Kuvi Bible
ହାନାୟି 37
ରା଼ଜିମା଼ନା ପେ଼ଡ଼ା କେ଼ପିନାୟି
(ହାନାୟି ୨୫:୧୦-୨୨)
ଏଚେଟିଏ ବସ୍ଚଲେଲ ସିଟିମ ମା଼ର୍କା ତଲେ ରୀ ହା଼ତା ଆଦା ଲାମ୍ବା ଅ଼ଡ଼େ ର଼ ହା଼ତା ଆଦା ଅ଼ସାରା ଅ଼ଡ଼େ ର଼ ହା଼ତା ଆଦା ପାଡ୍ଣି ର଼ ପେ଼ଡ଼ା ତିୟାରା କିତେସି। ଅ଼ଡ଼େ ଏ଼ଦାଣି ପାଙ୍ଗାତା ଅ଼ଡ଼େ ବିତ୍ରା ସୁଦୁ ବାଂଗାରା ୱା଼ରିକିହାଁ ତାନି ସା଼ରି ୱାକି ବାଂଗାରା ଗିଚୁ କିତେସି। ଇଞ୍ଜାଁ, ଏମ୍ବାତି ସା଼ରି କନ ତାକି ସା଼ରିଗଟା ବାଂଗାରା କାଡ୍ୱାୟାଁ କିତେସି, ଏ଼ଦାଣି ରକୱାକି ରୀ କାଡ୍ୱାୟାଁ ଅ଼ଡ଼େ ଅ଼ରୱାକି ରୀ କାଡ୍ୱାୟାଁ କିତେସି। ଅ଼ଡ଼େ ଏ଼ୱାସି ସିଟିମ ମା଼ର୍କା ତଲେ ଟେଙ୍ଗାୟାଁ କିହାଁ ବାଂଗାରା ୱା଼ରି କିତେସି। ଅ଼ଡ଼େ ପେ଼ଡ଼ା ଡେ଼କାଲି ତାକି ପେ଼ଡ଼ାତି ନ଼କିତି କାଡ୍ୱାୟାଁଣା ଏ଼ ଟେଙ୍ଗା ପେନ୍ଦିତେସି। ଏଚେଟିଏ ଏ଼ୱାସି ନେହିଁ ବାଂଗାରା ତଲେ ରୀ ହା଼ତା ଆଦା ଲାମ୍ବା ଅ଼ଡ଼େ ର଼ ହା଼ତା ଆଦା ଅ଼ସାରା ର଼ ପା଼ପୁ ପ୍ଡିକ୍ନି ଡା଼ପ୍ଣା ତିୟାରା କିତେସି। ଇଞ୍ଜାଁ, ମୂତ୍ଲା ତଲେ କଲ୍ହିହିଁ ବାଂଗାରାତି ରୀ କିରୁବ1 ଦୂତୁ କିହାଁ ପା଼ପୁ ପ୍ଡିକ୍ନି ଡା଼ପ୍ଣା ତା଼ର୍ପୁ ୱାକି ଇଟିତେସି। ଏ଼ଦାଣିତି ର଼ ତା଼ର୍ପୁ ୱାକି ର଼ କିରୁବ ଅ଼ଡ଼େ ଅ଼ର ତା଼ର୍ପୁ ୱାକି ଅ଼ର କିରୁବ ଇଟିତେସି; ପା଼ପୁ ପ୍ଡିକ୍ନି ଡା଼ପ୍ଣାତି ରୀ ତା଼ର୍ପୁ ୱାକି ରୀ କିରୁବତି ଏମ୍ବାତି ବା଼ଗା କିହାଁ ଇଟିତେସି। ଇଞ୍ଜାଁ କିରୁବତି ମା଼ରାୟାଁ ଲାକ ୱାକି ପେର୍ହାଁ ପା଼ପୁ ପ୍ଡିକ୍ନାଣି ପ୍ଡିକ୍ହୁ, ଅ଼ଡ଼େ ଏ଼ୱାସିକା ମୂମ୍ବୁ ହାରିମ଼ହାଣା ଡ଼ୟିତେ; ସାମା ପା଼ପୁ ପ୍ଡିକ୍ନାଣି ୱାକି କିରୁବୟାଁତି ମୂମ୍ବୁ ଡ଼ୟିତେ।
ହେର୍ପିନି ରୂଟିତି ବାଲାପା଼ଟା
(ହାନାୟି ୨୫:୨୩-୩୦)
ଏଚେଟିଏ ଏ଼ୱାସି ସିଟିମ ମା଼ର୍କା ତଲେ ରୀ ହା଼ତା ଲାମ୍ବା ଅ଼ଡ଼େ ର଼ ହା଼ତା ଅ଼ସାରା ଅ଼ଡ଼େ ର଼ ହା଼ତା ଆଦା ପାଡ୍ଣି ର଼ ବାଲାପା଼ଟା2 ତିୟାରା କିତେସି। ଇଞ୍ଜାଁ ଏ଼ଦାଣି ନେହିଁ ବାଂଗାରା ତଲେ ୱା଼ରି କିତେସି ଅ଼ଡ଼େ ଏ଼ଦାଣି ସା଼ରି ୱାକି ବାଂଗାରା ଗିଚୁ କିତେସି। ଇଞ୍ଜାଁ, ଏ଼ୱାସି ଏ଼ଦାଣି ସା଼ରିୱାକି ସା଼ରି ଆଙ୍ଗୁଲି ବାଲା ଗୂର୍ତେସି, ଅ଼ଡ଼େ ଏ଼ ଗୂର୍ଚାମାନି ସା଼ରିୱାକି ବାଂଗାରା ଗିଚୁ କିତେସି। ଅ଼ଡ଼େ ବାଂଗାରା ତଲେ ସା଼ରିଗଟା କାଡ୍ୱାୟାଁ କିହାଁ ସା଼ରିଗଟା କାଡ୍ୱାୟାଁ ସା଼ରି କନତା ଇଟିତେସି। ଏ଼ କାଡ୍ୱାୟାଁ, ସା଼ରିୱାକି ଗୂର୍ଚାମାନି ବାଲା ଦାରି ବାଲାପା଼ଟା ଡେ଼କାଲି ତାକି ଟେଙ୍ଗା ପେନ୍ଦ୍ୱି ଆ଼ହାମାଚେ। ଇଞ୍ଜାଁ ଏ଼ୱାସି ଏ଼ ପିଣ୍ତା ଡେ଼କାଲି ତାକି ସିଟିମ ମା଼ର୍କାତି ଟେଙ୍ଗା କିହାଁ ବାଂଗାରା ୱା଼ରି କିତେସି। ଅ଼ଡ଼େ ଏ଼ୱାସି ପିଣ୍ତା ଲାକତି ଗିନା ସିପା, ଇଚିହିଁ, ଏମ୍ବାତି ସାଡ଼୍ୱା, ହାଟ୍ୱା, ଜା଼ଚୁ, ୱା଼କ୍ହାଲି ଗିନାୟାଁ ବାରେ ନେହିଁ ବାଂଗାରା ତଲେ ତିୟାରା କିତେସି।
ବାଂଗାରା ଦୀୱଁ ମୁଣ୍ତା
(ହାନାୟି ୨୫:୩୧-୪୦)
ଅ଼ଡ଼େ, ଏ଼ୱାସି ନେହିଁ ବାଂଗାରା ତଲେ ର଼ ଦୀୱଁ ମୁଣ୍ତା ତିୟାରା କିତେସି, ଏ଼ୱାସି ତାସିହିଁ ଦୀୱଁ ମୁଣ୍ତା ତିୟାରା କିତେସି, ଏମ୍ବାତି ଡାକି ଅ଼ଡ଼େ କମାୟାଁ ତିୟାରା କିତେସି, ଅ଼ଡ଼େ ଏମ୍ବାତି ଗୁର୍ଞ୍ଜିତି ଡୂଣ୍ତି ଅ଼ଡ଼େ ପୂଙ୍ଗା ଏମ୍ବାଆଁ ଆଣ୍ତ୍ୱି କିତେସି ଏ଼ ଦୀୱଁ ମୁଣ୍ତାତି ରକୱାକି ତୀନିଗଟା କମାୟାଁ ଅ଼ଡ଼େ ଅ଼ର ୱାକି ତୀନିଗଟା କମାୟାଁ, ଈ ସ଼ଗଟା କମାୟାଁ ଏ଼ଦାନି ତା଼ଣାଟି ହ଼ତୁ। ଇଞ୍ଜାଁ, ର଼ କମାତା ଜଲାଜା଼ମ୍ବୁ ପୂୟୁ ଲେହେଁତି ତୀନିଗଟା ଗୁର୍ଞ୍ଜିତି ଡୂଣ୍ତି ଅ଼ଡ଼େ ପୂୟୁ, ଅ଼ଡ଼େ ଅ଼ର କମାତା ଜଲାଜା଼ମ୍ବୁ ପୂୟୁ ଲେହେଁତି ତୀନିଗଟା ଗୁର୍ଞ୍ଜିତି, ଡୂଣ୍ତି ଅ଼ଡ଼େ ପୂୟୁ, ଇଲେକିହିଁ ଦୀୱଁ ମୁଣ୍ତାତା ହ଼ଚାମାନି ସ଼ଗଟା କମାୟାଁଣା ଡ଼ୟିତୁ। ସାମା ଦୀୱଁ ମା଼ର୍ନୁତା ଜଲାଜା଼ମ୍ବୁ ପୂୟୁ ଲେହେଁତି ସା଼ରିଗଟା ଗୁର୍ଞ୍ଜିତାଇ ଅ଼ଡ଼େ ଏମ୍ବାତି ଡୂଣ୍ତି ଅ଼ଡ଼େ ପୂୟୁ ଡ଼ୟିତେ। ଅ଼ଡ଼େ ଏମ୍ବାଟି ଏମିନି ସ଼ଗଟା କମାୟାଁ ହ଼ତୁ, ଏଲେକିହିଁଏ ର଼ ଟେ଼ରାତି