Kuvi Bible
୧ତିମ 3
କୁଲମିତି କାଜାରି
ଈ କାତା ସାତା, ଆମ୍ବାଆସି କ୍ରୀସ୍ତାନା କୁଲମିତା ଜାତ୍ନୁ କିନି ପା଼ଣା ବେଟାଆ଼ହାଲି ଅଣ୍ପିମାଚିସାରେ, ଏ଼ୱାସି ନେହିଁ କାମା କିଇଁ ଇଞ୍ଜିଁ ଅଣ୍ପିନେସି । ଈଦାଆଁତାକି କୁଲମିତି କାଜାସି ଦ଼ହ ହିଲାଆଗାଟାସି ଆ଼ନାୟି ମାନେ, ରଣ୍ତିଏ ଡକ୍ରିନି ଡକ୍ରା, ଟିକାଣାତାସି, ନେହିଁ ଅଣ୍ପୁ ଗାଟାସି, ପୁନାଆତି ଗତାୟାଁଣି ସେ଼ବା କିନାସି, ଅ଼ଡ଼େ ନେହିକିଁ ଜା଼ପ୍ନାସି ଆ଼ନାୟି ମାନେ । ଅ଼ଡ଼େ କା଼ଡ଼ୁ ଗହ୍ନାସି କି ଗଡ଼୍ହା କିନାସି ଆ଼ଆନା, ସୁଦୁ ସୁୱାଲା, କ଼ପା ଇଟାଆଗାଟାସି, ଅ଼ଡ଼େ ଦ଼ନ ଜୂପ୍କା ଗାଟାସି ଆ଼ଆୟି ମାନେ, ଏ଼ୱାସି ତାନି ଇଲୁ କୁଟମିତି ନେହିକିଁ ସା଼ଲୱି କିନାସି, ଅ଼ଡ଼େ କକାରି ପ଼ଦାଁଣି ତୀର୍ପୁତଲେ ଜାତ୍ନୁ କିନାୟିମାନେ । ଆମ୍ବାଆସି ତାନି ଇଲୁ କୁଟମିତି ନେହିକିଁ ଜାତ୍ନୁ କିହାଲି ଆ଼ଡଅସି, ଏ଼ୱାସି ଏ଼ନିକିଁ ମାହାପୂରୁ କୁଲମିତି ଜାତ୍ନୁ କିନେସି ? ଏ଼ୱାସି ପୁଃନି ନାମିତାସି ଆ଼ଆୟି ମାନେ, ଇଚିହିଁ ଏଚେ଼ତା ପାଟେ ନା଼ନୁ କାଜାତେଏଁ ଇଞ୍ଜିଁ ବଡପଣ ଆ଼ହାଁ, ସୟତାନ ଡଣ୍ତ ପା଼ଣ୍ନିଲେହେଁ ଡଣ୍ତ ବେଟା ଆ଼ନେସି । ଅ଼ଡ଼େ ଏ଼ୱାସି ନାମାଆଗାଟାରି ତା଼ଣାଟି ଜିକେଏ ମା଼ନି ବେଟାଆ଼ନାୟି ମାନେ, ଆ଼ଆତିଁ ଲାଜା ବେଟାଆ଼ହାଁ ସୟତାନ ପା଼ନ୍ଦାତା ହେର୍ନେସି ।
କୁଲମିତି ସା଼ୟେମି କିନାରି
ଏଲେକିହିଁଏ କୁଲମିତି ସେ଼ବା କିନାରି ନେହିଁ ଅଣ୍ପୁ ତଲେ ନାମୁତା ଡ଼ୁଗାମାନାଣି ଆସାହାଁ ତୀରିତଲେ ମାଞ୍ଜାହାଁ ନା଼ଡ଼ି କିନାସି ଆ଼ଆପେସି, କା଼ଡ଼ୁ ଗସିହିଁ ଡ଼ୟିନାସି, ଉଜେଏତି ଦ଼ନତି ଜୂପ୍କା ଆ଼ଆୟି ମାନେ ଏ଼ୱାରି ସେ଼ବା ପା଼ଣା ପ୍ଣାଃଆ ନ଼କେଏ ଏ଼ୱାରି ତାୟିପାରି କିୱିଆ଼ପାରି, ଅ଼ଡ଼େ ଏ଼ୱାରିତା଼ଣା ଏ଼ନି ଦ଼ହ ତ଼ଞ୍ଜା ଆ଼ଆତିହିଁ, କୁଲମିତି