Koya Bible
ଏବ୍ରୀ 8
କ୍ରିଷ୍ଟ ମାନ୍ ବେଡ଼୍ୟେ ପୁଜାରି
ମାନ୍ ଗଟ୍ତାଦ୍ ମୁକ୍ୟ ବିଷୟ୍ ଇଦ୍, ମାମ୍ ବେନ୍ ବେଡ଼୍ୟେ ପୁଜାରିଙ୍କ୍ ପାଏମ୍ଆତ୍ତମ୍, ଅଣ୍ଡ୍ ସ୍ୱର୍ଗତାଗ୍ ସାରେତିଙ୍କ୍ ବାଡ଼୍ୟଣ୍ଡ୍ ସିଂହାସନତାଗ୍ ତିନ୍ଦେ ପାକେ କୁଦି ମିନ୍ଦେଣ୍ଡ୍ । ଅଣ୍ଡ୍ ବେଦ୍ ବେଡ଼୍ୟେ ପବିତ୍ର ପଡ଼୍ୟେତାଗ୍ ମାଡ଼୍ତେ ନିଜାତାଦ୍ ତମ୍ବୁତ୍ ମଦଲ୍ ବେଡ଼୍ୟେ ପୁଜାରି ଲେକେମ୍ ପାଡ଼୍ୟି ମାଡ଼ିତଣ୍ଡ୍, ଆଦ୍ ନାରୁଡ଼୍ ତିଆର ମାଡ଼୍ତାଦ୍ ଆୟ, ଆଦିଙ୍କ୍ ଇଶ୍ୱର ତିଆର୍ ମାଡ଼୍ତଣ୍ଡ୍ ।
ସାର୍ରେ ବାଡ଼୍ୟେ ପୁଜାରିଡ଼୍ ଇଶ୍ୱର୍ତେ ଲେକାମ୍ ପୁଜ୍ ସାମାନ୍ ନୁ ପଶୁ ପଜ୍ ଇଦାନଙ୍କ୍ ନିଯୁକ୍ତ ଆତ୍ତଡ଼୍ । ଆଦିଙ୍କ୍ ମାନ୍ ବାଡ଼୍ୟେ ପୁଜାରି ଗାଲେୟ୍ ଆଲେକେନ୍ ସୁଡୁଟ୍ ପୁଜା ଜିନିଷ୍ ଇଦାନଙ୍କ୍ ଦର୍କାର୍ । ଅଣ୍ଡ୍ ଯଦି ଇ ବୂମ୍ତାଗ୍ ମାନେଣ୍ଡ୍ ଆଲେକେ, ଅଣ୍ଡ୍ ବେସୁଟ୍ବା ପୁଜାରି ଆୟୱାମାନେଣ୍ଡ୍, ବାତାଙ୍କ୍ଇତକେ ଯିହୁଦିଡ଼୍ ନିୟମ ଇସାବ୍ତେ ପୁଜ୍ ଇଦାନ୍ ମାଇଦିଙ୍କ୍ ପୁଜାରି ଆସ୍ମିନ୍ଦେଣ୍ଡ୍ । ଅଡ଼୍ୱାଦ୍ ପୁଜାରି ପାଡିୟ୍ ବସ୍ତୁତ୍ୱ ସ୍ୱର୍ଗତ୍ ବିଷୟ୍ ଲେକାମ୍ ନୁ ଅଣ୍ଡୟ୍ ନିଡ଼୍କେ । ମଶାନାଗ୍ ଇଲା ଆସ୍ ୱାଦୁତା । ମଶାଲ୍ ବେସୁଙ୍କ୍ ଉପାସନା ମାଇଦିଙ୍କ୍ ଅଣ୍ଡୟ୍ କୁଡ଼ୁମା ମାଡ଼ାଙ୍କ୍ ଆଦାନ୍ୱେଲେ, ଇଶ୍ୱର ଅଙ୍କ୍ କେତ୍ତଣ୍ଡ୍, “ଉଡ଼ା, ମେଟେତ୍ ପର ନିକିଙ୍କ୍ ବେନ୍ ନକ୍ସା ତଅସିତ୍ତାନ୍ ଆଲେନେ ସାର୍ରେ ବିଷୟ୍ ତିଆର୍ ମାଡ଼େ ।” କିନ୍ତୁ ଇଞ୍ଜେ ଜିସୁଙ୍କ୍ ବେନ୍ ପୁଜାରି ପାଡିୟ୍ ଇସ୍ ମିନ୍ଦେଡ଼୍, ଆଦ୍ ୱେରେ ପୁଜାରି ପାଡିୟନୁଞ୍ଚ ବାଡ଼ିୟା । ଆଲେକେନ୍ ଇଶ୍ୱର ନୁ ନାରୁଡ୍ ନାଡ୍ମେ ଅଣ୍ଡ୍ ବେଦ୍ ନିୟମ୍ ଇସ୍ମିନ୍ଦେଣ୍ଡ୍, ଆଦ୍ ବେଡ଼ିୟାଦ୍, ବାତାଙ୍କ୍ଇତ୍କେ ଇଦ୍ ନିୟମତାଗ୍ ବାଡ଼ିୟା ବିଷୟ ଇଦାନ୍ ମାଇଦିଙ୍କ୍ ପ୍ରତିଜ୍ଞା ମାଡ଼୍ତଣ୍ଡ୍ ।
