Koya Bible
ଯୋହନ୍ 15
ଜିସୁ ନିଜାତାଦ୍ ଅଙ୍ଗୁର୍ ଟଣ୍ଡ୍
“ନାନ୍ ନିଜାତାଦ୍ ଅଙ୍ଗୁର୍ ଟଣ୍ଡ୍, ମେଣ୍ଡେ ନା ବାବାଲ୍ ଚାଷୀ ନାରୁଣ୍ଡ୍ । ନାୟାଗେ ମାନ୍ଦାନ୍ ବେନ୍ ଆୟି କମ୍ମା କାୟା ଆଦକ୍, ଆଦିଙ୍କ୍ ଅଣ୍ଡ୍ ନାଡ଼୍କିତଣ୍ଡ୍; ମେଣ୍ଡେ କାୟା ଆଦ୍କେ, ଗାଟି କାୟା ଆଦାନ୍ ସେଙ୍ଗେ ଅଣ୍ଡ୍ ଆଦିଙ୍କ୍ ସାଏ ଜତନ୍ ମାଡ଼ିତନ୍ । ନାନ୍ ମିକିଂଙ୍କ୍ ବେନ୍ ବାକ୍ୟ କେସ୍ମିନ୍ଦେନ୍ ଆଦିନ୍ ସେଙ୍ଗେ ମିଡ଼୍ ସାଏ ଆସ୍ ମିନ୍ଦେଡ଼ି । ନାୟାଗେ ମାନୁଟ୍, ଆଲେକେ ନାନ୍ ମିୟାଗ୍ ମାନ୍ତାନ୍ । କମ୍ମା ବେଲା ଅଙ୍ଗୁର୍ ଟଣ୍ଡେତାଗ୍ ମାନୋକ୍ କାୟା ଆଦେ ପାର୍ୱେ, ଆଦେପୁଟୁଙ୍କ୍ ମିଡ଼୍ ମିକା ନାୟାଗେ ମାନୋକ୍ କାୟା ଆଦେ ପାର୍ୱିଡ଼୍ ।”
“ନାନ୍ ଅଙ୍ଗୁର୍ ଟଣ୍ଡ୍ ମିଡ଼୍ ଆଦୁତିଡ଼୍ କମ୍ମା; ବେନ ନାୟାଗ୍ ମାନ୍ତଣ୍ଡ୍ ନୁ ନାନ୍ ବେନନାଗ୍ ମାନ୍ତାନ୍, ଅଣ୍ଡ୍ ଗାଟି କାୟା ଆଦିତଣ୍ଡ୍; ବାତେଙ୍କ୍ ଇତ୍କେ ନାନ୍ ଇଲ୍ଉକ୍ ମିଡ଼୍ ବାଆତେ ମିକା ମାଡ଼୍ ପାର୍ୱିଡ଼୍ । ବେନ ବେସୁଟେ ନାୟାଗ୍ ମାନନ୍, ଆଲାଇତ୍କେ ଅଙ୍କ୍ ନାଡ଼୍କ୍ତାଦ୍ କମ୍ମା ଲେକାମ୍ ବାଇଦେ ହେସିଦ୍ତଡ଼୍ ନୁ ୱାସ୍ପିତ୍ଡ଼୍, ମେଣ୍ଡେ ନାରୁଡ଼୍ ଆୱିଙ୍କ୍ ଅଣ୍ଡୟାଗେ ମାଡ଼ି କିସ୍ତାଗ୍ ୱାଟିଦ୍ତଡ଼୍ ନୁ ଆୱ୍ଚାରେ କାଡ଼୍ୱିତା । ଯଦି ମିଡ଼୍ ନାୟାଗେ ମାନ୍ତିଡ଼୍, ମେଣ୍ଡେ ନାୟାୱ୍ ବାକ୍ୟ ମିୟାଗ୍ ମାନ୍ତା, ଆଲେକେ ବେନେଆୟି ବିଷୟ୍ ଇଚ୍ଛା ମାଡ଼ିତିଡ଼୍, ଆଦ୍ ତାଲ୍କାଟ୍, ମେଣ୍ଡେ ମିଇ ମାଇଦିଙ୍କ୍ ଆଦ୍ ଦର୍କିତେ । ମିଡ଼୍ ନାର୍ଗେ କାୟା ଆଦ୍କେ ନା ବାବାଲ୍ ମହିମାନିତ ଆଦ୍ତନ୍, ମେଣ୍ଡେ ମିଡ଼୍ ନା ସାଏତ୍ ଶିଷ୍ୟଡ଼୍ ଆଦ୍ତିଡ଼୍ । ବାବାଲ୍ ବେଲା ନାକିଂଙ୍କ୍ ପ୍ରେମ ମାଡ଼୍ତଣ୍ଡ୍, ନାନ୍ ମିକା ଆଲେକେ ମିକିଂଙ୍କ୍ ପ୍ରେମ ମାଡ଼୍ତାନ୍; ନା ପ୍ରେମାତାଗ୍ ତିଆର୍ ଆସ୍ ମାନୁଟ୍ । ନାନ୍ ବେଲା ନା ବାବାନ୍ ଗଟ୍ ପାଲନ୍ ମାଡ଼ି ଅନାଦ୍ ପ୍ରେମାତାଗ୍ ତିଆର୍ ଆତ୍ତାନ୍, ଆଦେପୁଟୁଙ୍କ୍ ମିଡ଼୍ ମିକା ନା ଗଟ୍ ପାଲନ୍ ମାଡ଼ିତିଡ଼୍, ନା ପ୍ରେମାତାଗ୍ ତିଆର୍ ଆଦେ ପାର୍ଦ୍ତିଡ଼୍ ।”
“ନାୱାଦ୍ ୱେଡ଼୍କ୍ ବେଲାକି ମିୟାଗ୍ ମାନ୍ତେ, ମେଣ୍ଡେ ମିୱାଦ୍ ୱେଡ଼୍କା ବେଲା ସାରେ ଆଦ୍ତେ, ଇଦିନ୍ ସେଙ୍ଗେ ନାନ୍ ଇୱୁସାରେ ମିକିଂଙ୍କ୍ କେତ୍ତାନ୍ । 1ନାନ୍ ବେଲା ମିକିଂଙ୍କ୍ ପ୍ରେମ ମାଡ଼୍ତାନ୍, ମିଡ଼୍ ମିକା ଆଲେକେ ମିଇ ମିଲୋପେ ପ୍ରେମ ମାଡ଼ାଟ୍, ଇଦ୍ ନାୱାଦ୍ ଗଟ୍ । ନିଜେତ୍ ସାଙ୍ଗନ୍ ସେଙ୍ଗେ ଜିୱୁନ୍ ଇଦାନ୍ କନ୍ସ୍ ବେନନାଦ୍ ମେଣ୍ଡେ ଗାଟି ପ୍ରେମ ଇଲେ । ନାନ୍ ମିକିଂଙ୍କ୍ ବେନ୍ ଗଟ୍ ହିସମିନ୍ଦେନ୍, ଆଦ୍ ଯଦି ପାଲନ୍ ମାଡ଼ିତିଡ଼୍, ଆଲେକେ ମିଡ଼୍ ନା ସାଙ୍ଗ । ନାନ୍ ମିକିଂଙ୍କ୍ ଚାକର୍ ଇଞ୍ଜ ମେଣ୍ଡେ କେଲନ୍, ବାତେଙ୍କ୍ ଇତ୍କେ ମାଲିକ୍ ବାତେଏ ମାଡ଼ିତନ୍, ଚାକର୍ ଆଦ୍ ପୁନଣ୍ଡ୍, ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ ସାଙ୍ଗ ଇଞ୍ଜ କେସ୍ମିନ୍ଦେନ୍, ବାତେଙ୍କ୍ ଇତ୍କେ ନାନ୍ ନା ବାବାନ୍ କନ୍ସ୍ ବାତେଏ କେଞ୍ଜିମିନ୍ଦେନ୍, ଆୱ୍ଚାରେ ମିକିଂଙ୍କ୍ କେତ୍ତାନ୍ । ମିଡ଼୍ ନାକିଂଙ୍କ୍ ହେଞ୍ଚୱିଡ଼୍, ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ ହଞ୍ଚିମିନ୍ଦେନ୍, ମେଣ୍ଡେ ବେଲା ଆଞ୍ଜ୍ କାୟା ଆଦ୍ସ୍ପିତିଡ଼୍ ନୁ ମିୟାୱୁ କାୟା ସାରେଦିନା ଆଦଡ଼େ ମାନ୍ତା, ଇଦିନ୍ ସେଙ୍ଗେ ମିକିଂଙ୍କ୍ ହେଞ୍ଚିମିନ୍ଦେନ୍ । ଆଗାଙ୍କ୍ ମିଡ଼୍ ନା ପେଦେର୍ ତେ ବାବାଙ୍କ୍ ବାତେମିକା ତାଲ୍କିତିଡ଼୍, ଅଣ୍ଡ୍ ଆଦ୍ ମିକିଂଙ୍କ୍ ହିଦ୍ତଣ୍ଡ୍; ମିଡ଼୍ ବେଲା ମିଇ ମିଲୋପେ ପ୍ରେମ ମାଡ଼ିତିଡ଼୍, ଇଦିନ୍ ସେଙ୍ଗେ ନାନ୍ ମିକିଂଙ୍କ୍ ଇଦ୍ସାରେ ଗଟ୍ ଇସମିନ୍ଦେନ୍ ।”
ବିଶ୍ୱାସୀନଡ଼କ୍ ଜଗତ୍ ପାସ୍କାନାଦ୍
“ଯଦି ଜଗତ୍ ମିକିଂଙ୍କ୍ ପାସ୍କି ତେ, ଆଲେକେ ମିକିଂଙ୍କ୍ ପାସ୍କାନ୍ ମୁନେଙ୍କ୍ ଆଦ୍ ନାକିଂଙ୍କ୍ ପାସ୍କି ତେ, ଇଦ୍ ପୁଞ୍ଜ୍ ମାନୁଟ୍ । ମିଡ଼୍ ଯଦି ଜଗତ୍ତାଗ୍ ମାନେଡ଼ି, ଜଗତ୍ ମିକିଂଙ୍କ୍ ନିଜେତ୍ ନାରୁଡ଼୍ ଇଞ୍ଜ ସ୍ନେହ ମାଡ଼େଡ଼୍; ବାତେଙ୍କ୍ ଇତ୍କେ ଜଗତ୍ତାଗାଙ୍କ୍ ନାନ୍ ମିକିଂଙ୍କ୍ ଜଗତ୍ ଲୋପେଙ୍କ୍ ହେଞ୍ଚିମିନ୍ଦେନ୍, ମେଣ୍ଡେ ମିଡ଼୍ ଜଗତ୍ତଡ଼ି ଆୟୱିଡ଼୍, ଇଦିନ୍ ସେଙ୍ଗେ ଜଗତ୍ ମିକିଂଙ୍କ୍ ପାସ୍କି ତେ । 2‘ଚାକର୍ ତାନ୍ ମାଲିକ୍ ତାଗାଙ୍କ୍ ବାଡ଼୍ୟଣ୍ଡ୍ ଆୟ୍ୟଣ୍ଡ୍,’ ନାନ୍ ମିକିଂଙ୍କ୍ ଇଦ୍ ବେନ୍ ବାକ୍ୟ କେସ୍ମିନ୍ଦେନ୍, ଆଦିଙ୍କ୍ ହେର୍କା ମାଡ଼ାଟ୍ । ଯଦି ଅଡ଼୍ ନାକିଂଙ୍କ୍ ତାଡ଼ନା ମାଡ଼ିମିନ୍ଦେଡ଼୍, ଆଲାଇତ୍କେ ମିକିଂଙ୍କ୍ ମିକା ତାଡ଼ନା ମାଡ଼ିତଡ଼୍; ଯଦି ଅଡ଼୍ ନାୱାଦ୍ ବାକ୍ୟ ପାଲନ୍ ମାଡ଼ିମିନ୍ଦେଡ଼୍, ଆଲାଇତ୍କେ ମିୱାଦ୍ ବାକ୍ୟ ମିକା ପାଲନ୍ ମାଡ଼ିତଡ଼୍ । ବାତେଙ୍କ୍ ଇତ୍କେ ଅଡ଼୍ ନାକିଂଙ୍କ୍ ରଅତେନଙ୍କ୍ ପୁନ୍ୱା ମାଇଦିଙ୍କ୍ ନାୱାଦ୍ ପେଦେର୍ ସେଙ୍ଗେ ମିକିଂଙ୍କ୍ ଇଦ୍ସାରେ ମାଡ଼ିତଡ଼୍ । ଯଦି ନାନ୍ ୱାସ୍ ଅଡ଼୍କିଂଙ୍କ୍ କେଲ୍ୱକଟ୍ ମାନେନ୍, ଆଲାଇତ୍କେ ଅଡ଼୍ୱାଦ୍ ପାପ୍ ଆୟ୍ ଆୟେଡ଼୍; ବାତେଙ୍କ୍ ଇତ୍କେ ଇଞ୍ଜେ ଅଡ଼୍ ଅଡ଼ାଦ୍ ପାପ୍ ବିଷୟ୍ ତେ ବାତେମିକା ବାହାନା ମାଡ଼େ ପାର୍ୱଡ଼୍ । ବେନ ନାକିଂଙ୍କ୍ ପାସ୍କିତନ୍, ଅଣ୍ଡ୍ ନା ବାବାଙ୍କ୍ ମିକା ପାସ୍କିତନ୍ । ବେନ୍ ପାଡ଼୍ୟି ସାରେ ମେଣ୍ଡେ ବେନମିକା ମାଡ଼ଣ୍ଡ୍, ନାନ୍ ଯଦି ଆୱୁସାରେ ଅଡ଼୍ ଲୋପେ ମାଡ଼୍ୱକଟ ମାନେନ୍, ଆଲାଇତ୍କେ ଅଡ଼ାଦ୍ ପାପ୍ ଆୟ୍ୟ ଆୟେଡ଼୍; ବାତେଙ୍କ୍ ଇତ୍କେ ଇଞ୍ଜେ ଅଡ଼୍ ଉଡ଼ିମିନ୍ଦେଡ଼୍, ମେଣ୍ଡେ ନାକିଂଙ୍କ୍ ନୁ ନା ବାବାଙ୍କ୍ ଇର୍ୱୁଡ଼୍କ୍ ପାସ୍କି ମିନ୍ଦେଡ଼୍ । ‘ମାତର୍ ଅଡ଼୍ ନାକିଂଙ୍କ୍ ବାତେଙ୍କ୍ ଇତ୍କେ ଇଲ୍ୱାକଟ ପାସ୍କି ମାଡ଼୍ତଡ଼୍,’ ଅଡ଼ାଦ୍ ଶାସ୍ତ୍ରତାଗ୍ କେତ୍ତାଦ୍ ଇଦ୍ ବାକ୍ୟ ବେଲା ସାରେ ଆଦ୍ତେ, ଇଦିନ୍ ସେଙ୍ଗେ ଇଲା ଆଦୁତେ ।”
“ବାବା ନାୟାଗ୍କଞ୍ଜ୍ ନାନ୍ ମିଇ ଗାର୍ରେ ବେନ ସାହାଜ୍ୟ ମାଡ଼ାନଙ୍କ୍ ରଅତିତାନ୍, ବାବା ନାୟାଗ୍କଞ୍ଜ୍ ପେଇତାଦ୍ ଆଦ୍ ସତ୍ ଆତ୍ମା ୱାତ୍କେ ନା ବିଷୟ୍ତେ ସାକ୍ଷି ହିଦ୍ତା; ମେଣ୍ଡେ ମିଡ଼୍ ମିକା ସାକ୍ଷି, ବାତେଙ୍କ୍ ଇତ୍କେ ମିଡ଼୍ ଆରାମ୍ କନ୍ସ୍ ନା ତଡ଼୍ ମିନ୍ଦେଡ଼ି ।”
Source notes (2)
- Cross-reference ଯୋହନ୍ ୧3:3୪; ୧୫:୧୭; ୧ ଯୋହନ୍ 3:୨3; ୨ ଯୋହନ୍ ୧:୫.
- Cross-reference ମାତିଉ ୧୦:୨୪; ଲୁକ ୬:୪୦; ଯୋହନ୍ ୧3:୧୬.
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.