Kuvi Bible
ହାନାୟି 25
ସୁଦୁ ଟା଼ୟୁ ତାକି ଦା଼ନା
(ହାନାୟି ୩୫:୪-୯)
ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନା଼ କ଼ସମି ଦା଼ନା ହିୟାଲି ନୀନୁ ଇସ୍ରାୟେଲ ଲ଼କୁଣି ୱେହ୍ମୁ; ଆମ୍ବାଆରି ହିୟାଁ ଏ଼ନାଆଁ ହିୟାଲି ମ଼ନ କିନେ ଏ଼ୱାଣି ତା଼ଣାଟି ନା଼ ଏ଼ ଦା଼ନା ରୀହ୍ଦି। ଇଚିହିଁ, ବାଂଗାରା, ୱେଣ୍ତି ଅ଼ଡ଼େ ପିତାଡ଼ା; ଇଞ୍ଜାଁ, ନୀଲି ୱା଼ଣା ହେୟାଁ ୱା଼ଣା, ନେତେରି ୱା଼ଣା, ଦବ୍ଲା ପା଼ତାଡ଼ା ଲୂଲୁ ଇଞ୍ଜାଁ ଗରି ବା଼ଣାୟାଁ, ଅ଼ଡ଼େ ନେତେରିଗାଟି ମେ଼ଣ୍ତା ତ଼ଲୁ, ସିସୁକ1 ତ଼ଲୁ ଅ଼ଡ଼େ ସିଟିମ ମା଼ର୍କା, ଦୀୱଁ ତାକି ନିୟୁଁ ଇଞ୍ଜାଁ, ପା଼ଣା ହେର୍ପିନି ନିୟୁଁ ଅ଼ଡ଼େ ନେହିଁ ଗାନ୍ଦା ଦୁପ୍ଣି ତାକି ଗାନ୍ଦା ଆ଼ସ୍ତି, ଇଞ୍ଜାଁ ଏପଦ2 ଅ଼ଡ଼େ ବକପା଼ଟା ତାକି ଗମେଦକ ମଣି3 ଏମ୍ବାଆଁ ଇଟିନି ୱାଲ୍କା; ଈ ବାରେ ଦା଼ନା ଏ଼ୱାରି ତା଼ଣାଟି ଅ଼ଦି। ଏ଼ୱାରି ନା଼ କ଼ସମି ର଼ ସୁଦୁ ଟା଼ୟୁ ତିୟାରା କିପାରି; ଏଚେଟିଏ ନା଼ନୁ ଏ଼ୱାରି ବିତ୍ରା ବାସା କିଇଁ। ଆଣ୍ତ୍ୱିଆ଼ନି ତୂମୁତି ଲେକା ଅ଼ଡ଼େ ଏମ୍ବାତି ବାରେ ଆ଼ସ୍ତିତି ଲେକା ନା଼ନୁ ନିଙ୍ଗେ ତ଼ସ୍ତାଇଁ, ଏଲେକିହିଁ ମୀରୁ ଏ଼ ବାରେ କିଦେରି।”
ରା଼ଜିମା଼ନା ପେ଼ଡ଼ା
(ହାନାୟି ୩୭:୧-୯)
ଅ଼ଡ଼େ ଏ଼ୱାରି ରୀ ହା଼ତା ଆଦା ଲାମ୍ବା, ର଼ ହା଼ତା ଆଦା ଅ଼ସାରା, ର଼ ହା଼ତା ଆଦା ପାଡ୍ଣି ସିଟିମ ମା଼ର୍କାତି ର଼ ପେ଼ଡ଼ା ତିୟାରା କିନେରି। ଏଚେଟିଏ ମୀରୁ ଏ଼ ପେ଼ଡ଼ାତି ଅଟ୍ହି ବାଂଗାରା ୱା଼ରି କିଦେରି; ଏ଼ଦାଣି ବିତ୍ରା ଅ଼ଡ଼େ ପାଙ୍ଗାତା ବାରେ ୱା଼ରି କିଦେରି, ଇଞ୍ଜାଁ, ତାନି ଲାକ ସା଼ରି ୱାକି ବାଂଗାରା ଗିଚୁ କିଦେରି। ଇଞ୍ଜାଁ, ଏ଼ଦାଣି ତାକି ବାଂଗାରାତି ସା଼ରିଗଟା ଡେ଼କିନି କାଡ୍ୱାୟାଁ କିହାଁ ତାନି ସା଼ରି କନତା ହୀଦେରି; ରକୱାକି ରୀ କାଡ୍ୱାୟାଁ ଅ଼ଡ଼େ ରକୱାକି