Kuvi Bible
ମୂଲୁ 14
ଅବ୍ରାମ ଲ଼ତଇଁ ଗେଲ୍ପିନାୟି
ଏଚେଟିଏ ସିନିୟରତି ଅମ୍ରାପଲ୍ ରାଜା, ଇଲ୍ଲାସରତି ଅରିୟକ ରାଜା, ଏଲମ୍ତି କଦର୍ଲାୟମ ରାଜା ଅ଼ଡ଼େ ଗୟିମତି ତିଦିୟଲ୍ ରାଜା ସା଼ଲୱି କିହିମାଚି ବେ଼ଲାତା। ଈୱାରି ସଦମତି ରାଜା ବିରା, ଗମରାତି ରାଜା ବିର୍ସା, ଅଦ୍ମାତି ରାଜା ସିନାବ୍, ସବୟିମତି ରାଜା ସିମେବର ଅ଼ଡ଼େ ବିଲା ଇଚିହିଁ, ସୟରତି ରାଜା ତଲେ ଜୁଜୁ କିତେରି। ଈ ବାରେ ଜା଼ଣା ସିଦିମ ବାଟାତା ଇଚିହିଁ ହା଼ରୁ ସାମ୍ଦୁରି1 ଦାରିତା ରୁଣ୍ତା ଆ଼ତେରି। ଏ଼ନାଆଁତାକି ଇଚିହିଁ ଏ଼ୱାରି ବା଼ର ବାର୍ସା ପାତେକା କଦର୍ଲାୟମ ରାଜା ତା଼ଣା ଡ଼ୟାହାଁ ତେ଼ର ବାର୍ସାତା ଏ଼ୱାଣି କ଼ପାଟି ନିଙ୍ଗାମାଚେରି। ଏ଼ଦାଆଁତାକି ସଦ ବାର୍ସାତା କଦର୍ଲାୟମ ରାଜା ଅ଼ଡ଼େ ତାନି ଜାଟୁତି ରାଜାୟାଁ ୱା଼ହାଁ ଅସ୍ତରତ୍ କର୍ନୟିମତା ରପାୟିୟ ଲ଼କୁଣି ଅ଼ଡ଼େ ହମତା ସୁସିୟ ଲ଼କୁଣି ଅ଼ଡ଼େ ସାବି କିରିୟାତୟିମତା ଏମିୟ ଲ଼କୁଣି, ଅ଼ଡ଼େ ଜା଼ଡ଼ା ଦାରିତି ଏଲ୍-ପାରଣ ପାତେକା ସେୟିର ହ଼ରୁତା ମାନି ହରିୟ ଲ଼କୁଣି ଜୀଣା ଆ଼ତେରି। ଅ଼ଡ଼େ, ଏ଼ୱାରି ଏ଼ ଟା଼ୟୁଟି ୱେଣ୍ତାହାଁ ଅୟିଣ୍ମିସ୍ପଟ୍, ଇଚିହିଁ, କାଦେସତା ହାଜାହାଁ ଅମାଲେକିୟ ଲ଼କୁତି ବାରେ ଦେ଼ସା ଅ଼ଡ଼େ ହତ୍-ସସନ୍-ତାମରତା ଡ଼ୟାମାନି ଇମରିୟ ଲ଼କୁଣି ହା଼ରୱି କିତେରି।
ଏ଼ଦାଆଁତାକି ସଦମତି ରାଜା, ଗମରାତି ରାଜା, ଅଦ୍ମାତି ରାଜା, ସବୟିମତି ରାଜା, ବିଲାତି ରାଜା, ଇଚିହିଁ, ସୟରତି ରାଜା, ଈ ପା଼ସା ଜା଼ଣା ରାଜାୟାଁ ଆଣ୍ତ୍ୱି ଆ଼ହାଁ, ଏଲମ୍ତି କଦର୍ଲାୟମ ରାଜା, ଗୟିମତି ତିଦିୟଲ୍ ରାଜା, ସିନିୟରତି ଅମ୍ରାପଲ୍ ରାଜା ଅ଼ଡ଼େ ଇଲ୍ଲାସରତି ଅରିୟକ ରାଜା, ଈ ସା଼ରି ଜା଼ଣା