Kuvi Bible
ହାନାୟି 9
ପା଼ସା ଲମ୍ବର ଡଣ୍ତ - ଜ଼ନ୍ତତି ହା଼କି
ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ପା଼ର ତା଼ଣା ହାଜାହାଁ ଏ଼ୱାଣାଇଁ ଏଲେଇନାମୁ, ଏବ୍ରିୟ ଲ଼କୁତି ପ୍ରବୁ ମାହାପୂରୁ ଈ କାତା ଏଲେଇଞ୍ଜି ମାନେସି, ‘ନା଼ ସେ଼ବା କିହାଲି ତାକି ନୀନୁ ନା଼ ଲ଼କୁଣି ପିସା ହିୟାମୁ। ସାମା ଏ଼ୱାରାଇଁ ହାଜାଲି ହୀଆନା ନୀଏଁ ଜିକେଏ ସା଼ସ୍ତି ହୀଦି, ଆତିହିଁ ମେହ୍ମୁ, ମୀ ଜା଼ଡ଼ାତି ଗ଼ଡ଼ା, ଗା଼ଡ଼୍ଦେ, ଊଟୁ, କ଼ଡିୟାଁ ମେ଼ଣ୍ତାୟାଁ ଜ଼ନ୍ତ ଲାକ ପ୍ରବୁତି କେୟୁ ମାନେ; ଏ଼ଦାଆଁତାକି ହା଼ରେକା ମର୍ଡ଼ି ୱା଼ନେ। ସାମା ପ୍ରବୁ ଇସ୍ରାୟେଲ ଅ଼ଡ଼େ ମିସର ଲ଼କୁତି ଜ଼ନ୍ତ ବିତ୍ରା ପାର୍ଡ଼ା କିନେସି; ଏଚେଟିଏ ଇସ୍ରାୟେଲ ଲ଼କୁତି ର଼ ଜ଼ନ୍ତ ଜିକେଏ ହା଼ଉ। ପ୍ରବୁ ଦିନା ତୀରି କିହାମାନେସି, ୱିଏ ପ୍ରବୁ ଈ ଦେ଼ସାତା ଈ କାମା କିନେସି।’”
ତାନି ଅ଼ର ଦିନା ପ୍ରବୁ ଏ଼ କାମା କିତେସି, ଏଚେଟିଏ ମିସର ଲ଼କୁତି ବାରେ ଜ଼ନ୍ତ ହା଼ତୁ; ସାମା ଇସ୍ରାୟେଲ ଲ଼କୁତି ଜ଼ନ୍ତ ବିତ୍ରାଟି ରଣ୍ତି ଜିକେଏ ହା଼ଆତୁ। ଏଚେଟିଏ ପା଼ର ଲ଼କୁଣି ପାଣ୍ତାହାଁ ଇସ୍ରାୟେଲ ଲ଼କୁତି ରଣ୍ତି ଜିକେଏ କ଼ଡି ଗରି ହା଼ହା ହିଲାଆଗାଟାଣି ମେସ୍ତେସି, ଆ଼ତି ଜିକେଏ ପା଼ରତି ହିୟାଁ ଆ଼ଟ୍ୱା ଆ଼ତେ, ଅ଼ଡ଼େ ଲ଼କୁଣି ହାଜାଲି ହୀଆତେସି।
ସ଼ଲମ୍ବର ଡଣ୍ତ - ବୀସାଗାଟି ମା଼ଦୁୟାଁ
ପ୍ରବୁ ମ଼ସା ଅ଼ଡ଼େ ହାରଣଇଁ ଏଲେଇଚେସି, “ମୀରୁ ମୁଟି ନେଞ୍ଜି କିହାଁ ହଲୁତି ଦାର୍ମ୍ବୁ ଅ଼ଦୁ, ଇଞ୍ଜାଁ ମ଼ସା ପା଼ର ନ଼କିତା ଏ଼ଦାଆଁ ହା଼ଗୁ ୱାକି ଡ଼ାଞ୍ଜାପେସି। ଏଚେଟିଏ ଏ଼ଦି ବାରେ ମିସର ଦେ଼ସାତା ଊଣା ଦୂଡ଼ି ଆ଼ହାଁ ମିସରତି ବାରେ ଲ଼କୁ ଅ଼ଡ଼େ କ଼ଡି ଗରି ଆଙ୍ଗାତା ବୀସାଗାଟି ମା଼ଦୁୟାଁ ଆ଼ନୁ।” ଏଚେଟିଏ ମ଼ସା ହଲୁତି ଦାର୍ମ୍ବୁ ଅ଼ହାଁ ପା଼ର ନ଼କିତା