Koya Bible
ଯିଶାଇୟ 43:19
Verse 19 is marked below, with the whole chapter around it. Read from the start
ଇଶ୍ୱର୍ତେ ଉଦ୍ଦାର୍ ଗଟ୍ଇଦାନାଦ୍
ମାତର୍ ହୋ ଯାକୁବ, ବେନ ନିକିଙ୍କ୍ ତିଆର୍ ମାଡ଼୍ତଣ୍ଡ୍, ହୋ ଇସ୍ରାଏଲ୍, ବେନ ନିକିଙ୍କ୍ ତିଆର୍ ମାଡ଼୍ତଣ୍ଡ୍, ଆ ସଦାପ୍ରବୁ ଇଞ୍ଜେ ଇଦ୍ ଗଟ୍ କେତିତଣ୍ଡ୍; ୱେର୍ମା, ବାତେଙ୍କ୍ଇତ୍କେ ମାମେ ମିକିଙ୍କ୍ ମୁକ୍ତ ମାଡ଼ିମିନ୍ଦେମ୍; ନାନେ ମି ପେଦେର୍ ପୟିସ୍ ନିକିଙ୍କ୍ କାର୍ଙ୍ଗି ତମ୍, ନିମେ ମାୱନି। ନିମେ ଏର୍ଦେ ନାଡ଼୍ମେକଞ୍ଜ୍ ଆଦାନ୍ ୱେଲେ ମାମେ ନି ତଡ଼୍ ଆଦ୍ତଡ଼୍ ବେଡ଼େମ୍ ଇଲ୍କାନ୍ ନାଡ଼୍ମେଙ୍କ୍ ତାକ୍କେ ମିକା, ଆୱୁସାରେ ନିକିଙ୍କ୍ ମୁଃୱ; ନିମେ କିସ୍ତାଲାନ୍ ତାକାନ୍ ୱେଲେ କାର୍ୱିନ୍, କି କିସ୍ତାଡ଼୍ମି ନିକ୍ ପୁଣ୍ଡକ୍ ମାଡ଼୍ଡ଼। ବାତେଙ୍କ୍ଇତ୍କେ ମାମେ ସଦାପ୍ରବୁ, ମି ପରମେଶ୍ୱର୍, ଇସ୍ରାଏଲ୍ତେ ଦର୍ମଲେକାମ୍, ମି ତ୍ରାଣକର୍ତ୍ତା ଆଦ୍ତମ୍; ମାମେ ମିକିଙ୍କ୍ ମୁକ୍ତିତେ ଦାମ୍ ଲେକାମ୍ ମିସର୍ ନୁ ମିକ୍ ୱିଡ଼୍ସି କୂଶ ନୁ ସିବା ଦେଶ୍ ଇସ୍ମିନ୍ଦେମ୍। ମିଡ଼୍ ମା କଣ୍ଡେତେ ନାର୍ଗେ ଦାମ୍ ନୁ ଗୌରବ୍ ଆସ୍ମିନ୍ଦେଡ଼ି ନୁ ମାମେ ମିକିଙ୍କ୍ ପ୍ରେମ ମାଡ଼ିମିନ୍ଦେମ୍; ଆଦିଙ୍କ୍ ମାମେ ମିକ୍ ୱିଡ଼୍ସି ନାରୁଡ଼୍କିଙ୍କ୍ ନୁ ମି ଜିୱେ ୱିଡ଼୍ସି ଗୋଷ୍ଟିତେ ନାରୁଡ଼୍ ଇଦିକାଡ଼୍। ୱେର୍ମାଟ୍; ବାତେଙ୍କ୍ଇତ୍କେ ମାମେ ମିତଡ଼୍ ମିନ୍ଦେମ୍; ମାମେ ପୂର୍ବ ପାକେଙ୍କ୍ ମି ପିଲୁଡ଼୍ତିଙ୍କ୍ ତାତିତମ୍ ନୁ ପଶ୍ଚିମ୍ ପାକେଙ୍କ୍ ମିକିଙ୍କ୍ ଗୁଡ଼୍ପିତମ୍; ମାମେ ଉତ୍ତର୍ ପାକେଙ୍କ୍ କେତିତମ୍, ୱିଡ଼୍ସିମୁଟ୍ ନୁ ଦକ୍ଷିଣ ପାକେଙ୍କ୍ କେତିତମ୍, ଅଟ୍କାମାଡ଼ି ନେଃମାଟ୍; ମା ମାରିକିଡ଼୍ ଜେକାକଞ୍ଜ୍ ନୁ ମା ମାୟାକିଙ୍କ୍ ପୃତିବୀତେ ଶେଷ ପଡ଼ିୟେ ତାଗାଙ୍କ୍ ତାସ୍ଇମୁଟ୍; ମା ପେଦେର୍ତେ ଲେକା ଆତ୍ତେ ନୁ ବାତ୍ତିଙ୍କ୍ ମାମେ ମା ଗୌରବ୍ତେ ସୃଷ୍ଟି ମାଡ଼୍ତମ୍, ଇଦ୍ଲେକାମ୍ ସାରେତଡ଼୍ ନାରୁଡ଼୍କ୍ ତାଡ଼ାଟ୍; ମାମେ ଅଙ୍କ୍ ତିଆର୍ ମାଡ଼୍ତମ୍; ହଁ ମାମେ ଅଙ୍କ୍ ତିଆର୍ ମାଡ଼୍ତମ୍।
ଇସ୍ରାଏଲ୍ ଇଶ୍ୱର୍ତେ ସାକ୍ଷୀ
କଣ୍ଡା ମାଞ୍ଜ୍ କାନାଲ୍ ନୁ କେୱୁକ୍ ମାଞ୍ଜ୍ ବୟ୍ରାଲ୍, ଆସତ୍ ନାରୁଡ଼୍କିଙ୍କ୍ ପେସ୍ପିତାଡ଼ାଟ୍। ସାରା ଦେଶ୍ତେନଡ଼୍ ତିଆର୍ ଆୟ୍ମୁଟ୍ ନୁ ଗୋଷ୍ଟିସାରେତଡ଼୍ ଅଣ୍ଡୟ୍ତାଗ୍ ଆୟିଡ଼୍; ଅଡ଼୍ ଲୋପେଙ୍କ୍ ବେନ ଇଦ୍ କେତେ ପାର୍ତଣ୍ଡ୍ ନୁ ମୁନେଙ୍କ୍ତେ ବିଷୟ୍କି ମାକିଙ୍କ୍ ତଃତେପାର୍ତଣ୍ଡ୍ ? ଅଡ଼୍ ନିର୍ଦ୍ଦୋଷୀ ଆଦାନ୍ ସେଙ୍ଗେ ନିଜେତ୍ ନିଜେତେ ସାକ୍ଷିନଡ଼୍କ୍ ତାଡ଼ାଟ୍; କି ଅଡ଼୍ କେଞ୍ଜି ଇଦ୍ ନିଜାମ୍ ଇଞ୍ଜ କେଲିଡ଼୍। ସଦାପ୍ରବୁ ପରମେଶ୍ୱର୍ କେତିତଣ୍ଡ୍, ମିଡ଼୍ ବେଲାନ୍ ପୁଞ୍ଜ୍ ମାୟାଗେ ବିଶ୍ୱାସ୍ ମାଡ଼ିତିଡ଼୍ ନୁ ମାମେ ଅଣ୍ଡେ ଇଞ୍ଜ ପୁନ୍ଦ୍ତିଡ଼୍, ଆଦିନ୍ ସେଙ୍ଗେ ମିଡ଼୍ ମା ସାକ୍ଷୀ ନୁ ମା ହେଞ୍ଚିମାନ୍ଦାନ୍ ଦାସନି, ମା ମୁନେ ବେନେ ବା ଇଶ୍ୱର୍ ତିଆର୍ ଆୟ, କି ମା ପାକେ ଆୟ। ମାମେ, ହିଁ ସଦାପ୍ରବୁ ଆଦ୍ତମ୍ ନୁ ମାକ୍ ୱିଡ଼୍ସି ମେଣ୍ଡେ ତ୍ରାଣକର୍ତ୍ତା ଇଲେଣ୍ଡ୍। ମାମେ କେତ୍ତମ୍, ମାମେ ଉଦ୍ଦାର୍ ମାଡ଼୍ତମ୍ ନୁ ମାମେ ତଃତମ୍, ମେଣ୍ଡେ ମା ପାକେ ବେନେବା ୱେରେ ଦେଶ୍ତେ ଦେୟାକ୍ ଇଲ୍ୱେ ମାତ୍ତା; ଆଦିଙ୍କ୍ ସଦାପ୍ରବୁ କେତିତଣ୍ଡ୍, ମିଡ଼୍ ମା ସାକ୍ଷୀ ଆଦ୍ତିଡ଼୍ ନୁ ମାମେ ପରମେଶ୍ୱର୍ ଆଦ୍ତମ୍। “ହଁ, ଦିନାକିନେ ମୁନେଙ୍କ୍ ମାମେ ଆଦ୍ଦେ ଆଦ୍ତାଡ଼୍ ନୁ ମାନ୍ କାଇଦାଗ୍ ଉଦ୍ଧାର୍ମାଡ଼ାନଣ୍ଡ୍ ବେନ ଇଲାଣ୍ଡ୍; ମାନାଡ଼୍ କାମ୍ ମାଡ଼ିକାଡ଼୍, ମେଣ୍ଡେ ବେନ ଆଦିଙ୍କ୍ ୱେରେ ମାଡ଼ିତଣ୍ଡ୍ ?”
