Kuvi Bible
ମୂଲୁ 38
ଜୀହୁଦା ଅ଼ଡ଼େ ତାମର
ଏଚିବେ଼ଲା ଜୀହୁଦା ତାନି ତାୟିୟାଁ ତା଼ଣାଟି ଅଦୁଲମି ଗା଼ଡ଼ାତି ହୀରା ଇନି ର଼ ଲ଼କୁ ତା଼ଣା ହାଚେସି। ଏମ୍ବାଆଁ ସୁୟ ଇନି କିଣାନ ଲ଼କୁତି ର଼ ମା଼ଙ୍ଗାନି ସିନିକିହାଁ ଏ଼ଦାନି ବୀହା ଆ଼ହାଁ ଏ଼ଦାନି ତଲେ ଡୂରିତେସି। ଅ଼ଡ଼େ ଏ଼ଦି ପୂରାମା଼ସା ଆ଼ହାଁ କକାଣାଇଁ ଜାର୍ନି କିହାଲିଏ, ଏ଼ୱାସି ଏ଼ୱାଣି ଦ଼ରୁ ଏର ଇଟିତେସି। ଅ଼ଡ଼େ ଏ଼ଦି ୱେଣ୍ତେ ପୂରାମା଼ସା ଆ଼ହାଁ କକାଣାଇଁ ଜାର୍ନି କିହାଁ ଏ଼ଦି ଏ଼ୱାଣି ଦ଼ରୁ ଅନନ୍ ଇଟିତେ। ଅ଼ଡ଼େ ୱେଣ୍ତେ ପୂରାମା଼ସା ଆ଼ହାଁ ଏ଼ଦି କକାଣାଇଁ ଜାର୍ନି କିହାଁ ଏ଼ୱାଣି ଦ଼ରୁ ସେଲା ଇଟିତେ। ଏ଼ୱାଣି ଜାର୍ନା ବେ଼ଲାତା ଜୀହୁଦା କସିବତା ମାଚେସି।
ଏଚେଟିଏ ଜୀହୁଦା ତାମର ଦ଼ରୁତି ର଼ ମା଼ଙ୍ଗାନି ତାଚାହାଁ ତାନି ପା଼ଣ୍ୱା ମୀର୍ଏସି ଏରକି ବୀହା କିତେସି। ସାମା ଜୀହୁଦାତି ପା଼ଣ୍ୱା ମୀର୍ଏସି ଏର ମାହାପୂରୁ ନ଼କିତା ଲାଗେଏତାସି ମାଚେସି; ଏ଼ଦାଆଁତାକି ପ୍ରବୁ ଏ଼ୱାଣାଇଁ ନା଼ସା କିତେସି। ଏଚେ଼ଟିଏ ଜୀହୁଦା ଅନନ୍ଇଁ ଏଲେଇଚେସି, “ନୀନୁ ନୀ ତାୟି ଡକ୍ରିନି ଇଟାମୁ ଅ଼ଡ଼େ ଏ଼ଦାଣି ତଲେ ମା଼ର୍ନ୍ଦେଏଣାତି କାମା କିହାଁ ତାୟିତି କୂଲୁ ଏ଼ପା କିମୁ।” ସାମା ଏ଼ କୂଲୁ ନୀଦି ଆ଼ଏ, ଈଦାନି ପୁଞ୍ଜାହାଁ ଅନନ୍ ଆୱା ତଲେ ଡୂରିନାଟି ତାୟିତି କୂଡ଼ା ଏ଼ପା କିହାଲି ମ଼ନ କିଆନା ବୂମିତା ୱା଼ରି କିତେସି। ଏ଼ୱାଣି ଇଲେତି କାମା ପ୍ରବୁ ନ଼କିତା ଲାଗେଏ ମାଚେ; ଏ଼ଦାଆଁତାକି ପ୍ରବୁ ଏ଼ୱାଣାଇଁ ଜିକେଏ ନା଼ସା କିତେସି। ଏଚିବେ଼ଲା ଜୀହୁଦା ତାନି କୁଡ଼ିୟା ତାମରଇଁ ଏଲେଇଚେସି, “ନା଼ ମୀର୍ଏସି ସେଲା କାଜାସି ଆ଼ଆ ପାତେକା ନୀନୁ ରା଼ଣ୍ତେଣି ଆ଼ହାଁ ନୀ ତାଞ୍ଜି ଇଜ ମାନାମୁ,” ଇଚିହିଁ ଏ଼ୱାସି ଅଣ୍ପିତେସି, ସେଲା ଜିକେଏ ତାମି ତାୟିୟାଁ ଲେହେଁ ହା଼ନେସି। ଏ଼ଦାଆଁତାକି ତାମର ତାଞ୍ଜି ଇଜ ହାଜାହାଁ ଡ଼ୟିତେ।
ଅ଼ଡ଼େ ହା଼ରେକା ଦିନା ହାଜାଲିଏ, ସୁୟ ମା଼ଙ୍ଗା ଜୀହୁଦା ଡକ୍ରି ହା଼ତେ; ଏଚେ଼ଟିଏ ଜୀହୁଦା ଦୁକୁ ଡୂକ୍ହାଁ ଅଦୁଲମି ଗା଼ଡ଼ାତି ହୀରା ଇନି ତ଼ଣେ ତଲେ ତିମ୍ନାତା ତାନି ମେ଼ଣ୍ତା ବା଼ଣାୟାଁ ହିହ୍ନାରି ତା଼ଣା ହାଚେସି।
ଏଚିବେ଼ଲା ଆମ୍ବାଆସି ରଅସି ତାମରଇଁ ଏଲେଇଚେସି, “ମେହ୍ମୁ ନୀ ପତ୍ଲେଏସି ତାନି ମେ଼ଣ୍ତା ବା଼ଣାୟାଁ ହିଣ୍ହାଲି ତାକି ତିମ୍ନାତା ହାଜିମାନେସି।” ଏଚେଟିଏ ତାମର ରା଼ଣ୍ତେଣି ହିମ୍ବରି ବାଦ୍ଲି କିହାଁ, ମୂମ୍ବୁତା ପ୍ଡିକ୍ହା କଡାହାଁ, ତିମ୍ନାତି ଜିରୁ ଦାରିତି ଅୟିନମ୍ତା ହ଼ଡ଼୍ନି ଦୁୱେରିତା କୁଗା ଡ଼ୟିତେ; ଇଚିହିଁ ଏ଼ଦି ସିନିକିତେ, ସେଲା କାଜାସି ଆ଼ତି ଜିକେଏ ତାନି ତଲେ ବୀହା ଆ଼ଆତେ।
ଏଚିବେ଼ଲା ଜୀହୁଦା ଏ଼ଦାନି ମେସାହାଁ ଦା଼ରେଣି ଅଣ୍ପିତେସି, ଇଚିହିଁ ଏ଼ଦି ମୂମ୍ବୁ ପ୍ଡିକ୍ହା ମାଚେ। ଏ଼ଦାଆଁତାକି ଏ଼ୱାସି ଜିରୁ ଟଟତା ଏ଼ଦାଣି ତା଼ଣା ହାଜାହାଁ କୁଡ଼ିୟାନି ପୁଞ୍ଜାଲି ଆ଼ଡାଆନା ଏଲେଇଚେସି, “ବାତିମା଼ଲି ମାଞ୍ଜାଇଁ ନୀ ତା଼ଣା ହାଜାଲି ହିୟାମୁ।” ଏଚେ଼ଟିଏ ତାମର ଏଲେଇଚେ, “ନୀନୁ ନା଼ ତା଼ଣା ୱା଼ହାଲି ଏ଼ନାଆଁ ହିୟାଦି ?”
ଏ଼ୱାସି ଏଲେଇଚେସି, “ମାନ୍ଦାଟି ର଼ ଗରି ଡା଼ଲୁ ପାଣ୍ତାଇଁ।” ତାମର ଏଲେଇଚେ, “ଏ଼ଦାଆଁ ପାଣ୍ତାନି ପାତେକା ନାଙ୍ଗେ ଏ଼ନାଆଁ ବାନ୍ଦେ ହିୟାଦି ?”
