Kuvi Bible
ଏଜ୍ରା 10
ଲ଼କୁତି ପା଼ପୁ ୱେ଼କ୍ନାୟି
ଏଜ୍ରା ମାହାପୂରୁ ଇଲୁ ନ଼କିତା ପ୍ରା଼ତାନା, ଜାହାରା ପା଼ପୁତି ୱେ଼କ୍ହାନା, ଡ଼ୀହାଁ, ଜହରା କିନି ବେ଼ଲାତା ଇସ୍ରାୟେଲ ବିତ୍ରାଟି ଆ଼ବାୟାଁ ଅ଼ଡ଼େ ଆୟାସିକା, କକାରି, ପ଼ଦାୟାଁ ର଼ କାଜା କୁଲମି ଏ଼ୱାଣି ନ଼କିତା ରୁଣ୍ତା ଆ଼ହାମାଚେରି; ଇଚିହିଁ ଲ଼କୁ ହା଼ରେକା ଡ଼ୀତେରି। ଏଚେଟିଏ ଏଲମ୍ତି ମୀର୍କା ବିତ୍ରାଟି ଜିହିୟେଲ ମୀର୍ଏସି ସକନିୟ ଏଜ୍ରାଇଁ ଏଲେଇଚେସି, “ମା଼ମ୍ବୁ ମା଼ ମାହାପୂରୁ କ଼ପାଟି ସାତାତି ଊରାହାଁ ଏଟ୍କା ଦେ଼ସା କୂଡ଼ାତି ଆୟାସିକାଣି ବୀହା ଆ଼ହାମାନମି; ଆ଼ତି ଜିକେଏ ନୀଏଁ ଜିକେଏ ଇସ୍ରାୟେଲ ୱାକି ବା଼ର୍ସୁ ମାନେ। ଏ଼ଦାଆଁତାକି ନୀଏଁ ମା଼ମ୍ବୁ ପ୍ରବୁ ମା଼ ମାହାପୂରୁତି ହୁକୁମିତା ତୀର୍ଗିମାନି ଲ଼କୁତି କାତା ଲେହେଁ ଈ ବାରେ ଡକ୍ରିସିକା ଅ଼ଡ଼େ ଏ଼ୱାସିକା ତା଼ଣାଟି ଜାର୍ନା ଆ଼ହାମାନି ବାରେତି ହେକ କିହାଲି ତାକି ମା଼ ମାହାପୂରୁ ତଲେ ମେ଼ରା କିନମି; ଅ଼ଡ଼େ ଈଦି ମେ଼ରା ଲେହେଁ କିୱିଆ଼ପେ। ନିଙ୍ଗାମୁ, ଇଚିହିଁ ନୀ ମୁହେଁ ଈ କାମାତି ବ଼ଜୁ ମାନେ ଅ଼ଡ଼େ ମା଼ମ୍ବୁ ନୀ ତଲେ ମାନମି; ସା଼ସା ଆସାହାଁ ଈ କାମା କିଦୁ।”
ଏଚେଟିଏ ଏଜ୍ରା ନିଙ୍ଗାହାଁ ଈ ବ଼ଲୁ ତଲେ କାମା କିହାଲି ପୂଜେରାଙ୍ଗା, ଲେ଼ବିୟଙ୍ଗା, ଅ଼ଡ଼େ ବାରେ ଇସ୍ରାୟେଲତି କାଜାରାଇଁ ପାର୍ମାଣା କିୱିକିତେସି। ଏଚେଟିଏ ଏ଼ୱାରି ପାର୍ମାଣା କିତେରି। ଏଚେଟିଏ ଏଜ୍ରା ମାହାପୂରୁ ଇଲୁ ନ଼କିତା ନିଙ୍ଗାହାଁ ଇଲିୟାସିବ ମୀର୍ଏସି ଜିହହାନନ୍ ବାକ୍ରାତା ହାଚେସି; ଏମ୍ବାଆଁ ହାଜାହାଁ ରୂଟି ତିନାଆତେସି କି ଏ଼ୟୁ ଗହ୍ଆତେସି; ଇଚିହିଁ ଏ଼ୱାସି ବାବିଲତା ମାନି ଲ଼କୁତି ସାତା ଊରାମାନାକି ଅଣ୍ପିହିଁ ଡ଼ୀହିମାଚେସି।
