Koya Bible
ଯିଶାଇୟ 54:10
Verse 10 is marked below, with the whole chapter around it. Read from the start
ସାରେ ଦିନାତେ ଶାନ୍ତିତେ ନିୟମ୍
ହୋ ୱାଞ୍ଜ ନାଟାଡ଼୍, ପିଲା ଇଲ୍ୱେ ନାଟାଡ଼୍ ଲେକାମ୍, ମିଡ଼୍ ପାଟେ ପାରାଟ୍, ଲେଙ୍ଗ୍ଦେ ପାରି ୱେଡ଼୍କେ ମାଡ଼ାଟ୍, ବାତେଙ୍କ୍ଇତ୍କେ ସଦାପ୍ରବୁ କେତିତଣ୍ଡ୍, ପେଣ୍ଡୁଲ୍ ଆତ୍ତେ ନାଟାଡ଼୍ତେ ପିଲେ ୱିଡ଼୍ସି ପଡ଼ମ୍ ପିଲା ଅଦିକ୍। ମିଡ଼୍ ନିଜେତ୍ ଗୁଡ଼ୁସେତ୍ ପଡ଼ିୟେ ବେଡ଼ିୟେ ମାଡ଼ାଟ୍ ନୁ ଅଡ଼୍ ମି ମାନ୍ଦାନ୍ ପଡ଼ିୟେତେ ପାର୍ଦାସାରେ ଅସାର୍ ମାଡ଼୍ଡ଼େ; ପୟିସ୍ ମାନ୍ମାଟ୍; ମିୟାୱୁ ନଡ଼କ୍ ସାରେ ଲାଟି ଆସିମୁଟ୍ ନୁ କୁଟିସାରେ ଡ଼ୁଟାଙ୍କ୍ ମାଡ଼ାଟ୍। ବାତେଙ୍କ୍ଇତ୍କେ ମିଡ଼୍ ତିନ୍ଦେକାଇ ନୁ ଡ଼େବେକାଇଦାକ୍ ଏକାମ୍ ଆଦ୍ତିଡ଼୍ ନୁ ମିୟାୱୁ ପିଲୁଡ଼୍ ସାରେ ୱେରେ ଦେଶ୍ତାଗ୍ ଅଦିକାର୍ ମାଡ଼ିତଡ଼୍ ନୁ ନାରୁଡ଼୍ ଇଲ୍ୱେ ନଗର୍ତିଙ୍କ୍ ମାନ୍ଦାନ୍ ପଡ଼ିୟେ ମାଡ଼ିତଡ଼୍। ୱେର୍ମାଟ୍; ବାତେଙ୍କ୍ଇତ୍କେ ମିଡ଼୍ ସିଗ୍ ଆୟ୍ୱିଡ଼୍। କି ରେଣ୍ଡ୍ମନ୍ ଆୟିମାଟ୍; ବାତେଙ୍କ୍ଇତ୍କେ ମିକିଙ୍କ୍ ସିଗ୍ ମାଡ଼ାନଙ୍କ୍ ଆୟ; ମିୟାଦ୍ ମକମ୍ ଚିନ୍ତେ ମାଡ଼୍ମାଟ୍ ନୁ ମିଡ଼୍ ନିଜେତ୍ ରାଣ୍ଡିଅବସ୍ଥାତେ ଦୁଃକା ମେଣ୍ଡେ ଏର୍କେ ମାଡ଼୍ୱିଡ଼୍। ବାତେଙ୍କ୍ଇତ୍କେ ମିକ୍ ତିଆର୍ ମାଡ଼୍ତେ କର୍ତ୍ତାଲ୍ ମି ମୁଦ୍ପାଲ୍ ଆଦ୍ତଣ୍ଡ୍; ସାରେକେ ବେଡ଼୍ୟନ୍ ସଦାପ୍ରବୁ ଅନ୍ ପେଦେର୍ ନୁ ଇସ୍ରାଏଲ୍ତେ ଦର୍ମଲେକାତାଦ୍ ମି ମୁକ୍ତିଦାତାଲ୍; ଅଣ୍ଡ୍ ସାରା ପୃତିବିତେ ପରମେଶ୍ୱର୍ ଇଞ୍ଜ ସାରେ ଏକାମ୍ ଆଦ୍ତଣ୍ଡ୍। ବାତେଙ୍କ୍ଇତ୍କେ ମିଡ଼୍ ପରମେଶ୍ୱର୍ କେତିତଣ୍ଡ୍, ୱିଡ଼୍ସ୍ତାଦ୍ ନୁ ମନ୍ଦୁଃକାତେ ନାଟାଡ଼୍ କି ଲେୟିୱେ କାଲାମ୍ତେ ୱିଡ଼୍ସିମାନ୍ଦାନ୍ ନାଟାଡ଼୍ ଲେକାମ୍ ସଦାପ୍ରବୁ ମିକିଙ୍କ୍ କାର୍ଙ୍ଗି ମିନ୍ଦେଣ୍ଡ୍। ମାମେ ସୁଦୁଟ୍ ସମୟ୍ ସେଙ୍ଗେ ନିକିଙ୍କ୍ ୱିଡ଼୍ସି ମିନ୍ଦେମ୍; ମାତର୍ ବେଡ଼ିୟେ ଦୟାତେ ନିକିଙ୍କ୍ ଗୁଡ଼୍ପିକାଡ଼୍। ଗାଟି କପାମ୍ତେ ମାମେ ୱେରଡ଼୍ ଇସୁର୍ ସମୟ୍ତେ ସେଙ୍ଗେ ନିଜେତ୍ ମକମ୍ ମିୟାଗାଙ୍କ୍ ମିଞ୍ଜ୍ସ୍ପିତମ୍; ମାତର୍ ସାରେକାଲାମ୍ ମାନ୍ଦାନ୍ ଦୟାତେ ମାମେ ମି ପରୁ ଦୟା ମାଡ଼ିତମ୍, ଇଦ୍ ମିୟାଦ୍ ମୁକ୍ତିଦାତାଲ୍ ସଦାପ୍ରବୁ କେତିତଣ୍ଡ୍। ବାତେଙ୍କ୍ଇତ୍କେ ଇଦ୍ ମା ପରୁ ନୋହ ସମୟତେ ଏର୍ ଲେକାମ୍ ଆତ୍ତେ; ନୋହ ସମୟତେ ଏର୍ ମେଣ୍ଡେ ପୃତିବିତିଙ୍କ୍ ମୁହୁତେ ପାର୍ୱଇଞ୍ଜ ମାମେ ବେଲାନ୍ ଶପଥ ମାଡ଼ିମିନ୍ଦେମ୍, ଆଦ୍ଲେକାମ୍ ମାମେ ମି ପରୁ କପାମ୍, କି ମିକିଙ୍କ୍ ଦେଞ୍ଜ୍କମ୍ ଇଞ୍ଜ ଶପଥ ମାଡ଼୍ତମ୍। ବେଲାନ୍ ମି ପରୁ ଦୟା ମାଡ଼ିମିନ୍ଦେଡ଼୍ ବେନ୍ ସଦାପ୍ରବୁ, ଅଣ୍ଡ୍ କେତିତଣ୍ଡ୍, ମେଟା ସାରେ ଦାନ୍ଦେଆସ୍ ଗୁସିତା ନୁ ବେଡ଼ିୟେ ମେଟା ଉଙ୍ଗିତା; ମାତର୍ ମା ଦୟା ମିୟାଗାଙ୍କ୍ ଦାନ୍ଦେ ଆୟ, କି ମାମେ ଶାନ୍ତିତେ ନିୟମ୍ ଉଙ୍ଗ।
ବବିଷ୍ୟତ୍ତେ ଯିରୁଶାଲେମ୍
