Koya Bible
ଯିଶାଇୟ 33
ସାହାଯ୍ୟ ସେଙ୍ଗେ ପ୍ରାର୍ତନା
ନିଜେ ଡଙ୍ଗ୍ତାଦ୍ ଇଲୁକ୍ ବା ଡଙ୍ଗମିନ୍ଦଡ଼୍ ଯେ ମିଡ଼୍ ; ମେଣ୍ଡେ ନାରୁଡ଼୍ ମି ପର ବିଶ୍ୱାସ୍ଉଃୱ କଟ ହୋ ବିଶ୍ୱାସ୍ଉଃତାନଡ଼୍ ମିନ୍ଦେଡ଼୍ ଯେ ମିଡ଼୍, ମିଡ଼୍ କାରାପ୍ ନାରୁଡ଼ି ! ମିଡ଼୍ ଡଙ୍ଗାନାଦ୍ ତେର୍ସ୍ପେ ପେର୍କେ ଡଙ୍ଗାନାଦ୍ ଆଦ୍ତେ ନୁ ବିଶ୍ୱାସ୍ଉଃତାନଣ୍ଡ୍ ମାଡ଼ାନାଦ୍ ତେର୍ସ୍ପେତେ ପେର୍କେ ନାରୁଡ଼୍ ମି ପରୁ ବିଶ୍ୱାସ୍ଉଃତିତଣ୍ଡ୍।
ହୋ ସଦାପ୍ରବୁ, ମା ପର ଦୟା ମାଡା; ମାମେ ମିୟାଦିଙ୍କ୍ କେପି ମିନ୍ଦେମ୍; ମି ପର ନାର୍କୁକ୍ ଅଡ଼୍ୱାଦ୍ ବପୁ ଲେକାମ୍ ଆଦ୍ତମ୍, ବିପଦ୍ ସମୟ୍ତେ ମିକା ମାୟାଦ୍ ଉଦ୍ଦାର୍ ଲେକାମ୍ ଆୟିମ୍। ରାମ୍କିନ୍ ମର୍ତେ ନାଟେନଡ଼୍ ମିର୍ତଡ଼୍, ମିଡ଼୍ ତେଦୱାନାକେ, ୱେରେ ଦେଶତେନଡ଼୍ ୱେରେ ୱେରେ ଆତ୍ତଡ଼୍। ମେଣ୍ଡେ, ବେଲାନ୍ ଇଟେକ୍ ବେଲାନ୍ ଗୁଡ଼୍ପିତା, ଆଦ୍ଲେକାମ୍ ମିୟାଦ୍ ଡଙ୍ଗ୍ତାୱୁ ଗୁଡ଼ିତା; ବେଲାନ୍ ଇଟେକ୍ ତୁଲିତା, ଆଦ୍ଲେକାମ୍ ନାରୁଡ଼୍ ଆଦିନ୍ ପରୁ ତୁଲିତଡ଼୍। ସଦାପ୍ରବୁ ମହାନ୍; ବାତେଙ୍କ୍ଇତ୍କେ ଅଣ୍ଡ୍ ସାରେତଡ଼୍ ପରୁତ୍ ବାସେ ମାଡ଼ିତଣ୍ଡ୍; ଅଣ୍ଡ୍ ସିୟୋନ୍ ନ୍ୟାୟତିଙ୍କ୍ ବିଚାର୍ ମାଡ଼ିମିନ୍ଦେଣ୍ଡ୍ ନୁ ଦାର୍ମିକ୍ତେ ପୁରା ମାଡ଼ିମିନ୍ଦେଣ୍ଡ୍। ମେଣ୍ଡେ, ମି ସମୟତେ ସୁସ୍ଥ ଆଦ୍ତେ; ପରିତ୍ରଣତେ, ଜ୍ଞାନ୍ତେ ନୁ ବୁଦ୍ଦ୍ତେ ନାର୍ଗେ ଆଦ୍ତଣ୍ଡ୍; ସଦାପ୍ରବୁନ୍ ବିଷୟକି ୱେର୍ ଅନାଦ୍ ବାକ୍ଡ଼େତେ କୁସ୍କାଇ। ଉଡ଼ାଟ୍, ଅଡ଼୍ ସୈନ୍ୟନଡ଼୍ ବାଇଦେ କେୟ ମିନ୍ଦେଡ଼୍; ଚାନ୍ଦ୍ ମେଃକଉଡ଼ାନଡ଼୍ କାବୁର୍ ହେଉସାନଡ଼୍ ଗାଟି କେୟଡ଼୍ ମିନ୍ଦେଡ଼୍। ରାଜାନ୍ ଆର୍ସାରେ ଡଲ୍ତେ ଲେକାମ୍, ଜିୱେ ବେନ ଇଲେଣ୍ଡ୍; ଅଣ୍ଡ୍ ନିୟମ୍ତିଙ୍କ୍ ଉଃସ୍ମିନ୍ଦେଣ୍ଡ୍, ଅଣ୍ଡ୍ ନଗର୍ସାରେ ଆସାମ୍ ମାଡ଼ିମିନ୍ଦେଣ୍ଡ୍, ଅଣ୍ଡ୍ ନାରୁଡ଼୍କିଙ୍କ୍ ଲେକଣ୍ଡ୍। ଦେଶ୍ ଦୁଃକାମ୍ତେ ଉର୍ଙ୍ଗିମିନ୍ଦେ; ଲିବାନୋନ୍ ସିଗ୍ଆସ୍ ୱାସମିନ୍ଦେଣ୍ଡ୍; ଶାରୋଣ ମେଟେ ଲେକାମ୍ ଆସ୍ମିନ୍ଦେଣ୍ଡ୍; ମେଣ୍ଡେ ବାଶନ୍ ନୁ କର୍ମିଲ୍ ଆକି କାଇସ ମିନ୍ଦେଣ୍ଡ୍।
ପରମେଶ୍ୱର୍ତିଙ୍କ୍ ଚେତନା ଇଦାନାଦ୍
ସଦାପ୍ରବୁ କେତିତଣ୍ଡ୍, “ମାନାଡ଼୍ ଇଞ୍ଜେ ତେଦିକାଡ଼୍,” ମାମେ ଇଞ୍ଜେ ଗୌରବ୍ତିଙ୍କ୍ ତେଃତିକାଡ଼୍; ମାନାଡ଼୍ ଇଞ୍ଜେ ବେଡ଼ିୟେ ଆଦିକାଡ଼୍। ମିଡ଼୍ କାରାପ୍ ବିଷୟ୍କିଙ୍କ୍ ସାରେ ଶାସନ୍ ମାଡ଼ୁତିଡ଼୍। ୱିଡ଼୍ସାନ୍ କାମ୍ ମାଡ଼ୁତିଡ଼୍ ମାୟାଦ୍ ଆତ୍ମା କିସ୍ ଲେକାମ୍ ନିଡ଼୍ସମିନ୍ଦେ ଆଦ୍ ମିକିଙ୍କ୍ ଦଂସ ମାଡ଼ିତେ। ମେଣ୍ଡେ, ଗୋଷ୍ଟିତଡ଼୍ କାର୍ୱି ମାନ୍ଦାନ୍ ଚୂନାମ୍ ଲେକାମ୍ ନୁ କିସ୍ତେ କାର୍ୱୁତେ ନାଡ଼୍କ୍ତେ କୟେ ଲେକାମ୍ ଆଦ୍ତିଡ଼୍। ହୋ ଜେକେମାନ୍ଦାନ୍ ନାରୁଡ଼୍ ସାର୍ରେତଡ଼ି, ମିଡ଼୍ ମାମେ ମାଡ଼ିମାନ୍ଦାନ୍ ପାଡ଼ିୟ୍ତେ ଗଟ୍ କେଞ୍ଜାଟ୍; ମେଣ୍ଡେ, ହୋ ଗାରେ ମାନ୍ଦାନ୍ ନାରୁଡ଼୍ ସାରେତଡ଼ି, ମିଡ଼୍ ମାୟାଦ୍ ପରାକ୍ରମ୍ତେ ସ୍ୱିକାର୍ ମାଡ଼ାଟ୍।
