Kuvi Bible
ମୂଲୁ 5
ଆଦମତି କୂଡ଼ା
(୧କୂଡ଼ା ୧:୧-୪)
ଆଦମ କୂଲୁତି କାତା ଈଦି। ଏମିନି ଦିନା ମାହାପୂରୁ ମାଣ୍ସିଇଁ ଗା଼ଡ଼ିକିତେସି, ଏ଼ ଦିନା ତାନି ୱା଼ଣାଲେହେଁ ଏ଼ୱାସି ଏ଼ୱାଣାଇଁ ରାଚିକିତେସି। ଆ଼ବା ଅ଼ଡ଼େ ଆୟା କିହାଁ ଏ଼ୱାସିକାଣି ଗା଼ଡ଼ିକିତେସି; ଅ଼ଡ଼େ ଏ଼ୱାରି ଗା଼ଡ଼ିଆ଼ତି ଦିନା ଏ଼ୱାରାଇଁ ବ଼ର ହୀହାଁ ଆଦମ “ମାଣ୍ସି” ଦ଼ରୁ ଇଟିତେସି। ଆଦମ ସ଼କ଼ଡ଼ି ଦସ ବାର୍ସା ଆୟାଲିଏ ତାନି ୱା଼ଣା ଲେହେଁ ର଼ ମୀର୍ଏଣାଇଁ ଜାର୍ନି କିହାଁ ଏ଼ୱାଣି ଦ଼ରୁ ସେତ ଇଞ୍ଜିଁ ଇଟିତେସି। ସେତ ଜାର୍ନାଆ଼ତି ଡା଼ୟୁ ଆଦମ ଆ଼ଟା ୱାଞ୍ଜା ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। ଆଦମ ନ଼ ୱାଞ୍ଜା କଡ଼େ ଦସ ବାର୍ସା ନୀଡିତେସି; ଏଚେଟିଏ ଏ଼ୱାସି ହା଼ତେସି।
ସେତ ପା଼ସା କ଼ଡ଼ି ପା଼ସା ବାର୍ସା ଆୟାଲିଏ ଇନସ ଜାର୍ନା ଆ଼ତେସି, ଇନସ ଜାର୍ନା ଆ଼ତି ଡା଼ୟୁ ସେତ ଆ଼ଟା ୱାଞ୍ଜା ସା଼ତା ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। ସେତ ନ଼ ୱାଞ୍ଜା ବା଼ର ବାର୍ସା ନୀଡିତେସି; ଏଚେଟିଏ ଏ଼ୱାସି ହା଼ତେସି।
ଇନସ ସା଼ରି କ଼ଡ଼ି ଦସ ବାର୍ସା ଆୟାଲିଏ କୟିନାନ ଜାର୍ନା ଆ଼ତେସି। କୟିନାନ ଜାର୍ନା ଆ଼ତି ଡା଼ୟୁ ଇନସ ଆ଼ଟା ୱାଞ୍ଜା ପନ୍ଦର ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। ଇନସ ନ଼ ୱାଞ୍ଜା ପା଼ସା ବାର୍ସା ନୀଡିତେସି; ଏଚେଟିଏ ଏ଼ୱାସି ହା଼ତେସି।
କୟିନାନ ତୀନି କ଼ଡ଼ି ଦସ ବାର୍ସା ଆୟାଲିଏ ମହଲଲେଲ ଜାର୍ନା ଆ଼ତେସି। ମହଲଲେଲ ଜାର୍ନା ଆ଼ତି ଡା଼ୟୁ କୟିନାନ ଆ଼ଟା ୱାଞ୍ଜା ଦୁଇ କ଼ଡ଼ି ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। କୟିନାନ ନ଼ ୱାଞ୍ଜା ଦସ ବାର୍ସା ନୀଡିତେସି; ଏଚେଟିଏ ଏ଼ୱାସି ହା଼ତେସି।
ମହଲଲେଲ ତିନି କ଼ଡ଼ି ପା଼ସା ବାର୍ସା ଆୟାଲିଏ ଜେରଦ ଜାର୍ନା ଆ଼ତେସି; ଜେରଦ ଜାର୍ନା ଆ଼ତି ଡା଼ୟୁ ଏ଼ୱାସି ଆ଼ଟା ୱାଞ୍ଜା କଡ଼େ ଦସ ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। ମହଲଲେଲ ଆ଼ଟା ୱାଞ୍ଜା ସା଼ରି କ଼ଡ଼ି ପନ୍ଦର ବାର୍ସା ନୀଡିତେସି; ଏଚେଟିଏ ଏ଼ୱାସି ହା଼ତେସି।
