Koya Bible
ଏବ୍ରୀ 6
ଆଦିଙ୍କ୍ ମାନାଡ଼୍ କ୍ରିଷ୍ଟ ଦର୍ମତାଦ୍ ମୁନେନ୍ତାୱୁ ତଥ୍ୟ ୱିଡ଼୍ସି, ନିଗୁଡ଼ ତଥ୍ୟ ଶିକ୍ଷା ମାଡ଼ାନ୍ ଦର୍କାର୍, ଇୱୁ ବଲାନ୍ କାମ୍ନୁଞ୍ଚ୍ ମାଲସ୍ ଇଶ୍ୱର୍ତାଗ୍ ବିଶ୍ୱାସ୍ ମାଡ଼ିତାଡ଼୍, ଏର୍ ଦୀକ୍ଷା ବିସୟତେ ଶିକ୍ଷା, କାୟ୍ ୱାଟି ପ୍ରାର୍ତନା ମାଡ଼ାନାଦ୍, ବାଡ଼ିୟା ବିଚାର୍, ଡଲତେରଡ଼୍ ତେଦାନାଦ୍ ନୁ ସାରେଦିନାତ୍ ଦଣ୍ଡ୍ ଇଦ୍ ବିଷୟ୍କିନାକ୍ ମିକିଂଙ୍କ୍ ମେଣ୍ଡନ୍ଦାମ୍ ଶିକ୍ଷା ଇଦାନ୍ ଦର୍କାର୍ ଇଲ୍ଲେ । ମାନଡ଼୍ ଇଞ୍ଜେ ମୁନେ ଆଦା ୱାୟ୍ତିତ୍, ଇଶ୍ୱରନ୍ ପର୍ର ଆଶେମାଡ଼ି ଇଦେ ମାନାଡ଼୍ ମାଡ଼ିକାଡ଼୍ । ବେନଡ଼୍ ବିଶ୍ୱାସ୍ ୱିଡ଼୍ସ୍ତଡ଼୍ ଅଡ଼୍ ଏର୍କାମାଡ଼ି ମେଣ୍ଡେ ୱାଦା ପାର୍ଦିତଡ଼୍ କି ? ଅଡ଼୍ ଆସୁଙ୍କ୍ ଇଶ୍ୱରନ୍ ୱେସ୍ତେ ବାଦ୍କ ମାତ୍ତଡ଼୍, ସ୍ୱର୍ଗତାଦ୍ ଦାନାମ୍ ନାକି, ପବିତ୍ର ଆତ୍ମା ଦର୍ସ୍କିମାତ୍ତଡ଼୍ । ପରମେଶ୍ୱରତା ଗଟି ମେଲ୍ତାୱ୍ ଇଞ୍ଜ ପୁତ୍ତଡ଼୍, ୱାଇନାଦ୍ ଯୁଗାତେ ପରମେଶ୍ୱର ତଅସିତେ ଶକ୍ତିତିