Kuvi Bible
ବୁ କା 4
ଦାର୍ତିତା ଲାଗେଏତାୟି
ଏଚେଟିଏ ନା଼ନୁ ୱେ଼ଡ଼ା ଡ଼଼ଇକା କିହାମାନି ଲାଗେଏତାଣି ମେସ୍ତେଏଁ; ଅ଼ଡ଼େ ମେହ୍ଦୁ, ହୀଣିଗାଟି ଲ଼କୁତି କାଣ୍ତ୍ରୁ ୱା଼ଙ୍ଗିନେ, ଅ଼ଡ଼େ ଏ଼ୱାରି ଦୁକୁ ଡୂକ୍ନାସି ଆମ୍ବାଆସି ହିଲଅସି; ଇଞ୍ଜାଁ ଏ଼ୱାରି ମୁହେଁ ଲାଗେଏ କିହିମାନାରାକି ବା଼ଡ଼୍ୟୁ ମାନେ, ସାମା ହୀଣିଗାଟି ଲ଼କୁତି ଦୁକୁ ଡୂକ୍ନାସି ଆମ୍ବାଆସି ହିଲଅସି। ଈଦାଆଁତାକି ନା଼ନୁ ନୀଏଁ ନୀଡାମାନି ଲ଼କୁ କିହାଁ ନ଼କେଏ ହା଼ତାରାଇଁ ହା଼ରେକା ଗା଼ୱୁରମି କିତେଏଁ; ସାମା ଏମିନି ମାଣ୍ସି ନୀଞ୍ଜୁ ପାତେକା ଜାର୍ନା ଆ଼ହାହିଲଅସି ଅ଼ଡ଼େ ୱେ଼ଡ଼ାତି ଡ଼଼ଇ କିହାମାନି ଲାଗେଏତି କାମା ମେସା ହିଲଅସି, ଈ ରିଆରି କିହାଁ ଏ଼ୱାଣାଇଁ ନା଼ନୁ ହା଼ରେକା ନେହେଁ ଇଞ୍ଜିଁ ଅଣ୍ପିତେଏଁ।
ଏଚେଟିଏ ନା଼ନୁ ବାରେ କସ୍ତତି କାମା ଅ଼ଡ଼େ ପୂରାଆ଼ତି କାମା ମେସ୍ତେଏଁ, ଏ଼ଦାଆଁତାକି ମାଣ୍ସି ତାନି ପା଼ଡ଼ିତି ଲ଼କୁଣି ଡା଼ହାରା ଆ଼ନେସି। ଈଦିଏ ଉଜେଏତାୟି ଅ଼ଡ଼େ ଗା଼ଲି ଜେ଼ଚ ହାନାୟି। ବୁଦି ହିଲାଆଗାଟାସି ତାନି କେୟୁ ମୁଟି ପଜାହାଁ ତାନି ଊଙ୍ଗା ତିନେସି1। କସ୍ତ ଅ଼ଡ଼େ ଗା଼ଲି ଜେ଼ଚ ହାଜାହାଁ ରୀ ମୁଟି କିହାଁ ହିତ୍ଡ଼ି ତଲେ ର଼ ମୁଟି ନେହେଁ।
ଏଚେଟିଏ ନା଼ନୁ ୱେଣ୍ତେ ୱେ଼ଡ଼ାତି ଡ଼଼ଇ ଉଜେଏତାଣି ମେସ୍ତେଏଁ। ଆମ୍ବାଆସି ରଅସିଏ ମାନେସି ଅ଼ଡ଼େ ଏ଼ୱାଣାକି ଆମ୍ବାଆସି ହିଲଅସି; ତାନି ମୀର୍ଏସି କି ତାୟି ହିଲଅସି; ଆ଼ତିଜିକେଏ ତାନି କସ୍ତ ରା଼ହିହିଲେଏ, ତାନି କାନୁ ଦ଼ନତା ରା଼ହାଁ ହିଲେଏ। କି ଏ଼ୱାସି ଏଲେଇନେସି, ନା଼ନୁ ଆମ୍ବାଆରି ତାକି କସ୍ତ କିହିମାଇଁ ଅ଼ଡ଼େ ନା଼ ଜୀୱୁଇଁ ସୁକୁଟି ଏଟ୍କା କିହିମାଇଁ ? ଈଦିଏ ଉଜେଏତାୟି ଅ଼ଡ଼େ ହା଼ରେକା କସ୍ତଗାଟାୟି।
