Kuvi Bible
ହାନାୟି 18
ଜିତ୍ର ମ଼ସାଇଁ ଜା଼ପ୍ନାୟି
ଏମ୍ବାଟିଏ ପ୍ରବୁ ମ଼ସାକି ଅ଼ଡ଼େ ତାନି ଲ଼କୁ ଇସ୍ରାୟେଲ ତାକି ଏ଼ନି ଏ଼ନି କାମା କିହାମାନେସି, ବାରେକିହାଁ ପ୍ରବୁ ଇସ୍ରାୟେଲ କୂଡ଼ାତି ମିସର ଦେ଼ସାଟି ଏ଼ନିକିଁ ହ଼ପ୍ହା ତାଚାମାନେସି, ଈ ବାରେ କାତା ମ଼ସା ପତ୍ଲେଏସି ମିଦିୟନତି ପୂଜେରା ଜିତ୍ର ୱେଚେସି। ଏଚେଟିଏ ମ଼ସା ପତ୍ଲେଏସି ଏ଼ ଜିତ୍ର ତାନି ଇଜ ପାଣ୍ତ୍ୱି ଆ଼ହାମାନି ମ଼ସା ଡକ୍ରି ସିପରାନି ଅ଼ଡ଼େ ତାନି ରୀ ମୀର୍କାଣି ଅ଼ହିଁ ହାଚେସି। ଏ଼ ରୀ ମୀର୍କା ବିତ୍ରାଟି ରଅଣି ଦ଼ରୁ ଗେର୍ସମ1, ଇଚିହିଁ ଏ଼ୱାସି ଏଲେଇଞ୍ଜାମାଚେସି, “ନା଼ନୁ ଏଟ୍କା ଦେ଼ସାତା ବାସା କିତେଏଁ।” ଅ଼ଡ଼େ ରଅଣି ଦ଼ରୁ ଇଲିୟେଜର2, ଇଚିହିଁ ଏ଼ୱାସି ଏଲେଇଞ୍ଜାମାଚେସି, “ନା଼ ତାଞ୍ଜିତି ମାହାପୂରୁ ନା଼ ସା଼ୟେମି ଆ଼ହାଁ ପା଼ରତି କାଣ୍ତାଟି ନାଙ୍ଗେ ଗେଲ୍ପାତେସି।” ଏଚେଟିଏ ମ଼ସା ପତ୍ଲେଏସି ଜିତ୍ର, ମ଼ସାତି ରୀ ମୀର୍କା ଅ଼ଡ଼େ ମ଼ସା ଡକ୍ରିନି ଅ଼ହିଁ ବାଟାତା, ଇଚିହିଁ, ମ଼ସା ତା଼ଣା, ମାହାପୂରୁତି ହ଼ରୁତା ଏମ୍ବିକାଣ୍ତା ଏ଼ୱାସି ତୂମୁ ଗ଼ଞ୍ଜାମାଚେସି, ଏ଼ ଟା଼ୟୁତା ୱା଼ତେସି। ଇଞ୍ଜାଁ ଏ଼ୱାସି ମ଼ସା ତା଼ଣା କାବ୍ରୁ ୱେସା ପାଣ୍ତିତେସି, “ନୀ ପତ୍ଲେଏସି ଜିତ୍ର, ନା଼ନୁ ଅ଼ଡ଼େ ନୀ ଡକ୍ରି ଇଞ୍ଜାଁ ନୀ ରୀ ମୀର୍କା ମା଼ମ୍ବୁ ବାରେ ନୀ ତା଼ଣା ୱା଼ହାମାନମି।” ଏଚିବେ଼ଲା ମ଼ସା ତାନି ପତ୍ଲେଏଣି ତଲେ କାତା ଆୟାଲି ପାଙ୍ଗାତା ହାଜାହାଁ ଏ଼ୱାଣାଇଁ ଜହରା କିହାଁ ନଣ୍ଡିତେସି; ଇଞ୍ଜାଁ ଏ଼ୱାରି ତାମି ନେହିଁ କାତା ୱେଚି ଡା଼ୟୁ ଏ଼ୱାରି ତୂମୁତା ହ଼ଟେରି। ଏଚେଟିଏ ପ୍ରବୁ ଇସ୍ରାୟେଲ କ଼ସମି ପା଼ରଇଁ ଅ଼ଡ଼େ ମିସର ଲ଼କୁ ତାକି ଏ଼ନା ଏ଼ନାଆଁ କିହାମାଚେସି, ଅ଼ଡ଼େ ଜିରୁତା ଏ଼ୱାରାକି ଏମିନି ବାରେ ଦୁକୁ କସ୍ତ ଆ଼ହାମାନେ, ଇଞ୍ଜାଁ ପ୍ରବୁ ଏ଼ନିକିହିଁ ଏ଼ୱାରାଇଁ ଗେଲ୍ପାହାଁ ତାଚାମାନେସି, ଈ ବାରେ କାତା ମ଼ସା ତାନି ପତ୍ଲେଏଣାଇଁ ୱେସ୍ତେସି। ଏଚେଟିଏ ପ୍ରବୁ ମିସର ଲ଼କୁ କେୟୁଟି ଇସ୍ରାୟେଲ ଲ଼କୁଣି ଗେଲ୍ପାହାଁ ଏମିନି ବାରେ ନେହାଣି ହୀହାମାନେସି, ଏ଼ଦାଆଁତାକି ଜିତ୍ର ହା଼ରେକା ରା଼ହାଁ ଆ଼ତେସି। ଇଞ୍ଜାଁ, ଜିତ୍ର ଏଲେଇଚେସି, “ଏମିନି ପ୍ରବୁ ମିସର ଲ଼କୁ ଅ଼ଡ଼େ ପା଼ର କେୟୁଟି ମିଙ୍ଗେ ଗେଲ୍ପାମାଞ୍ଜାନେସି, ଇଞ୍ଜାଁ ମିସର ଲ଼କୁତି ହ଼ଲିୟାଙ୍ଗା କାମା କିନି ତା଼ଣାଟି ମିଙ୍ଗେ ଗେଲ୍ପାମାଞ୍ଜାନେସି, ଏ଼ୱାସି ନେହେଁ। ପ୍ରବୁ ବାରେ ପେ଼ଣ୍କା କିହାଁ ହା଼ରେକା କାଜାସି, ଈଦାଆଁ ନୀଏଁ ନା଼ନୁ ପୁଚେଏଁ। ହାଅ, ଏ଼ୱାରି ଏମିନାଣି ତାକି ବଡପଣ କିହାମାଚେରି ଏ଼ କାତାତାକି ଏ଼ୱାସି କାଜାସି।” ଏଚେଟିଏ ମ଼ସାତି ପତ୍ଲେଏସି ଜିତ୍ର ମାହାପୂରୁ ତାକି ହିଚୁତା ହୂଡିନି ପୂଜା ହେର୍ପିତେସି; ଇଞ୍ଜାଁ ହାରଣ ଅ଼ଡ଼େ ଇସ୍ରାୟେଲତି ବାରେ ପ୍ରାଚିନାଙ୍ଗା ୱା଼ହାଁ ମାହାପୂରୁ ନ଼କିତା ମ଼ସା ପତ୍ଲେଏଣି ତଲେ ତିଚେରି।
ବିଚାରା କିନାରାଇଁ ଆ଼ଚିନାୟି
(ୱେ ମେ଼ରା ୧:୯-୧୮)
ତାନି ଅ଼ର ଦିନା ମ଼ସା ଲ଼କୁଣି ନୀହାଁୟି କିୟାଲି କୁଗାଲିଏ, ବାରେ ଲ଼କୁ ଲା଼ଇଟିଏ ମିଡ଼୍ଅଲା ପାତେକା ଏ଼ୱାଣି ନ଼କିତା ନିଚାହାଁ ଡ଼ୟିତେରି। ଏଚିବେ଼ଲା ମ଼ସା ଲ଼କୁ ତାକି ଏ଼ନା ଏ଼ନାଆଁ କିତେସି, ତାନି ପତ୍ଲେଏସି ଏ଼ଦାଆଁ ମେସାହାଁ ମ଼ସାଇଁ ଏଲେଇଚେସି, “ନୀନୁ ଲ଼କୁଣି ଏ଼ନାଆଁତାକି ଇଲେକିଁ ଲେ଼ମ୍ବିମାଞ୍ଜି ? ନୀନୁ ଏ଼ନାଆଁତାକି ରଅତିଏ କୁଗାହାଁ ଡ଼ୟିଦି ଅ଼ଡ଼େ ବାରେ ଲ଼କୁ ଲା଼ଇଟିଏ ମିଡ଼୍ଅଲା ପାତେକା ନୀ ସା଼ରିୱାକି ନିଚାହାଁ ଡ଼ୟିନେରି ?”
ଏଚେଟିଏ ମ଼ସା ତାନି ପତ୍ଲେଏଣାଇଁ ଏଲେଇଚେସି, “ଲ଼କୁ ମାହାପୂରୁତି ନୀହାଁୟି ତେଲ୍ହାଲି ନା଼ ତା଼ଣା ୱା଼ନେରି। ଅ଼ଡ଼େ ଏ଼ୱାରି ବିତ୍ରା ଏ଼ନି ଗଡ଼୍ହା ଆ଼ତିହିଁ, ନା଼ ତା଼ଣା ୱା଼ନେରି; ଆ଼ତି ଜିକେଏ ନା଼ନୁ ଦ଼ହ ଗାଟାଣାଇଁ ଅ଼ଡ଼େ ଦ଼ହ ହିଲାଆ ଗାଟାଣାଇଁ ନୀହାଁୟି କିଇଁ, ଇଞ୍ଜାଁ, ମାହାପୂରୁତି ମେ଼ରା ବାରେ ଏ଼ୱାରାଇଁ ତେଲ୍ହି କିଇଁ।”
ଏଚେଟିଏ ମ଼ସା ପତ୍ଲେଏସି ଏଲେଇଚେସି, “ନୀ ଈ କାମା ନେହେଁ ଆ଼ଏ। ନୀନୁ ଅ଼ଡ଼େ ନୀ ତଲେ ମାନି ଈ ଲ଼କୁ ୱା଼ହା ହାଜେରି; ଇଚିହିଁ ଈ କାମା ନିଙ୍ଗେ ତାକି ହା଼ରେକା ବ଼ଜୁ; ନୀନୁ ରଅତିଏ ଈ କାମା କିୟାଲି ଆ଼ଡଅତି। ଏ଼ଦାଆଁତାକି ନୀନୁ ନା଼ କାତା ଆହ୍ମୁ, ନା଼ନୁ ନିଙ୍ଗେ ବୁଦି ୱେସ୍ତାଇଁ, ଇଞ୍ଜାଁ ମାହାପୂରୁ ନୀ ତଲେ ମାଣ୍ମ୍ବେସି; ମାହାପୂରୁ ନ଼କିତା ନୀ ଲ଼କୁ ୱାକିଟି ଆ଼ହାଁ ଏ଼ୱାରି କାତା ମାହାପୂରୁ ତା଼ଣା ୱେହ୍ମୁ। ଇଞ୍ଜାଁ ନୀନୁ ଏ଼ୱାରାଇଁ ମାହାପୂରୁତି ମେ଼ରା ଅ଼ଡ଼େ ହୁକୁମି ଜା଼ପ୍ମୁ ଅ଼ଡ଼େ ଏ଼ୱାରି ତା଼କିନି ଜିରୁ ଅ଼ଡ଼େ କିନି କାମା ତ଼ହ୍ମୁ। ଅ଼ଡ଼େ ନୀନୁ ଈ ଲ଼କୁ ତା଼ଣାଟି କାମା କିୟାଲି ଆ଼ଡିନାରାଇଁ, ଇଚିହିଁ, ମାହାପୂରୁଇଁ ଆଜିନାରାଇଁ, ସାତା କାତା ୱେହ୍ନାରାଇଁ, ଅ଼ଡ଼େ ଲାଗେଏତି ଜୂପ୍କା ଅ଼ପାଆଗାଟି ଇଲେତି ଲ଼କୁଣି ବାଚି କିମୁ; ଇଞ୍ଜାଁ, ଏ଼ୱାରାଇଁ ର଼ ମା଼ଣା ଲ଼କୁ ମୁହେଁ ରଅଣାଇଁ, ପା଼ସାକ଼ଡ଼ି ଲ଼କୁ ମୁହେଁ ରଅଣାଇଁ, ଦୁଇ କ଼ଡ଼ି ଦସ ଲ଼କୁ ମୁହେଁ ରଅଣାଇଁ, ଅ଼ଡ଼େ ଦସ ଜା଼ଣା ମୁହେଁ ରଅଣାଇଁ ଇଲେକିଁ ବାଚିକିହାଁ ଏ଼ କାମାତା ହେର୍ପାମୁ। ଏ଼ୱାରି କା଼ଲେଏ ଲ଼କୁଣି ନୀହାଁୟି କିପେରି, ଇଞ୍ଜାଁ ଏ଼ନି କାଜା କାତା ଆ଼ତିହିଁ ନୀ ତା଼ଣା ତାପେରି, ସାମା ଊଣା ଊଣା କାତା ବାରେ ତା଼ମ୍ବୁଏ ନୀହାଁୟି କିପେରି, ଆତିହିଁ ନୀ କାମାତି ବ଼ଜୁ ଊଣା ଆ଼ନେ, ଇଞ୍ଜାଁ ଏ଼ୱାରି ନୀ ତଲେ ବ଼ଜୁ ଡେ଼କିନେରି। ନୀନୁ ଇଲେ କିତିହିଁ ଇଞ୍ଜାଁ ମାହାପୂରୁ ଇଲେ କିୟାଲି ତାକି ହୁକୁମି ହିୟାନେସି, ଆତିହିଁ ନୀନୁ ଅ଼ର୍ହାଲି ଆ଼ଡିଦି, ଅ଼ଡ଼େ ଈ ବାରେ ଲ଼କୁ ନେହିଁ ତଲେ ତାମି ତାମି ଟା଼ୟୁତା ହାନେରି।”
ଏଚେଟିଏ ମ଼ସା ତାନି ପତ୍ଲେଏଣା କାତା ଆସାହାଁ ଏ଼ୱାଣି କାତା ଲେହେଁ ଏ଼ ବାରେ କାମା କିତେସି। ଇଞ୍ଜାଁ ମ଼ସା ବାରେ ଇସ୍ରାୟେଲ ଲ଼କୁ ତା଼ଣାଟି କାମା କିୟାଲି ଆ଼ଡିନାରାଇଁ ଆ଼ଚାହାଁ ଲ଼କୁତି ମୁହେଁ କାଜାରାଇଁ, ଇଚିହିଁ, ର଼ ମା଼ଣା ତାକି ରଅଣାଇଁ, ପା଼ସାକ଼ଡ଼ି ତାକି ରଅଣାଇଁ, ଦୁଇ କ଼ଡ଼ି ଦସ ଜା଼ଣା ତାକି ରଅଣାଇଁ ଅ଼ଡ଼େ ଦସ ଜା଼ଣା ତାକି ରଅଣାଇଁ ଆ଼ଚିତେସି। ଏଚେଟିଏ ଏ଼ୱାରି ବାରେ ବେ଼ଲା ଲ଼କୁତି ନୀହାଁୟି କିତେରି; ଅ଼ଡ଼େ ଆ଼ଡାଆଗାଟି ନୀହାଁୟି ମ଼ସା ତା଼ଣା ତାତେରି; ସାମା ଊଣା ଊଣା କାତା ତା଼ମ୍ବୁଏ ନୀହାଁୟି କିତେରି।
ଏଚେଟିଏ ମ଼ସା ତାନି ପତ୍ଲେଏଣାଇଁ ହେଲ ହିୟାଲିଏ, ଏ଼ୱାସି ତାମି ଦେ଼ସାତା ହାଚେସି।
Source notes (2)
- Footnote ଗେର୍ସମ/ଈ ଟା଼ୟୁତା ବାସା କିତାତେଏଁ
- Footnote ଇଲିୟେଜର/ମାହାପୂରୁ ନା଼ ସା଼ୟେମି କିନାସି
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.