ବାବିଲ୍ତାଗାଙ୍କ୍ ମୁକ୍ତି
ମି ମୁକ୍ତିଦାତାଲ୍, ଇସ୍ରାଏଲ୍ତେ ଦର୍ମଲେକାମ୍ ସଦାପ୍ରବୁ ଇଦ୍ ଗଟ୍ କେତିତଣ୍ଡ୍, “ମାମେ ମି ସେଙ୍ଗେ ବାବିଲ୍ତିଙ୍କ୍ ନାରୁଡ଼୍ ରଃତ୍ତମ୍ ନୁ ମାମେ ଅଡ଼୍କିଙ୍କ୍ ମିରାନଡ଼ାଗାଙ୍କ୍ ତାତିକାଡ଼୍; କଲ୍ଦୀୟନଡ଼୍କ୍ କେୟ କେୟ ପାଟେତେ ଓଡେତାଗ୍ ତାତିକାଡ଼୍। ମାମେ ସଦାପ୍ରବୁ ମି ଦର୍ମଲେକାମ୍, ଇସ୍ରାଏଲ୍ତେ ସୃଷ୍ଟିକର୍ତ୍ତାଲ୍, ମି ରାଜା ଆଦ୍ତମ୍।” ବେନ ସଦାପ୍ରବୁ ସମୁଦ୍ରତାଗ୍ ଆର୍ ନୁ ନାର୍ଗେ ଏର୍ଦାଗ୍ ଆର୍ ମାଡ଼ିତଣ୍ଡ୍; ବେନ ରତ ନୁ ଗୁରାକ୍, ସୈନ୍ୟ ନୁ ବୀରନଡ଼୍କ୍ ପେସ୍ପି ତାତିତଣ୍ଡ୍; ଅଡ଼୍ ଅଣ୍ଡୟ୍ଦାମ୍ ନେଲ୍ ରାଲି ମେଣ୍ଡେ ତେଦଡ଼୍, ଅଡ଼୍ କୁପିତେ କାର୍ୱିମାନ୍ଦାନ୍ ସାଲ୍ତେ ଲେକାମ୍ ମାୟି ଆଦ୍ତଡ଼୍; ସଦାପ୍ରବୁ ଇ ଗଟ୍ କେତିତଣ୍ଡ୍; ମିଡ଼୍ ମୁନେଙ୍କ୍ତେ ବିଷୟ୍ସାରେ ଏର୍କେ ମାଡ଼୍ମାଟ୍, କି ପାଃନ୍ତେ ବିଷୟ୍ସାରେ ମାନ୍ତାଗ୍ ଚିନ୍ତେ ମାଡ଼୍ମାଟ୍। ଉଡ଼େ, ମାମେ ୱେରଡ଼୍ ପୁଃନେ ନିୟମ୍ ମାଡ଼ିକାଡ଼୍; ଆଦ୍ ଇଞ୍ଜେ ଲେକାମ୍ ମଡ଼୍ତିକାଡ଼୍; ମିଡ଼୍ ବାତେ ଆଦ୍ଦିଙ୍କ୍ ପୁନ୍ୱିଡ଼୍ ? ମେଣ୍ଡେ, ମାନାଡ଼୍ ମେଟେତାଗ୍ ଆର୍ ନୁ ଉସ୍କନେଲ୍ଦାଗ୍ ବେଡ଼େମ୍, ଇଲ୍କା ମାଡ଼ିକାଡ଼୍। ୱାୟେତେ ଜିୱାକ୍, କଇଲା ନୁ ଓଟପିଟେକି ମାନାଙ୍କ୍ ଗୌରବ୍ ମାଡ଼ିତା; ବାତେଙ୍କ୍ଇତ୍କେ ମାମେ ନିଜେତେ ହେଞ୍ଚିମାନ୍ଦାନ୍ ନାରୁଡ଼୍ ଉନ୍ଦାନ୍ ମାୟିଦିଙ୍କ୍ ମେଟେତାଗ୍ ଏର୍ ନୁ ଉସ୍କନେଲ୍ଦାଗ୍ ବେଡ଼େମ୍ ଇଲ୍କା କେପ୍ସିକାଡ଼୍; ଆ ନାରୁଡ଼୍କିଙ୍କ୍ ମାନାଡ଼୍ ନିଜେତ୍ ପ୍ରଶଂସା କେତାନ୍ ସେଙ୍ଗେ ତିଆର୍ ମାଡ଼ିମିନ୍ଦେଡ଼୍।