ର଼ ଲ଼କୁ କିହାଁ ରୀ ଲ଼କୁ ନେହେଁ, ଇଚିହିଁ ଏ଼ୱାରି ଜାହାରା କସ୍ତତି ନେହିଁ ପା଼ଡ଼େୟି ବେଟାଆ଼ନେରି। ଏ଼ୱାରି ରିତିହିଁ, ରଅସି ରଅଣାଇଁ ନିକ୍ନେସି; ସାମା ଆମ୍ବାଆସି ରିନେ ବେ଼ଲାତା ରଅସିଏ ଡ଼ୟିନେସି ଅ଼ଡ଼େ ଆମିନିଗାଟାଣାଇଁ ନିକ୍ହାଲି ଏଟ୍କା ଆମ୍ବାଆସି ଡ଼ୟଅସି, ଏ଼ୱାସି ଡଣ୍ତ ବେଟାଆ଼ନେସି। ରୀ ଲ଼କୁ ରହେଁଏ ଡୂରିତିହିଁ ଉସମି ଆ଼ନେରି; ସାମା ରଅସିଏ ଏ଼ନିକିଁ ଉସମି ଆ଼ନେସି ? ଆମ୍ବାଆସି ରଣ୍ତିଏ ମାଣ୍ସିଇଁ ହା଼ରୱି କିନେସି, ଆତିହିଁ ରିଆରି ଏ଼ୱାଣି କ଼ପାଟି ନିଙ୍ଗିନେରି; ଏମିନି ଡ:ରି ତୀନି ଗୂଣି ଏ଼ଦି ତବେଏ ଡାମ୍ବେଏ।
ଆମିନି ବୁଡ଼୍ହା ଅ଼ଡ଼େ ବୁଦି ହିଲାଆ ରାଜା ଅ଼ଡ଼େ ଏ଼ନି କାତା ଆବାଲି ପୁନଅସି, ଏ଼ୱାଣି କିହାଁ ବୁଦିମାନି କା଼କୁଲିଗାଟି ଦାଂଗ୍ଣେଏସି ନେହେଁ। ଇଚିହିଁ ଏ଼ୱାସି ରାଜା ଆ଼ହାଲି କାୟିଦିଟି ହ଼ଚା ୱା଼ତେସି; ଅ଼ଡ଼େ ଏ଼ୱାସି ତାନି ରା଼ଜିତା କା଼କୁଲିଗାଟାସି ଆ଼ହାଁ ଜାର୍ନା ଆ଼ହାମାଚେସି। ନା଼ନୁ ବାରେ ଜୀୱୁଗାଟାଆଁ ୱେ଼ଡ଼ାତି ଡ଼଼ଇକା ତା଼କିମାନାଣି ମେସ୍ତେଏଁ, ଏ଼ୱାରି ଏ଼ ଦାଂଗ୍ଣେଏଣା ତ଼ଡ଼ୁ, ଏମିନି ଅ଼ର ମାଣ୍ସି ଈୱାଣି ଟା଼ୟୁତା ନିତେସି ଏ଼ୱାସି ଏ଼ୱାଣି ତ଼ଡ଼ୁ। ଏ଼ୱାସି ଆମ୍ବାଆରି ମୁହେଁ କାଜାସି ଆ଼ତେସି, ଏ଼ ଲ଼କୁ ଲେକା କିହାଲି ଆ଼ଡାଆଗାଟାରି; ଆ଼ତିଜିକେଏ ୱା଼ହିମାନି କା଼ଲାତି ଲ଼କୁ ଏ଼ୱାଣି ତା଼ଣା ରା଼ହାଁ ଆ଼ଅରି। ଈଦିଏ ସାତା ଉଜେଏତାୟି ଅ଼ଡ଼େ ଗା଼ଲି ଜେ଼ଚ ହାନାୟି। ମୀରୁ ମାହାପୂରୁ ଇଲୁତା ହାନି ବେ଼ଲାତା ଜାଗ୍ରାତା ତଲେ ମୀ ପା଼ୱୁଲି ଇଟାଦୁ; ଇଚିହିଁ ବୁଦି ହିଲାଆଗାଟାରି ପୂଜା କିହାଁ ତାନି କାତା ୱେଞ୍ଜାଲି ଦାରିତା ହାନାୟି ନେହେଁ; ଇଚିହିଁ ଏ଼ୱାରି ଲାଗେଏତି କାମା କିହିମାନମି ଇଞ୍ଜିଁ ପୁନଅରି।
Source notes (1)
- Footnote ତାନି ଊଙ୍ଗା ତିନେସି/ଜାହାରାଇଁ ନା଼ସା କିନେସି
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.