Koya Bible
ଯିଶାଇୟ 59
ନାରୁଡ଼୍ ପାପ୍ ନୁ ଦଷ୍
ଉଡ଼େ, ସଦାପ୍ରବୁନ୍ କାଇ ଇସୁର୍ ଆୟ ଯେ, ଆଦ୍ ପରିତ୍ରାଣ ମାଡ଼ାନଙ୍କ୍ ପାର୍ୱ, କି ଅନ୍ କେୱୁ ବୟିରାଲ୍ ଆୟ, ଯେ ଆଦ୍ କେଞ୍ଜାନଙ୍କ୍ ପାର୍ୱଣ୍ଡ୍। ମାତର୍ ମିୟାଦ୍ ଅପରାଦ୍ ସାରେ, ମିୟାଦ୍ ନୁ ମି ପରମେଶ୍ୱର୍ ତାଗାଙ୍କ୍ ୱେରେ ମାଡ଼ିସ୍ ମିନ୍ଦେ ନୁ ମିୟାୱୁ ପାପ୍ସାରେ ମିୟାଗାଙ୍କ୍ ଅନାଦ୍ ମକମ୍ ମିଞ୍ଜିସ୍ପି ମିନ୍ଦେଣ୍ଡ୍, ଆଦିଙ୍କ୍ ଅଣ୍ଡ୍ କେଞ୍ଜଣ୍ଡ୍। ବାତେଙ୍କ୍ଇତ୍କେ ମିୟାଦ୍ କାଇ ନେତୁର୍ତେ ନୁ ମିଡ଼୍ ବୁସା କେସମିନ୍ଦେଡ଼ି, ନୁ ମିୟାଦ୍ ୱାଞ୍ଜ୍ଜେର୍ତାଗାଙ୍କ୍ ଦୁଷ୍ଟତାୱୁ ଗଟି ପେଇତିତା; ବେନ ନ୍ୟୟ୍ତେ ଅନୁରଦ୍ କେଞ୍ଜଣ୍ଡ୍ ନୁ ବେନ ସଦ୍ତାଗାଙ୍କ୍ ରାମ୍କ୍ ମାଡ଼ିତଡ଼୍; ଅଡ଼୍ ଅସରତାଗ୍ ଆଶେ ୱାଟିତଡ଼୍ ନୁ ବୁଚା ଗଟି କେତିତଡ଼୍; ଅଡ଼୍ ଅନିଷ୍ଟତିଙ୍କ୍ ଆଶେତେ ମାଡ଼ିତଡ଼୍ ନୁ ପାପ୍ ଜନ୍ମ ମାଡ଼ିତଡ଼୍। ଅଡ଼୍ ବେଡ଼ିୟେ ତାଡ଼ାମ୍ତେ ଗାଡ଼୍ବାକ୍ ଅତିତଡ଼୍ ନୁ ବାଲ ଲେକାମ୍ ନୁଲ୍ ତଃତିଡ଼୍; ବେନ ଆୱିନ୍ ଗାଡ଼୍ବାକ୍ ତିନ୍ଦ୍ତଣ୍ଡ୍, ଅଣ୍ଡ୍ ଡଲିତଣ୍ଡ୍, ମେଣ୍ଡେ ଆଦ୍ ଅତ୍ତେ ଆଗାଙ୍କ୍ ୱିସାମ୍ ତାଡ଼ାମ୍ ପେଇତିତ୍। ଆୱିନ୍ ନୁଲ୍ ସିଲେ ଆୟ, କି ଆୱୁ ନିଜେତ୍ କାମ୍ତାଗ୍ ନିଜେତିଙ୍କ୍ ମୁଚ୍ସ; ଆୱିନ୍ କାମ୍ସାରେ ଅଦର୍ମତେ କାମ୍ ନୁ ଆୱିନ୍ କାଇକିନାଗ୍ ଅପରାଦ୍ତେ ପାଡ଼ିୟ୍କ୍ ମାନ୍ଦ୍ତା। ଅଡ଼୍ ଡେକେ କାରାପ୍ କାମ୍ଦା