Koya Bible
ନିହିମୀୟା 12
ଯାଜକ ନୁ ଲେବୀୟ
ବେନ୍ ଯାଜକିଡ଼୍ ନୁ ଲେବିୟଡ଼୍ ଶଲ୍ଟିୟେଲ୍ତେ ମାର୍ ଯିରୁବ୍ବାବିଲ୍ ନୁ ଯେଶୂୟତଡ଼୍ ୱାସମାତ୍ତଡ଼୍, ଅଡ଼୍ ଇଡ଼୍, ସରାୟ, ଯିରିମୀୟ, ଏଜ୍ରା; ଅମରୀୟ, ମଲ୍ଲୂକ, ହଟୂଶ୍, ଶକନିୟ, ରହୁମ୍, ମରେମୋତ୍; ଇଦ୍ଦୋ, ଗିନ୍ନଥୋୟ, ଅବୀୟ; ମିୟାମୀନ୍, ମୋୟଦୀୟ, ବିଲ୍ଗା; ଶମୟିୟ ନୁ ଯୋୟାରୀବ୍, ଯିଦୟୀୟ; ସଲ୍ଲ, ଆମୋକ, ହିଲ୍କିୟ, ଯିଦୟୀୟ। ଇଡ଼୍ ଯେଶୂୟନ୍ ସମୟତେ ଯାଜକିଡ଼୍ ନୁ ନିଜର ନିଜର ଦାଦାଲଡ଼୍କନ୍ ବେଡ଼୍ୟଡ଼୍ ମାତ୍ତଣ୍ଡ୍। ମେଣ୍ଡେ ଲେବିୟଡ଼୍, ଯେଶୂୟ, ବିନ୍ନୁୟି, କଦ୍ମୀୟେଲ, ଶେରେବୀୟ, ଯିହୁଦା ନୁ ମତ୍ତନୀୟ, ଇ ମତ୍ତନିୟ ନୁ ତାମ୍ ଦାଦାଲଡ଼୍ ଦନ୍ୟବାଦ୍ ଇଦାନଣ୍ଡ୍ ବେଡ଼ିୟଡ଼୍ ମାତ୍ତଣ୍ଡ୍। ବା ଅଡ଼୍ ଦାଦାଲ୍ ବକ୍ବୁକୀୟ ନୁ ଉନ୍ନି ଅଡ଼୍ ମୁନେ କୁଲିକାମ୍ ମାଡ଼୍ତଡ଼୍।
ବେଡ଼ିୟେ ଯାଜକ ଯେଶୁୟନ୍ ପିଲୁଡ଼୍
ମେଣ୍ଡେ, ଯେଶୂୟତେ ମାର୍ ଯୋୟାକୀମ୍, ଯୋୟାକୀମ୍ତେ ମାର୍ ଇଲୀୟାଶୀବ ନୁ ଇଲିୟାଶିବତେ ମାର୍ ଯୋୟାଦ୍, ଯୋୟାଦ୍ତେ ମାର୍ ଯୋନାତନ ନୁ ଯୋନାତନ୍ତେ ମାର୍ ଯଦ୍ଦୂୟ।
ବେଡ଼ିୟେ ଯାଜକ୍ନଡ଼୍ ପେଦେରି
ମେଣ୍ଡେ, ଯୋୟାକୀମ୍ତେ ସମୟତେ ଇ ଯାଜକିଡ଼୍ ବାବାନ୍ପିଲୁଡ଼୍ ବାଡ଼୍ୟିୟଡ଼୍ ମାତ୍ତଣ୍ଡ୍, ଇତ୍କେ, ସରାୟ ପିଲୁଡ଼୍ତେ ମରାୟ; ଯିରିମୀୟ ପିଲୁଡ଼୍ତେ ହନାନୀୟ; ଏଜ୍ରା ପିଲୁଡ଼୍ତେ ମଶୁଲ୍ଲମ୍; ଅମରୀୟ ପିଲୁଡ଼୍ତେ ଯିହୋହାନନ୍; ମଲ୍ଲୁକି ପିଲୁଡ଼୍ତେ ଯୋନାତନ୍, ଶବନୀୟ ପିଲୁଡ଼୍ତେ ଯୋଷେପ୍; ହାରୀମ୍ ପିଲୁଡ଼୍ତେ ଅଦନ୍; ମରାୟୋତ୍ ପିଲୁଡ଼୍ତେ ହିଲ୍କୟ; ଇଦ୍ଦୋ ପିଲୁଡ଼୍ତେ ଜିକରୀୟ; ଗିନ୍ନଥୋନ ପିଲୁଡ଼୍ତେ ମଶୁଲ୍ଲମ୍; ଅବୀୟ ପିଲୁଡ଼୍ତେ ସିଖ୍ରି; ମିନ୍ୟାମୀନ ପିଲୁଡ଼୍ତେ, ମୋୟଦିୟ ପିଲୁଡ଼୍ତେ ପିଲ୍ଟେୟ; ବିଲ୍ଗା ପିଲୁଡ଼୍ତେ ଶମ୍ମୂୟ; ଶମୟିୟ ପିଲୁଡ଼୍ତେ ଯୋନାଥନ୍; ମେଣ୍ଡେ, ଯୋୟାରୀବ୍ ପିଲୁଡ଼୍ତେ ମତ୍ତନୟ; ଯିଦୟୀୟ ପିଲୁଡ଼୍ତେ ଉଷି; ସଲ୍ଲୟ ପିଲୁଡ଼୍ତେ କଲ୍ଲୟ; ଆମୋକ ପିଲୁଡ଼୍ତେ ଏବର; ହିଲ୍କିୟ ପିଲୁଡ଼୍ତେ ହଶବୀୟ; ଯିଦୟୀୟ ପିଲୁଡ଼୍ତେ ନଥନେଲ।
ଯାଜକ ନୁ ଲେବିୟଡ଼୍ ପିଲୁଡ଼୍ତେ କାମ୍
ଇଲିୟାଶିବ, ଯୋୟାଦ୍ ନୁ ଯୋହାନନ୍ ନୁ ଯଦ୍ଦୂୟ ସମୟତେ ଲେବିୟଡ଼୍, ବା ପାରସିକ ଦାରିୟାବସତେ ଅଦିକାର୍ତେ ସମୟତେ ଯାଜକିଡ଼୍ ବାବାନ୍ପିଲୁଡ଼୍ ବାଡ଼୍ୟିୟଣ୍ଡ୍ ଇନା ପିଲୁଡ଼୍ତେ ଲେକା ଆତ୍ତଡ଼୍। ଲେବି ପିଲୁଡ଼୍ଜାତ ବାବାନ୍ ପିଲୁଡ଼୍ ବେଡ଼୍ୟଡ଼୍ ପେଦେ ଇଲିୟାଶିବତେ ମାର୍ ଯୋହାନନ୍ତେ ସମୟ ଏୱୁନା ପିଲୁଡ଼୍ତେ ବଇତାଗ୍ ଲେକା ଆତ୍ତେ।
ପ୍ରାର୍ତନା ମନ୍ଦିର୍ତାଗ୍ ୱେରେ କାମ୍ମାଡ଼ାନଡ଼୍ ଦାୟିତ୍
ଲେବିୟଡ଼୍ ବାଡ଼ିୟଡ଼୍; ହଶବୀୟ, ଶେରେବୀୟ ନୁ କଦ୍ମୀୟେଲତେ ମାର୍ ଯେଶୂୟ ନୁ ଅଡ଼୍ ମୁନେତ୍ ଦାଦାଲଡ଼୍ ପରମେଶ୍ୱରଦେ ନାରୁଡ଼୍ ଦାଉଦତେ ଆଦେଶ୍ତେ ମାନ୍ଦା ମାନ୍ଦାଆସ୍ ପ୍ରଶଂସା ନୁ ଦନ୍ୟବାଦ୍ ଉତ୍ସର୍ଗ ମାଡ଼ାନଙ୍କ୍ ଏଞ୍ଚ୍ତଡ଼୍। ମତ୍ତନୀୟ ନୁ ବକ୍ବୁକୀୟ, ଓବଦିୟ, ମଶୁଲ୍ଲମ୍, ଟଲ୍ମୋନ, ଅକ୍କୂବ, ଗେଟ୍କେପାନଡ଼୍ ଆସ୍ ଆର୍ଦେ ଗାରେ ଗୁଦାମ୍ ଲତ୍ତାଗ୍ କେପାନ୍ ପାଡ଼୍ୟି ମାଡ଼୍ତଡ଼୍। ଇଡ଼୍ ଯୋଷାଦକତେ ନାତି ଯେଶୂୟତେ ମାର୍ ଯୋୟାକୀମ୍ ସମୟତେ, ମେଣ୍ଡେ ଶାସନକର୍ତ୍ତାଲ୍ ନିହିମୀୟା ନୁ କଲେଜ୍ ମେସ୍ତେରୀ ଏଜ୍ରା ଯାଜକ ସମୟତେ ମାତ୍ତଣ୍ଡ୍।
ଯିଶାଲେମ୍ ନଗର୍ତେ ନେଟେ ଉତ୍ସର୍ଗମାଡ଼ାନାଦ୍
ଆସୁଙ୍ଗ୍ ଯିରୁଶାଲମତେ ନେଟେ ତିଆର୍ ମାଡ଼ାନ୍ ସମୟତେ ନାରୁଡ଼୍ କାଇକ୍ପେଞ୍ଚି, ଅଷଡ଼୍ ନୁ ଡ଼ୁମିର୍ ପେଞ୍ଚି ଦନ୍ୟବାଦ୍ ନୁ ପାଟେତଡ଼୍ ୱେଡ଼୍କେତେ ତିଆର୍ତାଗ୍ ପାଳନ୍ ମାଡ଼ାନ୍ ମାଇଦିଙ୍କ୍ ଲେବିୟଡ଼୍ ଯିରୁଶାଲମତିଙ୍କ୍ ତାତ୍ତାନ୍ ମାଇଦିଙ୍କ୍ ଅଡ଼୍ ସାରେ ପଡ଼୍ୟେତିଙ୍କ୍ ଅଡ଼୍କିଂଙ୍କ୍ ମେଃକ୍ତଡ଼୍। ମେଣ୍ଡ, ପାଟାପାର୍ନଡ଼୍ ମାର୍କ୍ ଯିରୁଶାଲମତେ ତିଡ଼୍ପାକା ବାୟୁଲ୍ ବୁମ୍କନ୍ ନୁ ନଟୋଫାତୀୟଡ଼୍ ୱେରେ ନାର୍କିନାଗ୍; ମେଣ୍ଡେ ବେତ୍ ଗିଲ୍ଗଲକନ୍, ମେଣ୍ଡେ ଗେବା ନୁ ଅସ୍ମାବତ୍ ୱାଏତାଗ୍ ଗୁଡ଼୍ତଡ଼୍; ବାତେଙ୍କ୍ଇତ୍କେ ପାଟାପାରାନଡ଼୍ ଯିରୁଶାଲମତେ ତିଡ଼୍ପାକା ନିଜର ମାଇଦିଙ୍କ୍ ନାର୍ କୁସ୍ପିମାତ୍ତଣ୍ଡ। ମେଣ୍ଡେ, ଯାଜକିଡ଼୍ ନୁ ଲେବିୟଡ଼୍ ନିଜର ନିଜର ପବିତ୍ର ମାଡ଼୍ତଡ଼୍; ମେଣ୍ଡେ, ଅଡ଼୍ ନାରୁଡ଼୍କିଙ୍କ୍ ନୁ ଦୁୱାଡ଼୍ ସାରେ ନୁ ନେଟା ପବିତ୍ର ମାଡ଼୍ତଡ଼୍। ଇଦିନାଗ୍କଞ୍ଜ୍ ନାନ୍ ଯିହୁଦାତେ ଅଦିପତିଡ଼୍କ୍ ନେଟେତ୍ ପର ତାତ୍ତାନ୍, ମେଣ୍ଡେ ଦନ୍ୟବାଦ୍ ନୁ ପାଟେ ପାରାନ୍ ମାଇଦିଙ୍କ୍ ରେଣ୍ଡେ ବାଡ଼ିୟେ ମାନ୍ଦେ ଏଞ୍ଚ୍ତାନ୍, ଆଗେତ୍ ଅଣ୍ଡୟ୍ ମାନ୍ଦେ ଦକ୍ଷିଣ ପାକେତ୍ ନେଟେତ୍ ପର ରେଣ୍ଡେ କାତାମ୍ ଦୁୱାଡ଼୍ତେ ପାକେ ଆତ୍ତଡ଼୍; ମେଣ୍ଡେ, ଅଡ଼୍ ପେର୍କେ ହୋଶୟିୟ ନୁ ଯିହୁଦାତେ ଅଦିପତିଡ଼୍ ବେଡ଼୍ୟଡ଼୍ ବାଗାମ୍, ମେଣ୍ଡେ ଅସରୀୟ, ଏଜ୍ରାଲ୍ ନୁ ମଶୁଲ୍ଲମ୍, ଯିହୁଦା ନୁ ବିନ୍ୟାମିନ୍, ଶମୟିୟ, ଯିରିମୀୟ ନୁ ବେସ୍କ୍ତଡ଼୍ ଯାଜକିଡ଼୍ ମାର୍କ୍ ତୂରି ଅସ୍ ଆତ୍ତଡ଼୍; ଆସଫ ପିଲୁଡ଼୍ତଡ଼୍ ସକ୍କୁରତେ ମୁୟିତେ ନାତିତ୍ ମାର୍କ୍, ମୀକାୟତେ ନାତିତ୍ ମାର୍କ୍, ମତ୍ତନୀୟତେ ନାତି, ଶମୟିୟତେ ମାର୍ ବେନ ଯୋନାତନ୍, ଅନ୍ ମାର୍ ଜିକରୀୟ ନୁ ଅନ୍ ଦାଦାଲଡ଼୍ ଶମୟିୟ ନୁ ଅସରେଲ୍, ମିଲଲୟ, ଗିଲଲୟ, ମାୟିୟ, ନଥନେଲ ନୁ ଯିହୁଦା, ହନାନି, ଇଡ଼୍ ପରମେଶ୍ୱରତେ ନାରୁଡ଼୍ ଦାଉଦତେ ଏଞ୍ଚ୍ତେ ୱେରେୱେରେ ପେଞ୍ଚାନ୍ ସାମାନ୍ ଅସ୍ ଆତ୍ତଡ଼୍; ଏଜ୍ରା କଲେଜ୍ ମେସ୍ତେରି ଅଡ଼୍ ମୁନେ ମୁନେ ତାକ୍ତଣ୍ଡ୍; ମେଣ୍ଡେ, ଅଡ଼୍ ସିମ୍ସାମ୍ ଆର୍ଦେ ଗାରେ ଆସ୍ ନିଜର ମୁନେ ସାରେ ଆର୍ଦେ ଦାଉଦ ନଗରତେ ପାଉଞ୍ଚ୍ତେ ନେଟେତାଗ୍ ତାର୍ରାନାଗ୍ ତେଦି ଦାଉଦତେ ଲତ୍ତେ ପର ଇସ୍ ମୁନେତ୍ ପାକେ ଏର୍ଦ୍ୱାର୍ ଏୱୁନା ଆତ୍ତଡ଼୍। ମେଣ୍ଡେ, ଅଡ଼୍ ୱେର୍ ବେନ୍ମାନ୍ଦେ ଦନ୍ୟବାଦ୍ ଉତ୍ସର୍ଗ ମାଡ଼୍ତଡ଼୍, ଅଡ଼୍ ଅଡ଼୍କିଂଙ୍କ୍ କାଇଲାନଙ୍କ୍ ଆତ୍ତଡ଼୍, ମେଣ୍ଡେ ମାମ୍ ନୁ ନାରୁଡ଼୍ତେ ବାଗାମ୍ ଅଡ଼୍ ପେର୍କେ ପେର୍କେ ନେଟେତ୍ ପର ଅଜାଲ୍ ଗୁଇନ୍ଦେ ଇସ୍ କାଲ୍କିନେ ନେଟେ ଏୱୁନା ଆତ୍ତମ୍; ମେଣ୍ଡେ, ଇଫ୍ରୟିମ ଆର୍ ନୁ ପାନ୍ତେ ଆର୍ ନୁ କିକେନ୍ ଆର୍ ନୁ ହନନେଲ ଦୁୱାଡ଼୍ ନୁ ହମିୟ ଦୁୱାଡ଼୍ ଇସ୍ ମେକାନ୍ ଆର୍ ଏୱୁନା ଆତ୍ତମ୍; ମେଣ୍ଡେ, ଅଡ଼୍ କେପାନ୍ ଆର୍ଦାଗ୍ ନିସ୍ ମାତ୍ତଡ଼୍। ଇଲାନେ ପରମେଶ୍ୱରଦେ ଲତ୍ତାଗ୍ ଦନ୍ୟବାଦ୍ ପୁଜେ ମାଡ଼ାନଡ଼୍ ଆ ରେଣ୍ଡେ ମାନ୍ଦେ ନୁ ମାମ୍, ମେଣ୍ଡେ ମା ତଡ଼୍ ବାଡ଼ିୟଡ଼୍ ବାଗାମ୍; ମେଣ୍ଡେ ଇଲିୟାକିମ୍, ମାସେୟ, ମିନ୍ୟାମୀନ, ମୀକାୟ, ଇଲିୟୋଐନୟ, ଜିକରୀୟ, ହନାନୀୟ, ତୂରୀବାଦକ, ଇ ଯାଜକିଡ଼୍; ମେଣ୍ଡେ, ମାସେୟ ନୁ ଶମୟିୟ, ଇଲୀୟାସର, ଉଷି, ଯିହୋହାନନ୍, ମଲ୍କୀୟ, ଏଲମ୍ ନୁ ଏସର୍, ମେଣ୍ଡେ ମାମେ ସାରେତମ୍ ନିସ୍ ମାତ୍ତମ୍। ଆସୱେଲେ ପାଟାପାରାନଡ଼୍ ନୁ ଅଡ଼୍ ବାଡ଼ିୟଡ଼୍ ଯିଷ୍ରହିୟ ଗାଟି ଲେଙ୍ଗ୍ଦେ ପାର୍ତଡ଼୍।
ମେଣ୍ଡେ, ଆ ଦିନ୍ତେ ନାରୁଡ଼୍ ବାଡ଼ିୟେ ବଲିଦାନ୍ମାଡ଼ି ୱେଡ଼୍କ୍ ତଡ଼୍; ପରମେଶ୍ୱର ଅଡ଼୍କିଂଙ୍କ୍ ବାଡ଼ିୟେ ୱେଡ଼୍କେ ମାଡ଼ି ମାତ୍ତଡ଼୍; ମେଣ୍ଡେ ନାଟାକି, ବା ନୁ ପେକଡ଼୍ ପିକିକି ୱେଡ଼୍କ୍ ମାଡ଼୍ତା; ଆସୁଙ୍କ୍ ଯିରୁଶାଲମ୍ତେ ୱେଡ଼୍କେତ୍ତେ ନାର୍ଗେ ଜେକେ ଏୱୁନା କେଞ୍ଜାଙ୍କ୍ ଆତ୍ତେ।
ମନ୍ଦିର୍ତେ ପୁଜେତ୍ ମାଇଦିଙ୍କ୍ ଯଗାମାଡ଼ାନାଦ୍