ରୀ କାଡ୍ୱାୟାଁ ଡ଼ୟିନୁ। ଅ଼ଡ଼େ ମୀରୁ ସିଟିମ ମା଼ର୍କା ତଲେ ରୀ ଡେ଼କିନି କ଼ଣାୟାଁ କେ଼ପାହାଁ ଏ଼ କ଼ଣାୟାଁ ବାଂଗାରା ୱା଼ରି କିଦେରି। ଇଞ୍ଜାଁ ଏ଼ ପେ଼ଡ଼ାତି ଡେ଼କାଲି ତାକି ପେ଼ଡ଼ାତି ରୀ ୱାକିତି କାଡ୍ୱାୟାଁଣା ଏ଼ କ଼ଣାୟାଁ ପେନ୍ଦିଦେରି। ଏ଼ କ଼ଣାୟାଁ ପେ଼ଡ଼ାତି କାଡ୍ୱାୟାଁଣା ଡ଼ୟିନୁ, ଏମ୍ବାଟି ପାଙ୍ଗାତା ରେୱିଆ଼ଉ। ଇଞ୍ଜାଁ ନା଼ନୁ ମିଙ୍ଗେ ଏମିନି ରା଼ଜିମା଼ନାତି ରୀ ୱାଲି ପା଼ଟାୟାଁ ହିୟାଇଁ ଏ଼ଦାଆଁ ଏ଼ ପେ଼ଡ଼ା ବିତ୍ରା ଇଟିଦେରି।
ଏଚେଟିଏ ମୀରୁ ଅଟ୍ହି ବାଂଗାରା ତଲେ ରୀ ହା଼ତା ଆଦା ଲାମ୍ବା ଅ଼ଡ଼େ ର଼ ହା଼ତା ଆଦା ଅ଼ସାରା ର଼ ପା଼ପୁ ପ୍ଡିକ୍ନି ଡା଼ପ୍ଣା ତିୟାରା କିଦେରି। ମୀରୁ ବାଂଗାରା ତଲେ ରୀ କିରୁବ4 ତିୟାରା କିଦେରି; ଏ଼ୱାଆଁ ମୂତ୍ଲା ତଲେ କଲ୍ହିହିଁ କିହାଁ ଏ଼ ପା଼ପୁ ପ୍ଡିକ୍ନି ଡା଼ପ୍ଣା ରୀ ତା଼ର୍ପୁ ୱାକି ଇଟିଦେରି। ର଼ କିରୁବ ର଼ ତା଼ର୍ପୁ ୱାକି ଅ଼ର କିରୁବ ଅ଼ର ତା଼ର୍ପୁ ୱାକି ଇଟିଦେରି; ରୀ କିରୁବଣି ପା଼ପୁ ପ୍ଡିକ୍ନାଣି ତଲେ ଆଣ୍ତ୍ୱି କିଦେରି ଅ଼ଡ଼େ ଏମ୍ବାଆଁ ରିକୱାକି ନିପ୍ହାଁ ଇଟିଦେରି। ଇଞ୍ଜାଁ କିରୁବୟାଁ ତା଼ମ୍ବୁ ତା଼ମ୍ବୁ ମେସ୍ପି ଆ଼ହାଁ, ମା଼ରାୟାଁ ଲାକ ପେର୍ହାଁ ପା଼ପୁ ପ୍ଡିକ୍ନି ଡା଼ପ୍ଣାତି ପ୍ଡିକ୍ନୁ; ଇଞ୍ଜାଁ ପା଼ପୁ ପ୍ଡିକ୍ନାଣି ୱାକି ତାମି ମୂମ୍ବୁ ଡ଼ୟିନେ। ମୀରୁ ଏ଼ ପା଼ପୁ ପ୍ଡିକ୍ନି ଡା଼ପ୍ଣା ଏ଼ ପେ଼ଡ଼ା ଲାକ ଇଟିଦେରି, ଇଞ୍ଜାଁ, ନା଼ନୁ ମିଙ୍ଗେ ଏମିନି ରା଼ଜିମା଼ନା ଆ଼କୁ ହିୟାଇଁ, ଏ଼ୱାଆଁ ଏ଼ ପେ଼ଡ଼ା ବିତ୍ରା ଇଟିଦେରି। ଅ଼ଡ଼େ ନା଼ନୁ ଏ଼ ଟା଼ୟୁତା ନୀ ତଲେ କାତା ଆୟାଇଁ ଅ଼ଡ଼େ ପା଼ପୁ ପ୍ଡିକ୍ନି ଲାକନି ପାରୁଟି, ଇଚିହିଁ ରା଼ଜିମା଼ନା ପେ଼ଡ଼ା ଲାକ ମାନି ରୀ କିରୁବୟାଁ ତା଼ଣାଟି ନୀ ତଲେ କାତା ଆ଼ହାଁ ଇସ୍ରାୟେଲ ଲ଼କୁତି ନା଼ ବାରେ ହୁକୁମି ନିଙ୍ଗେ ୱେସ୍ତାଇଁ।