ନିତେସି; ଇଞ୍ଜାଁ ମ଼ସା ଏ଼ଦାଆଁ ହା଼ଗୁ ୱାକି ଡ଼ାଞ୍ଜାଲିଏ, ବାରେ ମାଣ୍ସି ଅ଼ଡ଼େ କ଼ଡି ଗରି ଆଙ୍ଗାତା ବୀସାଗାଟି ମା଼ଦୁୟାଁ ଆ଼ତୁ। ଏ଼ ମା଼ଦୁୟାଁ ତାକି ଗୂର୍କା ମ଼ସା ନ଼କିତା ନିଚାଲି ଆ଼ଡାଆତେରି; ଇଚିହିଁ ଗୂର୍କା ଅ଼ଡ଼େ ବାରେ ମିସରତି ଲ଼କୁ ଆଙ୍ଗାତା ମା଼ଦୁୟାଁ ଆ଼ତୁ। ଏଚେଟିଏ ପ୍ରବୁ ପା଼ରତି ହିୟାଁ ଆ଼ଟ୍ୱା କିତେସି, ଅ଼ଡ଼େ ଏ଼ନିକିଁ ପ୍ରବୁ ମ଼ସାଇଁ ଏଲେଇଞ୍ଜାମାଚେସି, ଏ଼ୱାସି ଏ଼ୱାରି କାତା ୱେନାଆତେସି।
ସା଼ତା ଲମ୍ବର ଡଣ୍ତ - ଆ଼ଜିୟାଁ
ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ଲା଼ଇ ନିଙ୍ଗାହାଁ ପା଼ର ନ଼କିତା ନିଚାହାଁ ଏ଼ୱାଣାଇଁ ଈ କାତା ଏଲେଇନାମୁ, ଏବ୍ରିୟ ଲ଼କୁତି ପ୍ରବୁ ମାହାପୂରୁ ଏଲେଇଞ୍ଜି ମାନେସି, ନା଼ ସେ଼ବା କିୟାଲି ନା଼ ଲ଼କୁଣି ହାଜାଲି ହୀମୁ; ଆ଼ଆସାରେ ନୀଏଟି ନା଼ନୁ ନୀ ହିୟାଁ କ଼ପାଟି, ଅ଼ଡ଼େ, ନୀ ହ଼ଲିୟାଙ୍ଗା ଅ଼ଡ଼େ ଲ଼କୁ ବିତ୍ରା ବାରେ କୂଡ଼ାତି ମର୍ଡ଼ି ପାଣ୍ତାଇଁ; ଏଚେଟିଏ ବାରେ ଦାର୍ତିତା ନା଼ ଲେହେଁ ଆମ୍ବାଆସି ହିଲଅସି, ଈ କାତା ନୀନୁ ପୁଞ୍ଜି। ଇଚିହିଁ ନୀଏଁ ଜିକେଏ ନା଼ନୁ ନା଼ କେୟୁ ଦା଼ସାହାଁ ମର୍ଡ଼ି ତଲେ ନିଙ୍ଗେ ଅ଼ଡ଼େ ନୀ ଲ଼କୁଣି ନା଼ସା କିତେଏଁନେଏମା, ଇଞ୍ଜାଁ ନୀନୁ ଦାର୍ତିଟି ନା଼ସା ଆ଼ହାଁ ରା଼ତିଏମା; ସାମା ନିଙ୍ଗେ ନା଼ ବା଼ଡ଼୍ୟୁ ତ଼ସାଲି ଅ଼ଡ଼େ ବାରେ ଦାର୍ତିତା ଏ଼ନିକିଁ ନା଼ ଦ଼ରୁ ଗା଼ୱୁରମି କିନେରି, ଏ଼ଦାଣିତାକି ନା଼ନୁ ନିଙ୍ଗେ ସାତେଏ ଇଟାମାଞ୍ଜାଇଁ। ଆ଼ତିଜିକେଏ ନୀନୁ ନା଼ ଲ଼କୁଣି ହାଜାଲି ହୀଆନା ଏ଼ୱାରି ମୁହେଁ ବଡପଣ କିହିମାଞ୍ଜି ? ମେହ୍ମୁ, ନା଼ନୁ ୱିଏ ଈ ବେ଼ଲାତା ମିସର ଦେ଼ସାତା ଇଲେତି ଆ଼ଜିୟାଁ ରିୱିକିଇଁ, କି ମିସର ଦେ଼ସାତା ଏଚେଲାୱା ଇଲେତି ଆ଼ଜିୟାଁ ରିହାହିଲାଉ। ଈଦାଆଁତାକି ନୀଏଁ ଲ଼କୁଣି ପାଣ୍ତାହାଁ ଗୁଡିୟାତା ମୀ ଏମିନି କ଼ଡି ଗରି ମାନୁ, ଏ଼ୱାଆଁ ବାରେ ତବେ ତାପିକିଦୁ, ଇଚିହିଁ ଆମିନି ମାଣ୍ସି କି କ଼ଡି ଗରି ପାଙ୍ଗାତା ଡ଼ୟିନୁ, ଇଜ ତାପିଆ଼ଉ, ଏ଼ୱାରି ଲାକ ଆ଼ଜିୟାଁ ରିତିସାରେ ଏ଼ୱାରି ହା଼ନେରି।” ଏଚିବେ଼ଲା ପା଼ରତି ହ଼ଲିୟାଙ୍ଗା ବିତ୍ରାଟି ଆମିନି ମାଣ୍ସି ପ୍ରବୁତି ବ଼ଲୁତା ଆଜିତେସି, ଏ଼ୱାସି ତବେ ତାମି ହ଼ଲେଏଣାଇଁ ଇଞ୍ଜାଁ କ଼ଡି ଗରି ଇଜ ତାତେସି। ସାମା ଆମ୍ବାଆସି ପ୍ରବୁତି ବ଼ଲୁତା ମ଼ନ ହୀଆତେସି, ଏ଼ୱାସି ତାମି ହ଼ଲିୟାଙ୍ଗା ଅ଼ଡ଼େ ଜ଼ନ୍ତତି ପାଙ୍ଗାତା ପିସ୍ତେସି।
ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ହା଼ଗୁ ୱାକି ନୀ କେୟୁ ଦା଼ହ୍ମୁ, ଏଚେଟିଏ ମିସରତି ବାରେ ମାଣ୍ସି, କ଼ଡି ଗରି ଅ଼ଡ଼େ ଗୁଡିୟାତି ବାରେ ମକ ଲାକ ଆ଼ଜିୟାଁ ରିନୁ।” ଏଚେଟିଏ ମ଼ସା ତାନି ବାଡ଼୍ଗା ହା଼ଗୁୱାକି ଦା଼ସାଲିଏ, ପ୍ରବୁ ହା଼ଗୁ ଗୂଣ୍ହିଁ ଆ଼ଜିୟାଁ ରିୱିକିତେସି; ଇଞ୍ଜାଁ ହା଼ଗୁ ମ୍ଣିହ୍ନାୟି ଦାର୍ତିତା ଏଗାୱା଼ତେ; ଇଲେକିହିଁ ପ୍ରବୁ ମିସର ଦେ଼ସାତା ଆ଼ଜିୟାଁ ରିୱିକିତେସି। ଏଚେଟିଏ ଆ଼ଜିୟାଁ ରିତୁ ଅ଼ଡ଼େ ଆ଼ଜିୟାଁ ତଲେ ହା଼ଗୁ ମ୍ଣିସ୍ତେ; ଇଲେକିଁ ଆଜିହ଼ପେତି ଆ଼ଜିୟାଁ ମିସର ଦେ଼ସାତା ରା଼ଜି ଦସ୍ପି ଆ଼ତି ରେ଼ଟୁଏ ଏଚେଲା ଆ଼ହାହିଲାଆତୁ। ଏଚେଟିଏ ବାରେ ମିସର ଦେ଼ସାତି ପାଙ୍ଗାତା ମାଚି ମାଣ୍ସି ଅ଼ଡ଼େ କ଼ଡି ଗରି ବାରେ ଆ଼ଜିୟାଁ ତଲେ ହା଼ତୁ ଅ଼ଡ଼େ ଗୁଡିୟାତି ବାରେ ଆର୍ନା ମକ ଆ଼ଜିୟାଁ ତଲେ ନସ୍ତ ଆ଼ତେ, ଜା଼ଡ଼ାତି ବାରେ ମା଼ର୍କା ଡୀହାହାଚୁ। ୱାର୍ଇ ଇସ୍ରାୟେଲ ମୀର୍କାତି ବାସା ଟା଼ୟୁ ଗ଼ସନ୍ ରା଼ଜିତା ଆ଼ଜିୟାଁ ରିଆତୁ।