ଏଚେଟିଏ ଲ଼କୁ ଜୀହୁଦା ଅ଼ଡ଼େ ଜିରୁସାଲମତି ବାରେ ଦସ୍ପି ଆ଼ହାମାନି ମୀର୍କା ତା଼ଣା ୱେ଼କ୍ହାନା ଏଲେଇଚେରି, “ଏ଼ୱାରି ଜିରୁସାଲମତା ରୁଣ୍ତା ଆ଼ପେରି; କାଜାରି ଅ଼ଡ଼େ ପ୍ରାଚିନାଙ୍ଗାତି କାତା ତଲେ ଆମ୍ବାଆସି ତୀନି ଦିନା ବିତ୍ରା ୱା଼ଅସି, ଏ଼ୱାଣି ବାରେ ଦ଼ନବିତି ନସ୍ତ କିୱିଆ଼ନେ, ଅ଼ଡ଼େ ଏ଼ୱାସି ଦସ୍ପି ଆ଼ହାମାନି କୁଟମିଟି ଏଟ୍କା କିୱିଆ଼ନେସି।”
ଏଚେଟିଏ ଜୀହୁଦା ଅ଼ଡ଼େ ବିନ୍ୟାମିନ୍ ବାରେ ଲ଼କୁ ତୀନି ଦିନା ବିତ୍ରା ଜିରୁସାଲମତା ରୁଣ୍ତା ଆ଼ତେରି, ଏ଼ ନ଼ ଲେ଼ଞ୍ଜୁତି କଡ଼େ ଦିନା ମାଚେ; ଅ଼ଡ଼େ ବାରେ ଲ଼କୁ ମାହାପୂରୁ ଇଲୁ ନ଼କିତି ଡେ଼ଡ଼ାତା କୁଗାହାଁ ଏ଼ କାତା ତାକି ଅ଼ଡ଼େ କାଜା ପିୟୁ ତାକି ତୀର୍ଗି ମାଚେରି। ଏଚେଟିଏ ଏଜ୍ରା ପୂଜେରା ନିଚାହାଁ ଏ଼ୱାରାଇଁ ଏଲେଇଚେସି, “ମୀରୁ ସାତାତି ଊରାମାଞ୍ଜେରି, ଅ଼ଡ଼େ ଇସ୍ରାୟେଲତି ଦ଼ହ ପାଡିକିହାଲି ତାକି ଏଟ୍କା ଦେ଼ସାତି ଆୟାସିକାଣି ବୀହା ଆ଼ହାମାଞ୍ଜେରି। ଏ଼ଦାଆଁତାକି ନୀଏଁ ମୀ ଆକୁୟାଁତି ମାହାପୂରୁ ପ୍ରବୁ ନ଼କିତା ମୀ ପା଼ପୁତି ୱେ଼କ୍ଦୁ ଅ଼ଡ଼େ ଏ଼ୱାଣି ରା଼ହାଁତି କାମା କିଦୁ; ଏଟ୍କା କୂଡ଼ାତି ଲ଼କୁ ତା଼ଣାଟି ଅ଼ଡ଼େ ଏଟ୍କା ଦେ଼ସାତି ଆୟାସିକା ତା଼ଣାଟି ମୀରୁ ଏଟ୍କା ଆ଼ଦୁ।”
ଏଚିବେ଼ଲା ବାରେ କୁଲମି କାଜା ଗିୟାଁ ତଲେ ଏଲେଇଚେରି, “ନୀନୁ ମାଙ୍ଗେ ଏ଼ନିକିଁ ୱେସ୍ତାଦି, ମା଼ମ୍ବୁ ଏଲେକିହିଁ କିହାଲି ଆ଼ନେ। ସାମା ଲ଼କୁ ହା଼ରେକା ଅ଼ଡ଼େ ନୀଏଁ ହା଼ରେକା ପିୟୁ ବେ଼ଲା, ଅ଼ଡ଼େ ମା଼ମ୍ବୁ ପାଙ୍ଗାତା ନିଚାଲି ଆ଼ଡଅମି, ଇଚିହିଁ ଈଦି ର଼ ଦିନା କି ରୀ ଦିନାତି କାମା ଆ଼ଏ; ମା଼ମ୍ବୁ ଈ କାତାତାକି ହା଼ରେକା ଦ଼ହ କିହାମାନମି। ଏ଼ଦାଆଁତାକି ବାରେ କୁଲମି ତାକି ମା଼ କାଜାରି ଆ଼ଚ୍ୱି ଆ଼ପେରି, ଇଞ୍ଜାଁ ମା଼ ମାହାପୂରୁତି କ଼ପା ମା଼ ତା଼ଣାଟି ଊଣା ଆ଼ନି ପାତେକା ଅ଼ଡ଼େ ଈ କାତା ତୀରିନି ପାତେକା ମା଼ ଗା଼ଡ଼ାତି ଏମିନି ଲ଼କୁ ଏଟ୍କା ଦେ଼ସାତି ଆୟାସିକାଣି ବୀହା ଆ଼ହାମାନେରି, ଏ଼ୱାରି ବାରେ ତୀରି କିହାମାନି ବେ଼ଲାତା ୱା଼ପେରି ଅ଼ଡ଼େ ଏ଼ୱାରି ତଲେ ବାରେ ଗା଼ଡ଼ାୟାଁତି ପ୍ରାଚିନାଙ୍ଗା ଅ଼ଡ଼େ ନୀହାଁୟି କିନାରି ୱା଼ପେରି।”