ହୋ ଦୁଃକାମ୍ତନି, ତପାନ୍ତେ ଦାନ୍ଦେତେ ନୁ ଶାନ୍ତିତେବାହୀନେ, ଉଡ଼େ, ମାମେ ୱେରେ ୱେରେ ସୁନ୍ଦର୍ତେ ମିୟାୱୁ ନେଟା ପେଃକିକା ନୁ ନୀଲମଣିତଡ଼୍ ମିୟାଦ୍ ମୁଲେକଞ୍ଜ୍ ତିଆର୍ ମାଡ଼ିକାଡ଼୍। ମାମେ ପଦ୍ମରାଗ ମଣିତେ ମି ଚୂଡ଼ାନୁ ସୂର୍ଯ୍ୟକାନ୍ତ ମଣିତେ ମିୟାଦ୍ ନଗର୍ତେ ଦ୍ୱାର୍ସାରେ ନୁ ମାନ୍ଆତ୍ତେ ନେଟେତେ ମିୟାଦ୍ ସାରେ ସାନ୍ଦ୍ ତିଆର୍ ମାଡ଼ିକାଡ଼୍। ମିୟାୱୁ ପିଲାକି ସାରେ ସଦାପ୍ରବୁନ୍ତଡ଼୍ ଶିକ୍ଷିତ୍ ଆଦ୍ତା ନୁ ମି ପିଲାକି ଅଦିକ୍ଶାନ୍ତି ଆଦ୍ତା। ମିଡ଼୍ ଦାର୍ମିକ୍ତେ ସ୍ଥିର ଆଦ୍ତିଡ଼୍; ମିଡ଼୍ ଦୁଷ୍ଟଡ଼ାଗାଙ୍କ୍ ଦୂରାମ୍ ମାନ୍ଦ୍ତିଡ଼୍, ବାତେଙ୍କ୍ଇତ୍କେ ମିଡ଼୍ ୱେର୍ୱିଡ଼୍; ମେଣ୍ଡେ ୱେର୍ତାଗାଙ୍କ୍ ଜେକା ମାନ୍ଦ୍ତିଡ଼୍, ବାତେଙ୍କ୍ଇତ୍କେ ଆଦ୍ ମିୟାଗାଙ୍କ୍ ୱାଦ୍ତେ। ଉଡ଼ାଟ୍, ନାରୁଡ଼୍ ୱେରଡ୍ମାନ୍ଦେ ଆଦ୍ଦେ ପାର୍ତଡ଼୍, ମାତର୍ ମା ତଡ଼୍ ଆୟ; ବେନ ଆୟି ମି ବିରୁଦ୍ଦ୍ତେ ଅଣ୍ଡୟାଗ୍ ଆଦ୍ତଣ୍ଡ୍, ଅଣ୍ଡ୍ ମି ସେଙ୍ଗେ ଆରେମ୍ ଆଦ୍ତଣ୍ଡ୍। ଉଡ଼ାଟ୍, ବେନ୍ କାମାରି କଇଲାତିଙ୍କ୍ କିସ୍ତଡ଼୍ ନୁ ମିୟାଦ୍ କାମ୍ତେ ସେଙ୍ଗେ ଅସ୍ତ୍ର ତିଆର୍ ମାଡ଼ାଟ୍, ମାମେ ଆଦିନ୍ ତିଆର୍ ମାଡ଼ିମିନ୍ଦେମ୍ ନୁ ଦଂସ ମାଡ଼ାନାଦିନେ ଦଂସତିଙ୍କ୍ ଏକେ ମାମେ ତିଆର୍ ମାଡ଼ିତମ୍। ବେନେଆୟି ଅସ୍ତ୍ର ମି ବିରୁଦ୍ଦ୍ତେ ତିଆର୍ ଆତ୍କେ, ଆଦ୍ ସାର୍ତକ୍ ଆୟ ନୁ ବେନ୍ ସାରେତଡ଼୍ ୱାଞ୍ଜେର୍ ବିଚାର୍ତାଗ୍ ମି ବିରୁଦ୍ଦ୍ତାଗ୍ ତେଦିତା, ମିଡ଼୍ ଅଙ୍କ୍ ଦଷିମାଡ଼ିତିଡ଼୍। ସଦାପ୍ରବୁନ୍ ଦାସନଡ଼୍ ଅଦିକାର୍ ନୁ ମାୟାଦ୍ କାମ୍ ଅଡ଼୍ ଦାର୍ମିକ୍ତାଗ୍ ଇଦ୍, ଇଦ୍ ସଦାପ୍ରବୁ କେତିତଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.