Koya Bible
ପ୍ରକାଶିତ୍ ବାକ୍ୟ 9
ତାନ୍ପେର୍କେ ଏଇଙ୍ଗ୍ ଦୂତ ତୁରି ଉଦ୍ତା ନୁ ନାନେ ଉଡ଼୍ତାନ୍, ସାଙ୍ଗେ ସାଙ୍ଗେ ମାବ୍ତାଗାଙ୍କ୍ ୱେରଡ଼୍ ନକ୍ଷତ୍ର ପୃତିବିତେ ପରୁ ରାଲ୍ତେ । ଆଦିଙ୍କ୍ ପାତାଲ୍ପୁର୍ତେ କୁଚ୍କାଇ ଇଞ୍ଜ ଇସ୍ମାତ୍ତଡ଼୍ । ଅଣ୍ଡ୍ ୱାସ୍ ପାତାଲ୍ତେ ଆର୍ ଟେଣ୍ଡିଦାନ୍ ସାଙ୍ଗେ ୱେରଡ଼୍ ପାତାଲ୍ ବାଟିତାଗାଙ୍କ୍ ପେଇସମାନ୍ଦାନ୍ ଉମା ଲେକାମ୍ ପାତାଲ୍ କୁଣ୍ଡତାଗାଙ୍କ୍ ଗନଦୁମ ତିଆର୍ ଆତ୍ତେ ନୁ ଆଦ୍ ଉମେ ସେଙ୍ଗେ ପଡ଼ଦ୍ ନୁ ମୟଲ୍ ଇକାଡ଼୍ ତାତ୍ତେ । ମେଣ୍ଡେ ଆଦ୍ ଉମେତାଗାଙ୍ଗ୍ ଇଟେକ୍ ପେଇସ ପୃତିବିତାଗ୍ ସାରେଏକାମ୍ ଆତ୍ତା । ଅଡ଼୍ ଏଟ୍ଗଡେଲ୍ ଲେକାମ୍ ଗାଟି ୱିସାମ୍ ମାତ୍ତା । ପୃତିବିତେ ସୁଦୁରାୱୁ, ପଦ୍ଲା ବା ବାତେବା ମାଡ଼େ କ୍ଷତି ମାଡ଼କଟ୍ ବେନଡ଼ ତାଲେତାଗ୍ ଇଶ୍ୱର୍ତେ ସିଲ୍ତଡ଼୍ ଚିହ୍ନେ ଇଲକଟ୍ ମାତ୍ତେ, ମାତର୍ ଅଡ଼୍କିଂଙ୍କ୍ କଷ୍ଟ ଇଦାନ୍ ମାଇଦିନ୍ ଆୱୁ ପଙ୍ଗପାଲକି ଅନିଷ୍ଠ ଅସ୍ମାତ୍ତା । ମେଣ୍ଡେ ଅଡ଼୍କିଂଙ୍କ୍ ଆୱୁକକଟ୍ ଏଇଙ୍ଗ୍ ନେଞ୍ଜ୍ଯାକ ମାତର୍ ୱିସାମ୍ ମାଡ଼ାନଙ୍କ୍ ପଙ୍ଗପାଲକି କ୍ଷମତା ଦର୍ସକ୍ତା । ଆୱୁ ତିପାଲ୍, ଏଟ୍ଗଡେଲ୍ କାସ୍ତେ ୱିସାମ୍ ଇନା ମାତ୍ତେ । ଆଦ୍ ସମୟତେ ଲୋପେ ୱିସାମ୍ତେ ନାରୁଡ଼୍ ଡଲାନଙ୍କ ମେହେକ୍ତଡ଼୍, ଇତ୍କେ ଦର୍ସକଡ଼୍ । ଅଡ଼୍ ଡଲ୍ନାଦ୍ ଉଡ଼ଡ଼୍, ମାତର୍ ଡଲାନାଦ୍ ଅଡ଼୍ଆଗାଙ୍କ୍ ମିର୍ତେ ।
