Kuvi Bible
ମୂଲୁ 23
ସାରାତି ହା଼କି
ସାରା ସ଼କ଼ଡ଼ି ସା଼ତା ବାର୍ସା ନୀଡିତେ। ଏଚେଟିଏ ସାରା କିଣାନ ଦେ଼ସାତି କିରିୟତ୍-ଅର୍ବତା ଇଚିହିଁ, ହିବ୍ରଣତା ହା଼ତେ, ଏଚେଟିଏ ଅବ୍ରାହାମ ସାରା ହା଼କିତା ଦୁକୁ ଆ଼ହାଁ ଡ଼ୀତେସି।
ଏଚେଟିଏ ଅବ୍ରାହାମ ତାନି ହା଼ତି ଡକ୍ରିନି ମାଡ଼୍ହା ପିସାହାଁ ହେତ୍ ଲ଼କୁ ତା଼ଣା ହାଜାହାଁ ଏଲେଇଚେସି, “ନା଼ନୁ ମୀ ତା଼ଣା ଏଟ୍କା ଦେ଼ସାତାତେଏଁ ଡ଼ୟାମାଇଁ; ମୀ ବିତ୍ରା ନାଙ୍ଗେ ମାହ୍ଣିମାଣ୍ତା ତାକି ବୂମି କଡାଲି ହିୟାଦୁ, ଏମ୍ବାଆଁ ନା଼ନୁ ନା଼ ଡକ୍ରିନି ହା଼ତି ମାଡ଼୍ହା ମୁହ୍ଇଁ।”
ଏଚେଟିଏ ହେତ୍ତି ମୀର୍କା ଅବ୍ରାହାମଇଁ ଏଲେଇଚେରି, “ଏ଼ ବା଼ବୁ ମା଼ କାତା ୱେଞ୍ଜାମୁ। ନୀନୁ ମା଼ ବିତ୍ରା ବା଼ଡ଼୍ୟୁ ଗାଟି ରାଜାତି; ନୀଏଁ ମା଼ ନେହିଁ ମାହ୍ଣି ମାଣ୍ତାତା ଜିକେଏ ନୀ ହା଼ତି ଡକ୍ରିନି ଦ଼ନ କିମୁ; ମା଼ ବିତ୍ରା ଆମ୍ବାଆସି ନୀ ହା଼ତି ଡକ୍ରିନି ମୁସାଲି କା଼ହି କିୟଅସି।”
ଏଚେଟିଏ ଅବ୍ରାହାମ ଏ଼ ଦେ଼ସାତି ଲ଼କୁଣି ଇଚିହିଁ ହେତ୍ତି ମୀର୍କାଣି ଜହରା କିତେସି। ଅବ୍ରାହାମ କାତା ଆ଼ହାଁ ଏଲେଇଚେସି, “ନା଼ ହା଼ତି ଡକ୍ରିନି ମାହ୍ଣି ମାଣ୍ତାତା ମୁସାଲି ମୀରୁ ହେଲ ହିୟାସାରେ, ନା଼ କାତା ୱେଞ୍ଜୁ; ମୀରୁ ସହରତି ମୀର୍ଏସି ଇପ୍ରଣଇଁ ନା଼ ତାକି ୱେଞ୍ଜୁ। ଏ଼ୱାସି ମୀ ତା଼ଣା ନା଼ ମାହ୍ଣିମାଣ୍ତା କିହାଲି ହିୟାସାରେ ମକ୍ପେଲାତି ତାନି ବୂମି ଟଟତି ପା଼ୱୁ ନାଙ୍ଗେ ହିୟାପେସି; ଏ଼ଦାଆଁତାକି ଏଚେକା ଦାରା ଆ଼ନେ ଏ଼ଦାଆଁ ଅ଼ହାଁ ହୀଦୁ।”
ଇପ୍ରଣ ହେତ୍ତି ମୀର୍କା ମାଦି କୁଗାମାଚେସି; ଏ଼ଦାଆଁତାକି, ହୀତିୟ ଇପ୍ରଣ ତାନି ଗା଼ଡ଼ା-ଦୁୱେରିତା ହ଼ଡ଼୍ନି ହେତ୍ତି ମୀର୍କା ବାରେ ନ଼କିତା ଅବ୍ରାହାମଇଁ ଏଲେଇଚେସି, “ବା଼ବୁ ଏଲେକିଁ ଆ଼ଆପେ, ନା଼ କାତା ୱେଞ୍ଜାମୁ, ନା଼ନୁ ନିଙ୍ଗେ ଏ଼ ଟା଼ୟୁ ଅ଼ଡ଼େ ଏମ୍ବାତି ପା଼ୱୁ ହିୟାତେଏଁ; ନା଼ନୁ ନା଼ କୂଡ଼ାତି ଲ଼କୁ ନ଼କିତା ଏ଼ଦାଆଁ ନିଙ୍ଗେ ହିୟାତେଏଁ, ନୀନୁ ନୀ ଡକ୍ରିନି ହା଼ତି ମାଡ଼୍ହାତି ମୁହ୍ମୁ।”
