Kuvi Bible
ହାନାୟି 16
ଲାକପୂରୁତି କା଼ଦି ମାନା ଅ଼ଡ଼େ ତୁମ୍ବାୟାଁ
ଏଚେଟିଏ ଏ଼ୱାରି ଏଲିମଟିଏ ତା଼କିତେରି, ଅ଼ଡ଼େ ମିସର ଦେ଼ସାଟି ହାଚି ଡା଼ୟୁ ରୀ ଲେ଼ଞ୍ଜୁତି ପନ୍ଦର ଦିନାତା ଇସ୍ରାୟେଲ ଲ଼କୁତି ବାରେ କୁଲମି ଏଲିମ ଅ଼ଡ଼େ ସିନୟତି ମାଦି ମାନି ସିନ୍ ବାଟାତା ଏଗାତେରି। ଏଚିବେ଼ଲା ଇସ୍ରାୟେଲ ଲ଼କୁତି ବାରେ କୁଲମି ମ଼ସା ଅ଼ଡ଼େ ହାରଣ କ଼ପାଟି ବାଟାତା ବା଼ଚା କିତେରି। ଇଞ୍ଜାଁ, ଇସ୍ରାୟେଲ ଲ଼କୁ ଏ଼ୱାରାଇଁ ଏଲେଇଚେରି, “ଆୟ଼ତା ମା଼ମ୍ବୁ ଏଚିବେ଼ଲା ଊଙ୍ଗା ଡ:କା ଦାରି କୁଗାହାଁ ବାଣ୍ଡି ପାଞ୍ଜେ ରା଼ନ୍ଦା ତିଞ୍ଜିମାଚମି, ଏଚିବେ଼ଲା ମା଼ମ୍ବୁ ମିସର ଦେ଼ସାତା ପ୍ରବୁ କେୟୁତା ହା଼ତମିମା। ମୀରୁ ଈ ବାରେ କୁଲମିତି ହାକିଟି ପା଼ୟାଲି ତାକି ମାଙ୍ଗେ ହ଼ପ୍ହାଁ ଈ ବାଟାତା ତାଚାମାଞ୍ଜାଦେରି।”
ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ମେହ୍ମୁ ନା଼ନୁ ମିଙ୍ଗେ ତାକି ହା଼ଗୁ ଲାକଟି ତିନି କା଼ଦି ହିୟାଇଁ; ଇଞ୍ଜାଁ, ଲ଼କୁ ବାରେ ପାଙ୍ଗାତା ହାଜାହାଁ ଦିନାତାକି ଦିନା, ଏଚେକା ଲ଼ଡ଼ା ଆ଼ନେ ଏଚେକା କା଼ଦି କୂଡ଼ି କିନେରି; ଏଚେଟିଏ ଏ଼ୱାରି ନା଼ ମେ଼ରା ଲେହେଁ ତା଼କିନେରି କି ଆ଼ଏ ନା଼ନୁ ଏ଼ୱାରାଇଁ ଈଦାଆଁ ତଲେ ତାୟିପାରି କିଇଁ। ସ଼ଦିନାତା ଏ଼ୱାରି ଏ଼ନାଆଁ ତାନେରି ଏ଼ଦାଆଁ ୱାଜିସାରେ ଦିନା ତାକି ଦିନା ଏଚେକା କୂଡ଼ି କିନେରି ତାନି ରୀ ଗୂଣୁ ଆ଼ନେ, ଏ଼ଦାଆଁତାକି ଏ଼ ଦିନା ଏଚେକା କୂଡ଼ି କିନେରି ଏ଼ଦାଆଁ କୂଡ଼ିକିହାଁ ଇଟାପେରି।”
ଏଚେଟିଏ ମ଼ସା ଅ଼ଡ଼େ ହାରଣ ଇସ୍ରାୟେଲ ଲ଼କୁଣି ଏଲେଇଚେରି, “ପ୍ରବୁ ମିଙ୍ଗେ ମିସରଟିଏ ହ଼ପ୍ହା ତାଚାମାଞ୍ଜାନେସି, ଈଦାଣି ମୀରୁ ମିଡ଼୍ଅଲା ବେ଼ଲା ପୁଞ୍ଜେରି। ଇଞ୍ଜାଁ, ଲା଼ଇ ଅ଼ଲି ପ୍ରବୁତି ଗା଼ୱୁରମି ମେହ୍ଦେରି; ଏ଼ନିଇଚିହିଁ ପ୍ରବୁ କ଼ପାଟି ମୀ ବା଼ଚା ଏ଼ୱାସି ୱେଞ୍ଜାମାନେସି; ମା଼ମ୍ବୁ ଆମ୍ବାଆତମି ଜେ ମୀରୁ ମା଼ କ଼ପାଟି ବା଼ଚା କିଦେରି ?” ଅ଼ଡ଼େ ମ଼ସା ଏଲେଇଚେସି, “ପ୍ରବୁ ମିଡ଼୍ଅଲା ବେ଼ଲା ତିଞ୍ଜାଲି ମିଙ୍ଗେ ଊଙ୍ଗା ହିୟାନେସି, ଅ଼ଡ଼େ ଲା଼ଇ ବେ଼ଲାତା ବାଣ୍ଡି ପାଞ୍ଜିନି ପାତେକା ରା଼ନ୍ଦା ହିୟାନେସି; ଇଚିହିଁ ପ୍ରବୁ କ଼ପାଟି ଜ଼ଲାମାନି ମୀ ବା଼ଚା ଏ଼ୱାସି ୱେନେସି। ମା଼ମ୍ବୁ ଆମ୍ବାଆତମି ? ମୀ ଜ଼ଲିମାନି ବା଼ଚା ମା଼ କ଼ପାଟି ଆ଼ଏ, ସାମା ପ୍ରବୁ କ଼ପାଟି ଆ଼ହିମାନେ।”
ଅ଼ଡ଼େ ମ଼ସା ହାରଣଇଁ ଏଲେଇଚେସି, “ନୀନୁ ଇସ୍ରାୟେଲ ଲ଼କୁତି ବାରେ କୁଲମିଇଁ ୱେହ୍ମୁ, ‘ମୀରୁ ପ୍ରବୁତି ନ଼କିତା ୱା଼ଦୁ, ଏ଼ୱାସି ମୀ ଜ଼ଲାମାନି ବା଼ଚା ୱେଞ୍ଜାମାନେସି।’” ଏଚେଟିଏ ହାରଣ ଇସ୍ରାୟେଲ ଲ଼କୁତି ବାରେ କୁଲମିଇଁ ଈ କାତା ୱେସିମାଚାଟି ଏ଼ୱାରି ବାଟା ୱାକି ସିନିକିହାଲିଏ, ମେହ୍ଦୁ ହା଼ଗୁତା ମାହାପୂରୁତି ଗା଼ୱୁରମି ତ଼ଞ୍ଜା ଆ଼ତେ। ଇଞ୍ଜାଁ, ପ୍ରବୁ ମ଼ସାଇଁ ଏଲେଇଚେସି, “ନା଼ନୁ ଇସ୍ରାୟେଲ ଲ଼କୁତି ବା଼ଚା ୱେଞ୍ଜାମାଇଁ; ନୀନୁ ଏ଼ୱାରାଇଁ ୱେହ୍ମୁ, ମୀରୁ ମିଡ଼୍ଅଲା ବେ଼ଲା ଊଙ୍ଗା ତିଞ୍ଜେରି, ଅ଼ଡ଼େ ଲା଼ଇ ରା଼ନ୍ଦା ତିଞ୍ଜାହାଁ ପାଞ୍ଜିଦେରି; ଏଚେଟିଏ ନା଼ନୁ ମୀ ପ୍ରବୁ ମାହାପୂରୁତେଏଁ ଏ଼ଦାଆଁ ମୀରୁ ପୁଞ୍ଜେରି।”
