Koya Bible
ଯିଶାଇୟ 9
ବବିଷତ୍ତେ ରାଜାଲ୍
ମାତର୍ ମୁନେ ବେନ୍ ଦେଶ୍ତାଗ୍ କଷ୍ଟ ମାତ୍ତେ, ଆଦ୍ ଇକାଡ଼୍ ଆସ୍ ମାନନ୍। ମୁନେତ୍ କାଲାମ୍ତେ ଅଣ୍ଡ୍ ସବୂଲୂନ ଦେଶ୍ ନୁ ନପ୍ତାଲି ଦେଶ୍ତା ପାସ୍କି ମାତ୍ତଡ଼୍, ମାତର୍ ଶେଷ କାଲାମ୍ତେ ଅଣ୍ଡ୍ ଆଦିଙ୍କ୍ ସମୁଦ୍ର କାଲ୍ଦେ ଗାରେ, ଯର୍ଦ୍ଦନ୍ତେ ମେଣ୍ଡନ୍ପାକେ, ଗୋଷ୍ଟିତ୍ନାରୁଡ଼୍ ଗାଲିଲୀତିଙ୍କ୍ ଗ୍ରହନ ମାଡ଼ିତଡ଼୍। ବେନ୍ ଗୋଷ୍ଠି ଇକାଡ଼୍ତେ ତାକ୍ତଡ଼୍, ଅଡ଼୍ ନାର୍ଗେ ୱେଇସ୍ ଉଡ଼ିମିନ୍ଦେଡ଼୍; ବେନଡ଼୍ ଡଲ୍ତେଲେକାତ୍ ଦେଶ୍ତାଗ୍ ବାସେ ମାଡ଼୍ତଡ଼୍, ଅଡ଼୍ ପରୁ ୱେଇସ୍ ଆସ୍ମିନ୍ଦେ। ମିଡ଼୍ ଆଦ୍ ଦେଶ୍ତେ ନାରୁଡ଼୍କିଙ୍କ୍ ନାର୍ଗେସଂକ୍ୟତେ ମାଡ଼ି ଅଡ଼୍ ୱେଡ଼୍କେ ଅଦିକ୍ ମାଡ଼ିମିନ୍ଦେଡ଼ି; ଅଡ଼୍ ଶସ୍ୟ କଇଦାନ୍ ୱେଡ଼୍କେ ପ୍ରାୟ ୱେଡ଼୍କେ ମାଡ଼ିତଡ଼୍, ଡଙ୍ଗିମାନ୍ଦାନ୍ ସମୟ ଲେକାମ୍ ସାର୍ଦା ଆଦ୍ତଡ଼୍, ବାତେଙ୍କ୍ଇତ୍କେ ମିଦୀୟନ୍ତ ଦିନାମ୍ତେ ବେଦ୍ଲେକାମ୍, ଆଦ୍ଲେକାମ୍ ମିଡ଼୍ ଆଦ୍ ପୁଉତେ ଲେକାମ୍ ଯୁୱାଡ଼୍ ନୁ ଆଦିନ୍ ଆଟେତ୍ କାଉଡ଼ି, ଆଦିନ୍ ବ୍ୟବହାର୍ମାଡ଼ାନଡ଼୍ ଦଣ୍ଡ୍ତିଙ୍କ୍ ଉଃସିତିଡ଼୍। ଆଦିଙ୍କ୍ ଯୁଦ୍ତାଗେ କେର୍ଦାନ୍ ଚକା ତିଆର୍ତେ ନାରୁନ୍ ସାରେ ୱିଲ୍କ୍ କାଡ଼ି ନୁ ନେତୁର୍ତେ କାଇଲ୍ତେ ଚକାସାରେ ନିଡ଼୍ତାନ୍ ଜଗ୍ଗାଡ଼ାମ୍, କିସ୍ତେ ସେଙ୍ଗେ ୱେର୍କି ଲେକାମ୍ ଆଦ୍ତେ। ବାତେଙ୍କ୍ଇତ୍କେ ମା ସେଙ୍ଗେ ୱେରଣ୍ଡ୍ ପେକାଲ୍ ଜନମ୍ ଆସ୍ମିନ୍ଦେଣ୍ଡ୍, ମାକିଙ୍କ୍ ୱେରଣ୍ଡ୍ ମାର୍ ଜନମ୍ ଆସ୍ମିନ୍ଦେଣ୍ଡ୍ ନୁ ତାନ୍ ଆଟେତାଗ୍ କର୍ତ୍ତୃତ୍ୱମପ୍ ୱାଟିତଡ଼୍; ମେଣ୍ଡେ, ଅନ୍ ପେଦେର୍ ଆଶ୍ଚର୍ଯ୍ୟ, ମନ୍ତ୍ରୀ, ପରାକ୍ରାନ୍ତ ପରମେଶ୍ୱର୍, ଅନନ୍ତକାଳାମ୍ତେ ବାବାଲ୍, ଶାନ୍ତିରାଜାଲ୍ ଆଦ୍ତଣ୍ଡ୍। ତାନ୍ ସାଶନ୍ ପାଡ଼ିୟ୍ ନୁ ତାନ୍ ଶାନ୍ତିତେ ସାନ୍ଦ୍ ଗାର୍ମାନ, ଅଣ୍ଡ୍ ଦାଉଦ୍ତେ ସିଂହାସନ୍ତାଗ୍ ନୁ ତାନ୍ ରାଜ୍ୟତାଗ୍ ମାଞ୍ଜ୍ ନ୍ୟାୟବିଚାର୍ ନୁ ଦାର୍ମିକ୍ତେ ଇଦ୍ ଇଞ୍ଜେକଞ୍ଜ୍ ଅନନ୍ତ କାଲାମ୍ ଯାକ ଆଦ୍ ସୁସ୍ଥିର ନୁ ଢ଼ାଟୁମ୍ ମାଡ଼ିତେ। ସାରେତଡ଼୍କିଙ୍କ୍ ବେଡ଼୍ୟେ ସଦାପ୍ରବୁନ୍ ଉଦ୍ଯୋଗ୍ ଇଦ୍ ପୁରା ମାଡ଼ିତଣ୍ଡ୍।
ସଦାପ୍ରବୁ ଇସ୍ରାଏଲ୍ତିଙ୍କ୍ ଦଣ୍ଡ ଇଦାନଣ୍ଡ୍
ଯାକୁବ୍ତିଙ୍କ୍ ପ୍ରବୁ ୱେରଡ଼୍ କାବୁର୍ ଇତ୍ତଣ୍ଡ୍ ନୁ ଆଦ୍ ଇସ୍ରାଏଲ୍ତେ ପରୁ ରାଲିମିନ୍ଦେ, ମେଣ୍ଡେ ସାରେତଡ଼୍ ନାରୁଡ଼୍, ଇଫ୍ରୟିମ୍ ନୁ ଶମରୀୟାତେ ନାରୁଡ଼୍ ଏକେ ଆଦ୍ ପୁନ୍ଦ୍ତଡ଼୍; ଅଡ଼୍ ଅହଙ୍କାର୍ତେ ନୁ ଆଶେତେ କେତିତଡ଼୍, ଇଟାସାରେ ରାଲିମିନ୍ଦେ ନିଜାମ୍, ମାତର୍ ମାମେ କୟିତେ କାଲ୍ଦେ ତିଆର୍ ମାଡ଼ିକାଡ଼୍; ତୟେ ମାଡ଼ାକ୍ ସାରେ ନାଡ଼୍କି ମିନ୍ଦେଡ଼୍ ନିଜାମ୍, ମାତର୍ ମାନାଡ଼୍ ତାନ୍ ବାଦୁଲ୍ତେ ଏରସ୍ ମାଡ଼େ ପେର୍ସିପିକାଡ଼୍। ଆଦିଙ୍କ୍ ସଦାପ୍ରବୁ ତାନ୍ ବିରୁଦ୍ଦ୍ତେ ରତ୍ସୀନତେ ପାକେତଡ଼୍କିଙ୍କ୍ ଉନ୍ନତ୍ ମାଡ଼ିତଣ୍ଡ୍ ନୁ ତାନ୍ ଶତ୍ରୁନଡ଼୍କ୍ ନାର୍ଗେ ମାଡ଼ିତଣ୍ଡ୍; ମୁନେ ଅରାମ୍ମୀୟନଡ଼୍ ନୁ ପେର୍କେ ପଲେଷ୍ଟିୟନଡ଼୍ ଆଦ୍ତଡ଼୍; ମେଣ୍ଡେ, ଅଡ଼୍ ତିଆର୍ ଆସ୍ ୱାସ୍ ଇସ୍ରାଏଲ୍ତିଙ୍କ୍ ଆରା ମାଡ଼ିତଡ଼୍। ଇୱୁସାରେ ଆତ୍ତ୍କେ ବା ଅନାଦ୍ କପାମ୍ ଶାନ୍ତି ଆୟ, ମାତର୍ ତାନ୍ କାଇ ମୁନେତ୍ତେ ଲେକାମ୍ ସାରେପାକେ ଆସ୍ମିନ୍ଦେ। ଆଗେକ୍ବା ବା ନାରୁଡ଼୍କିଙ୍କ୍ ବେଦ୍ ଲେକାମ୍ ମାଡ଼ିମିନ୍ଦେଡ଼୍, ଅନ୍ ପାକେ ଅଡ଼୍ ସୈନ୍ୟାଦିପତି ସଦାପ୍ରବୁନ୍ ଏର୍କେ ମାଡ଼ଡ଼୍। ଆଦିଙ୍କ୍ ସଦାପ୍ରବୁ ଇସ୍ରାଏଲ୍ତେ ତାଲେ ନୁ ତକେ, ଏତେଲ୍ମାଟା ନୁ ଏର୍ଦେ ଗାଡ୍ ଅଣ୍ଡୟ୍ ଦିନେତେ କୟିଦ୍ତଣ୍ଡ୍। ପ୍ରାଚୀନ୍ ନୁ ସମ୍ମାନ ପାଏମ୍ ଆଦାନ୍ ନାରୁଡ଼୍ ଆଦ୍ ତାଲେ, ମେଣ୍ଡେ, ମିଚ୍ ଶିକ୍ଷା ଇଦାନଡ଼୍ ବବିଷ୍ୟଦ୍ବକ୍ତା ତକେ, ବାତେଙ୍କ୍ଇତ୍କେ ଇ ନାରୁଡ଼୍ ଆର୍ତାକାନଡ଼୍କ୍ ଅଡ଼୍କିଂଙ୍କ୍ ବୁଲ୍କା ମାଡ଼ିତଡ଼୍, ମେଣ୍ଡେ, ବେନଡ଼୍ ଅଡ଼୍ତଡ଼୍ ଆର୍ ତାକାନଡ଼୍, ଅଡ଼୍ ନଷ୍ଟ ଆଦ୍ତଡ଼୍। ଆଦିଙ୍କ୍ ପ୍ରବୁ ଅଡ଼୍ ପେକାନଡ଼ାଗ୍ ୱେଡ଼୍କେ ମାଡ଼ଡ଼୍, କି ଅଡ଼୍ ମୁନେତ୍ ପେକଡ଼୍ ନୁ ରାଣ୍ଡିକିନ୍ ପରୁ ଦୟା ମାଡ଼ଡ଼୍; ବେଲାନ୍ କି ସାରେତଡ଼୍ ନାରୁଡ଼୍ ଦର୍ମ ଇଲ୍ୱେନଡ଼୍ ନୁ ଦୁରାଚାରୀ ନୁ ସାରେତଡ଼୍ ମିତ୍ୟାବାଦୀଡ଼୍। ଇୱୁସାରେ ଆତ୍କେ କେ ଅନ୍ କପାମ୍ ମାନେମ୍ ଆୟଣ୍ଡ୍, ମାତର୍ ଅନ୍ କାୟି ମୁନେତ୍ ଲେକାମ୍ ଏକାମ୍ ଆସ୍ମିନ୍ଦେ। ବେଲାନ୍ କି ଦୁଷ୍ଟତା କିସ୍ ଲେକାମ୍ ନିଡ଼୍ତିତ୍; ଆଦ୍ ପାର୍ୱେଲି ନୁ କୟେମାଡ଼େ ଆକ୍ରମଣ ମାଡ଼ିତେ; ମେଣ୍ଡେ, ଆଦ୍ ମେଟେତେ ୱେରଡ଼୍ ପଡ଼ିୟେତାଗ୍ ନିସ୍ ଉଡାନ୍ ମୟଲ୍ ଲେକାମ୍ ଉମ୍ ଆସ୍ ପରୁ ତେଦିତେ। ସାରେତିଙ୍କ୍ ବେଡ଼୍ୟେ ସଦାପ୍ରବୁନାଗେ କପାମ୍ତେ ଦେଶ୍ ଦଂସ ଆସ୍ମିନ୍ଦେ; ମେଣ୍ଡେ ନାରୁଡ଼୍ କିସ୍ତେ ସେଙ୍ଗେ ୱେର୍କ୍ ଲେକାମ୍ ଆଦ୍ତଣ୍ଡ୍; ବେନ ନିଜେତ୍ ତାମୁଙ୍କ୍ ଦୟା ମାଡ଼ଣ୍ଡ୍। ଆସୁଙ୍କ୍ ନାରୁଣ୍ଡ୍ ତିନ୍ଦେକାଇଦେ ୱିର୍ସ୍ପିତଡ଼୍, ମେଣ୍ଡେ, କାରିୱିନ୍ ଆଦ୍ତଡ଼୍; ମେଣ୍ଡେ, ଡେବେକାଇଦେ ତିନ୍ଦ୍ତଡ଼୍ ନୁ ପାଞ୍ଜଡ଼୍; ଅଡ଼୍ ସାରେତଡ଼୍ ନିଜେ ନିଜେତ୍ ପିଲାନ୍ ଆଉଙ୍ଗ୍ ତିନ୍ଦିତଡ଼୍; ମନଃଶି ଇଫ୍ରୟିମତେ ବିରୁଦ୍ଦ୍ତେ ନୁ ଇଫ୍ରୟିମ୍ ମନଃଶିତେ ବିରୁଦ୍ଦ୍ ଆଦ୍ତଡ଼୍, ମେଣ୍ଡେ, ଅଡ଼୍ ଅଣ୍ଡୟ୍ତାଗ୍ ଆସ୍ ଯିହୁଦାତେ ବିରଦ୍ ଆଦ୍ତଡ଼୍। ଇୱୁସାରେ ଆତ୍ତ୍କେ କେ ଅନାଦ୍ କପାମ୍ ଶାନ୍ତି ଆୟ, ମାତର୍ ତାମ୍ କାଇ ମୁନେତ୍ ଲେକାମ୍ ହେକାମ୍ ଆସ୍ ମିନ୍ଦେ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.