡିକ୍ହା ତୁହ୍ଇଁ। ନା଼ନୁ ନେହିଁ ବାଂଗାରା କିହାଁ ଦାର୍ତିତି ଅ଼ଡ଼େ ଅପିରତି ନେହେଁ ବାଂଗାରା କିହାଁ ମାଣ୍ସିଇଁ ଦାରା କିଇଁ। ଏ଼ଦାଆଁତାକି ନା଼ନୁ ହା଼ଗୁପା଼କାତି ତୀର୍ଗି କିଇଁ, ଅ଼ଡ଼େ ବା଼ଡ଼୍ୟୁଗାଟି ପ୍ରବୁତି କ଼ପାତା ଅ଼ଡ଼େ ତାନି ହା଼ରେକା କ଼ପାତି ଦିନାତା ଦାର୍ତି ତୀର୍ଗାହାଁ ତାନି ଟା଼ୟୁ ପିହ୍ନେ।
ଏଚେଟିଏ ଇଲେକିଁ ଆ଼ନେ, ବେ଼ଟାତା ପେ଼ର୍ହିମାନି କୂର୍ହୁ ସମାନା ଅ଼ଡ଼େ ଗ଼ଡ଼ୁ ହିଲାଆ ମେ଼ଣ୍ତାୟାଁ ସମାନା ଲ଼କୁ ବାରେ ଜାହା ଜାହାରା କୂଡ଼ା ୱାକି ୱେଣ୍ତାନେରି ଅ଼ଡ଼େ ବାରେ ଜାହା ଜାହାରା ଦେ଼ସା ୱାକି ହଣ୍ନେରି। ଆମ୍ବାଆସି ତ଼ଞ୍ଜାଆ଼ନେସି ଏ଼ୱାସି ୱେଲୁତଲେ ଜୀୱି ଆ଼ନେସି ଅ଼ଡ଼େ ଆମ୍ବାଆସି ଆସ୍ପି ଆ଼ନେସି ଏ଼ୱାସି କାଣ୍ତା ତଲେ ପା଼ୟ୍ୱି ଆ଼ନେସି। ଏ଼ୱାରି କକାରି ପ଼ଦାୟାଁ ଜିକେଏ ତାମି ନ଼କିତା କୁତ୍ସ୍ପି ଆ଼ନେରି; ଏ଼ୱାରି ଇଲୁ ଦୂହ୍ୱି ଆ଼ନେ ଅ଼ଡ଼େ ଏ଼ୱାରି ଡକ୍ରିସିକା ବାଲାମାତମି କିୱିଆ଼ନୁ।
ମେହ୍ଦୁ, ନା଼ନୁ ଏ଼ୱାରି କ଼ପାଟି ମାଦିୟ ଲ଼କୁଇଁ ନିକ୍ଇଁ, ଏ଼ୱାରି ୱେଣ୍ତିତି ସିନିକିଅରି ଅ଼ଡ଼େ ବାଂଗାରାତା ଏ଼ୱାରି ରା଼ହାଁ ଆ଼ଅରି। ଏ଼ୱାରି ଆମ୍ବୁ ଅ଼ଡ଼େ ୱେଲୁ ତଲେ ଏ଼ୱାରି ଦାଂଗ୍ଣାୟାଁଣି ପା଼ୟିନେରି। ଏ଼ୱାରି ବାଣ୍ତିତା ମାନି ଡା଼ଲୁତି କାର୍ମା ମେହ୍ଅରି କକାରି ପ଼ଦାୟାଁଣି ଏ଼ୱାରି କାର୍ମା ମେହ୍ନାୟି ଡ଼ୟେଏ। ଇଞ୍ଜାଁ, ବାରେ ରା଼ଜିତି ଗା଼ୱୁରମି ଲେହେଁ ଅ଼ଡ଼େ କଲ୍ଦିୟ ଲ଼କୁ ବଡପଣଟି ପ଼ଙ୍ଗିନି ଲେହେଁ ବାବିଲ, ଏ଼ଦି ମାହାପୂରୁ ତା଼ଣାଟି ନା଼ସା ଆ଼ତି ସଦମ ଅ଼ଡ଼େ ଗମରା ଲେହେଁ ଆ଼ନେ। ଏ଼ଦି ଏଚେଲା ବାସା ଟା଼ୟୁ ଆ଼ଏ, ପା଼ଟୁ ପା଼ଟୁ ତାକି ଆମ୍ବାଆରି ଏମ୍ବାଆଁ ବାସା କିଅରି; ଆରବିୟ ଲ଼କୁ ଏମ୍ବାଆଁ ତୂମୁ ଗ଼ଞ୍ଜଅରି, କି ମେ଼ଣ୍ତା ଗ଼ଡ଼୍କା ଜାହା ଜାହାରା ମାନ୍ଦା ଏମ୍ବାଆଁ ଡୂରିକିଅରି। ସାମା ଜା଼ଡ଼ା ଜ଼ନ୍ତୟାଁ ଏ଼ ଟା଼ୟୁତା ଡୂରିନୁ ଅ଼ଡ଼େ ଏ଼ୱାରି ଇଲ୍କାଣା କା଼ଲୱି ଆ଼ନି କଲିୟାକା ନେଞ୍ଜା ଡ଼ୟିନୁ; କର୍କଟିକା ଏମ୍ବାଆଁ ବାସା କିନୁ ଅ଼ଡ଼େ ଗରିୟାଁ ଏମ୍ବାଆଁ ଏ଼ନ୍ଦିନୁ। ଇଞ୍ଜାଁ, କା଼ସାୟାଁ ଏ଼ୱାରି ଇଲୁତା ଅ଼ଡ଼େ ନାକାୟାଁ ତାମି ଅ଼ଜିତି ଇଲୁତା ଡ଼ୀନୁ; ତାନି କା଼ଲା ଡାଗେ ୱା଼ତେୟିଏ, ଅ଼ଡ଼େ ତାନି ଦିନା ବାରେ ଗାଡି ହେକ ହିଲେଏ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.