Kuvi Bible
ହାନାୟି 39
ପୂଜେରା ହିମ୍ବରି ତିୟାରା କିନାୟି
(ହାନାୟି ୨୮:୧-୧୪)
ଏଚେଟିଏ ଲ଼କୁ ମ଼ସାକି ପ୍ରବୁ ହୁକୁମି ହୀତି ଲେହେଁ ନୀଲି, ହେୟାଁ, ନେତେରି ୱା଼ଣା ଲୂଲୁ ତଲେ ସୁଦୁ ଟା଼ୟୁତା ସେ଼ବା କାମା କିହାଲି ଅ଼ଜିତି ହିମ୍ବରିକା ତିୟାରା କିତେରି, ଅ଼ଡ଼େ ହାରଣତି ସୁଦୁ ସକାୟାଁ ତିୟାରା କିତେରି।
ଇଞ୍ଜାଁ, ଏ଼ୱାସି ବାଂଗାରା ତଲେ ନୀଲି, ହେୟାଁ, ନେତେରି ୱା଼ଣା ରୁତି ଦବ୍ଲା ପା଼ତାଡ଼ା ଲୂଲୁ ତଲେ ଏପଦ1 ହିମ୍ବରି ତିୟାରା କିତେରି। ଇଚିହିଁ, ଏ଼ୱାରି ବାଂଗାରା କଲ୍ହି କଲ୍ହି ପା଼ତାଡ଼ା ଆ଼କୁ ଲେହେଁ କିହାଁ ଆ଼କୁତି ରାତ୍ହାଁ ତୀଗାୟାଁ କିତେରି, ଅ଼ଡ଼େ ତୀଗାତି ନୀଲି, ହେୟାଁ, ନେତେରି ୱା଼ଣା ରୁତି ଲୂଲୁ ତଲେ ଆଲିତେରି। ଏ଼ୱାରି ଏ଼ଦାଆଁ ଜ଼ଡ଼ି କିହାଁ ରୀ ବମିତି ଜେ଼ନୁ ୱାକି କିତେରି, ଏ଼ଦାଣିତି ରିକୱାକି ଦୂର୍ସାହାଁ ଆଣ୍ତ୍ୱି କିତେରି। ମ଼ସାକି ପ୍ରବୁତି ହୁକୁମି ଲେହେଁ ଏପଦ ଲାକତି ଏମିନି କା଼ବ୍ରା ସିତ୍ରା ପା଼ଟା ଏମିନି ବା଼ଗା ମାଚେ, ଏ଼ଦି ଜିକେଏ ଏ଼ କାମା ଲେହେଁ ବାଂଗାରା ତଲେ ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା ଆ଼ତେ। ଅ଼ଡ଼େ ଏ଼ୱାରି ଇସ୍ରାୟେଲ ମୀର୍କା ଦ଼ରୁତି ଲେକା ତଲେ ପତ୍ହି ବୁଟୁ ମୁଦ୍ରା ଲେହେଁ ପତ୍ହାୟି ଅ଼ଡ଼େ ବାଂଗାରା ତଲେ ଆଟିକିତି ରୀ ଗମେଦକ ମଣି2 ତିୟାରା କିତେରି। ଇଞ୍ଜାଁ, ଏ଼ୱାରି ପ୍ରବୁତି ହୁକୁମି ଲେହେଁ ଏପଦତି ରୀ ବମିତି ଜେ଼ନୁ ଲାକ ଇସ୍ରାୟେଲ ମୀର୍କାଣି ଅଣ୍ପିନି ମଣି ଲେହେଁ ଏ଼ଦାଆଁ ଆଟିକିତେରି।
ବକପା଼ଟା କିନାୟି
(ହାନାୟି ୨୮:୧୫-୩୦)
