Koya Bible
ଯିଶାଇୟ 6
ଯିଶାଇୟତିଙ୍କ୍ ତନ୍ଦାନାଦ୍ ନୁ କାର୍ଙ୍ଗାନାଦ୍
ଉଷିୟ ରାଜା ଡଲାନ୍ ବର୍ଷ ନାନେ ପ୍ରବୁଙ୍କ୍ ୱେରଡ଼୍ ଡ଼ଙ୍ଗ୍ ନୁ ବେଡ଼ିୟେ ସିଂହାସନ୍ତାଗ୍ ମାନ୍ଦାନାଦ୍ ଉଡ଼୍ତାନ୍, ତାନ୍ ରାଜାନ୍ ଚକାତେ ପରଦା ମନ୍ଦିର୍ତାଗ୍ ନିଣ୍ଡିମାତ୍ତେ। ତାନ୍ ପାକେ ସରାଫଗଣ1 ନିତ୍ତା; ଆୱିନ୍ ସାରେତାୱିଙ୍କ୍ ଆରୁ ଆରୁ ରେକା ମାତ୍ତା; ସାରେତଡ଼୍ ଇର୍ୱୁଡ଼୍ ପାକେ ନିଜେ ନିଜେତେ ମକମ୍ ମୁସ୍ତା, ରେଣ୍ଡ୍ପାକେ ଡ଼େକା ମୁସ୍ତା ନୁ ରେଣ୍ଡ୍ ପାକେଙ୍କ୍ ପାର୍ତା। ମେଣ୍ଡେ, ଅଡ଼୍ ନିଜେ ନିଜେ କାର୍ଙ୍ଗି କେତ୍ତଡ଼୍, “ସାରେତିଙ୍କ୍ ବେଡ଼ିୟେ ସଦାପ୍ରବୁ ପବିତ୍ର, ପବିତ୍ର, ପବିତ୍ର; ସାରେ ପୃତିବି ତାନ୍ ମହିମାତେ ନିଣ୍ଡିମିନ୍ଦେ।” ଆସୁଙ୍କ୍ କେତାନଡ଼୍କ୍ ଲେଙ୍ଗ୍ଦେ ନେଙ୍କାନ୍ ଆର୍ ମଦଲ୍କଞ୍ଜ ୱାଡ଼୍କି ଆତ୍ତେ ନୁ ମନ୍ଦିର୍ ଉମେତେ ନିଣ୍ଡିଆତ୍ତେ। ଆସୁଙ୍କ୍ ନାନେ କେତ୍ତାନ୍, “ୟେୟ ୟେୟ ! ନାନେ ନଷ୍ଟ ଆତ୍ତାନ୍; ବାତେଙ୍କ୍ଇତ୍କେ ନାନେ ଅଶୁଚି ବା ଅପବିତ୍ର ନାରୁନ୍ ନୁ ନାନେ ଅଶୁଚି ପାପ ନାର୍ଦାଗ୍ ବାସେ ମାଡ଼ୁତାନ୍; ଆଗେକ୍ବା ନାୟାୱୁ କଣ୍ଡା ସାରେତିଙ୍କ୍ ବେଡ଼ିୟେ ସଦାପ୍ରବୁଙ୍କ୍ ରାଜାଙ୍କ୍ ଉଡ଼ିମିନ୍ଦେଡ଼ି !” ତାନ୍ପେର୍କେ ଆୱୁ ସରାଫକିନାଗାଙ୍କ୍ ୱେରଡ଼୍ ନା ପାକେ ପାର୍ସ୍ ୱାତ୍ତେ, ତାନ୍ କାଇତାଗ୍ ସୁଦୁର୍ ନିଡ଼୍ତାନ୍ ତାଡ଼ାମ୍ ମାତ୍ତେ, ଅଣ୍ଡ୍ ପୁଜେତ୍ ବେଦିତାଗାଙ୍କ୍ ଚିମ୍ଟେତଡ଼୍ ଆଦ୍ ଅସ୍ମାତ୍ତେ; ମେଣ୍ଡେ, ଆଦ୍ ଆଦିନ୍ତଡ଼୍ ନାୟାଦ୍ ମକମ୍ତିଙ୍କ୍ ଇଟିମିକା କେତ୍ତେ, “ଉଡ଼େ, ଇଦ୍ ମିଇ ପାୟୁତିଙ୍କ୍ ଇଟିମିନ୍ଦେ; ଆଦିଙ୍କ୍ ମିୟାଦ୍ ଅପରାଦ୍ ଯେକା ଆତ୍ତେ ନୁ ମିୟାଦ୍ ପାପ୍ କ୍ଷମା ଆତ୍ତେ।” ତାନ୍ପେର୍କେ “ନାନେ ବେନଙ୍କ୍ ରତିତାନ୍ ? ଓ ବେନ ମାନ୍ ମାଇଦିଙ୍କ୍ ଆଦ୍ତଣ୍ଡ୍ ?” ପ୍ରବୁନ୍ ଇଦ୍ ଲେଙ୍ଗ୍ ନାନେ କେଞ୍ଜ୍ତାନ୍। ଆଲେକେ ନାନେ କେତ୍ତାନ୍, “ନାନେ ମିନ୍ଦେନ୍; ନାକିଙ୍କ୍ ରମୁଟ୍।” ଆସୁଙ୍କ୍ ଅଣ୍ଡ୍ କେତ୍ତଣ୍ଡ୍, “ଆନ୍ ନୁ ଇଦ୍ ନାର୍ତିଙ୍କ୍ କେଲ୍ମ୍, ମିଡ଼୍ କେଞ୍ଜୁତିଡ଼୍ ନିଜାମ୍, ମାତର୍ ବୁଜେମ୍ ଆୟିୱିଡ଼୍ ନୁ ଉଡ଼ୁତିଡ଼୍ ନିଜାମ୍, ମାତର୍ ପୁନ୍ୱିଡ଼୍। ଇଡ଼୍ ନାରୁଡ଼୍ ନିଜେ ନିଜେତ୍ କଣ୍ଡେତେ ଉଡ଼ି ନୁ କେୱୁଦଡ଼୍ କେଞ୍ଜି ନୁ ରୁଦୟ୍ତାଗ୍ ବୁଜେମ୍ଆସ୍ ମନ୍ ମାଲ୍ପି ବେଲାନ୍ ସୁସ୍ଥ ଆୟଡ଼୍, ଆଦିନ୍ ସେଙ୍ଗେ ମିଡ଼୍ ଅଡ଼୍ ହୃଦୟତିଙ୍କ୍ ସୁସ୍ଥ ମାଡ଼ାଟ୍ ନୁ ଅଡ଼୍ କେୱୁକିଙ୍କ୍ ବୟରା ମାଡ଼ାଟ୍ ନୁ ଅଡ଼୍ କଣ୍ଡାଙ୍କ୍ ପିଇସିମୁଟ୍।” ଆଲେକେ ନାନେ ପଚାର୍ ମାଡ଼୍ତାନ୍, “ହୋ ପ୍ରବୁ, ବେସ୍କେ କାଲାମ୍ ଯାକ ?” ତାନ୍ପେର୍କେ ଅଣ୍ଡ୍ ଉତ୍ତର୍ ଇତ୍ତଣ୍ଡ୍, ବେସୁଙ୍କ୍କଞ୍ଜ୍ ନାର୍କ୍ ସାରେ ନାରୁଡ଼୍ ମାନଡ଼୍ ନୁ ଲକ୍ସାରେ ଚିମ୍ଚାମ୍ ଆସ୍ ଲିକିଆୟ୍ ନୁ ବୂମ୍ ସାରେ ଲିକିଆୟ୍ୟ, ମେଣ୍ଡେ, ସଦାପ୍ରବୁ ନାରୁଡ଼୍କିଙ୍କ୍ ନାର୍ଗେ ଦୂରାମ୍ ଅୟିୱେ ଯାକ ଇଦ୍ ଦେଶ୍କିନାଗ୍ ଦୂରାମ୍ ମାଡ଼୍ୱେ ଯାକ, ଆସୁଙ୍କ୍ ଆୟିନା। ମେଣ୍ଡେ, ଯଦିବା ଆଗେ ଦଶ୍ବାଗ୍ତାଗାଙ୍କ୍ ଅଣ୍ଡୟ୍ ବାଗ୍ ମାତ୍କେ ବା, ଆଦ୍ ମେଣ୍ଡନ୍ଦାମ୍ ନଷ୍ଟ ଆଦ୍ତେ; ଆଦ୍ତେ ଏଲା ନୁ ଅଲୋନ୍ ମାଡ଼େ ନାଡ଼୍କେ କେ ବେଲାନ୍ କି ଆଦିନ୍ ଗୁଟେ ମାନ୍ତେ; ଆଦ୍ଲେକାମ୍ ଆଦ୍ ପବିତ୍ର ପିଲୁଡ଼୍ ଇଦ୍ ନଗର୍ତେ ଗୁଟେ ଲେକାମ୍ ଆଦ୍ତେ।
Source notes (1)
- Footnote ସରାଫଗଣ ଇତ୍କେ: ସ୍ୱର୍ଗତାୱୁ ଦୂତକିଙ୍କ୍ କେତାନଙ୍କ୍ ଆଦ୍ତେ
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.