ମିରିତା ନୁ ଅଡ଼୍ ନିର୍ଦ୍ଦୋଷତେ ଆୱୁକାନଙ୍କ୍ ତଡ଼୍ ପେର୍କେ ଆଦ୍ତା; ଅଡ଼ାୱୁ ଚିନ୍ତା ସାରେ ଅଦର୍ମତେ ଚିନ୍ତା; ଅଡ଼୍ ଆର୍ଦାଗ୍ କାରାପ୍ ନୁ ଦଂସ ମାନ୍ତେ। ଶାନ୍ତିତେ ଆର୍ ଅଡ଼୍ ପୁନଡ଼୍ ଆଦ୍ତଡ଼୍ ନୁ ଅଡ଼୍ ପାକେ ବାତ୍ତେ ବିଚାର୍ ଇଲେ; ଅଡ଼୍ ନିଜେତ୍ ମାୟିଦିଙ୍କ୍ ୱାଙ୍ଗ୍ତେ ଆର୍ ତିଆର୍ ମାଡ଼ିମିନ୍ଦେଡ଼୍; ବେନଆୟି ଆଦିନାଗ୍ ତାକିତଣ୍ଡ୍, ଅଣ୍ଡ୍ ଶାନ୍ତି ବାତ୍ତେ ପୁନଣ୍ଡ୍।
ପାପ୍ତେ କେତାନାଦ୍
ଆଦିଙ୍କ୍ ବିଚାର୍ ମାୟାଗାଙ୍କ୍ ଦୁରାମ୍ ମାନ୍ତେ, ଦାର୍ମିକ୍ ମା ତଡ଼୍ ମାନନ୍; ମାମେ ୱେୟିସ୍ତେ ସେଙ୍ଗେ କେପିତମ୍, ମାତର୍ ଉଡ଼େ, ଇକାଡ଼୍; ୱେୟିସ୍ତିଙ୍କ୍ କେପି, ମାତର୍ ମାମେ ଇକାଡ଼୍ତାଗ୍ ତାକିକାଡ଼୍। ମାମେ କାନା ନାରୁଡ଼୍ ଲେକାମ୍ ନେଟେ ସେଙ୍ଗେ ମେର୍ସ୍କିତମ୍, ହଁ କଣ୍ଡାଇଲ୍ୱେ ନାରୁଡ଼୍ ଲେକାମ୍ ମାମେ ମେର୍ସ୍କତମ୍; ମାମେ ମୁଲ୍ପୁଟ୍ ଲେକାମ୍ ମାଦ୍ନାମ୍ତେ ତାଲ୍ଗି ରାଲିତମ୍; ମାମେ ମେନ୍ଦୁଲ୍ ମାନ୍ଦାନ୍ ନାରୁଡ଼ାଗ୍ ଡଲ୍ତେ ନାରୁଡ଼୍ ଲେକାମ୍ ମିନ୍ଦେମ୍। ମାମେ ସାରେତମ୍ ଏଡ଼୍ଜ୍ଇନା ଲେକାମ୍ ଲେଙ୍ଗ୍ ମାଡ଼୍ତମ୍ ନୁ କାକାରା ପିଟେ ଲେକାମ୍ ଅଦିକ୍ ମର୍ରେ ମାଡ଼ିତମ୍; ମାମେ ବିଚାର୍ତିଙ୍କ୍ କେପିତମ୍, ମାତର୍ ଆଦ୍ ଆୟି; ପରିତ୍ରାଣତିଙ୍କ୍ କେପ୍ତମ୍, ମାତର୍ ଆଦ୍ ମାୟାଗାଙ୍କ୍ ଯେକା ମିନ୍ଦେ। ମି ପାକେ ମାୟାଦ୍ ପାପ୍ ଅଦିକ୍ ଆସ୍ମିନ୍ଦେ ନୁ ମାୟାଦ୍ ପାପ୍ ମା