ଏଚେଟିଏ ମିଡ଼୍ଅଲା ବେ଼ଲା ତୁମ୍ବାୟାଁ ୱା଼ହାଁ ତୂମୁ ଇଲ୍କା ସା଼ରିୱାକି ନେଞ୍ଜାହାଚୁ, ଇଞ୍ଜାଁ ଲା଼ଇ ବେ଼ଲାତା ତୂମୁ ସା଼ରିୱାକି ପେଣ୍ଡି ରିତେ। ଈଦାଣି ଡା଼ୟୁ ରିହାମାଚି ପେଣ୍ଡି ୱା଼ୟାଲିଏ ବୂମିତି ମାଚୁ ଲେହେଁ ଗୁର୍ଞ୍ଜିତି ଊଣା ଊଣା ଆ଼ସ୍ତି ବାଟାତା ଡ଼ୟିତେ। ଏଚେଟିଏ ଇସ୍ରାୟେଲ ଲ଼କୁ ଏ଼ଦାଆଁ ମେସାହାଁ ତା଼ମ୍ବୁ ତା଼ମ୍ବୁଏ ୱେସ୍ପି ଆ଼ତେରି, “ଈଦି ଏ଼ନାୟି1 ?” ଇଚିହିଁ ଏ଼ଦି ଏ଼ନାୟି ମାଚେ, ଏ଼ୱାରି ପୁଞ୍ଜା ହିଲାଆତେରି। ଏଚେଟିଏ ମ଼ସା ଏଲେଇଚେସି, “ଈଦି ମିଙ୍ଗେ ତାକି ପ୍ରବୁ ହିୟାତି ରା଼ନ୍ଦା। ଈଦାଣିତାକି ପ୍ରବୁ ହୁକୁମି ହୀହାମାଞ୍ଜାନେସି, ମୀରୁ ବାରେ ଜା଼ଣା ଜାହାରା ତିଞ୍ଜାଲି ଆ଼ଡିନି ବା଼ଡ଼୍ୟୁ ପୁଞ୍ଜାହାଁ ଏ଼ଦାଆଁ କୂଡ଼ିକିଦୁ; ମୀ ବାରେ ଜା଼ଣା ଜାହା ଜାହାରା ତୂମୁୟାଁଣା ମାନି ଲ଼କୁତି ଲେକା ତଲେ ର଼ ର଼ ଲ଼କୁ ତାକି ର଼ ର଼ ଅମର2 କୂଡ଼ିକିଦୁ।”
ଏଚେଟିଏ ଇସ୍ରାୟେଲ ଲ଼କୁ ଏଲେକିତେରି; ଆମ୍ବାଆସି ଗାଡି ଅ଼ଡ଼େ ଆମ୍ବାଆସି ଇଚାଣି କୂଡ଼ି କିତେରି। ଏଚେଟିଏ ଏ଼ୱାରି ଏ଼ଦାଆଁ ଅମରତା ଲା଼ଚାଲିଏ; ଆମ୍ବାଆସି ଗାଡି କୂଡ଼ି କିହାମାଚେସି, ଏ଼ୱାଣିୱାୟି ହା଼ରାଆତେ, ଅ଼ଡ଼େ ଆମ୍ବାଆସି ଇଚାଣି କୂଡ଼ି କିହାମାଚେସି ଏ଼ୱାଣିୱାୟି ଊଣା ଆ଼ଆତେ; ଇଲେକିହିଁ ଏ଼ୱାରି ତିଞ୍ଜାଲି ଆ଼ଡିନି ବା଼ଡ଼୍ୟୁ ତଲେ କୂଡ଼ି କିତେରି। ଏଚେଟିଏ ମ଼ସା ଏ଼ୱାରାଇଁ ଏଲେଇଚେସି “ମୀରୁ ଆମ୍ବାଆତେରି ଲା଼ଇ ପାତେକା ଇଚାଣି ଜିକେଏ ଇଟାଆଦୁ।” ଆ଼ତିଜିକେଏ ଏ଼ୱାରି ମ଼ସାତି କାତା ଆହ୍ଆନା ଆମ୍ବା ଆମ୍ବାଆରି ଲା଼ଇ ପାତେକା ଇଚା ଇଚାଣି ଇଟିତେରି; ସାମା ଏମ୍ବାଆଁ ପୀଡ଼୍କା ଆ଼ହାଁ ଗାନ୍ଦା ଆ଼ତେ। ଏ଼ଦାଣିତାକି ମ଼ସା ଏ଼ୱାରାଇଁ କାର୍ବି ଆ଼ତେସି। ଇଲେକିହିଁ ବାରେ ଦିନା ଲା଼ଇ ଅ଼ଲି ଏ଼ୱାରି ଜାହାରା ତିଞ୍ଜାଲି ଆ଼ଡିନି ବା଼ଡ଼୍ୟୁ ପାତେକା ଏ଼ଦାଆଁ କୂଡ଼ି କିତେରି; ସାମା ଗାଡି କାରା ଆୟାଲିଏ ଏ଼ଦି ୱିର୍ଲା ହାଚେ।