ହେର୍ପିନି ରୂଟି
(ହାନାୟି ୩୭:୧୦-୧୬)
ଏଚେଟିଏ ମୀରୁ ସିଟିମ ମା଼ର୍କା ତଲେ ରୀ ହା଼ତା ଲାମ୍ବା ଅ଼ଡ଼େ ର଼ ହା଼ତା ଅ଼ସାରା ଅ଼ଡ଼େ ର଼ ହା଼ତା ଆଦା ପାଡ୍ଣି ର଼ ବାଲାପା଼ଟା5 ତିୟାରା କିହାଁ, ଅଟ୍ହି ବାଂଗାରା ତଲେ ଏ଼ଦାଣି ୱା଼ରି କିଦେରି, ଇଞ୍ଜାଁ, ଏ଼ ବାଲାପା଼ଟା ସା଼ରିୱାକି ବାଂଗାରା ଗିଚୁ କିଦେରି। ଇଞ୍ଜାଁ ଏ଼ଦାଣି ସା଼ରିୱାକି ସା଼ରି ଆଙ୍ଗୁଲି ପାଡିକିହିଁ ଅ଼ଟି ଗୂର୍ଚାହାଁ ତାନି ସା଼ରିୱାକି ବାଂଗାରା ଗିଚୁ କିଦେରି। ଅ଼ଡ଼େ ବାଂଗାରା ତଲେ ସା଼ରିଗଟା କାଡ୍ୱାୟାଁ ତିୟାରା କିହାଁ ଏ଼ଦାଣି ସା଼ରି କନତା ସା଼ରିଗଟା କଡାୟାଁ ଡ଼ୟିନୁ। ଏ଼ ବାଲାପା଼ଟା ଡେ଼କାଲି ତାକି କ଼ଣା ପେନ୍ଦାଲି କାଡ୍ୱାୟାଁ, ଏ଼ ଅ଼ଟି ଗୂର୍ଚାମାନି ଦାରିତା ଡ଼ୟିନୁ। ଇଞ୍ଜାଁ, ଏ଼ ବାଲାପା଼ଟା ଡେ଼କାଲି ସିଟିମ ମା଼ର୍କା ତଲେ କ଼ଣା ତିୟାରା କିହାଁ ବାଂଗାରା ୱା଼ରି କିଦେରି। ଇଞ୍ଜାଁ, ଦୁପ୍ଣି ସାଡ଼୍ୱା, କର୍ପା, ମୂକ୍ଉରି ନକି ଅ଼ଡ଼େ ଏ଼ୟୁ ୱା଼କ୍ହାଲି ଜା଼ଚୁ ତିୟାରା କିଦେରି, ଈ ବାରେ ଅଟ୍ହି ବାଂଗାରା ତଲେ ତିୟାରା କିଦେରି। ନୀନୁ ଏ଼ ବାଲାପା଼ଟା ଲାକ ନା଼ ନ଼କିତା କା଼ଲେଏ ସୁଦୁ ରୂଟି ଇଟିଦି।
ବାଂଗାରା ଦୀୱଁ ମୁଣ୍ତା
(ହାନାୟି ୩୭:୧୭-୨୪)
ଅ଼ଡ଼େ ନୀନୁ ଅଟ୍ହି ବାଂଗାରା ତଲେ ର଼ ଦୀୱଁ ମୁଣ୍ତା ତିୟାରା କିଦି; ଏ଼ଦାଆଁ ମୂତ୍ଲା ତଲେ କଲ୍ହାଁ ଏମ୍ବାତି ଡାକି ଅ଼ଡ଼େ କମାୟାଁ ତିୟାରା ଆ଼ନୁ; ଅ଼ଡ଼େ ଗୁର୍ଞ୍ଜିତି ଡୂଣ୍ତି ଇଞ୍ଜାଁ ପୂଙ୍ଗା ଡାକିତା ଆଣ୍ତ୍ୱି ଆ଼ହାଁ ଡ଼ୟିନୁ। ଇଚିହିଁ, ଏମ୍ବାତି ରକୱାକି ତୀନିଗଟା ଦୀୱଁ କମାୟାଁ ଅ଼ଡ଼େ ରକୱାକି ତୀନିଗଟା ଦୀୱଁ କମାୟାଁ ଇଲେକିହିଁ ରିକୱାକି ସ଼ଗଟା କମାୟାଁ ହ଼ନୁ। ଏମ୍ବାତି ର଼ କମାତା ଜଲା ଜା଼ମ୍ବୁ ପୂୟୁ ଲେହେଁତି ତୀନିଗଟା ଗୁର୍ଞ୍ଜିତି, ଡୂଣ୍ତି ଅ଼ଡ଼େ ପୂୟୁ ଡ଼ୟିନେ, ଇଞ୍ଜାଁ ଅ଼ର କମାତା ଜଲା ଜା଼ମ୍ବୁ ପୂୟୁ ଲେହେଁତି ତୀନିଗଟା ଗୁର୍ଞ୍ଜିତି, ଡୂଣ୍ତି ଅ଼ଡ଼େ ପୂୟୁ ଡ଼ୟିନେ; ଏ଼ ଦୀୱଁ ମୁଣ୍ତାଟି ହ଼ଚାମାନି ସ଼ଗଟା କମାୟାଁ ଇଲେକିହିଁ ଆ଼ନୁ। ସାମା ଦୀୱଁ ମୁଣ୍ତାତା ଜଲା ଜା଼ମ୍ବୁ ପୂୟୁ ଲେହେଁତି ସା଼ରିଗଟା ଗୁର୍ଞ୍ଜିତି, ଡୂଣ୍ତି ଅ଼ଡ଼େ ପୂୟୁ ଡ଼ୟିନେ; ଇଞ୍ଜାଁ ଏ଼ ଦୀୱଁ ମୁଣ୍ତାଟି ଏମିନି ସ଼ଗଟା କମାୟାଁ ହ଼ନୁ, ଏ଼ୱାସିକା ରୀ କମାୟାଁ ଡ଼଼ଇ ର଼ ଡୂଣ୍ତି, ଅ଼ଡ଼େ ରୀ କମାୟାଁ ଡ଼଼ଇ ର଼ ଡୂଣ୍ତି ଅ଼ଡ଼େ ତୀନି ଲମ୍ବର କମାୟାଁ ଡ଼଼ଇ ର଼ ଡୂଣ୍ତି ଡ଼ୟିନେ। ଡୂଣ୍ତି ଅ଼ଡ଼େ କମାୟାଁ ରଣ୍ତିଏ ଦୀୱଁ ମୁଣ୍ତା ଆ଼ନେ, ଏ଼ ବାରେ ଅଟ୍ହି ବାଂଗାରା ତଲେ ତିୟାରା ଆ଼ତି ର଼ ମୂତ୍ଲାତି କାମା ଆ଼ନେ। ଅ଼ଡ଼େ ନୀନୁ ଏମ୍ବାତାକି ସା଼ତାଗଟା ଦୀୱଁୟାଁ ତିୟାରା କିଦି; ଏଚେଟିଏ ଲ଼କୁ ଏ଼ ଦୀୱଁୟାଁ ଡ଼଼ସ୍ତିସାରେ, ଏ଼ୱାଆଁ ନ଼କିତା ଉଜେଡ଼ି ଆ଼ନେ। ଅ଼ଡ଼େ ଅଟ୍ହି ବାଂଗାରା ତଲେ ଏମ୍ବାତି ସିମ୍ଟା ଅ଼ଡ଼େ ରୀଙ୍ଗାୟାଁ ଡ଼େୱିନି ହାଟ୍ୱା ତିୟାରା କିଦି। ଏ଼ ଦୀୱଁ ମୁଣ୍ତା ଅ଼ଡ଼େ ଏମ୍ବାତି ଆ଼ସ୍ତି ବାରେ ର଼ ତାଲନ୍ତ6 ଅଟ୍ହି ବାଂଗାରା ତଲେ ଆ଼ନେ। ଜାଗ୍ରାତା, ହ଼ରୁ ଲାକ ନିଙ୍ଗେ ଏ଼ନି ଏ଼ନି କାମା କିୟାଲି ତ଼ସ୍ପି ଆ଼ହାମାନେ, ଏଲେକିହିଁଏ ବାରେ କିମୁ।
Source notes (6)
- Footnote ସିସୁକ/ସାମ୍ଦୁରିତି ପା଼ଲୁ ଊଟ୍ନି ଗ଼ଜିୟା ମୂତି ମୀନୁ ତ଼ଲୁ ସମାନା ।
- Footnote ଏପଦ/ବମିଟିଏ କୁଦ୍ଗୁ ପାତେକା ପୂଜେରାଙ୍ଗା ତୁର୍ନି ଲାକତି ସକା
- Footnote ମଣି/ଦାରାଗାଟି ୱାଲ୍କା ।
- Footnote କିରୁବ/ମା଼ରାୟାଁଗାଟି ଦୂତୁ
- Footnote ବାଲାପା଼ଟା/ମାହାପୂରୁକି ହେର୍ପିତି ରୂଟି ଇଟିନି ଟା଼ୟୁ ।
- Footnote ର଼ ତାଲନ୍ତ/୩୫ କେ଼ଜି ସମାନା
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.