ରାଜାୟାଁ ତଲେ ସିଦିମ ବାଟାତା ଜୁଜୁ କିହାଲି ମା଼ଟ୍ହେରି। ଏ଼ ସିଦିମ ବାଟାତା ହା଼ରେକା ସୁନ୍ଦାଁ ଇର୍ଆତି କା଼ଦ ଗା଼ଡ଼୍ଙ୍ଗା ମାଚୁ; ସଦମ ଅ଼ଡ଼େ ଗମରାତି ରାଜାୟାଁ ହଟି ହଟିହିଁ ଏମ୍ବାଆଁ ରିତେରି, ଇଞ୍ଜାଁ, ଆମ୍ବାଆରି ଡ଼ୟାମାଚେରି, ଏ଼ୱାରି ହ଼ରୁତା ହଟେରି। ଇଲେକିହିଁ ଈ ସା଼ରି ଜା଼ଣା ରାଜାୟାଁ ଏ଼ ସଦମ ଅ଼ଡ଼େ ଗମରାତି ବାରେ ଦ଼ନ ଦୂହା ଅ଼ତେରି। ଇଞ୍ଜାଁ ଅବ୍ରାମତି ତାୟି ମୀର୍ଏସି ସଦମ ଗା଼ଡ଼ାତା ମାଚି ଲ଼ତଇଁ, ଅ଼ଡ଼େ ତାନି ବାରେ ଦ଼ନ ଅ଼ହିଁ ହାଚେରି।
ଏଚିବେ଼ଲାତା ର଼ ଏବ୍ରି ଲ଼କୁ ହଟାହାଁ ଅବ୍ରାମଇଁ କାବ୍ରୁ ହୀତେସି; ଏ଼ ବେ଼ଲାତା ଅବ୍ରାମ ଇସ୍କଲ୍ ଅ଼ଡ଼େ ଆନେର୍ତି ତାୟି ଇମରିୟ ମମ୍ରିତି ଅଲନ୍ ମା଼ର୍ନୁ ଡ଼଼ଇ ବାସା କିହିମାଚେସି, ଇଞ୍ଜାଁ ଏ଼ୱାରି ଅବ୍ରାମତି ଜାଟୁ ମାଚେରି। ଏଚିବେ଼ଲା ଅବ୍ରାମ ତାମି ଲ଼କୁଣି ଆସାଅ଼ତି କାତା ୱେଞ୍ଜାହାଁ, ଜୁଜୁତା ଜା଼ପାମାନି ତାନି ଇଜ ଜାର୍ନାଆ଼ତି ତୀନି ୱାଞ୍ଜା ଅଟର ଜା଼ଣାଇଁ ତାନି ତଲେ ଅ଼ହିଁ ସାତ୍ରୁୟାଁ ଜେ଼ଚ ଦାନ୍ ଗା଼ଡ଼ା ପାତେକା ହାଚେସି। ଏଚେଟିଏ ଏ଼ୱାସି ତାନି ହ଼ଲିୟାଙ୍ଗାଣି ରୀ ଗଚି କିହାଁ ଲା଼ଆଁୟାଁ ବେ଼ଲାତା ସାତ୍ରୁୟାଁଣି ଜୁଜୁ କିତେସି, ଇଞ୍ଜାଁ ଏ଼ୱାରାଇଁ ହା଼ରୱି କିହାଁ, ଦମେସକତି ଟେ଼ବ୍ରି ୱାକିତି ହବା ପାତେକା ଏ଼ୱାରି ଜେ଼ଚ ପେ଼ର୍ହେରି। ଅ଼ଡ଼େ ଦୂହା ଅ଼ହାମାଚି ବାରେ ଦ଼ନ, ତାନି ତାୟି ମୀର୍ଏସି ଲ଼ତ ଇଞ୍ଜାଁ ଏ଼ୱାଣି ଦ଼ନ, ଇଞ୍ଜାଁ ଆୟାସିକା ଅ଼ଡ଼େ ଲ଼କୁଣି ୱେଟ୍ହା ତାତେସି।
ମଲ୍କିସେଦକ ଅବ୍ରାମକି ବ଼ର
ଇଲେକିଁ ଅବ୍ରାମ କଦର୍ଲାୟମଇଁ ଅ଼ଡ଼େ ତାନି ଜାଟୁତି ରାଜାୟାଁଣି ଜୀଣା ଆ଼ହାଁ ୱା଼ତି ଡା଼ୟୁ, ସଦମତି ରାଜା ଅବ୍ରାମ ତଲେ କାତା ଆ଼ହାଲି ସାବି ଗୁଡିୟା, ଇଚିହିଁ, ରାଜାତି ଗୁଡିୟାତା ହାଚେସି। ଇଞ୍ଜାଁ, ସାଲେମ୍ତି2 ରାଜା ମଲ୍କିସେଦକ ରୂଟି ଅ଼ଡ଼େ ଅଙ୍ଗୁରି ରାସା ଆସାହାଁ ୱା଼ତେସି, ଏ଼ୱାସି ବାରେ କିହାଁ କାଜା ମାହାପୂରୁତି ପୂଜେରା; ଏ଼ୱାସି ଅବ୍ରାମକି ବ଼ର ହୀହାଁ ଏଲେଇଚେସି, “ଲାକପୂରୁ ଅ଼ଡ଼େ ଦାର୍ତିତି ଅଦିକାରାଗାଟି ବାରେ କିହାଁ କାଜା ମାହାପୂରୁତି ବ଼ର ବେଟାଆ଼ମୁ; ବାରେ କିହାଁ କାଜା ମାହାପୂରୁଇଁ ଜହରା ଆ଼ପେ, ଏ଼ୱାସି ମୀ ସାତ୍ରୁୟାଁଣି ମୀ କେୟୁତା ହେର୍ପାତେସି!” ଏଚିବେ଼ଲା ଅବ୍ରାମ ବାରେ ଆ଼ସ୍ତିଟି ଦସ ବା଼ଗାଟି ର଼ ବା଼ଗା ମଲ୍କିସେଦକକି ହୀତେସି।
ଏଚେଟିଏ ସଦମତି ରାଜା ଅବ୍ରାମଇଁ ଏଲେଇଚେସି, “ନୀନୁ ବାରେ ଦ଼ନ ଅ଼ମୁ, ସାମା ନା଼ ଲ଼କୁଣି ନାଙ୍ଗେ ହିୟାମୁ।”
ଏଚେଟିଏ ଅବ୍ରାମ ସଦମତି ରାଜାଇଁ ଏଲେଇଚେସି, “ନା଼ନୁ ଲାକପୂରୁ ଅ଼ଡ଼େ ଦାର୍ତି ଅଦିକାରା ଗାଟି ବାରେ କିହାଁ କାଜା ପ୍ରବୁ କାଜା ମାହାପୂରୁ ତା଼ଣା ପାର୍ମାଣା କିହାଁ ୱେସିମାଞ୍ଜାଇଁ, ନା଼ନୁ ନୀଦାଆଁ ଏ଼ନାଆଁ ଅ଼ଅଁ, ଲୂଲୁ ଗାଣ୍ତ୍ରା ଆ଼ପେ କି ପା଼ଣ୍ତେୟିତି ଡ:ରି ଜିକେଏ ଅ଼ଅଁ; ଡା଼ୟୁ ନୀନୁ ଏଲେଇଞ୍ଜାଦି, ‘ନା଼ନୁ ଅବ୍ରାମଇଁ ବାତ୍କି କିତେଏଁ।’ ୱାର୍ଇ ନା଼ ଦାଂଗ୍ଣାୟାଁ ଏ଼ନାଆଁ ତିଞ୍ଜା ମାନେରି, ଏ଼ଦାଆଁ ଅ଼ଇଁ, ଅ଼ଡ଼େ ଏମିନି ନା଼ ସା଼ୟେମି କିନାରି ନା଼ ତଲେ ହାଜାମାଚେରି, ଏ଼ୱାରି, ଇଚିହିଁ, ଆନେର୍ ଅ଼ଡ଼େ ଇସ୍କଲ୍ ଅ଼ଡ଼େ ମମ୍ରି ତାମି ବା଼ଗା ଅ଼ପେରି।”
Source notes (2)
- Footnote ଏ଼ଦି ନୀଏଁ ହା଼ତି ସାମ୍ଦୁରି
- Footnote ଜିରୁସାଲମ
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.