ଏଚେଟିଏ ଅବ୍ରାହାମ ଏ଼ ଦେ଼ସାତି ଲ଼କୁଣି ଜହରା କିତେସି, ଇଞ୍ଜାଁ ଏ଼ ଦେ଼ସାତି ଲ଼କୁ ନ଼କିତା ଇପ୍ରଣଇଁ ଏଲେଇଚେସି, “ଏ଼ଦାଆଁ ନୀନୁ ନାଙ୍ଗେ ହିୟାଦି ଆତିହିଁ ନା଼ କାତା ୱେନାମୁ; ନା଼ନୁ ଏ଼ ଟା଼ୟୁତି ମୂଲୁ ହୀହିମାଞ୍ଜାଇଁ ନୀନୁ ଏ଼ୱାଆଁ ଅ଼ମୁ; ଏଚେଟିଏ ନା଼ନୁ ଏ଼ ଟା଼ୟୁତା ନା଼ ଡକ୍ରିନି ହା଼ତି ମାଡ଼୍ହାତି ମୁହ୍ଇଁ।”
ଏଚେଟିଏ ଇପ୍ରଣ ଅବ୍ରାହାମଇଁ ଏଲେଇଚେସି, “ବା଼ବୁ, ନା଼ କାତା ୱେନାମୁ, ବୂମିତି ଦାରା ସା଼ରି ୱାଞ୍ଜା ୱେଣ୍ତି ଆଦ୍ଲି, ନୀ ଅ଼ଡ଼େ ନା଼ ମାଦି ଏ଼ଦି ଏଚେକା ଆ଼ନେ ? ଏ଼ଦାଆଁତାକି ନୀନୁ ନୀ ଡକ୍ରିନି ହା଼ତି ମାଡ଼୍ହାତି ମୁହ୍ମୁ।” ଇପ୍ରଣତି ଈ କାତା ୱେଞ୍ଜାହାଁ ଅବ୍ରାହାମ ହୀତିୟ ମୀର୍କା ୱେଣ୍ମ୍ବେ ଇପ୍ରଣ ତା଼ଣାତି ଲେକା ତଲେ ଏଚିବେ଼ଲାତି ବେ଼ବାରା ଗାଟାରି ତା଼ଣା ୱେ଼ଙ୍ଗିତି ସା଼ରି ୱାଞ୍ଜା ୱେଣ୍ତି ଆଦ୍ଲି ତୂକ୍ହାଁ ଇପ୍ରଣକି ହୀତେସି।
ଏ଼ଦାଆଁତାକି ୱେ଼ଡ଼ା ହ଼ପୁ ୱାକିତି ମମ୍ରିତି ମକ୍ପେଲାତା ଇପ୍ରଣତି ଏମିନି ବୂମି ମାଚେ, ଏ଼ ବୂମି ଅ଼ଡ଼େ ଏମ୍ବାତି ପା଼ୱୁ ଇଞ୍ଜାଁ ଏମ୍ବାତି ସା଼ରିସୁଟୁତି ମା଼ର୍କା ଅବ୍ରାହାମୱାଇ ଆ଼ତୁ। ଈ ବାରେ ହେତ୍ତି ମୀର୍କା ନ଼କିତା ଇଚିହିଁ ତାମି ଗା଼ଡ଼ା ଦୁୱେରିଟି ହ଼ଡ଼୍ନି ବାରେ ଲ଼କୁ ନ଼କିତା ଅବ୍ରାହାମତି ଅଦିକାରା ତୀରି କିୱିଆ଼ତେ।
ଏଚେଟିଏ ଅବ୍ରାହାମ ମମ୍ରିତି ୱେ଼ଡ଼ା ହ଼ପୁୱାକିତି ମକ୍ପେଲା ବୂମିତି ପା଼ୱୁତା ତାନି ଡକ୍ରି ସାରାନି ମୁସ୍ତେସି। ଏ଼ ଟା଼ୟୁ କିଣାନ ଦେ଼ସାତି ହିବ୍ରଣ। ଇଲେକିହିଁ ମାହ୍ଣିମାଣ୍ତା କିହାଲି ତାକି ଏ଼ ବୂମି ଅ଼ଡ଼େ ଏମ୍ବାତି ପା଼ୱୁ ହେତ୍ତି ମୀର୍କା ତା଼ଣାଟି ଅବ୍ରାହାମକି ଅଦିକାରା ହୀପ୍କି ଆ଼ତେ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.