ଏଚେଟିଏ ଏ଼ୱାରି ଏପଦ କାମା କିତି ଲେହେଁ ବାଂଗାରା ତଲେ ନୀଲି, ହେୟାଁ, ନେତେରି ୱା଼ଣା ରୁତି ଦବ୍ଲା ପା଼ତାଡ଼ା ଲୂଲୁ ତଲେ ନେହିଁ ତୀର୍ସିନି କାମା ତଲେ ବକପା଼ଟା ତିୟାରା କିତେରି। ଏ଼ଦି ସା଼ରି କନ ମାଚେ, ଇଚିହିଁ, ଏ଼ୱାରି ଏ଼ ବକପା଼ଟା ମାଡ଼୍ତା କିହାଁ ର଼ ବିତା ଲାମ୍ବା ଅ଼ଡ଼େ ର଼ ବିତା ଅ଼ସାରା କିତେରି। ଇଞ୍ଜାଁ, ଏ଼ଦାଣି ସା଼ରି ଦା଼ଡ଼ି ମଣି ତଲେ ଆଟିକିତେରି; ଏମ୍ବାତି ତଲିତି ଦା଼ଡ଼ିତା ଚୁଣି, ପିତମଣି, ଅ଼ଡ଼େ ମରକତମଣି। ରୀ ଲମ୍ବର ଦା଼ଡ଼ିତା ପଦ୍ମରାଗ, ନିଲକାନ୍ତ, ଅ଼ଡ଼େ ହିରକ, ତୀନି ଲମ୍ବର ଦା଼ଡ଼ିତା ପେରଜ, ଜିସ୍ମ ଅ଼ଡ଼େ ଇନ୍ଦ୍ରନିଲମଣି। ଇଞ୍ଜାଁ, ସା଼ରି ଲମ୍ବର ଦା଼ଡ଼ିତା ବଦୁର୍ଯ୍ୟ, ଗମେଦକ ଅ଼ଡ଼େ ସୁର୍ଯ୍ୟକାନ୍ତ ମଣି ମାଚେ; ଈ ବାରେ ମଣି ବାଂଗାରା ତଲେ ଆଟିକିୱି ଆ଼ତେ। ଇଞ୍ଜାଁ, ଇସ୍ରାୟେଲ ମୀର୍କାତି ଦ଼ର୍କା ଈ ବାରେ ଦାରାଗାଟି ୱାଲ୍କା ଏ଼ୱାରି ଦ଼ର୍କା ଲେହେଁ ବା଼ରଗଟା ଆ଼ତୁ ଅ଼ଡ଼େ ବୁଟୁ ମୁଦ୍ରା ଲେହେଁ ର଼ ର଼ ୱାଲିତା ବା଼ର କୂଡ଼ାତି ର଼ ର଼ ଦ଼ରୁ ଡ଼ୟିତେ। ଏଚେଟିଏ ଏ଼ୱାରି ବକପା଼ଟାତା ନେହିଁ ବାଂଗାରା ତଲେ ପୂସାୟାଁ ଲେହେଁ ହିକ୍ଣିୟାଁ ତିୟାରା କିତେରି। ରୀ ବାଂଗାରା ପୂଙ୍ଗା ଅ଼ଡ଼େ ରୀ ବାଂଗାରା ଜେଏଃଲାୟାଁ ତିୟାରା କିହାଁ ବକପା଼ଟାତି ରିକୱାକି ଏ଼ ରୀ ଜେଏଃଲାୟାଁ ଆଟି କିତେରି। ଅ଼ଡ଼େ ବକପା଼ଟାତି ରିକୱାକିତି ରୀ ଜେଏଃଲାୟାଁଣା ଏ଼ ଆଲାମାନି ବାଂଗାରା ହିକ୍ଣିୟାଁ ପେନ୍ଦିତେରି। ଇଞ୍ଜାଁ, ଏ଼ ରୀ ଆଲାମାନି ହିକ୍ଣିୟାଁ ରିକୱାକି ସୁଣ୍ତାହାଁ ଏପଦ ହିମ୍ବରି ନ଼କିତି ରୀ ବମି ଲାକ ଇଟିତେରି। ଇଞ୍ଜାଁ, ଏ଼ୱାରି ରୀ ବାଂଗାରା ଜେଏଃଲାୟାଁ କିହାଁ ବକପା଼ଟାତି ରିକୱାକିତି ଏପଦ ନ଼କିତି ବିତ୍ରା ୱାକି ଇଟିତେରି। ଏ଼ୱାରି ଅ଼ଡ଼େ ରୀ ବାଂଗାରା ଜେଏଃଲାୟାଁ କିହାଁ ଏପଦ ରୀ ବମିୟାଁ ଡ଼଼ଇ ତାନି ନ଼କିୱାକିତି ଆଣ୍ତ୍ୱି ଆ଼ନି ଟା଼ୟୁତା