Koya Bible
ଯିଶାଇୟ 48
ଇସ୍ରାଏଲ୍ତା ମନ୍ ମାଲ୍ପାନାଦ୍
ହୋ ଇସ୍ରାଏଲ୍ ପେଦେର୍ତେ ଲେକାଆତ୍ତେ ନୁ ଯିହୁଦାତେ ଏର୍ଗୁଇନ୍ଦେ ତାଗାଙ୍କ୍ ପେୟିତ୍ତେ ଯାକୁବ୍ ପିଲୁଡ଼୍, ମିଡ଼୍ ଇଦ୍ ଗଟ୍ କେଞ୍ଜାଟ୍; ମିଡ଼୍ ସଦାପ୍ରବୁନ୍ ପେଦେର୍ତେ ଶପଥ ମାଡ଼ୁତିଡ଼୍ ନୁ ଇସ୍ରାଏଲ୍ତେ ପରମେଶ୍ୱର୍ତେ ପେଦେର୍ ପାଲନ୍ ମାଡ଼ୁତିଡ଼୍, ମାତର୍ ନିଜାମ୍ତେ କି ଦାର୍ମିକ୍ତେ ଆୟ। ବାତେଙ୍କ୍ଇତ୍କେ ଅଡ଼୍ ନିଜେତିଙ୍କ୍ ପବିତ୍ର ନଗର୍ତେ ନାରୁଡ଼୍ ଇଞ୍ଜ ଲେକିତଡ଼୍ ନୁ ଇସ୍ରାଏଲ୍ତେ ପରମେଶ୍ୱର୍ତେ ପରୁ ଆଶେ ନେଃତ୍ତଡ଼୍; ଅନ୍ ପେଦେର୍ ସାରେତିଙ୍କ୍ ବେଡ଼ିୟେ ସଦାପ୍ରବୁ। ମିଡ଼୍ ମୁନେତ୍ କାଲାମ୍ତେ ଗଟି ମୁନେତ୍ କାଲାମ୍କଞ୍ଜ୍ କେସ୍ ମିନ୍ଦେମ୍; କି, ଆଦ୍ ମା ପାୟୁର୍ତାଗାଙ୍କ୍ ପେୟିତ୍ତେ ନୁ ଆଦ୍ ମାମେ କେତ୍ତମ୍; ମାମେ ଆଦ୍ମାଡ଼୍ତମ୍ ନୁ ଆଦ୍ଲେକାମ୍ ଅଟାତ୍ ଆୱୁ ସାରେ ଗଟେମ୍ ଆତ୍ତା। ମିଡ଼୍ କେଞ୍ଜ୍ୱେନଡ଼ି, ମିୟାଦ୍ ବଣ୍ଡ୍କା ଲୁହାତୁମ୍ ନୁ ମିୟାଦ୍ ମୁଞ୍ଜ୍ ପିତଲ୍ ଇଞ୍ଜ ମାମେ ପୁତ୍ତମ୍। ଆଦିନ୍ ସେଙ୍ଗେ ମାମେ ମୁନେତ୍ କାଲାମ୍କଞ୍ଜ୍ ମି ପରୁ ଆଦ୍ କେତୁତମ୍; ଆଦ୍ ଗଟେମ୍ ଆଦାନ୍ ମୁନେ ମିକିଙ୍କ୍ ପୁଞ୍ଜ୍ସିତ୍ତମ୍; ଇଲୁକ୍ ବା ମାମେ କେଲେମ୍, ମାୟାଦ୍ ଦେୟାମ୍ ଇଦ୍ ମାଡ଼ିମିନ୍ଦେ, ମାୟାଦ୍ ଡେୱୁତେ ନୁ ଚଞ୍ଚ୍ତାଗ୍ ତସ୍ତେ ଲେକାମ୍ ଇଦ୍ କେସ୍ମିନ୍ଦେନି। ମିଡ଼୍ କେଞ୍ଜିମିନ୍ଦେଡ଼ି; ଇୱୁସାରେ ଉଡ଼ାଟ୍ ନୁ ମିଡ଼୍ କି ଆଦ୍ କେଲ୍ୱିଡ଼୍ ? ଇଦ୍ ସମୟ୍ତାଗାଙ୍କ୍ ମାମେ ମିକିଙ୍କ୍ ପୁଃନାଦ୍ ବିଷୟ୍, ଇତ୍କେ, ମିୟାଦ୍ ୱିଡ଼୍ସି ମାନ୍ଦାନ୍ ବେଡ଼ିୟେ ବିଷୟ୍ ତଃସ୍ମିନ୍ଦେମ୍। ଇୱୁସାରେ ମୁନେତ୍ କାଲ୍ମ୍କଞ୍ଜ୍ ଆୟ, ମାତର୍ ଇଞ୍ଜ୍ ତିଆର୍ ଆତ୍ତେ; ନେଟେ ଦିନାମ୍ ମୁନେଙ୍କ୍ ମିଡ଼୍ ଆଦ୍ କେଞ୍ଜ୍ୱିଡ଼୍; ଇଲୁକ୍ ବା ଉଡ଼ାଟ୍, ମାମେ ଆୱୁସାରେ ପୁତ୍ତମ୍ ଇଞ୍ଜ ମିଡ଼୍ ପୁଞ୍ଜ୍ ମାତ୍ତମ୍। ଆଙ୍ଗ୍ଡ଼ାମ୍, ମିଡ଼୍ କେଞ୍ଜ୍ୱିଡ଼୍; ମିଡ଼୍ ପୁଃନ୍ୱିଡ଼୍ ଆତ୍ତିଡ଼୍; ମୁନେଙ୍କ୍ ମିୟାଦ୍ କେୱୁକ୍ କୁଲେମ୍ ଆୟିୱେ ମାତ୍ତେ; ବାତେଙ୍କ୍ଇତ୍କେ ମିଡ଼୍ ଅଦିକ୍ ଅଦିକ୍ ବିଶ୍ୱସଗାତକତା ମାଡ଼୍ତିଡ଼୍ ନୁ ଡ଼ଙ୍କେତାଗାଙ୍କ୍ ଅଦର୍ମଚାରି ଇଞ୍ଜ ଲେକାଆସ୍ ମାତ୍ତେ ଇଦ୍ ମାମ୍ମେ ପୁତ୍ତମ୍। ମାମେ ବେଲାନ୍ ମିକିଙ୍କ୍ ତେୱମ୍, ଆଦିନ୍ ମାୟିଦିଙ୍କ୍ ମାମେ ନିଜେତ୍ ପେଦେର୍ ସେଙ୍ଗେ ମାୟାଦ୍ କପାମ୍ କମ୍ ମାଡ଼ିକାଡ଼୍ ନୁ ନିଜେତ୍ ପ୍ରଶଂସା ସେଙ୍ଗେ ମି ପରୁ ଆୟିଦ୍ତମ୍। ଉଡ଼େ, ମାମେ ମିକିଙ୍କ୍ ପରିଷ୍କାର୍ ମାଡ଼ିମିନ୍ଦେମ୍, ମାତର୍ ରୁପା ଲେକାମ୍ ଆୟ; ମାମେ ଦୁଃକାମ୍ ଲେକାମ୍ କିସ୍ କୁଣ୍ଡ୍ତାଗ୍ ମିକିଙ୍କ୍ ହେଞ୍ଚିମିନ୍ଦେମ୍। ମାମେ ନିଜେତ୍ ସେଙ୍ଗେ, ମାତର୍ ନିଜେତ୍ ସେଙ୍ଗେ ଆଦ୍ ମାଡ଼ିକାଡ଼୍; ବାତେଙ୍କ୍ଇତ୍କେ ମାନାଦ୍ ପେଦେର୍ ବାତ୍ତିଙ୍କ୍ ଅପବିତ୍ର ଲେକାମ୍ ଆଦ୍ତେ ? ମେଣ୍ଡେ, ମାନାଦ୍ ଗୌରବ୍ ୱେରେତଡ଼୍କିଙ୍କ୍ ଇୱାଡ଼୍।
