Kuvi Bible
ମୂଲୁ 40
ଜସେପ ହାପାନା ଅର୍ତ ୱେହ୍ନାୟି
ଈ ବାରେ ଆ଼ତି ଡା଼ୟୁ ମିସର ରାଜାତି ଅଙ୍ଗୁରି ରାସା ହୀନାସି ଅ଼ଡ଼େ କା଼ଦି ହୀନାସି ତାମି ପ୍ରବୁ ମିସରତି ରାଜା କ଼ପାଟି ଦ଼ହ କିତେରି। ଏଚେଟିଏ ପା଼ର ତାନି ଅଙ୍ଗୁରି ରାସା ହୀନାରି କାଜାସି ଅ଼ଡ଼େ କା଼ଦି ହୀନାରି କାଜାସି ଈ ରୀ କାମା କିନାରାଇଁ ରାଜା କାର୍ବି ଆ଼ତେସି। ଅ଼ଡ଼େ ଏ଼ୱାରାଇଁ କାୟିଦି ଇଲୁ କା଼ଃନି ପା଼ସାକ଼ଡ଼ି ମୁହେଁ କାଜାଣି କାୟିଦି ଇଲୁତା, ଏମିନି ତା଼ଣା ଜସେପ କାୟିଦି ମାଚେସି, ଏମ୍ବାଆଁ ଏ଼ୱାରାଇଁ କାୟିଦି କିହାଁ ସୁଣ୍ତିତେସି। ଏଚେଟିଏ କାୟିଦି ଇଲୁ କା଼ଃନି ପା଼ସାକ଼ଡ଼ି ମୁହେଁ କାଜାସି ଜସେପ କେୟୁତା ଏ଼ୱାରାଇଁ ହେର୍ପାଲିଏ, ଜସେପ ଏ଼ୱାରାଇଁ ଜାତ୍ନୁ ଅ଼ହାଲି ମା଼ଟ୍ହେସି। ଏଲେକିହିଁ ଏ଼ୱାରି ଏଚର ଦିନା କାୟିଦିତା ଡ଼ୟିତେରି।
ଏଚେଟିଏ ର଼ ଲା଼ଆଁୟାଁ ମିସରତି ରାଜାକି ଅଙ୍ଗୁରି ରାସା ହୀନାସି ଅ଼ଡ଼େ କା଼ଦି ହୀନାସି ରିଆରି ରୀ ୱା଼ଣାତି ହାପାନା ହେ଼ଟେରି, ଇଞ୍ଜାଁ ରିଆରି ହାପାନାତି ଅର୍ତ ଏଟ୍କା ଏଟ୍କା ମାଚେ। ଏଚେଟିଏ ଜସେପ ଲା଼ଇ ଏ଼ୱାରି ତା଼ଣା ୱା଼ନି ବେ଼ଲାତା, ଏ଼ୱାରାଇଁ ଦୁକୁତଲେ ମାଚାଣି ମେସ୍ତେସି। ଏଚେଟିଏ ପା଼ରତି ଆମିନି କାମା କିନାରି ଜସେପ ତଲେ ତାନି ପ୍ରବୁତି କାୟିଦିତା ସୁଣ୍ତ୍କି ଆ଼ହାମାଚେରି, ଏ଼ୱାରାଇଁ ଜସେପ ୱେଚେସି, “ନୀଞ୍ଜୁ ମୀ ମୂମ୍ବୁ ଏ଼ନାଆଁତାକି ହାପ୍ଲି ଆ଼ହାମାନେ ?”
ଏ଼ୱାରି ଏଲେଇଚେରି, “ମା଼ମ୍ବୁ ହାପାନା ହେ଼ଟମି, ସାମା ଏମ୍ବାତି ଅର୍ତ ୱେସାଲି ଆମ୍ବାଆସି ହିଲଅସି।” ଜସେପ ଏ଼ୱାରାଇଁ ଏଲେଇଚେସି, “ଅର୍ତତି ବୁଦି ହୀନାୟି ମାହାପୂରୁ ତା଼ଣା ହିଲେଏ କି ? ବାତିମା଼ଲି ମାଞ୍ଜାଇଁ ମୀ ହାପାନା ନାଙ୍ଗେ ୱେସ୍ତାଦୁ।”
ଏ଼ଦାଆଁତାକି ଅଙ୍ଗୁରି ରାସା ହୀନାରି କାଜାସି ଜସେପଇଁ ତାନି ହାପାନାତି କାତା ଏଲେଇଚେସି, “ମେହ୍ମୁ ନା଼ ନ଼କିତା ର଼ ଅଙ୍ଗୁରିମା଼ଡ଼ା ମାଚେ, ଏ଼ ଅଙ୍ଗୁରିମା଼ଡ଼ାତା ତୀନିଗଟା କମାୟାଁ ମାଚୁ, ଇଞ୍ଜାଁ ଏ଼ଦି ଆ଼କା ଗା଼ଲ୍ହାଲିଏ, ଏମ୍ବାଆଁ ବ଼ଣ୍ତା ଦା଼ଲିତୁ, ଅ଼ଡ଼େ ବାରେ ଗେଲାତା ଜପୁ ଜପୁ ଅଙ୍ଗୁରି କାମ୍ବିତେ। ଏଚିବେ଼ଲା ନା଼ କେୟୁତା ପା଼ରତି ଗହ୍ନି ସିପା ମାଚାକି ଏ଼ ସିପାତା ନା଼ନୁ ଏ଼ ଅଙ୍ଗୁରି ଅ଼ହାଁ ପୀଚାହାଁ ପା଼ର କେୟୁତା ହୀତେଏଁ।”