ମେଣ୍ଡେ, ଆ ଦିନ୍ତେ ଦନ ନୁ କାଇଦଡ଼୍ କାଇତେସ୍ ଇଦାନ୍ ପୁରସ୍କାର୍, ପ୍ରଥମଜନମ୍ତେ କାୟା ନୁ ଦଶବାଗ୍କନ୍ ଅଣ୍ଡୟବାଗ୍, ଯାଜକ ନୁ ଲେବିୟଡ଼୍ ମାଇଦିଙ୍କ୍ ୱେରେୱେରେ ନଗରତେ କ୍ଷେତ୍ରାନୁସାରତେ ନିୟମ ଏଞ୍ଚତେ ଅଂଶ ଗୁଡ଼୍ପାନ୍ ମାଇଦିଙ୍କ୍ ବାକ୍ଡ଼ାନାଗ୍ ସାରେ ନାରୁଡ଼୍ ଏଞ୍ଚି ଆତ୍ତଡ଼୍; ବାତେଙ୍କ୍ଇତ୍କେ ମନ୍ଦିର୍ତେ ପୁଜେତ୍ ମାଇଦିଙ୍କ୍ କାଇଲାନ୍ ଯାଜକ ନୁ ଲେବିୟଡ଼୍ ମାଇଦିଙ୍କ୍ ଯିହୁଦା ୱେଡ଼୍କି ମାତ୍ତଡ଼୍। ମେଣ୍ଡେ, ଅଡ଼୍ ଦାଉଦ ନୁ ଅନ୍ ମାର୍ ଶଲୋମନତେ ଆଦେଶ୍ତେ ନିଜର ପରମେଶ୍ୱରଦେ ସେବା ମାଡ଼୍ତଡ଼୍ ନୁ ପବିତ୍ର ଆତ୍ତଡ଼୍, ମେଣ୍ଡେ ପାଟାପାରାନଡ଼୍ ନୁ ଗେଟ୍କେପାନଡ଼୍ ଆଲାନେ ମାଡ଼୍ତଡ଼୍। ବାତେଙ୍କ୍ଇତ୍କେ ମୁନେତ୍ କାଲାତେ ଦାଉଦ ନୁ ଆସଫନ୍ ସମୟତେ ପାଟାପାରାନଡ଼୍ ଅର୍ତୁଣ୍ଡ୍ ବାଡ଼ିୟିଣ୍ଡ୍ ମାତ୍ତଣ୍ଡ୍ ନୁ ପରମେଶ୍ୱରଦେ ପେଦେର୍ତେ ପ୍ରଶଂସା ନୁ ଦନ୍ୟବାଦ୍ତେ ବେସ୍ ବେସତ୍ ପାଟା ମାତ୍ତା। ମେଣ୍ଡେ, ଯିରୁବ୍ବାବିଲ୍ ନୁ ନିହିମୀୟାନ୍ ସମୟତେ ସାରେ ଇସ୍ରାଏଲତେ ପର ଦିନାତେ ଦରକାର ଅନୁସାର୍ତେ ପାଟାରାନଡ଼୍ ନୁ ଗେଟ୍କେପାନଡ଼୍ ଅଂଶ ଇତଡ଼୍; ମେଣ୍ଡେ ନାରୁଡ଼୍ ଲେବିୟଡ଼୍ ମାଇଦିଙ୍କ୍ ସାମାନ୍ ପ୍ରତିଷ୍ଠା ମାଡ଼୍ତଡ଼୍ ନୁ ଲେବିୟଡ଼୍ ହାରୋଣ ମାର୍କିଡ଼୍ ମାଇଦିଙ୍କ୍ ସାମାନ୍ ପ୍ରତିଷ୍ଠା ମାଡ଼୍ତଡ଼୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.