Koya Bible
ନିହିମୀୟା 3
ଯିରୁଶାଲମତେ ନେଟା ପୁଃନେତିଆର୍
ଇଦିନ୍ ପେର୍କେ ଇଲିୟାଶିବ ବାଡ଼ିୟେ ଯାଜକ ନୁ ଅନ୍ ଯାଜକ ଦାଦାଲଡ଼୍ ତେଦି ମେଣ୍ଢାନ୍ ଆର୍ ତିଆର ମାଡ଼୍ତଡ଼୍; ଅଡ଼୍ ଆଦ୍ ପବିତ୍ର ମାଡ଼ି ଆଗେତ୍ କାପାଟିସାରେ ନିଲ୍ସ୍ପତଡ଼୍; ହମ୍ମେୟା ନେଟା ନୁ ହନନେଲ ନେଟା ଏୱୁନା ଅଡ଼୍ ପବିତ୍ର ମାଡ଼୍ତଡ଼୍।
ଅନ୍ ଗାରେ ଯିରୀହୋର ନାରୁଡ଼୍ ତିଆର ମାଡ଼୍ତଡ଼୍, ନୁ ଅଡ଼୍ ଗାରେ ଇମ୍ରିର୍ତେ ମାର୍ ସକ୍କୁର ତିଆର ମାଡ଼୍ତଣ୍ଡ୍। ହସନାୟାର ମାର୍କ୍ କିକେନ୍ ଆର୍ ତିଆର ମାଡ଼୍ତଡ଼୍; ଅଡ଼୍ ଆଗେତ୍ କଡ଼ି ଚାଲା ମାଡ଼୍ତଡ଼୍ ନୁ ଆଗେତ୍ କାପାଟି ନୁ କିଲିଣୀ ନୁ ମାର୍ ଦୁଡ଼୍ ଟୁଞ୍ଜପ୍ତଡ଼୍। ମେଣ୍ଡେ, ଅଡ଼୍ ଗାରେ ହକ୍କୋସ୍ର ନାତି ଊରୀୟର ମାର୍ ମରେମୋତ୍ ତିଆର୍ ମାଡ଼୍ତଣ୍ଡ୍। ମେଣ୍ଡେ, ଅଡ଼୍ ଗାରେ ମଶେଷବେଲ୍ର ନାତି ବେରିଖୀୟର ମାର୍ ମଶୁଲ୍ଲମ୍ ତିଆର୍ ମାଡ଼୍ତଣ୍ଡ୍। ମେଣ୍ଡେ ଅଡ଼୍ ଗାରେ ବାନାତେ ମାର୍ ସାଦୋକ ତିଆର୍ ମାଡ଼୍ତଣ୍ଡ୍।
ମେଣ୍ଡେ, ଅଡ଼୍ ଗାରେ ତକୋୟ ନଗରତେ ନାରୁଡ଼୍ ତିଆର୍ ମାଡ଼୍ତଡ଼୍; ମାତର୍ ଅଡ଼୍ ମାନ୍ଦେତଡ଼୍ ନିଜର ନେତାଲଡ଼୍ ପାଡ଼୍ୟି ନିଜର ମୁକିୟାନ୍ ପାଡ଼୍ୟି ତାଗ୍ ଆର୍ ଇୱମାତ୍ତଡ଼୍। ମେଣ୍ଡେ, ପାସେହରତେ ମାର୍ ଯିହୋୟାଦା ନୁ ବଷୋଦିୟାରତେ ମାର୍ ମଶୁଲ୍ଲମ୍ ପୁରାତନ୍ ଆର୍ ମାରାମାତି ମାଡ଼୍ତଡ଼୍; ଅଡ଼୍ ଆଗେତ୍ କଡ଼ି ଚାଲାମାଡ଼୍ତଡ଼୍, ମେଣ୍ଡେ ଆଗେତ୍ କାପାଟି, ହୁଡ଼ୁକା ନୁ ଟେଙ୍ଗା ସାରେ ୱାଟ୍ତଡ଼୍। ମେଣ୍ଡେ, ଅଡ଼୍ ଗାରେ ଗିବୀୟୋନୀୟ ମଲାଟୀୟ ନୁ ମେରୋଣୋଥୀୟ ଯାଦୋନ ନାରୁଡ଼୍ ତିଆର୍ ମାଡ଼୍ତଡ଼୍, ଅଡ଼୍ ଗିବୀୟୋନ୍ ନୁ ମିସ୍ପା ନଗରତେ ମୁକ୍ୟ ମାତ୍ତଣ୍ଡ୍, ଇଲ୍କେତ୍ ଆପାକେତ୍ ମିସ୍ପା ନଗର୍ ସିଂହାସନ୍ତେ ମୁକିୟାଲ୍ ମାତ୍ତେ। ଆଦିନ୍ ଗାରେ ସନାରିଡ଼୍, ହର୍ହୟରତେ ମାର୍ ଉଷୀୟେଲ୍ ତିଆର୍ ମାଡ଼୍ତଡ଼୍। ମେଣ୍ଡେ, ଆଦିନ୍ ଗାରେ ଗନ୍ଧ- ବଣିକିଡ଼୍କନ୍ ହନାନୀୟ ତିଆର୍ ମାଡ଼୍ତଣ୍ଡ, ମେଣ୍ଡେ ଅଡ଼୍ ଓସାର୍ ନେଟେ ଏୱୁନା ଯିରୁଶାଲମ ଢାଟାଙ୍କ୍ ମାଡ଼୍ତଣ୍ଡ୍। ଅଡ଼୍ ଗାରେ ଯିରୁଶାଲମତେ ପ୍ରଦେଶତେ ଦୁଡ଼୍ବାଗ୍ ବାଡ଼ିୟଣ୍ଡ୍ ହୁରନ୍ ମାର୍ ରଫାୟ ତିଆର୍ ମାଡ଼୍ତଣ୍ଡ୍। ମେଣ୍ଡେ, ଅଡ଼୍ ଗାରେ ହରୁମଫରତେ ମାର୍ ଯିଦାୟ ନିଜର ଲତ୍ତେ ମୁନେ ତିଆର୍ ମାଡ଼୍ତଣ୍ଡ୍। ଅନ୍ ଗାରେ ହଶ୍ବାନୀୟରତେ ମାର୍ ହଟୂଶ୍ ତିଆର୍ ମାଡ଼୍ତଣ୍ଡ୍। ହାରୀମତେ ମାର୍ ମଲ୍କୀୟ ନୁ ପହତ୍ ମୋୟାବରତେ ମାର୍ ହଶୂବ ୱେର୍ ଅଣ୍ଡୟ ଅଂଶ ନୁ କିସ୍ ଅଜାଲ୍ ତିଆର୍ ମାଡ଼୍ତଣ୍ଡ୍। ଆଦିନ୍ ଗାରେ ଯିରୁଶାଲମ ପ୍ରଦେଶତେ ଦୁଡ଼୍ବାଗ୍ ବାଡ଼ିୟଣ୍ଡ୍ ହଲୋହେଶରତେ ମାର୍ ଶଲ୍ଲୁମ୍ ନୁ ଅନ୍ ମାୟାସ୍କ୍ ତିଆର୍ ମାଡ଼୍ତା। ହାନୂନ୍ ନୁ ସାନୋହ ମାନ୍ଦାନଡ଼୍ ନେତିନ୍ ଆର୍ ତିଆର୍ ମାଡ଼୍ତଡ଼୍; ଅଡ଼୍ ଆଦ୍ ତିଆର୍ ମାଡ଼୍ତଡ଼୍ ନୁ ଆଗେତ୍ କାପାଟ୍, ହୁଡ଼ୁକା ନୁ ମାର୍ ଟେଙ୍ଗା ଟୁଞ୍ଜ୍ପ୍ପ୍ତଡ଼୍, ମେଣ୍ଡେ କାତାମ୍ ଆର୍ ଏୱୁନା ନେଟାନେ ଏକ ହଜାର୍ କାଇ ଦୃଢ଼ ମାଡ଼୍ତଡ଼୍। ମେଣ୍ଡେ, ବେତ୍- ହକ୍କେରମ୍ ପ୍ରଦେଶତେ ବାଡ଼ିୟିଡ଼୍ ରେକବରତେ ମାର୍ ମଲ୍କୀୟ କାତାମ୍ ଆର୍ଦେ ତିଆର୍ ମାଡ଼୍ତଡ଼୍; ଅଣ୍ଡ ଆଦ୍ ମାଡ଼୍ତଣ୍ଡ୍ ନୁ ଆଗେତ୍ କାପାଟି, କିଲିଣୀ ନୁ ଟେଙ୍ଗାସାରେ ଟୁଞ୍ଜ୍ପ୍ପ୍ତଣ୍ଡ୍। ମେଣ୍ଡେ, ମିସ୍ପା ପ୍ରଦେଶତେ ବାଡ଼ିୟିଡ଼୍ କଲ୍ହୋଷିରତେ ମାର୍ ଶଲ୍ଲୁନ୍ ସିମ୍ସାମ୍ ଆର୍ ତିଆର୍ ମାଡ଼୍ତଣ୍ଡ୍; ଅଣ୍ଡ ଆଦ୍ ତିଆର୍ ମାଡ଼ି ମୁଚ୍ତଣ୍ଡ ନୁ ଆଗେତ୍ କାପାଟ୍, ହୁଡ଼ୁକା ନୁ ଟେଙ୍ଗାସାରେ ଟୁଞ୍ଜପ୍ପ୍ତଣ୍ଡ୍, ମେଣ୍ଡେ ଦାଉଦ- ନଗରତେ ମଦଲ୍ ଆଦାନ୍ ତିପ୍ତାପ୍ ତାରାନାୱୁ ଏୱୁନା ରାଜାନ୍ ବଗିଚା ଗାରେତ୍ ଶେଲା ଏରୱିନ୍- ନେଟା ତିଆର୍ ମାଡ଼୍ତଣ୍ଡ୍। ଆଦିନ୍ ଗାରେତ୍ ବେତ୍ ସୁର୍ ଜିଲ୍ଲାତେ ଦୁଡ଼୍ବାଗ୍ତେ ବାଡ଼ିୟନ୍ ଅସ୍ବୂକର୍ତେ ମାର୍ ନିହିମୀୟା ଦାଉଦତେ କାବୁର୍ ମୁନେ ଏୱୁନା ନୁ ତିଆର୍ ମାଡ଼୍ତେ ଏର୍ୱୁ ଏୱୁନା ନୁ ବିରଡ଼୍ ଲନ ଏୱୁନା ତିଆର୍ ମାଡ଼୍ତଡ଼୍।
ନେଟେ ତିଆର୍ ମାଡ଼ିମାନ୍ଦାନ୍ ଲେବିୟଡ଼୍
ଆଦିନ୍ ଗାରେତ୍ତେ ଲେବିୟଅଡ଼୍, ଇତ୍କେ, ବାନିରତେ ମାର୍ ରହୁମ୍ ତିଆର୍ ମାଡ଼୍ତଣ୍ଡ୍। ଆଦିନ୍ ଗାରେ କିୟୀଲା ପ୍ରଦେଶ ଦୁଡ଼୍ବାଗ୍ତେ ବାଡ଼ିୟିଅଡ଼୍ ହଶବୀୟ ନିଜର ପ୍ରଦେଶତେ ପାକେ ତିଆର୍ ମାଡ଼୍ତଣ୍ଡ୍। ଆଦିନ୍ ଗାରେ ଅଡ଼୍ ଦାଦାଲଡ଼୍, ଇତ୍କେ, କିୟୀଲା ପ୍ରଦେଶତେ ଦୁଡ଼୍ବାଗ୍ତେ ବାଡ଼ିୟିଅଡ଼୍ ହେନାଦଦତେ ମାର୍ ବବୟ ତିଆର୍ ମାଡ଼୍ତଣ୍ଡ୍। ଆଦିନ୍ ଗାରେତ୍ ମିସ୍ପାତେ ବାଡ଼ିୟିଅଡ଼୍ ଯେଶୂୟରତେ ମାର୍ ଏସର୍ ନେଟାନେ ୱାଙ୍ଗ୍ତେ ଗାରେତ୍ ଅସ୍ତ୍ରାଗାରତେ ତେଦାନ୍ ଆର୍ ମୁନେ ୱେର୍ ଅଣ୍ଡୟ୍ ଦୁଡ଼େତେ ତିଆର୍ ମାଡ଼୍ତଣ୍ଡ୍। ଆଦିନ୍ ଗାରେତ୍ ସବ୍ବୟରତେ ମାର୍ ବାରୁକ୍ ଯତ୍ନ ମାଡ଼ି ନେଟେତେ ୱାଙ୍କ୍ତେକନ୍ ଇଲିୟାଶିବ ବାଡ଼ିୟେ ଯାଜକତେ ଲତ୍ତେ ଆର୍ ଏୱୁନା ୱେର୍ ଅଣ୍ଡୟ୍ ଦୁଡ଼େ ତିଆର୍ ମାଡ଼୍ତଣ୍ଡ୍। ତାନ୍ପେର୍କେ ହକ୍କୋସ୍ର୍ ମାର୍ ଊରୀୟରତେ ମାର୍ ମରେମୋତ୍ ଇଲିୟାଶିବର୍ତେ ଲତ୍ତେକନ୍ ଇଲୀୟାଶୀବରତେ ଲତ୍ତେ ଆଞ୍ଚିନା ଏୱୁନା ୱେର୍ ଅଣ୍ଡୟ୍ ଦୁଡ଼େ ତିଆର୍ ମାଡ଼୍ତଣ୍ଡ୍।
ନେଟେ ତିଆର୍ ମାଡ଼ିମାନ୍ଦାନ୍ ଯାଜକିଡ଼୍
ମେଣ୍ଡେ, ଯିରୁଶାଲେମ୍ ଆଞ୍ଚିନାଗ୍ ମାନ୍ଦାନ୍ ଯାଜକିଡ଼୍ ତିଆର୍ ମାଡ଼୍ତଡ଼୍। ଅଡ଼ାକଞ୍ଜ୍ ବିନ୍ୟାମିନ୍ ନୁ ହଶୂବ ମିଇ ଲତ୍ତେ ମୁନେ ତିଆର୍ ମାଡ଼୍ତଡ଼୍। ଅଡ଼ାକଞ୍ଜ୍ ଅନନୀୟାରତେ ନାତି ମାସେୟରତେ ମାର୍ ଅସରୀୟ ନିଜର ଲତ୍ତେ ଗାରେ ତିଆର୍ ମାଡ଼୍ତଣ୍ଡ୍। ହେନାଦଦ୍ତେ ମାର୍ ବିନ୍ନୁୟି ଅସରୀୟର୍ତେ ଲତ୍ତେକନ୍ ନେଟେତେ ୱାଙ୍କ ନୁ ମୁଲେ ଏୱୁନା ୱେର୍ ଅଣ୍ଡୟ୍ ଦୁଡ଼େତେ ତିଆର୍ ମାଡ଼୍ତଣ୍ଡ୍। ଉଷୟରତେ ମାର୍ ପାଲାଲ୍ ନେଟେତେ ୱାଙ୍କ୍ ମୁନେ କେପାନଡ଼୍ ଲତ୍ତେ ଗାରେତ୍ ବାଡ଼ିୟେ ରାଜାନ୍ଲନ୍ ସମୀପତେ ବାଇଦେ ଅଜାଲ୍ ଗାରେ ତିଆର୍ ମାଡ଼୍ତଣ୍ଡ୍। ଅନ୍ ପେର୍କେ ପରିୟୋଶରତେ ମାର୍ ପଦାୟ ତିଆର୍ ମାଡ଼୍ତଣ୍ଡ୍। ଇ ସମୟତେ ଓଫଲତେ ମାଞ୍ଜମାନ୍ଦାନ୍ ସେବାକାରିଡ଼୍ ଏର୍ଆଦାନ୍ ମୁନେତ୍ ପାକେ ଏୱୁନା ନୁ ବାଇଦେ ଅଜାଲ୍ ଏୱୁନା ମାଞ୍ଜମାତ୍ତଡ଼୍।