ଏଚେଟିଏ ଏ଼ୱାରି ସ଼ଦିନାତା ରୀ ଗୂଣୁ ଇଚିହିଁ ରଅଣାକି ରୀ ରୀ ଅମର କା଼ଦି କୂଡ଼ି କିତେରି, ଏଚେଟିଏ କୁଲମିତି କାଜାରି ବାରେ ୱା଼ହାଁ ମ଼ସାଇଁ ୱେସ୍ତେରି। ଏଚିବେ଼ଲା ମ଼ସା ଏ଼ୱାରାଇଁ ଏଲେଇଚେସି, “ପ୍ରବୁ ଏ଼ଦାଆଁ ଏଲେଇଞ୍ଜା ମାନେସି, ଇଚିହିଁ ୱିଏ ଜ଼ମିନି ଦିନା ଇଚିହିଁ ପ୍ରବୁ ତାକି ସୁଦୁ ଜ଼ମିନି ଦିନା ଆ଼ନେ; ଏ଼ଦାଆଁତାକି ଏ଼ନାଆଁ ୱାହ୍ନାୟି ମାନେ ଏ଼ଦାଆଁ ୱାହ୍ଦୁ; ଏ଼ନାଆଁ ୱାଜିନାୟି ମାନେ ଏ଼ଦାଆଁ ୱାଜାଦୁ; ଇଞ୍ଜାଁ ଏ଼ନାୟି ହା଼ରିନେ ଏ଼ଦାଆଁ ଲା଼ଇ ପାତେକା କୂଡ଼ିକିହା ଇଟାଦୁ।” ଏଚେଟିଏ ଏ଼ୱାରି ମ଼ସାତି ହୁକୁମି ଲେହେଁ ଏ଼ଦାଆଁ ଲା଼ଇ ପାତେକା ଇଟିତେରି, ଅ଼ଡ଼େ ଏ଼ଦି ଗାନ୍ଦା ଆ଼ଆତେ କି ପିଡ଼୍କା ଆ଼ଆତେ। ଏଚେଟିଏ ମ଼ସା ଏଲେଇଚେସି, “ନୀଞ୍ଜୁ ମୀରୁ ଏ଼ଦାଣି ତିଞ୍ଜୁ, ଇଚିହିଁ ନୀଞ୍ଜୁ ପ୍ରବୁତି ଜ଼ମିନି ଦିନା; ନୀଞ୍ଜୁ ଏ଼ଦାଣି ଗୁଡିୟାତା ବେଟାଆ଼ଅତେରି। ମୀରୁ ସ଼ଦିନା ଏ଼ଦାଆଁ କୂଡ଼ି କିଦେରି, ସାମା ସା଼ତା ଦିନା ଜ଼ମିନି ଦିନା, ଏମ୍ବାଆଁ ଏ଼ନାଆଁ ବେଟାଆ଼ଅତେରି।”
ଆ଼ତି ଜିକେଏ ସା଼ତା ଦିନାତା ଆମ୍ବା ଆମ୍ବାଆରି କୂଡ଼ି କିହାଲି ହାଚେରି, ସାମା ଏ଼ନାଆଁ ବେଟାଆ଼ଆତେରି। ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ମୀରୁ ନା଼ ହୁକୁମି ଅ଼ଡ଼େ ମେ଼ରା ମା଼ନୱି ଆ଼ହାଲି ଏଚର ଦିନା କୂଦେରି ? ମେହ୍ଦୁ, ପ୍ରବୁ ମିଙ୍ଗେ ଜ଼ମିନି ଦିନା ହୀହାଲି ତାକି ଏ଼ୱାସି ସ଼ଦିନାତା ରୀ ଦିନାତି କା଼ଦି ହିୟାନେସି; ମୀରୁ ବାରେ ଜା଼ଣା ସା଼ତା ଦିନାତା ଜାହାରା ଟା଼ୟୁଟି ପାଙ୍ଗାତା ହାଲାଆନା ଜାହାରା ଟା଼ୟୁତା ଡ଼ୟାଦୁ।” ଏ଼ଦାଆଁତାକି ଲ଼କୁ ଏ଼ ସା଼ତା ଦିନାତା ଜ଼ମିତେରି।