ସିୟୋନ୍ତାଗ୍ ପାପିଡ଼୍ ୱେର୍ତଡ଼୍; ଅଦାର୍ମିକ୍ନଡ଼୍କ୍ କମ୍ପ ଅଟାତ୍ ଆକ୍ରମନ୍ ମାଡ଼ିମିନ୍ଦେଣ୍ଡ୍। ମାୟାଗାଙ୍କ୍ ବେନ ସାରେପାକେ ପୟିତେ କିସ୍ତାଗ୍ ବାସେ ମାନ୍ଦେପାର୍ତଣ୍ଡ୍ ? ମାୟାଗାଙ୍କ୍ ସାରେ କାଲାମ୍ ଆୟିନା ନିଡ଼୍ତାନାଗ୍ ବାସେ ମାଡ଼େପାର୍ତଣ୍ଡ୍ ? ବେନ୍ ନାରୁଣ୍ଡ୍ ଦର୍ମଲେକାତ୍ ଆର୍ତାଗ୍ ତାକିତଣ୍ଡ୍ ନୁ ବେନ ସାୟେତ୍ ଗଟି କେତିତଣ୍ଡ୍; ବେନ୍ ନାରୁଡ଼୍ କାରାପ୍ ଲାବ୍ ୱିଡ଼୍ସିଦ୍ତଣ୍ଡ୍ ନୁ ଲାଞ୍ଚ୍ ଅଦାନ୍ ବିଷୟକଞ୍ଜ୍ ନିଜର୍ କାଇ କାଇସ୍ଇଦ୍ତଣ୍ଡ୍, ବେନ ନେତୁର୍ ମାଡ଼ାନ୍ଗଟ୍ କେଞ୍ଜିତଣ୍ଡ୍ ନିଜର୍ କେୱୁ ବନ୍ଦ୍ ମାଡ଼ିତଣ୍ଡ୍, ମେଣ୍ଡେ କାରାପ୍ ଉଡ଼ାନାଗାଙ୍କ୍ ନିଜେତ୍ କଣ୍ଡାଙ୍କ୍ ମୁସିତଣ୍ଡ୍; ଅଣ୍ଡ୍ ଡେଙ୍ଗ୍ ମାନ୍ଦାନ୍ ପଡ଼ିୟେତାଗ୍ ବାସେ ମାଡ଼ିତଣ୍ଡ୍; ବାଣ୍ଡ୍କାଲ୍କିନ୍ ଦୁରାମ୍କଞ୍ଜ୍ ପଡ଼ିୟେ ଅନାଦ୍ ମାନ୍ଦାନାଦ୍ ଆଦ୍ତେ; ତାନାଦ୍ କାଦି ତାଙ୍କ୍କିଙ୍କ୍ ଇଦ୍ତଣ୍ଡ୍; ଅଙ୍କ୍ ଏର୍ଦେ ଅବାବ୍ ଆୟ।
ମୁନେଙ୍କ୍ତେ ଗୌରବ୍
ନିୟାଦ୍ କଣ୍ଡେ ରାଜାଙ୍କ୍ ତାନ୍ ସୁନ୍ଦର୍ତେ ଉଡ଼ିତଡ଼୍; ୱେରଡ଼୍ ଲାଟି ଅସାର୍ ମାନ୍ଦାନ୍ ଦେଶ୍ ଉଡ଼ିତିଡ଼୍। ନିୟାଦ୍ ହୃଦୟ୍ ୱେର୍ଦାନ୍ ବିଷୟତେ ବିଚାର୍ ମାଡ଼ିତେ; ଅଣ୍ଡ୍ ଲେକାନଣ୍ଡ୍ ବେକା ? ଡାବୁକ୍ କଲ୍ସାନଡ଼୍ ବେକେ ? ସାମ୍ଡ଼ାତାଗ୍ ମାଞ୍ଜ୍ ଲେକାନଡ଼୍ ବେକେ ?
ମିଡ଼୍ ଆଦ୍ ଜେକେତ୍ ଗୋଷ୍ଟିତିଙ୍କ୍, ବେନଡ଼ାୱୁ ନାର୍ଗେ ଗଟି ମିଡ଼୍ ପୁନ୍ଦେ ପାର୍ୱିଡ଼୍, ବେନଡ଼ାୱୁ ବିଦେଶ୍ ଗଟ୍ ମିଡ଼୍ପୁନ୍ଦେ ପାର୍ୱିଡ଼୍, ଆଦ୍ ଗୋଷ୍ଟିତିଙ୍କ୍ ମେଣ୍ଡେ ଉଡ଼୍ୱିଡ଼୍। ମା ପବିତ୍ର ମିଟିଙ୍କ୍ପଡ଼ିୟେ ସିୟୋନ ନାର୍ଦେ ପର କଣ୍ଡେ ୱାଟାଟ୍; ମିୟାଦ୍ କଣ୍ଡେ ଶାନ୍ତିମୟ ମାନ୍ଦାନାଦ୍ ଯିରୁଶାଲେମ୍ତିଙ୍କ୍ ଉଡ଼ିତ୍, ଆଦ୍ ୱେରଡ଼୍ ଗୁଡ଼୍ସା ଲେକାମ୍, ଆଗେତ୍ କୁଟିସାରେ ବେସୁଙ୍କ୍ ଟେଣ୍ଡାନଙ୍କ୍ ଆୟ, କି ଆଗେତ୍ ବେନେଆୟି ନଡ଼ମ୍ ତେଗ। ମାତର୍ ଆଗେ ସଦାପ୍ରବୁ କାମ୍କେତେ ମାନ୍ ତଡ଼୍ ଆଦ୍ତଡ଼୍, ବେଡ଼ିୟେ ବେଡେମ୍ ଇଲ୍କା ନୁ ସାରେତାୱିନ୍ ପଡ଼ିୟେ ଇଲ୍କେ ଲେକାମ୍ ଆଦ୍ତା; ଆଦ୍ ଗାଙ୍କୁଡ଼୍ ତଲ୍କଡ଼୍ ଶକ୍ତିତେ ବାତେବା ଆଦ୍ଦେ ପାର୍ୱ, କି ବେଡ଼ିୟାୱୁ ଜାହାଜ୍ ଆଦ୍ ପାର୍ ଆଦ୍ତେ ପାର୍ୱଡ଼୍। ବାତେଙ୍କ୍ଇତ୍କେ ସଦାପ୍ରବୁ ମା ବିଚାର୍କର୍ତ୍ତା, ସଦାପ୍ରବୁ ମା ନିୟମ୍ଦାତାଲ୍, ସଦାପ୍ରବୁ ମା ରାଜାଲ୍, ଅଣ୍ଡ୍ ମାକିଙ୍କ୍ ଉଦ୍ଦାର୍ ମାଡ଼ିତଣ୍ଡ୍। ମିୟାଦ୍ ତଃତ୍ତେ ନଡ଼କ୍ ଲୁଜ୍ଆସ୍ ମିନ୍ଦେ, ଆୱୁ ସାରେ ନିଜର୍ ଗୁଞ୍ଜ୍ତିଙ୍କ୍ ଡାଟୁଙ୍କ୍ ନୁ ପାଲ୍ତିଙ୍କ୍ ଏକାମ୍ ମାଡ଼୍ନଙ୍କ୍ ପାର୍ୱଡ଼୍; ଆସୁଙ୍କ୍ ଏକାମ୍ ଡଙ୍ଗ୍ତେ ଜିନିଷ୍ ତୁଃସିତ୍ତଡ଼୍; କୁଟା ନାରୁଣ୍ଡ୍ ଡଙ୍ଗିମାନ୍ଦାନାୱୁ ପୟିତ୍ତଣ୍ଡ୍। ମେଣ୍ଡେ, ନାନ୍ ରଗ୍ତେ ମିନ୍ଦେନ୍ ଇଞ୍ଜ ସିୟନ୍ତାଗେ ବାସେ ମାଡ଼ାନଡ଼୍ କେଲଡ଼୍; ଆଗେ ମାନ୍ଦାନ୍ନାରୁଡ଼୍ ଅପରାଦ୍ କ୍ଷମା ମାଡ଼ାନଙ୍କ୍ ଆଦ୍ତେ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.