Kuvi Bible
ମୂଲୁ 36
ଏସୱୁତି କୂଡ଼ା
(୧କୂଡ଼ା ୧:୩୪-୩୭)
ଏସୱୁତି କୂଡ଼ା। ତାନି ଅ଼ର ଦ଼ରୁ ଇଦମ୍। ଏସୱୁ କିଣାନ ଲ଼କୁତି ରୀ ମା଼ସ୍କାଣି ଇଚିହିଁ ହୀତିୟ ଏଲନତି ମା଼ଙ୍ଗା ଆଦା ଅ଼ଡ଼େ ଅନାତି ମା଼ଙ୍ଗା ହିବ୍ବିୟ ସିବିୟନ୍ତି ତାଙ୍ଗା ମା଼ଙ୍ଗା ଅହଲିବାମାନି ବୀହା ଆ଼ହାମାଚେସି, ଅ଼ଡ଼େ ଏ଼ୱାସିକା ପିସ୍ପେ ନବାୟତ୍ ତାଙ୍ଗି ଇଚିହିଁ, ଇସ୍ମାୟେଲ ମା଼ଙ୍ଗା ବାସମତ୍ଇଁ ବୀହା ଆ଼ତେସି। ଏଚେଟିଏ ଏସୱୁ ତା଼ଣାଟି ଆଦା ଇଲିପସ୍ ଅ଼ଡ଼େ ବାସମତ୍ ରୁୟେଲଇଁ ଜାର୍ନି କିତେ। ଅ଼ଡ଼େ ଅହଲିବାମା, ଜିୟୁସ୍, ଜାଲମ୍, ଅ଼ଡ଼େ କରହଇଁ ଜାର୍ନି କିତେ। ଏସୱୁତି ଈ ବାରେ ମୀର୍କା କିଣାନ ଦେ଼ସାତା ଜାର୍ନା ଆ଼ତେରି।
ଏଚେ଼ଟିଏ ଏସୱୁ ତାନି ଡକ୍ରିସିକା ତାନି ମୀର୍କା, ମା଼ସ୍କା, ଅ଼ଡ଼େ ତାନି ଇଜତି ବାରେ ଲ଼କୁ, ଜ଼ନ୍ତଜିୱେଡ଼ି ତଲେ ଅ଼ଡ଼େ କିଣାନ ଦେ଼ସାତା ମେ଼ଡ଼ି କିହାମାଚି ବାରେ ଦ଼ନ ଅ଼ହାଁ ତାନି ତାୟି ଜାକୁବ ତା଼ଣାଟି ଏଟ୍କା ଦେ଼ସାତା ହାଚେସି। ଇଚିହିଁ ଏ଼ୱାରାକି ହା଼ରେକା ଗାଡି ବାତ୍କୁ ମାଚାକି ଏ଼ୱାରି ରଣ୍ତିଏ ତା଼ଣା ଡ଼ୟାଲି ଆ଼ଡାଆତେରି, ଅ଼ଡ଼େ, ଏ଼ୱାରି କ଼ଡି ଗରି ହା଼ରେକା ତାକି ଏ଼ ଟା଼ୟୁତା ଡ଼ୟାଲି ଆ଼ଆତେ। ଇଲେକିହିଁ ଏସୱୁ ସେୟିର ହ଼ରୁତି ଇଦମ୍ ଦେ଼ସାତା ବାସା କିତେସି।
ସେୟିର ହ଼ରୁତି ଇଦମିୟତି ଆକୁ ଆ଼ବାୟାଁ ଏସୱୁତି କୂଡ଼ା। ଏସୱୁତି ମୀର୍କା ଦ଼ରୁ ଈୱି। ଏସୱୁତି ଆଦା ଇନି ଡକ୍ରିନି ମୀର୍ଏସି ଇଲିପସ୍ ଅ଼ଡ଼େ ବାସମତ୍ ଇନି ଡକ୍ରିନି ମୀର୍ଏସି ରୁୟେଲ। ଅ଼ଡ଼େ, ଇଲିପସ୍ ମୀର୍ଏସି ତୟିମନ୍, ଅମାର୍, ସପ, ଗୟିତମ୍ ଅ଼ଡ଼େ କନସ୍। ଅ଼ଡ଼େ, ଏସୱୁତି ମୀର୍ଏସି ଇଲିପସ୍ତି ତିମ୍ନା ଇନି ଅ଼ର ଡକ୍ରି ମାଚେ, ଏ଼ଦି ଇଲିପସ୍ ତଲେ ଅମାଲେକଇଁ ଜାର୍ନି କିତେ; ଈୱାରି ଏସୱୁତି ଡକ୍ରି ଆଦାନି ମୀର୍କା। ରୁୟେଲ ମୀର୍ଏସି ନହତ୍, ସେରହ, ସମ୍ମ ଅ଼ଡ଼େ ମିସା, ଈୱାରି ଏସୱୁତି ଡକ୍ରି ବାସମତ୍ତି ମୀର୍କା।
ଇଞ୍ଜାଁ ସିବିୟନ୍ ତାଙ୍ଗା ମା଼ଙ୍ଗା ଅନାର ମା଼ଙ୍ଗା ଅହଲିବାମା ଏସୱୁତି ଡକ୍ରି ମାଚେ, ଏ଼ଦାଣି ମୀର୍କା, ଜିୟୁସ୍, ଜାଲମ୍ ଅ଼ଡ଼େ କରହ।
ଏସୱୁ ମୀର୍କାତି ରାଜାୟାଁ। ଏସୱୁତି ପା଼ଣ୍ୱା ମୀର୍ଏସି ଇଲିପସ୍ ଏ଼ୱାଣି ମୀର୍କା ରାଜା ତୟିମନ୍, ରାଜା ଅମାର୍, ରାଜା ସପ ଅ଼ଡ଼େ ରାଜା କନସ୍, ରାଜା କରହ, ରାଜା ଗୟିତମ୍, ରାଜା ଅମାଲେକ ଈୱାରି ବାରେ ଇଦମ୍ ଦେ଼ସାତି ଇଲିପସ୍ କୂଡ଼ାତି ଆଦା ମୀର୍କା ମାଚେରି।
ଏସୱୁତି ମୀର୍ଏସି ରୁୟେଲ ମୀର୍କା ରାଜା ନହତ୍, ରାଜା ସେରହ, ରାଜା ସମ୍ମ ଅ଼ଡ଼େ ରାଜା ମିସା; ଇଦମ ଦେ଼ସାତା ରୁୟେଲ କୂଡ଼ାତି ଈ ରାଜାୟାଁ ଏସୱୁତି ଡକ୍ରି ବାସମତ୍ତି ମୀର୍କା ମାଚେରି।
ଅ଼ଡ଼େ, ଏସୱୁତି ଡକ୍ରି ଅହଲିବାମାତି ମୀର୍କା ରାଜା ଜିୟୁସ୍, ରାଜା ଜାଲମ୍ ଅ଼ଡ଼େ ରାଜା କରହ; ଅନାର ମା଼ଙ୍ଗା ଅହଲିବାମା, ଏସୱୁତି ଡକ୍ରି ମାଚେ, ଈୱାରି ଏ଼ଦାନି ମୀର୍କା। ଈୱାରି ଏସୱୁ ଇଚିହିଁ, ଇଦମତି ମୀର୍କା ଅ଼ଡ଼େ ଈୱାରି ଏ଼ୱାରି ରାଜା।
ସେୟିରତି କୂଡ଼ା
(୧କୂଡ଼ା ୧:୩୮-୪୨)
ତଲି କା଼ଲାତା ଏ଼ ଦେ଼ସାତା ମାନି ହରିୟ, ସେୟିରତି ମୀର୍କା ଲତନ୍, ସବଲ୍, ସିବିୟନ୍ ଅ଼ଡ଼େ ଅନା, ଦିସନ୍, ଏସ୍ଚର, ଅ଼ଡ଼େ ଦିସନ୍; ସେୟିରତି ଈ ମୀର୍କା ଇଦମ ଦେ଼ସାତି ହରିୟ କୂଡ଼ାତି ରାଜା ମାଚେରି।
ଲତନ୍ ମୀର୍ଏସି ହରି, ଅ଼ଡ଼େ ହେମମ୍, ଇଞ୍ଜାଁ, ଲତନ୍ତି ତିମ୍ନା ଇନି ତାଙ୍ଗି ମାଚେ।
ଅ଼ଡ଼େ, ସବଲ୍ତି ମୀର୍କା ଅବଲନ୍, ମାନହତ୍, ଏବଲ୍, ସପ ଅ଼ଡ଼େ ଅନମ୍।
ଅ଼ଡ଼େ, ସିବିୟନ୍ତି ମୀର୍କା ଅୟା ଅ଼ଡ଼େ ଅନା; ଈ ଅନା ତାନି ଆ଼ବା ସିବିୟନ୍ତି ଗା଼ଡ଼୍ଦେ ମେଚିମାଚି ବେ଼ଲାତା ହ଼ରୁତା ୱେହ୍ନି ଏ଼ୟୁତି ଜାର୍ଣା ହ଼ପ୍ହେସି। ଏ଼ ଅନାତି ମୀର୍ଏସି ଦିସନ୍ ଅ଼ଡ଼େ ମା଼ଙ୍ଗା ଅହଲିବାମା। ଅ଼ଡ଼େ, ଦିସନ୍ତି ମୀର୍କା ହିମ୍ଦନ୍, ଇସବନ୍, ଜିତ୍ରନ୍ ଅ଼ଡ଼େ କରାନ୍।
ଏସ୍ଚର ମୀର୍କା ବିଲ୍ହନ୍, ସାବନ୍ ଅ଼ଡ଼େ ଆକନ୍। ଅ଼ଡ଼େ ଦିସନ୍ତି ମୀର୍କା ଊସ୍ ଅ଼ଡ଼େ ଅରାନ୍।
ହରିୟ କୂଡ଼ାତି ରାଜା ଈୱାରି; ରାଜା ଲତନ୍, ରାଜା ସବଲ୍, ରାଜା ସିବିୟନ୍ ଅ଼ଡ଼େ ରାଜା ଅନା। ଅ଼ଡ଼େ ରାଜା ଦିସନ୍, ରାଜା ଏସ୍ଚର ଅ଼ଡ଼େ ରାଜା ଦିସନ୍। ଈୱାରି ସେୟିର ଦେ଼ସାତି ହରିୟ କୂଡ଼ାତି ରାଜା ମାଚେରି।