ଏପଦତି କା଼ବ୍ରା ସିତ୍ରା ପା଼ଟା ଲାକ ଏ଼ଦାଆଁ ଇଟିତେରି। ଅ଼ଡ଼େ ବକପା଼ଟା ଏ଼ନିକିଁ ଏପଦତି କା଼ବ୍ରା ସିତ୍ରା ପା଼ଟା ଲାକ ମାଞ୍ଜାହାଁ ଏପଦଟିଏ ହୁଙ୍ଗାହାଁ ରିଏ, ଏ଼ଦାଆଁତାକି ଏ଼ୱାରି ବକପା଼ଟାତି ତାନି ଜେଏଃଲାୟାଁଣା ନୀଲି ଲୂଲୁ ତଲେ ଏପଦତି ଜେଏଃଲାୟାଁଣା ଆସ୍ପିକିହାଁ ଇଟିତେରି; ମ଼ସାକି ପ୍ରବୁ ହୁକୁମି ହୀତିଲେହେଁ ଈ ବାରେ କିୱିଆ଼ତେ।
ଏଟ୍କା ପୂଜେରାଙ୍ଗା ସକାୟାଁ ତିୟାରା କିନାୟି
(ହାନାୟି ୨୮:୩୧-୪୩)
ଏଚେଟିଏ ମ଼ସାକି ପ୍ରବୁ ହୁକୁମି ହୀତିଲେହେଁ ଏ଼ୱାସି ଆଲିନି କାମା ତଲେ ଏପଦ ଡ଼଼ଇତି ସକା ୱାର୍ଇ ନୀଲି ୱା଼ଣା ତଲେ କିତେରି। ଏ଼ ଏପଦ ଡ଼଼ଇତି ସକାତି ମାଦିଏ ହେର୍କି ସମାନା ର଼ କା଼ଣି ମାଚେ; ଏ଼ଦି ଏ଼ନିକିଁ ଡାମ୍ବେଏ, ଏ଼ଦାଆଁତାକି ଏ଼ ହେର୍କିତି ସା଼ରିୱାକି ଆଲ୍ୱି ଆ଼ହାମାଚେ। ଇଞ୍ଜାଁ, ଏ଼ୱାରି ଏପଦ ଡ଼଼ଇତି ସକା କୁଙ୍ଗୁତି ସା଼ରି ୱାକି ନୀଲି, ହେୟାଁ, ଅ଼ଡ଼େ ନେତେରି ୱା଼ଣାତି ରୁତି ଲୂଲୁ ତଲେ ଡାଲିମ୍ବ ତିୟାରା କିତେରି। ଅ଼ଡ଼େ ଏ଼ୱାରି ଡାଲିମ୍ବ ମାଦି ନେହିଁ ବାଂଗାରା ତଲେ ଜିଣ୍ଙ୍ଗାୟାଁ କିହାଁ ସକା କୁଙ୍ଗୁତି ସା଼ରିୱାକି ଡାଲିମ୍ବ ମାଦି ମାଦି ଇଟିତେରି; ଇଚିହିଁ, ସେ଼ବା କାମାତା ଲେ଼ମ୍ବିନି ଏପଦ ଡ଼଼ଇତି ସକା କୁଙ୍ଗୁତି ସା଼ରିୱାକି ର଼ ଜିଣ୍ଙ୍ଗା ଜେ଼ଚ ର଼ ଡାଲିମ୍ବ ଅ଼ଡ଼େ ର଼ ଜିଣ୍ଙ୍ଗା ଜେ଼ଚ ର଼ ଡାଲିମ୍ବ, ଇଲେକିହିଁ କିତେରି।
ଏଚେଟିଏ ମ଼ସାକି ପ୍ରବୁ ହୁକୁମି ହୀତିଲେହେଁ, ଏ଼ୱାରି ହାରଣ ଅ଼ଡ଼େ ତାନି ମୀର୍କାକି ଦବ୍ଲା ପା଼ତାଡ଼ା ଲୂଲୁ ତଲେ ଆଲାହାଁ ଈ ବାରେ ସକାୟାଁ, ଅ଼ଡ଼େ ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା କିତି ଟ଼ପେରି, ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା କିତି ତା଼ର୍ୟୁଁତା ପ୍ଡିକ୍ହା କଡିନି ପାଚିୟା ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା କିତି ସେଡି ତିୟାରା କିତେରି। ଅ଼ଡ଼େ ରୁତି ଦବ୍ଲା ପା଼ତାଡ଼ା, ନୀଲି, ହେୟାଁ, ଅ଼ଡ଼େ ନେତେରି ୱା଼ଣା ଲୂଲୁ ତଲେ ଆଲାହାଁ ଜାଟି ରୂପାକଡିନି ପାଚିୟା ତିୟାରା କିତେରି। ଏଚେଟିଏ ମ଼ସାକି ପ୍ରବୁ ହୁକୁମି ହୀତିଲେହେଁ, ଏ଼ୱାରି ନେହିଁ ବାଂଗାରା ତଲେ ସୁଦୁ ଟ଼ପେରିତି ପାଟେ ତିୟାରା କିହାଁ ପତ୍ହି ବୁଟୁ ମୁଦ୍ରା ସମାନା ତାନି ଲାକ “ପ୍ରବୁତି କ଼ସମି ସୁଦୁ” ଇଞ୍ଜିଁ ରା଼ଚିତେରି। ଇଞ୍ଜାଁ, ଟ଼ପେରି ଲାକ ଇଟାଲି ଏ଼ଦାଣି ନୀଲି ୱା଼ଣା ଲୂଲୁ ତଲେ ଦସ୍ତେରି।
ବାସା ଟା଼ୟୁତି କାମା ରା଼ପ୍ନାୟି
(ହାନାୟି ୩୫:୧୦-୧୯)
ଇଲେକିହିଁ ଆଣ୍ତ୍ୱିଆ଼ନି ତୂମୁ ଲେହେଁତି ବାସା ଟା଼ୟୁତି ବାରେ କାମା ରା଼ତେ; ଇସ୍ରାୟେଲ ମୀର୍କା ଏ଼ ବାରେ କିତେରି, ମ଼ସାକି ପ୍ରବୁ ହୁକୁମି ହୀତିଲେହେଁ ଏ଼ୱାରି ବାରେ କାମା କିତେରି। ଏଚେଟିଏ ଏ଼ୱାରି ଏ଼ ବାସା ଟା଼ୟୁ ମ଼ସା ତା଼ଣା ତାତେରି, ଇଚିହିଁ, ତୂମୁ ଅ଼ଡ଼େ ଏମ୍ବାତି ବାରେ ଗିନା ସିପା, ଡ:ଙ୍କିୟାଁ, ପା଼ଟାୟାଁ, ଅର୍ଗଡ଼ିକା, ମୁଣ୍ତାୟାଁ ଅ଼ଡ଼େ ପତ୍ପିଆ଼ତି କଟ୍ଲାୟାଁ3; ଇଞ୍ଜାଁ, ନେତେରିଗାଟି ମେ଼ଣ୍ତା ତ଼ଲୁ ତଲେ କେ଼ପିତି ତେପରି ଅ଼ଡ଼େ ସିସୁକ4 ତ଼ଲୁ ତଲେ କେ଼ପିତି ତେପରି ଅ଼ଡ଼େ ପ୍ଡିକ୍ନି ଏଟ୍କା କିନି ହିମ୍ବରି; ରା଼ଜିମା଼ନା ପେ଼ଡ଼ା ଅ଼ଡ଼େ ଏମ୍ବାତି ଟେଙ୍ଗାୟାଁ ଅ଼ଡ଼େ ପା଼ପୁ ପ୍ଡିକ୍ନାଣି; ବାଲାପା଼ଟା5, ଏମ୍ବାତି ବାରେ ଗିନା ସିପା ଅ଼ଡ଼େ ହେର୍ପିନି ରୂଟି, ନେହିଁ ବାଂଗାରା ଦୀୱଁ ମୁଣ୍ତା, ଏମ୍ବାତି ଦୀୱଁ, ଇଚିହିଁ ଦୀୱଁ ତଲେତି ବାରେ ଆ଼ସ୍ତି ଅ଼ଡ଼େ ଦୀୱଁ ଇଟିନି ନିୟୁଁ; ଅ଼ଡ଼େ ବାଂଗାରାଗାଟି ପିଣ୍ତା, ପା଼ଣା ହେର୍ପିନି ନିୟୁଁ, ଦୁପ୍ଣିତି ନେହିଁ ଗାନ୍ଦା ଆ଼ସ୍ତି ଅ଼ଡ଼େ ତୂମୁ ଦୁୱେରି ପ୍ଡିକ୍ନି ହିମ୍ବରି; ପିତାଡ଼ାତି ପିଣ୍ତା ଅ଼ଡ଼େ ଏମ୍ବାତି ପିତାଡ଼ା ଜା଼ଲି, ଏମ୍ବାତି ଟେଙ୍ଗାୟାଁ ଅ଼ଡ଼େ ବାରେ ଗିନା ସିପା, ନର୍ହା କଡିନି କୁଣ୍ତି ଅ଼ଡ଼େ କୁଣ୍ତି କୁଗିନି ପିଣ୍ତା; ଆଂଗେଣିତି ଟା଼ଟିନି ହିମ୍ବରି, ଏମ୍ବାତି ମୁଣ୍ତାୟାଁ, ପତ୍ପିଆ଼ତି କଟ୍ଲାୟାଁ ଅ଼ଡ଼େ ଆଂଗେଣି ଦୁୱେରିତି ପ୍ଡିକ୍ନି ହିମ୍ବରି, ଏମ୍ବାତି ଡ:ର୍କା, କୁଟିୟାଁ ଅ଼ଡ଼େ ଆଣ୍ତ୍ୱିଆ଼ନି ତୂମୁ ଇଲୁତା କାମା ତାକି ଲେ଼ମ୍ବିନି ବାରେ ଗିନା ସିପା; ସୁଦୁ ଟା଼ୟୁତା ସେ଼ବା କାମାତା ଲେ଼ମ୍ବିନି ହା଼ରେକା ଅ଼ଜିତି ସକାୟାଁ, ଇଚିହିଁ, ହାରଣ ପୂଜେରାତି ସୁଦୁ ସକା ଅ଼ଡ଼େ ତାନି ମୀର୍କା ପୂଜେରା କାମାତା ଲେ଼ମ୍ବିନି ସକାୟାଁ, ଈ ବାରେ ଏମିନି ଏମିନି କାମା କିୟାଲି ପ୍ରବୁ ମ଼ସାକି ହୁକୁମି ହୀହାମାଚେସି, ଇସ୍ରାୟେଲ ଲ଼କୁ ଏ଼ ବାରେ କାମା ରା଼ପ୍ହେରି। ଏଚେଟିଏ ମ଼ସା ଏ଼ ବାରେ କାମାତି ସିନିକିତେସି, ଅ଼ଡ଼େ ମେହ୍ଦୁ, ଏ଼ୱାରି ବାରେ କାମା କିହାମାନେରି; ପ୍ରବୁ ଏ଼ନିକିହିଁ ହୁକୁମି ହୀହାମାଚେସି, ଏ଼ୱାରି ଏଲେକିହିଁ ବାରେ କାମା କିହାମାଚେରି; ଏଚେଟିଏ ମ଼ସା ଏ଼ୱାରାକି ବ଼ର ହୀତେସି।
Source notes (5)
- Footnote ଏପଦ/ବମିଟିଏ କୁଦ୍ଗୁ ପାତେକା ପୂଜେରାଙ୍ଗା ତୁର୍ନି ଲାକତି ସକା ।
- Footnote ମଣି/ଦାରାଗାଟି ୱାଲ୍କା ।
- Footnote କଟ୍ଲାୟାଁ/ପା଼ଟା ଅ଼ଡ଼େ ମୁଣ୍ତା ଆ଼ଟ୍ୱା ତଲେ ନିପ୍ନାଇ ।
- Footnote ସିସୁକ
- Footnote ବାଲାପା଼ଟା/ମାହାପୂରୁକି ହେର୍ପିତି ରୂଟି ଇଟିନି ଟା଼ୟୁ ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.