ଈ କାତା କ଼ପାଟି ଅସାହେଲ ମୀର୍ଏସି ଜନାତନ ଅ଼ଡ଼େ ତିକ୍ବ ମୀର୍ଏସି ଜହସିୟ ନିଙ୍ଗିତେରି, ଅ଼ଡ଼େ ମସୁଲମ୍ ଅ଼ଡ଼େ ଲେ଼ବିୟ ସବତୟ ଏ଼ୱାରାଇଁ ସା଼ୟେମି କିତେରି। ସାମା ବାବିଲଟି ୱେଣ୍ତା ୱା଼ହାମାନି ମୀର୍କା ଏଲେକିଁ କାମା କିତେରି। ଇଞ୍ଜାଁ ଏଜ୍ରା ପୂଜେରା ଅ଼ଡ଼େ ଜାହାରା ଜାହାରା ତାଞ୍ଜି କୂଡ଼ାତି ଲେକା ତଲେ ଅ଼ଡ଼େ ଦ଼ରୁ ତଲେ ତୀରି କିହାମାନି ତାଞ୍ଜି କୂଡ଼ାତି ଏଚେକା କାଜା ଲ଼କୁ ଏଟ୍କା କିୱିଆ଼ତେରି; ଅ଼ଡ଼େ ଏ଼ୱାରି ଦସ ଲେ଼ଞ୍ଜୁତି ମୂଲୁ ଦିନା ଏ଼ କାତା ପାରାଲି କୁଗିତେରି। ଇଞ୍ଜାଁ ଏ଼ୱାରି ମୂଲୁ ଲେ଼ଞ୍ଜୁତି ମୂଲୁ ଦିନାତା ଏଟ୍କା ଦେ଼ସାତି ଆୟାସିକାଣି ବୀହା ଆ଼ହାମାନି ବାରେ ଆ଼ବାୟାଁତି ନୀହାଁୟି ରା଼ପ୍ହେରି।
ଏଟ୍କା ଦେ଼ସାତି ଡକ୍ରିସିକା ମାନି ଲ଼କୁ
ପୂଜେରାଙ୍ଗା ମୀର୍କା ବିତ୍ରାଟି ଆମିନିଗାଟାରି ଏଟ୍କା ଦେ଼ସାତି ଡକ୍ରିସିକା ବୀହା ଆ଼ହାମାଚେରି, ଏ଼ୱାରି ଆ଼ତେରି, ଜସାଦକ ମୀର୍ଏସି ଜେସୁୟ ମୀର୍କା ଅ଼ଡ଼େ ତାମି ତାୟିୟାଁ ବିତ୍ରାଟି ମାସେୟ, ଇଲିୟେଜର, ଜାରିବ ଅ଼ଡ଼େ ଗଦଲିୟ। ଈୱାରି ଜାହା ଜାହାରା ଡକ୍ରିସିକାଣି ହେକ କିନମି ଇଞ୍ଜିଁ ପାର୍ମାଣା କିହାଁ କାତା ହୀତେରି; ଅ଼ଡ଼େ ଦ଼ହ ଆ଼ତାକି ଏ଼ୱାରି ଜାହାରା ଜାହାରା ଦ଼ହ ତାକି ଗଟାଟି ର଼ ର଼ ମେ଼ଣ୍ତା ପୂଜା ହେର୍ପିତେରି।
ଇମ୍ମେର ମୀର୍କା ବିତ୍ରାଟି ହନାନି ଅ଼ଡ଼େ ସବଦିୟ ଅ଼ଡ଼େ ହାରିମ ମୀର୍କା ବିତ୍ରାଟି ମାସେୟ, ଏଲିୟ, ସମୟିୟ, ଜିହିୟେଲ ଅ଼ଡ଼େ ଉସିୟ; ଅ଼ଡ଼େ ପସ୍ହୁର ମୀର୍କା ବିତ୍ରାଟି ଇଲିୟଅଇନୟ, ମାସେୟ, ଇସ୍ମାୟେଲ, ନତନେଲ, ଜସାବଦ୍ ଅ଼ଡ଼େ ଇଲିୟାସା।
ଅ଼ଡ଼େ ଲେ଼ବିୟ ଲ଼କୁ ବିତ୍ରାଟି ଜସାବଦ୍, ସିମିୟି ଅ଼ଡ଼େ କଲାୟ ଈୱାଣାଇଁ କଲିଟ ଇନେରି, ପତାହିୟ, ଜୀହୁଦା ଅ଼ଡ଼େ ଇଲିୟେଜର।
ପା଼ଚିନାରା ବିତ୍ରାଟି ଇଲିୟାସିବ; ଦୁୱେରିତା କା଼ଃନାରି ବିତ୍ରାଟି ସଲୁମ୍, ଟେଲମ୍ ଅ଼ଡ଼େ ଊରି।