ରୀ କମାୟାଁ ଡ଼଼ଇ ର଼ ଡୂଣ୍ତି ଅ଼ଡ଼େ ରୀ କମାୟାଁ ଡ଼଼ଇକା ର଼ ଡୂଣ୍ତି ଡ଼ୟିତେ। ଈ ଡୂଣ୍ତି ଅ଼ଡ଼େ କମାୟାଁ ଏମ୍ବାତି ର଼ ବା଼ଗା ଆ଼ତୁ, ଅ଼ଡ଼େ ବାରେ ନେହିଁ ବାଂଗାରାତି ମୂତ୍ଲା ତଲେ ତୀର୍ସିତି କାମା ଆ଼ତେ। ଅ଼ଡ଼େ, ଏ଼ୱାସି ଏ଼ଦାଣି ତାକି ସା଼ତାଗଟା ଦୀୱଁ, ସିମ୍ଟା ଅ଼ଡ଼େ ରୀଙ୍ଗାୟାଁ ଡ଼େୱାଲି ତାକି ହାଟ୍ୱା ନେହିଁ ବାଂଗାରା ତଲେ ତିୟାରା କିତେସି। ଏ଼ୱାସି ର଼ ତାଲନ୍ତ3 ଅଟ୍ହି ବାଂଗାରା ତଲେ ଏ଼ଦାଣି ଅ଼ଡ଼େ ଏମ୍ବାତି ବାରେ ଗିନା ସିପା ତିୟାରା କିତେସି।
ଦୁପ୍ଣି ପିଣ୍ତା କିନାୟି
(ହାନାୟି ୩୦:୧-୫)
ଏଚେଟିଏ ଏ଼ୱାସି ସିଟିମ ମା଼ର୍କା ତଲେ ର଼ ହା଼ତା ଲାମ୍ବା ଅ଼ଡ଼େ ର଼ ହା଼ତା ଅ଼ସାରା ଅ଼ଡ଼େ ରୀ ହା଼ତା ପାଡ୍ଣି ସା଼ରି କନତି ଦୁପ୍ଣି ପିଣ୍ତା ତିୟାରା କିତେସି, ଏମ୍ବାତି କମ୍କା ବାରେ ଏମ୍ବାତି ବା଼ଗା ଆ଼ତୁ। ଅ଼ଡ଼େ, ଏ଼ଦି, ଏ଼ଦାଣି ଲାକ ଅ଼ଡ଼େ ଏ଼ଦାଣି ସା଼ରିୱାକି ଅ଼ଡ଼େ ଏମ୍ବାତି କମ୍କା ବାରେ ନେହିଁ ବାଂଗାରା ତଲେ ୱା଼ରି କିତେସି; ଇଞ୍ଜାଁ, ଏ଼ୱାସି ଏ଼ଦାଣି ସା଼ରି ୱାକି ବାଂଗାରା ଗିଚୁ କିତେସି। ଅ଼ଡ଼େ ଏ଼ଦାଣି ଡେ଼କିନି ଟେଙ୍ଗା ପେନ୍ଦାଲି ଏମ୍ବାତି ଗିଚୁ ଡ଼଼ଇ ରିକୱାକିତି ରୀ କନତା ବାଂଗାରାତି ରୀ ରୀ କାଡ୍ୱାୟାଁ ତିୟାରା କିତେସି। ଅ଼ଡ଼େ ସିଟିମ ମା଼ର୍କା ତଲେ ଟେଙ୍ଗାୟାଁ କିତେସି ଅ଼ଡ଼େ ବାଂଗାରା ୱା଼ରି କିତେସି।
ତା଼ର୍ୟୁଁତା ୱା଼କ୍ନି ନିୟୁଁ କିନାୟି
(ହାନାୟି ୩୦:୨୨-୩୮)
ଏଚେଟିଏ ଏ଼ୱାସି ତା଼ର୍ୟୁଁତା ୱା଼କ୍ନି ସୁଦୁ ନିୟୁଁ ଅ଼ଡ଼େ ଦୁପ୍ଣି ତାକି ଗାନ୍ଦା କିନି ଲେକା ତଲେ ନେହିଁ ଗାନ୍ଦା ଆ଼ସ୍ତି ତିୟାରା କିତେସି।
Source notes (3)
- Footnote କିରୁବ/ମା଼ରାୟାଁଗାଟି ଦୂତୁ ।
- Footnote ବାଲାପା଼ଟା/ମାହାପୂରୁକି ହେର୍ପିତି ରୂଟି ଇଟିନି ଟା଼ୟୁ ।
- Footnote ର଼ ତାଲନ୍ତ/୩୫ କେ଼ଜି ବ଼ଜୁ ଗାଟାୟି ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.