ୱେର୍ ତିଆର୍ ମାଡ଼ାନଡ଼୍
ତାନ୍ପେର୍କେ ତକୋୟୀୟଡ଼୍ ବାୟିଦେତ୍ ବାଡ଼ିୟେ ଦୁର୍ଗ ମୁନେକନ୍ ଓଫଲରତେ ନେଟେ ଏୱୁନା ୱେର୍ ଅଣ୍ଡୟ ଦୁଡ଼େ ତିଆର୍ ମାଡ଼୍ତଣ୍ଡ୍। ଯାଜକିଡ଼୍ ସାରେତଡ଼୍ ନିଜର ନିଜର ଲତ୍ତେ ମୁନେ ଗୁରାନ୍ଆର୍ଦେ ପରତ୍ ଜାଗେତାଗ୍ ତିଆର୍ ମାଡ଼୍ତଡ଼୍। ଅଡ଼୍ ପେର୍କେ ଇମ୍ମେରତେ ମାର୍ ସାଦୋକ ନିଜର ଲତ୍ତେ ମୁନେ ତିଆର୍ ମାଡ଼୍ତଡ଼୍। ମେଣ୍ଡେ, ଆଦିନ୍ ପେର୍କେ ମୁନେତ୍ ଦୁୱାଡ଼୍ କେପାନଣ୍ଡ୍ ଶକନିୟତେ ମାର୍ ଶମୟିୟ ତିଆର୍ ମାଡ଼୍ତଣ୍ଡ୍। ଆଦିନ୍ ପେର୍କେ ଶେଲିମିୟରତେ ମାର୍ ହନାନୀୟ ନୁ ସାଲଫରତେ ଷଷ୍ଠ ମାର୍ ହାନୂନ୍ ୱେର୍ ଅଣ୍ଡୟ ଦୁଡ଼େତେ ତିଆର୍ ମାଡ଼୍ତଣ୍ଡ୍। ଆଦିନ୍ ପେର୍କେ ବେରିଖୀୟରତେ ମାର୍ ମଶୁଲ୍ଲମ୍ ନିଜର ବାକେଡ଼୍ତ୍ ମୁନେ ତିଆର୍ ମାଡ଼୍ତଣ୍ଡ୍। ଆଦିନ୍ ପେର୍କେ ମଲ୍କୀୟ ପେଦେର୍ତେ ଅର୍ତୁଣ୍ଡ୍ ସନାରି ହମିପ୍କଦ୍ ଦୁୱାଡ଼୍ ମୁନେତ୍ ନଥୀନୀୟଡ଼୍ ନୁ ବେପାରିଡ଼୍ ଲନ୍ ଏୱୁନା, ମେଣ୍ଡେ ମୁଲେତ୍ ତେଦାନ୍ ଏୱୁନା ତିଆର୍ ମାଡ଼୍ତଣ୍ଡ୍। ମେଣ୍ଡେ, ମୁଲେ ତେଦାନ୍ ନୁ ମେକାନ୍ ଦୁୱାଡ଼୍କନ୍ ସନାରି ନୁ ବେପାରିଡ଼୍ ତିଆର୍ ମାଡ଼୍ତଡ଼୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.