ଜୀହୁଦା ଏ଼ଦାନି ଏଲେଇଚେସି, “ଏ଼ନାଆଁ ବାନ୍ଦେ ହିୟାଇଁ ?” ତାମର ଏଲେଇଚେ, “ନୀ ଈ ମୁଦି ଅ଼ଡ଼େ ଲୂଲୁ ଅ଼ଡ଼େ କେୟୁତି ବାଡ଼୍ଗା।” ଏଚେଟିଏ ଜୀହୁଦା ଏ଼ ବାରେ ହୀହାଁ ଏ଼ଦାଣି ତା଼ଣା ହାଚେସି, ଏଚେଟିଏ ଏ଼ଦି ଏ଼ୱାଣି ତା଼ଣାଟି ପୂରାମା଼ସା ଆ଼ତେ। ଏଚେଟିଏ ତାମର ନିଙ୍ଗା ହାଜାହାଁ, ମୂମ୍ବୁତା ପୀଡ଼୍ଗା ମାଚାଣି ଇଟାହାଁ, ରା଼ଣ୍ତେଣି ହିମ୍ବରି ହୁଚିତେ।
ଏଚେଟିଏ ଜୀହୁଦା ଏ଼ ଆୟାଟି ତା଼ଣା ବାନ୍ଦେ ଇଟାମାନି ଆ଼ସ୍ତି ତାଚାଲି ତାନି ତ଼ଣେ ଅଦୁଲମି ଗା଼ଡ଼ାତି ହୀରା ତା଼ଣାଟି ଗରି ଡା଼ଲୁ ପାଣ୍ତିତେସି, ସାମା ଏ଼ୱାସି ଏ଼ଦାନି ବେଟାଆ଼ଆତେସି। ଏ଼ଦାଆଁତାକି ଏ଼ୱାସି ଏମ୍ବାତି ଲ଼କୁଣି ୱେଚେସି, “ଅୟିନମ ଜିରୁ ଟଟ ଏମିନି ଦା଼ରେଣି ମାଚେ, ଏ଼ଦି ଏମ୍ବିୟା ?” ଏ଼ୱାରି ଏଲେଇଚେରି, “ଇମ୍ବାଆଁ ଏ଼ନି ଦା଼ରେଣି ହିଲେଏ।”
ଏଚେଟିଏ ଏ଼ୱାସି ଜୀହୁଦା ତା଼ଣା ୱେଣ୍ତା ହାଜାହାଁ ଏଲେଇଚେସି, “ନା଼ନୁ ଏ଼ଦାନି ବେଟାଆ଼ଆତେଏଁ, ଅ଼ଡ଼େ ଏମ୍ବାତି ଲ଼କୁ ଜିକେଏ ଏଲେଇଞ୍ଜାତେରି ଇମ୍ବାଆଁ ଏ଼ନି ଦା଼ରେଣି ହିଲେଏ।”
ଏ଼ଦାଆଁତାକି ଜୀହୁଦା ଏଲେଇଚେସି, “ଏ଼ଦାନି ତା଼ଣା ଏ଼ନାୟି ମାନେ, ଏ଼ଦି ଏ଼ଦାନି ଇଟାପେ, ମା଼ର ଏ଼ନାଆଁତାକି ଲାଜା ବେଟାଆ଼ନାୟି ? ମେହ୍ଦୁ, ନା଼ନୁ ଈ ଗରି ଡା଼ଲୁ ପାଣ୍ତାତେଏଁ, ସାମା ନୀନୁ ଏ଼ଦାନି ବେଟାଆ଼ଆତି।” ଅ଼ଡ଼େ ତୀନି ଲେ଼ଞ୍ଜୁ ଡା଼ୟୁ ଆମ୍ବାଆସି ଜୀହୁଦାଇଁ ଏଲେଇଚେସି, “ନୀ କୁଡ଼ିୟା ତାମର ଦା଼ରେଣି ଆ଼ହାମାନେ; ଅ଼ଡ଼େ ଦା଼ରି କାମା ତଲେ ଏ଼ଦାଣି ପୂରାମା଼ସା ଆ଼ହାମାନେ।” ଏଚେ଼ଟିଏ ଜୀହୁଦା ଏଲେଇଚେସି, “ଏ଼ଦାନି ପାଙ୍ଗାତା ତାଚାହାଁ ହିଚୁତା ହୂଡାଦୁ।”