ଏଚେଟିଏ ପା଼ର ଲ଼କୁଣି ପାଣ୍ତାହାଁ ମ଼ସା ଅ଼ଡ଼େ ହାରଣଇଁ ହା଼ଟିକିହାଁ ଏଲେଇଚେସି, “ଈ ପା଼ଲିତା ନା଼ନୁ ପା଼ପୁ କିହାମାଇଁ; ପ୍ରବୁ ଦାର୍ମୁଗାଟାସି, ସାମା ନା଼ନୁ ଅ଼ଡ଼େ ମା଼ ଲ଼କୁ ଦ଼ହ କିହାମାନମି। ପ୍ରବୁ ତା଼ଣା ପ୍ରା଼ତାନା କିଦୁ; ଇଚିହିଁ ମାହାପୂରୁତି ଗାର୍ଜିନାୟି ଅ଼ଡ଼େ ଆ଼ଜିୟାଁ ରିହାମାନାୟି ହା଼ରେକା ଆ଼ହାମାନେ; ନା଼ନୁ ମିଙ୍ଗେ ହାଜାଲି ହିୟାଇଁ, ମିଙ୍ଗେ ଅ଼ଡ଼େ ୱେ଼ଡ଼ା ଆ଼ଏ।”
ଏଚିବେ଼ଲା ମ଼ସା ପା଼ରଇଁ ଏଲେଇଚେସି, “ନା଼ନୁ ଗା଼ଡ଼ାଟି ହାଚି ଦେବୁଣିଏ ପ୍ରବୁ ତା଼ଣା କେୟୁ ଦା଼ହ୍ଇଁ, ଏଚେଟିଏ ହା଼ଗୁ ଗୂଣ୍ନାୟି ସାପି ଆ଼ନେ ଅ଼ଡ଼େ ଆ଼ଜିୟାଁ ରିଉ; ଅ଼ଡ଼େ, ଈ ଦାର୍ତି ପ୍ରବୁୱାୟି ଏ଼ଦାଆଁ ନୀନୁ ପୁଞ୍ଜାଲି ଆ଼ଡିଦି। ସାମା ନା଼ନୁ ପୁଞ୍ଜାମାଇଁ, ନୀନୁ ଅ଼ଡ଼େ ନୀ ହ଼ଲିୟାଙ୍ଗା ନୀଏଁ ପାତେକା ପ୍ରବୁ ମାହାପୂରୁଇଁ ଆଜିହିଲଅରି।”
ଏଚିବେ଼ଲା ପେସି1 ଅ଼ଡ଼େ ଗ଼ହଁ ବାରେ ନସ୍ତ ଆ଼ତୁ, ଇଚିହିଁ ଗ଼ହଁ ଜେ଼କା ଅ଼ଡ଼େ ପେସି ପୂୟୁ ଦା଼ଲାମାଚେ। ସାମା ଗ଼ହଁ ଅ଼ଡ଼େ ଜ଼ନା2 ପାଡା ଆ଼ହା ହିଲାଆତାକି ଏ଼ୱି ନସ୍ତ ଆ଼ଆତୁ।
ଏଚେଟିଏ ମ଼ସା ପା଼ର ତା଼ଣାଟି ଗା଼ଡ଼ା ପାଙ୍ଗାତା ହାଜାହାଁ ପ୍ରବୁ ତା଼ଣା କେୟୁ ପେର୍ହାଲିଏ, ହା଼ଗୁ ଗୂଣ୍ନାୟି ଅ଼ଡ଼େ ଆ଼ଜିୟାଁ ରିହାଲି ଡୂଙ୍ଗିତୁ, ବୂମିତା ଅ଼ଡ଼େ ପିୟୁ ରିଆତେ। ଏଚିବେ଼ଲା ଆ଼ଜି ପିୟୁ ଅ଼ଡ଼େ ହା଼ଗୁ ଗୂଣ୍ନାଣି ଡୂଙ୍ଗିତାଣି ମେସାହାଁ ପା଼ର ଅ଼ଡ଼େ ୱେଣ୍ତେ ପା଼ପୁ କିତେସି, ଇଞ୍ଜାଁ ଏ଼ୱାସି ଅ଼ଡ଼େ ତାମି ହ଼ଲିୟାଙ୍ଗା ତାମି ମ଼ନତି ଆ଼ଟ୍ୱା କିତେରି। ଏଚେଟିଏ ପା଼ରତି ହିୟାଁ ଆ଼ଟ୍ୱା ଆ଼ତେ, ଏ଼ଦାଆଁତାକି ପ୍ରବୁ ମ଼ସାଇଁ ୱେସ୍ତି ବ଼ଲୁ ଲେହେଁ ଇସ୍ରାୟେଲ ଲ଼କୁଣି ହାଜାଲି ହୀଆତେସି।
Source notes (2)
- Footnote ପେସି/ମେସ୍ତା/ମିସର ଦେ଼ସାତା/ପା଼ଡ଼େୟିଟି ନିୟୁଁ/ମା଼ର୍ନୁଟି ଲୂଲୁ କିହାଁ ହିମ୍ବରିକା କିୱି ଆ଼ହିମାଚେ ।
- Footnote ଜ଼ନା/ଜା଼ଡ଼ାତି ଗ଼ହଁ
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.