ଇଟେକ୍କି ଯୁଦ୍ତିଙ୍କ୍ ସୁସଜ୍ଜିତ ଗୁରାମ୍ ଲେକାମ୍ ତନ୍ଦମାନ୍ନୁଡ଼୍ । ଅଡ଼୍ ତାଲେତାଗ୍ ଲେକେତାଦ୍ ମୁକୁଟ୍ ଇନା ତନ୍ଦମାନ୍ନୁଡ଼୍ । ଅଡ଼୍ ମକମ୍ ନାରୁଡ଼୍ ମକମ୍ ଇନା, କେଲ୍କ୍ ନାଟାଡ଼୍ତେ କେଲ୍କିନ୍ ଲେକାମ୍ ନୁ ଗଣ୍ଡ୍ରାସ୍ତେ ପାଲ୍କ୍ ସୂଉଜେ ପାଲ୍କ୍ ଇନା ମାନ୍ନୁ । ଅଡ଼୍ ଗୁଣ୍ଡେତାଗ୍ ଲୁଆତେ ସାଞ୍ଜୁ କେର୍ତେ ଲେକାମ୍ ତନ୍ଦମାନ୍ନୁଡ଼୍ । ଅଡ଼୍ ରେକା ଯୁଦ୍ତାଗ୍ ମିରମାନ୍ଦାନ୍ ଗୁରାକ୍ ବା ଲାଗମାନ୍ଦାନ୍ ରତ୍ତେ ଲେକାମ୍ । ଏଟ୍ଗଡେଲ୍ ଇନା ଅଡ଼ାଦ୍ ତକା ନୁ ନାଉଡ଼୍ ମାତ୍ତେ । ଆଦ୍ ତକେତେ ଏଇଙ୍ଗ୍ ନେଲ୍ଞ୍ଜ୍ ଆୟ୍ନା ନାରୁଡ଼୍ ରେହେତାନ୍ ସେଙ୍ଗେ ଆୱୁ ଶକ୍ତି ଦର୍ସକ୍ତା । ଆୱିନ୍ ପରୁ ୱେରଣ୍ଡ୍ ରାଜାଲ୍ ଶାସନ୍ ମାଡ଼ୁତନ୍ । ଅଣ୍ଡ୍ ପାତାଲ୍ତେ ଦାୟିତ୍ୱତେ ମାନ୍ଦାନ୍ ୱେରଡ଼୍ ଦାୟାତ୍ ଦୂତ । ଏବ୍ରି ଗଟ୍ତେ ତାନାଦ୍ ପେଦେର୍ ଆବାଦନ୍; ଗ୍ରୀକ୍ ଗଟ୍ତେ ଆଦିନ୍ ପେଦେର୍ ଅଦୁତ୍, ଆପୋଲ୍ଲୀୟନ୍ ଇତ୍କେ “ସଂହାରକ୍ ।”
ଉଡ଼େ, ମୁନେତ୍ ବିପର୍ଯ୍ୟୟତେ ଅବସ୍ତା ଆତ୍ତେ । ଇଦିନ୍ ପେର୍କେ ମେଣ୍ଡେ ରେଣ୍ଡ୍ ବୟାନକ୍ ବିପଦ୍ ୱାସ୍ ଏୱୁଦ୍ତେ ।
ତାନ୍ପେର୍କେ ଷଷ୍ଟ ଦୂତ ତାନ୍ ତୁରି ଉଦାନ୍ ପେର୍କେ ଇଶ୍ୱର୍ତେ ମୁନେ ମାନ୍ଦାନ୍ ସୁବର୍ଣ୍ଣ ବେଦୀତେ ନାଲୁ ମୁଲେତାଗାଙ୍କ୍ ନାନେ ୱେରଡ଼୍ ଲେଙ୍ଗ୍ କେଞ୍ଜ୍ତାନ୍ । ଆଦ୍ ଲେଙ୍ଗ୍ ଷଷ୍ଟ ଦୂତଙ୍କ୍ ଆଦେଶ୍ ଇତ୍ତେ, “ୟୁପ୍ରେଟିସ୍ ବାଡ଼ିୟ୍ ନଦିତେ ପାକେ ବନ୍ଦି ଆସ୍ମାନ୍ଦାନ୍ ନାଲୁ ଦୂତଙ୍କ୍ ୱିଡ଼୍ସିମୁଟ୍ ।” ଆଦିଙ୍କ୍ ଇଦ୍ ୱେରଡ଼୍ ୱାଡ଼୍ଷା, ନେଲ୍ଞ୍ଜ୍, ଦିନାମ୍ ନୁ ଦଣ୍ଡ୍ତେ ସାରେ ନାରିଡ଼୍ ଜାତିତ୍ ଅଣ୍ଡୟ୍ ତୃତିୟାସଂ ନାରୁଡ଼୍କ୍ ଆୱୁକାଙ୍କ୍ ସେଙ୍ଗେ ତିଆର୍ ଆସ୍ ମାନ୍ଦାନ୍ ଆୱୁ ନାଲୁ ଦୂତଙ୍କ୍ ୱୁଡ଼୍ସିତ୍ତଡ଼୍ । ମେଣ୍ଡେ ନାନେ ଉଡ଼୍ତାନ୍, ୱେରଡ଼୍ ବେଡ଼ିୟାଦ୍ ଗୁରାତାଗ୍ କୁଦି ଆଞ୍ଜମାନ୍ଦାନ୍ । ଅଡ଼ାୱୁ ସଂକ୍ୟା ରେଣ୍ଡ୍ କୋଟି ଇଞ୍ଜ ନାକିଙ୍କ୍ କେସ୍ସିତ୍ତଡ଼୍ । ନାନେ ଉଡ଼୍ତାନ୍, ଅଡ଼ାଦ୍ ଉରସ୍ତ୍ରାଣ କିସ୍ ଲେକାମ୍ କଲର୍, ନିଲି କଲର୍ତେ ମଣି ଲେକାମ୍ ନିଲି ନୁ ଗନ୍ଦକ୍ ଇନ୍ ପିତଲ୍ କଲର୍ତେ ଲେକାମ୍ ମାତ୍ତେ । ଗୁରାକିନାଦ୍ ଗଣ୍ଡ୍ରାସ୍ ଇନା ତାଲେ ମାତ୍ତେ; ମେଣ୍ଡେ ଅଡ଼୍ ମକତାଗାଙ୍କ୍ କିସ୍, ଉମେ ନୁ ଗନ୍ଦକ୍ ଲେକାମ୍ ମୁଣ୍ଡ୍ ମହାମାରି ପେୟ୍ତା । ଇୱୁ ମହାମାରିକି ଗାଟି ଗାବ୍ତେ ନାରୁଡ଼୍ ଜାତିତେ ଅଣ୍ଡ୍ ମୁଣ୍ଡୁଦାମ୍ ଡଲାନ୍ ଲେକାମ୍ ଆତ୍ତଡ଼୍ । ଗୁରାକିନାୱୁ ଶକ୍ତି ଅଡ଼ାଦ୍ ମକମ୍ ନୁ ତକେ ମାତ୍ତେ । ଅଡ଼ାଦ୍ ତକା, ତାଲେ ମିକା ତାଡ଼ାମ୍ ଇନା ନୁ ଆଗେ ଅଡ଼୍ ନାରୁଡ଼୍କ୍ ତିପାଲ୍ ମାଡ଼ମାତ୍ତଡ଼୍ ।
ମହାମାରିତାଗ୍ ବିନଷ୍ଟ ଆୟ୍ୱ ନାରୁଡ଼୍ ଜାତି ଆଗେବା ବେସୁଟ୍ ମିକା ପରିବର୍ତନ୍ ଆୟଡ଼୍ । ଅଡ଼୍ ବୁତ୍କିନ୍ ପୂଜାକିଙ୍କ୍ ୱିଡ଼୍ସଡ଼୍ । ଉଡ଼ାନାଦ୍, କେଞ୍ଜାନାଦ୍ ନୁ ତାକାନ୍ ଶକ୍ତି, ସୁନା, ରୁପା, ପିତଲ୍ ମିକା ୱେର୍କି କାଲ୍କିନ୍ ପ୍ରତିମା ପୂଜା ୱିଡ଼୍ସଡ଼୍ । ଅଡ଼୍ ମନ୍ପରିବର୍ତନ୍ ମାଡ଼କଟ୍ ନାରୁଙ୍କ୍ ଆୱୁକ୍ତଡ଼୍, ଏୱ୍ତାନାଦ୍, ଆଙ୍କର୍ଗଟି ନୁ ଆସତ୍ ଗୁନାକ୍ ମାଡ଼ାନଡ଼୍ ମାତ୍ତଡ଼୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.