ଏଚେଟିଏ ଏ଼ଦି ପାଙ୍ଗାତା ତାପି ଆ଼ହାଲିଏ, ତାନି ପତ୍ଲେଏଣାଇଁ ୱେସା ପାଣ୍ତିତେ, “ଈ ବାରେ ଆ଼ସ୍ତି ଆମ୍ବାଆରି ୱାୟି, ଏ଼ ମାଣ୍ସି ତଲେ ନା଼ନୁ ପୂରାମା଼ସା ଆ଼ହାମାଇଁ।” ଅ଼ଡ଼େ ଏଲେଇଚେ, “ଈ ନା଼ ମୁଦି ଅ଼ଡ଼େ ଲୂଲୁ ଅ଼ଡ଼େ ବାଡ଼୍ଗା ଆମ୍ବାଆରି ୱାୟି ? ଏ଼ୱାଆଁ ସିନିକିଦୁ।”
ଏଚେ଼ଟିଏ ଜୀହୁଦା ଏ଼ ବାରେ ଆ଼ସ୍ତି ନା଼ଦି ଇଞ୍ଜିଁ ଇଞ୍ଜାହାଁ ଏଲେଇଚେସି, “ଏ଼ଦି ନା଼ କିହାଁ ହା଼ରେକା ଦାର୍ମୁଗାଟାୟି, ଇଚିହିଁ ନା଼ନୁ ଏ଼ଦାନାକି ନା଼ ମୀର୍ଏସି ସେଲାଇଁ ହୀଆତେଏଁ।” ସାମା ଜୀହୁଦା ଅ଼ଡ଼େ ଏ଼ଦାନି ତା଼ଣା ହାଲାଆତେସି।
ଇଞ୍ଜାଁ ତାମର ଜାର୍ନିକିନି ବେ଼ଲା ୱା଼ହାଲିଏ, ତାନି ବାଣ୍ତିତା ଜା଼ଣ୍ୱା ମୀର୍କା ମାନାୟି ତ଼ଞ୍ଜାଆ଼ତେ। ଅ଼ଡ଼େ ତାନି ଜାର୍ନି କିନି ବେ଼ଲାତା ର଼ କକାଣି କେୟୁ ହ଼ତେ; ଏଚେ଼ଟିଏ ସେ଼ବା କିନାୟି ଏ଼ୱାଣି କେୟୁତା ନେତେରି ୱା଼ଣା ଲୂଲୁ ଦସାହାଁ ଏଲେଇଚେ, “ଈୱାସି ପା଼ଣ୍ୱା।” ସାମା ଏ଼ଦି ଏ଼ୱାଣି କେୟୁ ରେଜା ଅ଼ହାଲିଏ, ମେହ୍ମୁ, ତାନି ତାୟି ଜାର୍ନା ଆ଼ତେସି; ଏଚେ଼ଟିଏ ସେ଼ବା କିନାୟି ଏଲେଇଚେ, “ନୀନୁ ଏ଼ନିକିହିଁ ନିଙ୍ଗେ ତାକି ପାର୍ଡ଼ା କିହାଁ ୱା଼ତି!” ନୀ ତା଼ଣା ଈ ପାର୍ଡ଼ା ଆ଼ପେ। ଏ଼ଦାଆଁତାକି ଏ଼ୱାଣି ଦ଼ରୁ ପେରସ1 ଆ଼ତେ। ଏଚେ଼ଟିଏ କେୟୁତା ନେତେରି ୱା଼ଣା ଲୂଲୁ ଦସାମାନି ତାନି ତାୟି ଜାର୍ନା ଆ଼ହାଲିଏ, ଏ଼ୱାଣି ଦ଼ରୁ ସେରହ2 ଆ଼ତେସି।
Source notes (2)
- Footnote ପାର୍ଡ଼ା
- Footnote ଉଜେଡ଼ି
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.