ଇସ୍ରାଏଲ୍ତେ ପାପ
ଆଗେକ୍ବା ହୋ ଯାକୁବ, ନିମେ ମା ପାକେ ପ୍ରାତନା ମାଡ଼୍ୱିନ୍; ହୋ ଇସ୍ରାଏଲ୍, ନିମେ ମା ବିଷୟ୍ତେ ଆୟିସ୍ ମିନ୍ଦେନି। ନିମେ ନିଜେତ୍ ପୂଜେଇଦାନ୍ ମେକା ମା ପାକେ ତାଡ଼୍ୱିନ୍; କି ନିମେ ନିଜେତ୍ ବଲିଦାନ୍ତଡ଼୍ ମାକିଙ୍କ୍ ସନ୍ମାନ୍ ମାଡ଼୍ୱିନ୍। ମାମେ କାୟାନ୍ନିୟ୍ ସେଙ୍ଗେ ମିକିଙ୍କ୍ ଦାସନ୍ କାମ୍ ମାଡ଼ାଙ୍କ୍ କେଲମ୍; କି ଦୁପାମ୍ ସେଙ୍ଗେ ନିକିଙ୍କ୍ ଆୟିସ୍ପମ୍। ନିମେ ରୂପାଡାବ୍କ୍ ଇସ୍ ମା ସେଙ୍ଗେ ଲେକେତ୍ ଗାବ୍ମାନ୍ଦାନ୍ ଦୁପାମ୍ ଆସ୍ୱିନ୍, କି ମି ବଲିତେ ପାଣ୍ଡୁମ୍ତାଗ୍ ମାକିଙ୍କ୍ କାର୍ଙ୍ଗିନ୍; ମାତର୍ ନିମେ ନିଜେତ୍ ପାପ୍ତଡ଼୍ ମାକିଙ୍କ୍ ଦାସନ୍ କାମ୍ ମାଡ଼ାଙ୍କ୍ କେସ୍ମିନ୍ଦେନି, ନିମେ ନିଜେତ୍ ୱେରେ ଅଦର୍ମତେ ମାକିଙ୍କ୍ ଆୟିସ୍ପି ମିନ୍ଦେନି। ମାମେ, ମା ନିଜେତ୍ ସେଙ୍ଗେ ନିୟାଦ୍ କାରାପ୍ସାରେ କ୍ଷମା ମାଡ଼ିତମ୍ ନୁ ନିୟାୱୁ ପାପ୍ସାରେ ମାମେ ଏର୍କେ ମାଡ଼୍ୱାଡ଼୍। ମାକିଙ୍କ୍ ଏର୍କେ ମାଡ଼ାଟ୍; ମାମେ ନିଜେ ନିଜେ ବିଚାର୍ ମାଡ଼ିତମ୍; ନିମେ ଦଷିଆୟନ୍ ଇଞ୍ଜ ନିଜେତ୍ ଗଟି କେଲା। ନି ପ୍ରତମ୍ତେ ବାବାଲ୍ ପାପ ମାଡ଼୍ତଣ୍ଡ୍ ନୁ ନିୟାଦ୍ ନାଡ଼୍ମେତଡ଼୍ ମା ବିରୁଦ୍ଧ୍ତେ କାରାପ୍ ମାଡ଼ିମିନ୍ଦେଡ଼୍। ଆଦିନ୍ ସେଙ୍ଗେ ମାମେ ପବିତ୍ର ପଡ଼ିୟେତେ ଅଦିପତିନଡ଼୍କ୍ ଅସୁସ୍ଥ ମାଡ଼ିକାଡ଼୍, ମାମେ ଯାକୁବଙ୍କ୍ ଅବିଶାପ୍ ନୁ ଇସ୍ରାଏଲ୍ତାକ୍ ନିନ୍ଦେତଣ୍ଡ୍ ମାଡ଼ିତାନ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.