ଜେରଦ ଆ଼ଟା କ଼ଡ଼ି ରୀ ବାର୍ସା ଆୟାଲିଏ ହନକ ଜାର୍ନା ଆ଼ତେସି; ଜେରଦ ହନକ ଜାର୍ନା ଆ଼ତି ଡା଼ୟୁ ଏ଼ୱାସି ଆ଼ଟା ୱାଞ୍ଜା ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି; ଜେରଦ ନ଼ ୱାଞ୍ଜା ତୀନି କ଼ଡ଼ି ରୀ ବାର୍ସା ନୀଡାହାଁ ହା଼ତେସି।
ହନକ ତୀନି କ଼ଡ଼ି ପା଼ସା ବାର୍ସା ଆୟାଲିଏ ମତୁସେଲହ ଜାର୍ନା ଆ଼ତେସି। ମତୁସେଲହ ଜାର୍ନା ଆ଼ତି ଡା଼ୟୁ ହନକ ତୀନି ୱାଞ୍ଜା ବାର୍ସା ପାତେକା ମାହାପୂରୁ ତଲେ ତା଼କିତେସି ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। ହନକ ତୀନି ୱାଞ୍ଜା ତୀନି କ଼ଡ଼ି ପା଼ସା ବାର୍ସା ପାତେକା ନୀଡିତେସି। ହନକ ମାହାପୂରୁ ତଲେ ତା଼କିତେସି, ଅ଼ଡ଼େ ଏ଼ୱାସି ତ଼ଞ୍ଜା ଆ଼ଆନା ମେଣ୍ଙ୍ଗିତେସି, ଇଚିହିଁ ମାହାପୂରୁ ଏ଼ୱାଣାଇଁ ଅ଼ତେସି।
ମତୁସେଲହ ଆ଼ଟା କ଼ଡ଼ି ସା଼ତା ବାର୍ସା ଆୟାଲିଏ ଲେମକ ଜାର୍ନା ଆ଼ତେସି। ଲେମକ ଜାର୍ନା ଆ଼ତି ଡା଼ୟୁ ମତୁସେଲହ ସା଼ତା ୱାଞ୍ଜା ସା଼ରି କ଼ଡ଼ି ରୀ ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। ମତୁସେଲହ ନ଼ ୱାଞ୍ଜା ତୀନି କ଼ଡ଼ି ନ଼ ବାର୍ସା ନୀଡାହାଁ ହା଼ତେସି।
ଲେମକ ଆ଼ଟା କ଼ଡ଼ି ରୀ ବାର୍ସା ଆୟାଲିଏ ର଼ ମୀର୍ଏଣାଇଁ ଜାର୍ନି କିହାଁ ଏ଼ୱାଣି ଦ଼ରୁ ନ଼ହଁ1 ଇଟିତେସି, ଇଚିହିଁ ଏ଼ୱାସି ଏଲେଇଚେସି, ପ୍ରବୁ ବା଼କା ଇଟାମାନି ବୂମିତା ମା଼ କାମା ଅ଼ଡ଼େ କେୟୁତି କସ୍ତତା ମାଙ୍ଗେ ବା଼ର୍ସୁ ଆୟାନେସି। ନ଼ହଁ ଜାର୍ନା ଆ଼ତି ଡା଼ୟୁ ଲେମକ ପା଼ସା ୱାଞ୍ଜା ସା଼ରି କ଼ଡ଼ି ପନ୍ଦର ବାର୍ସା ନୀଡାହାଁ ଅ଼ଡ଼େ କକାରି ପ଼ଦାୟାଁ ଜାର୍ନି କିତେସି। ଲେମକ ସା଼ତା ୱାଞ୍ଜା ତୀନି କ଼ଡ଼ି ସତର ବାର୍ସା ନୀଡାହାଁ ହା଼ତେସି।
ନ଼ହଁକି ପା଼ସାୱାଞ୍ଜା ବାର୍ସା ଆୟାଲିଏ, ସେମ, ହାମ ଅ଼ଡ଼େ ଜେପତ୍ ତୀନି ଜା଼ଣା ମୀର୍କା ଜାର୍ନା ଆ଼ତେରି।
Source notes (1)
- Footnote ବା଼ର୍ସୁ
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.