ଏଚେଟିଏ ଜସେପ ଏ଼ୱାଣାଇଁ ଏଲେଇଚେସି, “ଈଦାଣି କାତା ଈଦି; ଏ଼ ତୀନିଗଟା କମାୟାଁ ତୀନି ଦିନା ୱେସିମାନେ।” ତୀନି ଦିନା ବିତ୍ରା ପା଼ର ନୀ ତା଼ର୍ୟୁଁ ନିକ୍ହାଁ ନିଙ୍ଗେ ନୀ ପା଼ଣାତା ଅ଼ଡ଼େ ୱେଣ୍ତେ ହେର୍ପାନେସି; ଏଚେ଼ଟିଏ ନୀନୁ ତଲିତିଲେହେଁ ଅଙ୍ଗୁରି ରାସା ହୀନାତି ଆ଼ହାଁ ୱେଣ୍ତେ ପା଼ର କେୟୁତା ଅଙ୍ଗୁରି ରାସା ହୀଦି। ସାମା ନୀ ନେହେଁ ଆ଼ତିସାରେ ନାଙ୍ଗେ ଅଣ୍ପାମୁ, ଇଞ୍ଜାଁ ନାଙ୍ଗେ କାର୍ମା ମେସାହାଁ ପା଼ର ନ଼କିତା ନା଼ କାତା ୱେସାନା ଈ କାୟିଦିଟି ଗେଲ୍ପାମୁ। ଇଚିହିଁ, ଏବ୍ରି ଲ଼କୁ ଦେ଼ସାଟି ନାଙ୍ଗେ ସ଼ରୁ କିହାଁ ତାଚା ମାଞ୍ଜାନେରି; ଇଞ୍ଜାଁ ଈ ଟା଼ୟୁତା ଜିକେଏ ନା଼ନୁ ଏ଼ନାଆଁ କିହାହିଲଅଁ, ଆ଼ତିଜିକେଏ ଏ଼ୱାରି ନାଙ୍ଗେ ଈ କାୟିଦି ଇଲୁତା ସୁଣ୍ତା ମାଞ୍ଜାନେରି।
ଏଚେଟିଏ ଏ଼ୱାସି ନେହିଁ କାତା ୱେସ୍ତାତେସି, ରାଜାକି କା଼ଦି ହୀନାରି କାଜାସି ଈ କାତା ୱେଞ୍ଜାହାଁ ଜସେପଇଁ ଏଲେଇଚେସି, “ନା଼ନୁ ଜିକେଏ ହାପାନା ହେ଼ଟେଏଁ; ମେହ୍ମୁ ନା଼ ତା଼ର୍ୟୁଁ ଲାକ ତୀନିଗଟା କା଼ଦି ଦଡ଼୍ୱାୟାଁ। ବାରେକିହାଁ ଲାକନି ଡାଲିତା ପା଼ରତି ତିଞ୍ଜାଲି ତାକି ବାରେ କୂଡ଼ାତି କା଼ଦି ମାଚେ; ଇଞ୍ଜାଁ ପଟାୟାଁ ୱା଼ହାଁ ନା଼ ତା଼ର୍ୟୁଁତା ମାନି ଦଡ଼୍ୱାଟି ଅ଼ହାଁ ତିଚୁ।”
ଏଚିବେ଼ଲା ଜସେପ ଏଲେଇଚେସି, “ଈଦାଣି କାତା ଈଦି, ଏ଼ ତୀନିଗଟା ଦଡ଼୍ୱା ତୀନି ଦିନାତି ୱେସିମାନେ।” ତୀନି ଦିନା ବିତ୍ରା ପା଼ର ନୀ ଆଙ୍ଗାଟି ନୀ ତା଼ର୍ୟୁଁ ପେର୍ହାଁ ନିଙ୍ଗେ ମା଼ର୍ନୁ ଲାକ ଲେତାନେସି, ଇଞ୍ଜାଁ ପଟାୟାଁ ୱା଼ହାଁ ନୀ ଊଙ୍ଗା ତିନୁ।
ଏଚେଟିଏ ତୀନି ଦିନା ଡା଼ୟୁ ପା଼ରତି ଜାର୍ନା ଦିନା ଆୟାଲିଏ ଏ଼ୱାସି ତାନି ବାରେ ହ଼ଲିୟାଙ୍ଗା ତାକି ବ଼ଜି କିତେସି। ଏଚେ଼ଟିଏ ଏ଼ୱାସି ତାନି ବାରେ ହ଼ଲିୟାଙ୍ଗା ନ଼କିତା ଅଙ୍ଗୁରି ରାସା ହୀନାରା କାଜାଣାଇଁ ଅ଼ଡ଼େ କା଼ଦି ହୀନାରା କାଜାଣାଇଁ ହା଼ଟିକିତେସି। ଇଞ୍ଜାଁ ଜସେପତି ୱେସ୍ତି କାତା ଲେହେଁ ପା଼ର କାଜା ଅଙ୍ଗୁରି ରାସା ହୀନାଣାଇଁ ତାନି ପା଼ଣା ୱେଣ୍ତେ ହୀତେସି; ଏଚେଟିଏ ଏ଼ୱାସି ପା଼ର କେୟୁତା ଅଙ୍ଗୁରି ରାସା ହୀତେସି। ସାମା ଏ଼ୱାସି ରାଜାକି କା଼ଦି ହୀନି କାଜାଣାଇଁ ମା଼ର୍ନୁତା ଲେତେସି; ଆ଼ତି ଜିକେଏ ଅଙ୍ଗୁରି ରାସା ହୀନାରି କାଜାସି ଜସେପଇଁ ଅଣ୍ପାଆତେସି, ସାମା ଏ଼ୱାଣାଇଁ ବା଼ଣା ଆ଼ତେସି।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.