ଇସ୍ରାୟେଲ ବିତ୍ରା ପରିୟସ ମୀର୍କା ବିତ୍ରାଟି ରମିୟ, ଜିସିୟ, ମଲ୍କିୟ, ମିୟାମିନ୍, ଇଲିୟାସର, ମଲ୍କିୟ, ଅ଼ଡ଼େ ବନାୟ।
ଏଲମ୍ ମୀର୍କା ବିତ୍ରାଟି ମତନିୟ, ଜିକରିୟ, ଜିହିୟେଲ, ଅବ୍ଦି, ଜେରେମତ୍ ଅ଼ଡ଼େ ଏଲିୟ।
ସତୁ ମୀର୍କା ବିତ୍ରାଟି ଇଲିୟଅଇନୟ, ଇଲିୟାସିବ, ମତନିୟ, ଜେରେମତ୍, ସାବଦ୍ ଅ଼ଡ଼େ ଅସିସା।
ବେବୟ ମୀର୍କା ବିତ୍ରାଟି ଜିହହାନନ୍, ହନାନିୟ, ସବେୟ ଅ଼ଡ଼େ ଅତଲୟ।
ବାନି ମୀର୍କା ବିତ୍ରାଟି ମସୁଲମ୍, ମଲୁକ, ଅଦାୟା, ଜାସୁବ, ସାଲ ଅ଼ଡ଼େ ଜିରେମତ୍।
ପହତ୍-ମୟାବ ମୀର୍କା ବିତ୍ରାଟି ଅଦନ୍, କଲାଲ, ବନାୟ, ମାସେୟ, ମତନିୟ, ବସ୍ଚଲେଲ, ବିନୁୟି ଅ଼ଡ଼େ ମନଃସି।
ହାରିମ ମୀର୍କା ବିତ୍ରାଟି ଇଲିୟେଜର, ଜିସିୟ, ମଲ୍କିୟ, ସମୟିୟ ଅ଼ଡ଼େ ସିମିୟନ; ବିନ୍ୟାମିନ୍, ମଲୁକ ଅ଼ଡ଼େ ସେମରିୟ।
ହସୁମ ମୀର୍କା ବିତ୍ରାଟି ମତନୟ, ମତତ, ସାବଦ୍, ଇଲିପେଲଟ୍, ଜିରେମୟ, ମନଃସି ଅ଼ଡ଼େ ସିମିୟି।
ବାନି ମୀର୍କା ବିତ୍ରାଟି ମାଦୟ, ଅମ୍ରାମ୍ ଅ଼ଡ଼େ ଉୟେଲ। ବନାୟ, ବେଦିୟା, କଲୁହୁ, ବନିୟ, ମରେମତ୍, ଇଲିୟାସିବ; ମତନିୟ, ମତନୟ, ଅ଼ଡ଼େ ଜାସୟ।
ବାନି, ବିନୁୟି, ସିମିୟି; ସେଲିମିୟ, ନାତନ, ଅଦାୟା; ମଗ୍ନଦବୟ, ସାସୟ, ସାରୟ; ଅସରେଲ, ସେଲିମିୟ, ସେମରିୟ; ସଲୁମ୍, ଅମରିୟ, ଜସେପ।
ନବ ମୀର୍କା ବିତ୍ରାଟି ଜିୟିୟେଲ, ମତତିୟ, ସାବଦ୍, ସବିନ, ଜଦୟ, ଜୟେଲ ଅ଼ଡ଼େ ବନାୟ; ଈ ବାରେ ଜା଼ଣା ଏଟ୍କା ଦେ଼ସାତି ଡକ୍ରିସିକା ଇଟାମାଚେରି; ଅ଼ଡ଼େ ଏ଼ ଡକ୍ରିସିକା ତା଼ଣାଟି ଆମ୍ବା ଆମ୍ବାଆରି କକାରି ପ଼ଦାୟାଁ ଜାର୍ନା ଆ଼ହାମାଚେରି1।
Source notes (1)
- Footnote ଏ଼ ଡକ୍ରିସିକା ତା଼ଣାଟି ଆମ୍ବା ଆମ୍ବାଆରି କକାରି ପ଼ଦାୟାଁ ଜାର୍ନା ଆ଼ହାମାଚେରି ଏ଼ୱାରି ଡକ୍ରିସିକାଣି ଜାହାରା ମୀର୍କା ମା଼ସ୍କା ତଲେ ପାଣ୍ତାମାଚେରି
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.