Kuvi Bible
୧ତେସ 1
ପା଼ୱୁଲ, ସିଲା ଅ଼ଡ଼େ ତିମତି ଆ଼ବା ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତ ତା଼ଣା ମାନି ତେସଲନିକି କୁଲମିତା ମାନି ଲ଼କୁତାକି ଆ଼କୁ; ମାହାପୂରୁତି କାର୍ମାମେହ୍ନାୟି ଅ଼ଡ଼େ ହିତ୍ଡ଼ି ମିଙ୍ଗେତାକି ଆ଼ପେ ।
ତେସଲନିକିତା ମାନାରି ନୀଡିନାୟି ଅ଼ଡ଼େ ନାମିନାୟି
ମା଼ ପ୍ରା଼ତାନାତା ମୀ ଦ଼ର୍କା ଆସାହାଁ ବାରେତାକି ବାରେବେ଼ଲା ମାହାପୂରୁଇଁ ଜହରା କିହିମାନମି, ମା଼ ଆ଼ବା ମାହାପୂରୁ ନ଼କିତା ମା଼ମ୍ବୁ ମୀ ନାମୁତି କାମା, ଜୀୱୁ ନ଼ନି କାମା ଅ଼ଡ଼େ ମା଼ ପ୍ରବୁ ଜୀସୁ କ୍ରୀସ୍ତ ତା଼ଣାଟି ମୀ ବା଼ର୍ସୁ ତଲେ ଅ଼ର୍ହିନାୟି ଏ଼ନିକିଁ ଆ଼ଟ୍ୱା । ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି ମା଼ମ୍ବୁ ପୁଞ୍ଜାମାନମି, ମାହାପୂରୁ ମିଙ୍ଗେ ଜୀୱୁ ନ଼ହାଁ ମାଞ୍ଜାନେସି ଇଞ୍ଜାଁ ତାନି ଲ଼କୁ ଆ଼ହାଲି ଆ଼ଚାମାଞ୍ଜାନେସି । ଇଚିହିଁ ମା଼ ନେହିଁ କାବ୍ରୁ ୱେ଼କ୍ନାଣି ତଲେ ଆ଼ଏ, ସାମା ବା଼ଡ଼୍ୟୁ, ସୁଦୁଜୀୱୁ, ସାତା ତଲେ, ମୀ ତା଼ଣା ଏଜା ମାଞ୍ଜାତେ, ଇଞ୍ଜାଁ ମୀ ତା଼ଣା ମାଚାଟି ମୀ ତଲେ ମା଼ମ୍ବୁ ଏ଼ନିକିଁ ଲେ଼ମ୍ବା ମାଚମି, ଏ଼ଦାଆଁ ମୀରୁ ପୁଞ୍ଜାମାଞ୍ଜେରି । ଅ଼ଡ଼େ, ମୀରୁ ହା଼ରେକା ଦୁକୁତା ମାଞ୍ଜାହାଁ ଜିକେଏ ସୁଦୁଜୀୱୁଟି ହୀପ୍କି ଆ଼ହାମାନି ରା଼ହାଁତଲେ ଏ଼ ବ଼ଲୁ ଅ଼ପାକଡାନା ମା଼ ଜେ଼ଚ ଅ଼ଡ଼େ ପ୍ରବୁ ଜେ଼ଚ ତା଼କିନାତେରି ଆ଼ହାମାଚେରି, ଏ଼ନିକିହିଁ ମୀରୁ ମାକିଦନିୟା ଅ଼ଡ଼େ ଆକାୟାତା ମାନି ବାରେ ନାମୁଗାଟାରି ତା଼ଣା ନାମୁତା ନେହିଁ ଗୂଣୁ ତ଼ହ୍ନାତେରି ଆ଼ହାମାଚେରି । ଇଚିହିଁ ତେସଲନିକିତି ନାମୁଗାଟାରି ତା଼ଣାଟି ପ୍ରବୁତି ନେହିଁ କାବ୍ରୁତି କାତା ୱାର୍ଇ ମାକିଦନିୟା ଅ଼ଡ଼େ ଆକାୟାତା ୱେ଼ଙ୍ଗାମାନେ, ଏ଼ଦି ଆ଼ଏ, ସାମା ମାହାପୂରୁ ତା଼ଣା ମୀ ନାମୁତି କାବ୍ରୁ ଜିକେଏ ବାରେୱାକି ୱେ଼ଙ୍ଗାହାଚେ, ଏ଼ଦାଣି ତାକି ମାଙ୍ଗେ ଅ଼ଡ଼େ ୱେସାଲି ଲ଼ଡ଼ା ହିଲେଏ । ଏ଼ନାଆଁତାକି ଇଚିହିଁ ଲ଼କୁ ତା଼ମ୍ବୁ ମା଼ କାତା ୱେସ୍ପି ଆ଼ନେରି, ମୀ ତା଼ଣା ମା଼ମ୍ବୁ ୱା଼ତମି ଏ଼ନାଆଁ ଆ଼ହାମାଚେ, ଅ଼ଡ଼େ ଏ଼ନିକିଁ ମୀରୁ ପେ଼ଣ୍କା ବମାୟାଁଣି ପିସ୍ତେରି, ଇଞ୍ଜାଁ ଜୀୱୁଗାଟି ଅ଼ଡ଼େ ସାତା ମାହାପୂରୁଇଁ ସେ଼ବା କିହାଲି, ଅ଼ଡ଼େ ଏ଼ୱାସି ଜାହାରା ଆମିନି ମୀର୍ଏଣାଇଁ ହା଼ତାରି ତା଼ଣାଟି ୱା଼ହିମାନି ମାହାପୂରୁତି କାର୍ବିଟି ଗେଲ୍ପାଲି ନିକ୍ହାମାନେସି, ମା଼ ଏ଼ ଗେଲ୍ପାନି ଜୀସୁଇଁ ଲାକପୂରୁଟି ୱେଣ୍ଡା ୱା଼ନାଣି କା଼ପୁ କା଼ଚାହାଁ ଡ଼ୟାଲି ।
Kuvi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.