ସା଼ୟେମି କିନାରି ଆ଼ପେରି । ଏଲେକିହିଁଏ ଏ଼ୱାରି ଡକ୍ରିସିକା ଜିକେଏ ନେହିଁ ଗୂଣୁ ଗାଟାଇ1 ଆ଼ହାଁ ସାକ୍ରି ହିଲାଆଗାଟାଇ ଆ଼ହାଁ ତୀର୍ପୁ, ପାଲେଏ ମାଞ୍ଜାହାଁ ବାରେ କାମା ଟିକାଣା ତଲେ କିପୁ । ସେ଼ବା କିନାରି ରଣ୍ତିଏ ଡକ୍ରିତି2 ଡକ୍ରା ଆ଼ପେରି, ଅ଼ଡ଼େ ଏ଼ୱାରି ତାମି କକାରି ପ଼ଦାୟାଁଣି ଅ଼ଡ଼େ ତାମି ଇଲୁ କୁଟମିତି ନେହିକିଁ ସା଼ଲୱି କିପେରି । ଇଚିହିଁ ଆମିନି ଗାଟାରି ନେହିକିଁ ସେ଼ବା କାମା କିହାମାନେରି, ଏ଼ୱାରି କୁଲମିତା ମା଼ନିଗାଟାରି ଇଞ୍ଜିଁ ୱେ଼ଙ୍ଗିନେରି ଅ଼ଡ଼େ କ୍ରୀସ୍ତ ଜୀସୁ ତା଼ଣା ନାମୁତା ହା଼ରେକା ସା଼ସା ବେଟାଆ଼ନେରି ।
ଡ଼ୁଗାମାନି କାଜା କାତା
ଈ ଆ଼କୁ ରା଼ଚିନି ବେ଼ଲାତା, ନା଼ନୁ ନୀ ତା଼ଣା ତବେ ୱା଼ହାଲି ଆ଼ସା କିହିମାଇଁ; ସାମା ନା଼ ୱା଼ନାୟି ୱେ଼ଡ଼ା ଆତିହିଁ, ମାହାପୂରୁ ଇଲୁ କୁଟମିତା ଇଚିହିଁ ସାତାତି ମୁଣ୍ତା ଅ଼ଡ଼େ ପୁନାଦି ଲେହେଁ ଜୀୱୁତି ମାହାପୂରୁ କୁଲମିତା, ଏ଼ନି ମାଣ୍କିତା ମାନାୟି ମାନେ, ଏ଼ଦାଆଁ ନୀନୁ ଏ଼ନିକିଁ ପୁଞ୍ଜାଲି ଆ଼ଡିଦି, ଈଦାଆଁତାକି ଈ ବାରେ କାତା ନା଼ନୁ ରା଼ଚିମାଞ୍ଜାଇଁ । ମାହାପୂରୁ ଦାର୍ମୁତି ବାରେ କାତା ହା଼ରେକା କାଜାୟି, ଈଦାଆଁ ବାରେ ଲ଼କୁ ୱେ଼କ୍ନେରି । ଏ଼ଦି ଈଦି,
କ୍ରୀସ୍ତ ମାଣ୍ସି ୱା଼ଣା ଆ଼ହାଁ ତ଼ଞ୍ଜାଆ଼ତେସି,
ସୁଦୁଜୀୱୁତା ଦାର୍ମୁଗାଟାସି ଇଞ୍ଜିଁ ୱେ଼ଙ୍ଗିତେସି,
ଦୂତୁୟାଁ ତଲେ ତ଼ଞ୍ଜାଆ଼ତେସି,
ଏଟ୍କା ଲ଼କୁତା଼ଣା ୱେ଼ଙ୍ଗିତେସି,
ଦାର୍ତିତା ନାମୁଗାଟାସି ଆ଼ତେସି,
ଇଞ୍ଜାଁ ମାହାପୂରୁ ଗା଼ୱୁରମି ତଲେ ଲାକପୂରୁ ଅ଼ୱିଆ଼ତେସି ।
Source notes (2)
- Footnote ଇୟାସିକା ସେ଼ବା କିନାଇ
- Footnote ରଣ୍ତିଏ ବୀହା ଡକ୍ରି
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.