ଇସ୍ରାଏଲ୍ତାଗ୍ ସଦାପ୍ରବୁଙ୍କ୍ ଏଞ୍ଚାନାଦ୍
ହୋ ଯାକୁବ୍, ହୋ ମାନ୍ ଜିୱେମାନ୍ଦାନ୍ ଇସ୍ରାଏଲ୍, ମା ବାକ୍ୟତାଗ୍ ମାନ୍ଇମୁଟ୍; ମାମେ ଆଦ୍ ଆଦ୍ତମ୍; ମାମେ ଆରାମ୍, ମାମେ କେ ଶେଷ। ମେଣ୍ଡେ,ମାୟାଦ୍ କାଇ ପୃତିବିତେ ବୂମ୍ତାଗାଙ୍କ୍ ତିଆର୍ ମାଡ଼ିମିନ୍ଦେଣ୍ଡ୍ ନୁ ମାନାଦ୍ ତିନ୍ଦେକାଇ ମାବ୍ ମୟଲ୍ ଏକାମ୍ ମାଡ଼ିମିନ୍ଦେ; ମାମେ ଅଡ଼୍କିଙ୍କ୍ କାର୍ଙ୍ଗକେ, ଅଡ଼୍ ଅଣ୍ଡୟ୍ତାଗ୍ ନିତ୍ତଡ଼୍। ମିଡ଼୍ ସାରେତଡ଼୍ ଅଣ୍ଡୟ୍ତାଗ୍ ଆସ୍ କେଞ୍ଜାଟ୍; ଅଡ଼ାଗାଙ୍କ୍ ବେନ ଇୱୁସାରେ କେସ୍ମିନ୍ଦେଣ୍ଡ୍ ? ସଦାପ୍ରବୁ ଆଦିଙ୍କ୍ ପ୍ରେମ ମାଡ଼ିମିନ୍ଦେଣ୍ଡ୍; ଅଣ୍ଡ୍ ବାବିଲ୍ତେ ପରୁ ତାମ୍ ମାନ୍ତେ ଇଚ୍ଛା ତିଆର୍ ମାଡ଼ିତଣ୍ଡ୍ ନୁ କଲ୍ଦିୟନଡ଼୍ ପରୁ ତାନାଦ୍ କାଇ ମାନ୍ତେ। ମାମେ, ମେମେ କେ ବାକ୍ୟ କେସ୍ମିନ୍ଦେମ୍; ମାମେ ଅଙ୍କ୍ କାର୍ଙ୍ଗିମିନ୍ଦେମ୍; ମାମେ ଅଙ୍କ୍ ତାସ୍ମିନ୍ଦେମ୍, ମେଣ୍ଡେ ଅଣ୍ଡ୍ ନିଜେତ୍ ଆର୍ଦାଗ୍ ମାଡ଼୍ତେ କାମ୍ ପୁରା ଆଦ୍ତେ। ମିଡ଼୍ ମା ଗାରେ ୱାସ୍ ଇଦ୍ ଗଟ୍ କେଞ୍ଜାଟ୍; ମାମେ ପ୍ରତମ୍ତାଗାଙ୍କ୍ ମିଞ୍ଜ୍ସ୍ପି କେଲମ୍; ଆଦ୍ ଆଦାନ୍ ସମୟ୍ ତାଗାଙ୍କ୍ ମାମେ ଆଗେ ମିନ୍ଦେମ୍; ମେଣ୍ଡେ, ଇଞ୍ଜେ ପ୍ରବୁ, ସଦାପ୍ରବୁ ନାକିଙ୍କ୍ ନୁ ତାନ୍ ଆତ୍ମାତିଙ୍କ୍ ମାଲ୍ପି ମିନ୍ଦେଣ୍ଡ୍।
ତାମ୍ ନାରୁଡ଼୍ ସେଙ୍ଗେ ସଦାପ୍ରବୁ ଆଲ୍ସ୍ସାନାଦ୍