ଇଦମତି ରାଜାୟାଁ
(୧କୂଡ଼ା ୧:୪୩-୫୪)
ଅ଼ଡ଼େ, ଇସ୍ରାୟେଲ ଲ଼କୁତି ଲାକ ଏ଼ନି ରାଜା ରା଼ଜି କିନି ନ଼କେଏ ଈ ରାଜାୟାଁ ଇଦମ ଦେ଼ସାତା ରା଼ଜି କିତେରି। ବିୟରତି ବେଲା ଇନି ମୀର୍ଏସି ଇଦମ ଦେ଼ସାତା ରା଼ଜି କିତେସି, ଏ଼ ରାଜା ଗା଼ଡ଼ାତି ଦ଼ରୁ ଦିନ୍ହାବା। ବେଲା ହା଼ତି ଡା଼ୟୁ, ତାନି ପା଼ଣାତା ବସ୍ରାତି ସେରହ ମୀର୍ଏସି ଜବବ୍ ରା଼ଜି କିତେସି। ଇଞ୍ଜାଁ, ଜବବ୍ ହା଼ତି ଡା଼ୟୁ ତୟିମନ୍ ଦେ଼ସାତି ହୁସମ୍ ତାନି ପା଼ଣାତା ରା଼ଜି କିତେସି। ହୁସମ୍ ହା଼ତି ଡା଼ୟୁ, ବଦଦ୍ ମୀର୍ଏସି ଆମ୍ବାଆସି ହଦଦ୍ ମୟାବ ବୂମିତା ମିଦିୟନଇଁ ଜୀଣା ଆ଼ତେସି, ଏ଼ୱାସି ଏ଼ୱାଣି ପା଼ଣାତା ରା଼ଜି କିତେସି; ତାନି ରାଜା ଗା଼ଡ଼ାତି ଦ଼ରୁ ଅବିତ୍। ହଦଦ୍ ହା଼ତି ଡା଼ୟୁ ମସ୍ରେକାତା ଡ଼ୟାମାଚି ସମ୍ଲ ତାନି ପା଼ଣାତା ରା଼ଜି କିତେସି। ଇଞ୍ଜାଁ, ସମ୍ଲ ହା଼ତି ଡା଼ୟୁ ପରାତ୍ କାଡା ଡାଗେତି ରହବତ୍ତି ସୟିଲ ଏ଼ୱାଣି ପା଼ଣାତା ରା଼ଜି କିତେସି। ସୟିଲ ହା଼ତି ଡା଼ୟୁ, ଅକ୍ବର ମୀର୍ଏସି ବାଲ୍ହାନନ୍ ଏ଼ୱାଣି ପା଼ଣାତା ରା଼ଜି କିତେସି। ଇଞ୍ଜାଁ, ଅକ୍ବର ମୀର୍ଏସି ବାଲ୍ହାନନ୍ ହା଼ତି ଡା଼ୟୁ, ହଦର ଏ଼ୱାଣି ପା଼ଣାତା ରା଼ଜି କିତେସି; ତାନି ରାଜା ଗା଼ଡ଼ାତି ଦ଼ରୁ ପା଼ଉ ଅ଼ଡ଼େ ତାନି ଡକ୍ରିନି ଦ଼ରୁ ମହେଟବେଲ ମାଚେ; ଏ଼ଦି ମଟ୍ରେଦ ମା଼ଙ୍ଗା ଅ଼ଡ଼େ ମେସାହବ ତାଙ୍ଗା ମା଼ଙ୍ଗା।
ଏସୱୁ ତା଼ଣାଟି ଜାର୍ନା ଆ଼ତାରି, କୂଡ଼ା, ଟା଼ୟୁ ଅ଼ଡ଼େ ଦ଼ରୁ ଲେହେଁ ଏମିନି ରାଜାୟାଁ ମାଚେରି, ଏ଼ୱାରି ଦ଼ର୍କା; ତିମ୍ନା, ଅଲ୍ବା ଅ଼ଡ଼େ ଜିତେତ୍। ଅହଲିବାମା, ଏଲା ଅ଼ଡ଼େ ପିନନ୍, କନସ୍, ତେୟିମନ୍ ଅ଼ଡ଼େ ମିବ୍ସର୍, ମଗ୍ଦିୟେଲ ଅ଼ଡ଼େ ଇରମ୍; ଈୱାରି ଜାହାରା ଅଦିକାରା ଦେ଼ସାତା ବାସା ଟା଼ୟୁ ଲେହେଁ ଇଦମତି ରାଜାୟାଁ ମାଚେରି, ଈଦି ଇଦମତି ଆକୁ ଏସୱୁତି କୁଟମି ରା଼ତେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.