ବିରୁଦ୍ଧ୍ତେ ସାକ୍ଷ୍ୟ ଇସମିନ୍ଦେ; ବେଲାନ୍ କି ମାୟାଦ୍ ଅଦର୍ମ ସାରେ ମା ତଡ଼୍ତଡ଼୍ ମିନ୍ଦେ ନୁ ମାୟାଦ୍ ଅପରାଦ୍ ସାରେ ମାମେ ତ ପୁତ୍ତମ୍; ଆଦ୍ ଅପରାଦ୍ ନୁ ସଦାପ୍ରବୁଙ୍କ୍ ଅସ୍ୱୀକାର୍ ମାଡ଼ିକାଡ଼୍ ନୁ ମାନ୍ ପରମେଶ୍ୱର୍ତେ ୱିଡ଼୍ସି ଆଦାନାଦ୍, ବେଡ଼ିୟଡ଼୍ ନୁ ରାଜାନ୍ ଲତ୍ତେ ଗଟି କେତିକାଡ଼୍, ମିଚ୍ ଗଟି ଏର୍କେମାଡ଼ି ହୃଦୟତାଗାଙ୍କ୍ ପେସ୍ପାନଙ୍କ୍ ଆଦ୍ତେ। ଆଦିଙ୍କ୍ ବିଚାର୍ ପେର୍କେ ଗୁସିମିନ୍ଦେ ନୁ ଦର୍ମ ଯେକେ ନିସ୍ସ ମିନ୍ଦେ; ଚକତାଗ୍ ସତ୍ତାଦ୍ ଆର୍ ଆଦୁତ୍ ନୁ ସାୟେତାଦ୍ ନେଙ୍ଗାଙ୍କ୍ ପାର୍ୱାଡ଼୍। ହଁ ସତ୍ ଅବାବ୍ ଆସ୍ମିନ୍ଦେ ନୁ ବେନ କାରାପ୍ ୱିଡ଼୍ସିତଣ୍ଡ୍, ଅଣ୍ଡ୍ ନିଜେତିଙ୍କ୍ ଡଙ୍ଗି ଅତ୍ତେ ଲେକାମ୍ ମାଡ଼ିତେ; ମେଣ୍ଡେ, ସଦାପ୍ରବୁ ଇଦ୍ ଉଡ଼୍କେ; ମେଣ୍ଡେ, ନ୍ୟାୟବିଚାର୍ ମାନ୍ୱାଙ୍କ୍ ଅଶାନ୍ତି ଆତ୍ତେ।
ବିଚାର୍ ନୁ ପରିତ୍ରାଣ
ମେଣ୍ଡେ, ଅଣ୍ଡ୍ ଉଡ଼୍ତଣ୍ଡ୍ ଯେ, ବେନେଆୟି ମାନେୟି ଇଞ୍ଜେ ଇଲାଣ୍ଡ୍, ମେଣ୍ଡେ ନାଡ଼୍ମେ ବେନ ଇଲାଣ୍ଡ୍ ଇଞ୍ଜ ବାକ୍ୱା ଆତ୍ତଡ଼୍; ଆଦିଙ୍କ୍ ତାମ୍ ନିଜେତ୍ ବପୁ ତାମ୍ ସେଙ୍ଗେ ପରିତ୍ରାଣ ପୁରା ମାଡ଼୍ତଡ଼୍ ନୁ ତାମ୍ ଦାର୍ମିକ୍ ଏକେ ଅଙ୍କ୍ ପୟିସ୍ ନେଃତ୍ତେ। ମେଣ୍ଡେ ଅଣ୍ଡ୍ ଗୁଣ୍ଡ୍ତାଗେ ଲେକାମ୍ ଦାର୍ମିକ୍ତା ନୁ ପରିତ୍ରାଣତେ ଜିଡ଼୍ତାଦ୍ ନିଜେତ୍ ତାଲେତାଗ୍ କେର୍ତଣ୍ଡ୍; ମେଣ୍ଡେ, ଆଦ୍ ବଦ୍ଲା ଅଦାନ୍ ଲେକାମ୍ ସିଲେ କେର୍ତେ ନୁ ଜିଉନ୍ ଗେଲ୍ସ୍ପାନ୍ ସେଙ୍ଗେ ସିଲେ ଉଦ୍ଯୋଗ୍ ଲେକାମ୍ ସିଲେ କେର୍ତେ। ଅଡ଼ାଦ୍ କାମ୍ ବାଦୁଲ୍ତେ ଅଣ୍ଡ୍ ନିଜେତ୍ ବିଷୟ୍କିଙ୍କ୍ ଗାଟି କପାମ୍ତେ କେର୍ତଣ୍ଡ୍ ନୁ ତାନ୍ ଶତ୍ରୁଡ଼୍କିଙ୍କ୍ ମାଡ଼୍ତେ କାୟେ ଇଦ୍ତଣ୍ଡ୍; ଦ୍ୱୀପତେ ମୁନେ ସାରେତେ କାୟା ଦାନ ମାଡ଼ିତଣ୍ଡ୍। ଆସୁଙ୍କ୍ ନାରୁଡ଼୍ ପଡ଼୍ଦ୍ ଆଦାନ୍ ପାକେ ସଦାପ୍ରବୁନ୍ ପେଦେର୍ତିଙ୍କ୍ ନୁ ପଡ଼୍ଦ୍ ପେଇତାନ୍ ପାକେଙ୍କ୍ ନାରୁଡ଼୍ ତାମ୍ କାମ୍କେତିଙ୍କ୍ ୱେର୍ଦ୍ତଡ଼୍; ବାତେଙ୍କ୍ଇତ୍କେ ସଦାପ୍ରବୁନ୍ ନେସ୍କାନ୍ ୱେଲେ ଚାଲେମ୍ ଆଦାନ୍ ନାର୍ଗେ ବେଡ଼େତେ ଲେକାମ୍ ଶତ୍ରୁଡ଼୍ ୱାଦ୍ତଡ଼୍। ମେଣ୍ଡେ, ସଦାପ୍ରବୁ କେତିତଣ୍ଡ୍, “ସିୟୋନ୍ତିଙ୍କ୍ ନୁ ଯାକୁବ୍ତାଗ୍ ବେନଡ଼୍ ଅଦର୍ମତାଗାଙ୍କ୍ ମାଲ୍ତଡ଼୍, ଅଡ଼୍ ପାକେ ୱେରଣ୍ଡ୍ ଉଦାର୍କର୍ତ୍ତାଲ୍ ୱାଦ୍ତଣ୍ଡ୍।” ନିଜେତ୍ ବିଷୟ୍ତେ ସଦାପ୍ରବୁ କେତିତଣ୍ଡ୍, “ଅଡ଼୍ତଡ଼୍ ମାନାଦ୍ ବୁଜାମନା ଇଦ୍, ମାନ୍ ବେନ୍ ଆତ୍ମା ମିଇ ପରୁ ମାନ୍ତେ ନୁ ମାନ୍ ବେନ୍ ସାରେ ବାକ୍ୟ ମାମେ ମିଇ ମକମ୍ତାଗ୍ ୱାଟିମିନ୍ଦେମ୍, ଆଦ୍ ମିଇ ମକମ୍ତାଗାଙ୍କ୍ ନୁ ମିଇ ପିଲୁଡ଼୍ତେ ମକମ୍ତାଗାଙ୍କ୍ ନୁ ମିଇ ପିଲୁଡ଼୍ ମାଡ଼ାନ୍ ପିଲୁଡ଼୍ ମକମ୍ତାଗାଙ୍କ୍ ନେଣ୍ଡ୍ଆୟିନା ସାରେଦିନାତ୍ କାଲାମ୍ ଯାକ ଦୂରାମ୍ ମାଡ଼୍ମାଟ୍,” ଇଦ୍ ସଦାପ୍ରବୁ କେତିତଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.