ଇଞ୍ଜାଁ, ଇସ୍ରାୟେଲ ଲ଼କୁ ଏ଼ କା଼ଦିତି ଦ଼ରୁ ମାନା ଇଟିତେରି; ଏ଼ଦି ଦାନିୟାଁ ପା଼ଡ଼େୟି ଲେହେଁ ଦବ୍ଲା ଅ଼ଡ଼େ କ୍ରିୟାଁ ଆଟ୍ହି ରୂଟି ଲେହେଁ ଡ଼ାକ୍ହାୟି। ଏଚେଟିଏ ମ଼ସା ଏଲେଇଚେସି, “ପ୍ରବୁ ଈ ହୁକୁମି ହୀହାମାଞ୍ଜାନେସି, ଏ଼ୱାସି ମିଙ୍ଗେ ମିସର ଦେ଼ସାଟି ତାତାତି ବେ଼ଲାତା ବାଟାତା ଏମିନି କା଼ଦି ହୀହାମାଞ୍ଜାତେସି, ଏ଼ଦାଆଁ ଏ଼ନିକିଁ ମୀ ୱା଼ହିମାନି କୂଡ଼ା ମେହ୍ନେରି, ଈଦାଆଁତାକି ଏ଼ୱାରି କ଼ସମି ର଼ ଅମର ମାନା ଇଟାଦୁ।” ଏଚିବେ଼ଲା ମ଼ସା ହାରଣଇଁ ଏଲେଇଚେସି, “ନୀନୁ ର଼ ସାଡ଼୍ୱା ଅ଼ହାଁ ର଼ ଅମର ମାନା ନେଞ୍ଜି କିହାଁ ପ୍ରବୁତି ନ଼କିତା ଇଟାମୁ; ଏ଼ଦି ମୀ ୱା଼ହିମାନି କୂଡ଼ାତାକି ଇଟ୍କି ଆ଼ନେ।” ଏଚେଟିଏ ହାରଣ ମ଼ସାକି ହୀହାମାନି ପ୍ରବୁତି ହୁକୁମି ଲେହେଁ ସା଼କି ହୀନି ପେ଼ଡ଼ା ଦାରି ଇଟ୍କି ଆ଼ହାଲି ତାକି ଏ଼ଦାଆଁ କୂଡ଼ିକିହା ଇଟିତେସି। ଇସ୍ରାୟେଲ ଲ଼କୁତି ବାସା ଆ଼ନି ଦେ଼ସାତା ଏଗାଆ ପାତେକା ଦୁଇ କ଼ଡ଼ି ବାର୍ସା ପାତେକା ଏ଼ ମାନା ତିଚେରି, ଅ଼ଡ଼େ କିଣାନ ଦେ଼ସାତି ହାନ୍ଦିତା ହାଲାଆ ପାତେକା ଏ଼ୱାରି ଏ଼ଦାଆଁ ତିଚେରି। ର଼ ଅମର ଏପାତି3 ଦସ ବା଼ଗାଟି ର଼ ବା଼ଗା।
Source notes (3)
- Footnote ଈଦି ଏ଼ନାୟି/ଏବ୍ରି ହା଼ଡା ତଲେ ମାନ୍ହୁଁ
- Footnote ର଼ ଅମର/ରୀ ଲିଟର
- Footnote ର଼ ଏ଼ପା/୨୩ ଆଡା
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.