ସଦାପ୍ରବୁ ମି ମୁକ୍ତି ଦାତାଲ୍, ଇସ୍ରାଏଲ୍ତେ ପବିତ୍ର ଇଶ୍ୱର୍, ଇଦ୍ ଗଟ୍ କେତିତଣ୍ଡ୍; ମାମେ ସଦାପ୍ରବୁ, ମି ପରମେଶ୍ୱର୍, ମିକିଙ୍କ୍ ଲାବ୍ ଲେକେତ୍ ଶିକ୍ଷା ଇଦ୍ତମ୍, ମିୟାଦ୍ ଲେକେତ୍ ଆର୍କିନାଗ୍ ମିକିଙ୍କ୍ ତାକ୍ସିତମ୍। ହୋ, ମିଡ଼୍ ବେସୁଙ୍କ୍ ମା ଗଟ୍ତେ ମାନ୍ଇୱେଡ଼ି ! ଆଲେକେ ମିୟାଦ୍ ଶାନ୍ତି ବେଡ଼େମ୍ ଲେକାମ୍ ନୁ ମିୟାଦ୍ ଦାର୍ମିକତା ସମୁଦ୍ରତେ ଗାଙ୍କୁଡ଼୍ ଲେକାମ୍ ଆସ୍ମାନେଡ଼୍; ମିୟାଦ୍ ପିଲୁଡ଼୍ ମିକା ଉସ୍କଲେକାମ୍ ନୁ ମି ଡଙ୍କେତ୍କଞ୍ଚ୍ ପୁଟ୍ତେ ପିଲାକି ଆଗେତ୍ ଇସୁର୍ ସାରେତାୱିନ୍ ଲେକାମ୍ ଆୟେ; ଆଦିନ୍ ପେଦେର୍ ମା ମୁନେଙ୍କ୍ ପେୟେଡ଼୍ ବା ନଷ୍ଟ ଆୟ ଆୟେଡ଼୍। ମିଡ଼୍ ବାବିଲ୍ତାଗାଙ୍କ୍ ପେୟିସ୍ ଆନୁଟ୍, କଲ୍ଦିୟନଡ଼ ଆଗାଙ୍କ୍ ମିରାଟ୍; ମିଡ଼୍ ପାରାନ୍ ଲେଙ୍ଗ୍ଦେ ପ୍ରଚାର୍ ମାଡ଼଼ି କେଞ୍ଜ୍ସ୍ପାଟ୍, ପୃତିବୀତେ ସାରେପାକା ଇଦ୍ ପ୍ରଚାର୍ ମାଡ଼଼ାଟ୍; ମିଡ଼୍ କେଲ୍ମୁଟ୍, “ସଦାପ୍ରବୁ ନିଜେତ୍ତେ ଦାସ ଯାକୁବ୍ତିଙ୍କ୍ ମୁକ୍ତ ମାଡ଼଼ିମିନ୍ଦେଣ୍ଡ୍।” ମେଣ୍ଡେ, ଅଣ୍ଡ୍ ଉସ୍କନେଲ୍ ଇସ୍ ଅଡ଼୍କିଙ୍କ୍ ଅଦାନ୍ୱେଲେ ଅଡ଼କ୍ ଏର୍ଉନ୍ଦେ ୱାଃୱ, ଅଡ଼ ସେଙ୍ଗେ କାଲ୍ଦାଗାଙ୍କ୍ ଏର୍ ପଙ୍କ୍ସ୍ତଣ୍ଡ୍, ମେଣ୍ଡେ ଅଣ୍ଡ୍ କାଲ୍ଦିଙ୍କ୍ ରେଃତ୍ତଣ୍ଡ୍, ମେଣ୍ଡେ ଆଗେଙ୍କ୍ ଏର୍ ପେୟିତ୍ତେ। ସଦାପ୍ରବୁ କେତିତଣ୍ଡ୍, “ଦୁଷ୍ଟ ନାରୁଡ଼ାଦ୍ ବାତେ ଶାନ୍ତି ଇଲେ।”
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.