ମୁନେତ୍ ନିୟମତାଗ୍ ଯଦି ବାତେବା ନିର୍ଦୋଷ୍ ମାତ୍କେ, ଆଲେକେ ରେଣ୍ଡ୍ ନିୟମ୍ ଦରକାର ଇଲୱା ମାତ୍ତା । କିନ୍ତୁ ଇଶ୍ୱର ତାନ୍ ନାରୁଡ୍ ଦୋଷତିନ୍ ତହସ୍ କେତ୍ତଣ୍ଡ୍, “ପ୍ରବୁ କେତୁତଣ୍ଡ୍, ସମୟ ୱାଦୁତା, ନାନ୍ ବେସୁଙ୍କ୍ ଇସ୍ରାଏଲ ବା ସାର୍ରେ ଯିହୁଦା ନାରୁଡ୍ ସାଙ୍ଗ୍ ଅରଟ୍ ପୁନାଦ୍ ନିୟମ୍ ତିଆର୍ ମାଡ଼ିତାନ୍ । ନାନ୍ ତାମ୍ ଆନିଦାଦଡ୍କ୍ କାୟ୍ ପଇସ୍ ମିସର୍ ଦେଶନୁଞ୍ଚ ପେସ୍ପି ତାତାନ୍ୱେଲେ ବେନ୍ ନିୟମ୍ ମାଡ଼ିମାତ୍ତାନ୍, ଇଦ୍ ନିୟମ୍ ଆଦ୍ ଲେକାମ୍ ଆୟ । ନାନ୍ ଅଡ଼୍ ସାଙ୍ଗ୍ ବେନ୍ ନିୟମ୍ ମାଡ଼ିମାତ୍ତନ୍, ଆଗେ ଅଡ୍ ବିଶ୍ୱାସ୍ତେ ମାନଡ଼୍; ଆଦିଙ୍କ୍ ନାନ୍ ଅଡ଼୍ ପର ମନ୍ ଇୱନ୍ । ପ୍ରବୁ କେତ୍ତଣ୍ଡ୍, ନାନ୍ ୱାଇନାଦ୍ କାଲାତେ ଇସ୍ରାଏଲ ନାରୁଡ୍ ସାଙ୍ଗ୍ ଇଦ୍ ନିୟମ୍ ମାଡ଼ିତାନ୍ । ନାନ୍ ନାୟାଦ୍ ନିୟମ ଅଡ଼୍ ଏରକେତେ ୱାଟିତାନ୍ ନୁ ତାମ୍ ଜିୱୁନ୍ତାଗ୍ ଲେକିତ୍ତାନ୍, ନାନ୍ ତାମ୍ ଇଶ୍ୱର୍ ଆଦ୍ତାନ୍, ମେଣ୍ଡେ ଅଡ୍ ନା ନାରୁଡ୍ ଆଦ୍ତଡ୍ । ଆସୁଟ୍ ଅଡ଼୍ ଗାରେତଡ଼୍କ୍ ଶିକ୍ଷା ଇଦାନଙ୍କ୍ ଦର୍କାର୍ ଆୟ, ବା ଦେଶ୍ତେ ନାରୁଡ଼୍କ୍ ‘ପ୍ରବୁଙ୍କ୍ ପୁନୁଟ୍,’ ଇଦ୍ ଗଟ୍ କେତାନଙ୍କ୍ ଦର୍କାର୍ ଆୟ, ବାତେଙ୍କ୍ଇତ୍କେ ସୁଦୁଲଡ଼୍ନୁଞ୍ଚ୍ ବେଡ଼ିୟଡ଼୍ ଏୱୁନା ସାର୍ରେତଡ୍ ନାକିଙ୍କ୍ ପୁଞ୍ଜ୍ମାନ୍ତଡ୍ । ନାନ୍ ତାମ୍ ସାର୍ରେ ପାପାମ୍ତିଙ୍କ୍ ୱିଡ଼୍ସି ମାଞ୍ଜ୍ ନୁ ତାମାଦ୍ ବାତେବା ବୁଲ୍ତିଙ୍କ୍ ଏର୍କେ ନେୱନ୍ ।” ଇଦିଙ୍କ୍ ପୁନା ନିୟମ୍ ଇଞ୍ଜ କେତାନ୍ ସାଙ୍ଗ୍ ଇଶ୍ୱର ମୁନେତାଦିଙ୍କ୍ ପାଃନ୍ତାଦ୍ ନିୟମ୍ ଇଞ୍ଜ କେସ୍ମିନ୍ଦେନ୍ ମେଣ୍ଡେ ବାତେ ପାଃନ୍ତାଦ୍ ନୁ ପାଡ଼୍ୟିଦେ ଆଇୱାଦ୍, ଆଦ୍ ଜାପେ ମାୟିଆତ୍ତେ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.