Koya Bible
ଯିଶାଇୟ 46
ବେଲ୍ ଦେୟାମ୍ ମଦଲ୍ ଆଦ୍ତେ, ଆଦ୍ ତାଲ୍ଗି ମଦଲ୍ ଆଦ୍ତେ; ଅଡ଼୍ ମୁର୍ତ୍ତିକି ଜିୱାକ୍ ନୁ ପଶୁକିନ୍ ପରୁ ନେଃସ୍ ମିନ୍ଦେଡ଼୍; ବେନ୍ ଜିନିଷ ମିଡ଼୍ କାଞ୍ଜିମିକା ଉଡ଼୍ସ୍ପିତିଡ଼୍, ଆଦ୍ ବଜ୍ ଆତ୍ତେ, ଆୟିତେ ପଶୁତ୍ ପରୁ ବଜ୍ ଆତ୍ତେ। ଅଡ଼୍ ମଦଲ୍ ମାଡ଼୍କ୍ତଡ଼୍, ଅଡ଼୍ ସାରେତଡ଼୍ ଅଣ୍ଡ୍ୟ୍ଦାମ୍ ତାଲ୍ଗି ମଡ଼୍ତଡ଼୍; ଅଡ଼୍ ବଜ୍ ରକ୍ଷାମାଡ଼୍ ପାର୍ୱଡ଼୍, ମାତର୍ ଜାମେ ନିଜେ ବନ୍ଦି ଆତ୍ତଡ଼୍। ହୋ ଯାକୁବ୍ ପିଲୁଡ଼୍, ହୋ ଇସ୍ରାଏଲ୍ତେ ପିଲୁଡ଼୍ତେ ବାଗାତ୍ ସାରେତଡ଼ି, ମା ଗଟ୍ କେଞ୍ଜାଟ୍; ମିଡ଼୍ ମେଣ୍ଡନ୍ପାକେ ଆୟିନା ମା କାଞ୍ଜି ଆସ୍ମାନୁଟ୍, ମିଡ଼୍ ଆଶେତେ କାଞ୍ଜିଆସ୍ ମିନ୍ଦେଡ଼୍; ମେଣ୍ଡ୍, ମାମେ ମି ମୁୟ୍ନା ଯାକ ଆଦ୍ତେ ଆଦ୍ତମ୍ ନୁ କେଲ୍କ୍ ସାରେ ପାଣ୍ଡ୍ନା ଯାକ ମାମେ ମିକିଙ୍କ୍ କାଞ୍ଜିତମ୍; ମାମେ ତିଆର୍ ମାଡ଼ିମିନ୍ଦେମ୍ ନୁ ମାନାଡ଼୍ କାଞ୍ଜିକାଡ଼୍; ହଁ ମାନାଡ଼୍ କାଞ୍ଜିକାଡ଼୍ ନୁ ଉଦ୍ଦାର୍ ମାଡ଼ିକାଡ଼୍। ମିଡ଼୍ ମାକିଙ୍କ୍ ବେନନ୍ ଲେକାମ୍ ସାମାନ୍ ମାଡ଼ାନ୍ ନୁ ବେନ୍ ତଡ଼୍ ମାୟାଦ୍ ଲେକାମ୍ ମାଡ଼ିତିଡ଼୍, ମାନାଡ଼୍ ସାମାନ୍ ଆଦ୍ତାଡ଼୍ ? ଅଡ଼୍ ମୁନେତାଗାଙ୍କ୍ ସୁନା ତଃସିତଡ଼୍ ନୁ କେଜିତେ ରୂପା କଲ୍ସିତଡ଼୍, ଅଡ଼୍ ସୁନାରିଡ଼୍ ଦାମ୍ ଇଦ୍ତଡ଼୍ ନୁ ଆଦ୍ ୱେରଡ଼୍ ଦେୟାମ୍ ତିଆର୍ ମାଡ଼ିତେ; ଅଡ଼୍ ମଡ଼୍କି ପୂଜା ମାଡ଼ିତଡ଼୍। ଅଡ଼୍ ଆଦିଙ୍କ୍ ଆଟେତାଗ୍ କାଞ୍ଜି ଅଦ୍ତଡ଼୍ ନୁ ଆଦିଙ୍କ୍ କାଞ୍ଜି ଆଦିନ୍ ପଡ଼ିୟେତାଗ୍ ଆଦିଙ୍କ୍ ୱାଟିତଡ଼୍, ଆସୁଙ୍କ୍ ଆଦ୍ ନିତିତ୍; ଆଦ୍ ନିଜେତ୍ ପଡ଼ିୟେତାଗାଙ୍କ୍ ଗୁଞ୍ଚେମା ଆୟ; ମେଣ୍ଡେ, ବେନ ଆଦିଙ୍କ୍ କାର୍ଙ୍ଗେମିକା ଆଦ୍ ଉତ୍ତର୍ ଇଦେ ପାର୍ୱ, କି କଷ୍ଟତେ ବେନଙ୍କ୍ ଉଦ୍ଦାର୍ ମାଡ଼ାଙ୍କ୍ ପାର୍ୱ। ମିଡ଼୍ ଇଦ୍ ଏର୍କେ ମାଡ଼ାଟ୍ ନୁ ମାନେଇନଡ଼୍କ୍ କେତିତଣ୍ଡ୍; ହୋ ଦର୍ମଚାରୀନଡ଼ି, ମନ୍ତାଗ୍ ମାଡ଼ାଟ୍। ପାଃନ୍ତେ ବିଷୟ୍ସାରେ ଏର୍କେ ମାଡ଼ାଟ୍; ବାତେଙ୍କ୍ଇତ୍କେ ମାନାଡ଼େ ପରମେଶ୍ୱର୍, ନାକ୍ ୱିଡ଼୍ସି ବେନ ଇଲାଣ୍ଡ୍; ମାମେ ପରମେଶ୍ୱର୍, ମା ଲେକାମ୍ ବେନ ଇଲାଣ୍ଡ୍; ମାମେ ତେର୍ତେ ବିଷୟ୍ ମୁନେଙ୍କ୍କଞ୍ଜ୍ କେତୁତମ୍, ମେଣ୍ଡେ ବାତେ ଲେକା ଆୟ, ଆଦ୍ ମୁନେତ୍ କାଲାମ୍କଞ୍ଜ୍ କେତିତମ୍, ମେଣ୍ଡେ କେତିତମ୍, ମାୟାଦ୍ ମନ୍ତ୍ରଣା ପୁରା ଆଦ୍ତେ ନୁ ମାମେ ମାୟାଦ୍ ସାରେ ମନ୍ତାଦ୍ ପୁରା ମାଡ଼ିତମ୍; ମାମେ ପୂର୍ବ ଦିଗ୍ତାକାଙ୍କ୍ ପରଉଡାନ୍ ପିଟେକି, ଦୁରାମ୍ ଦେଶତାଗାଙ୍କ୍ ମା ମନ୍ତ୍ରର୍ତେ ନାରୁଡ଼୍କିଙ୍କ୍ କାର୍ଙ୍ଗିତମ୍; ମାମେ କେସ୍ମିନ୍ଦେମ୍, ମେଣ୍ଡେ ମାମେ ଆଦ୍ ପୁରା ମାଡ଼ିକାଡ଼୍; ମାମେ କେସ୍ମିନ୍ଦେମ୍, ମେଣ୍ଡେ ମାମେ ଆଦ୍ ପୁରା ମାଡ଼ିକାଡ଼୍। ହୋ ଦାର୍ମିକ୍ତାଗାଙ୍କ୍ ଜେକାମାନ୍ଦାନଡ଼୍ ଉର୍ଗାଡ଼୍ ନାରୁଡ଼ି, ମାୟାୱୁ ଗଟି କେଞ୍ଜାଟ୍। ମାମେ ମା ଦର୍ମ ପାକେ ତାତୁତମ୍, ଆଦ୍ ଜେକା ଆୟ ନୁ ମାୟାଦ୍ ପରିତ୍ରାଣ ଡେରି ଆୟ; ମାୟାଦ୍ ଗୌରବ୍ ଲେକାମ୍ ଇସ୍ରାଏଲ୍ତେ ସେଙ୍ଗେ ମାମେ ସିୟୋନ୍ତେ ପରିତ୍ରାଣ ତିଆର୍ ମାଡ଼ିକାଡ଼୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.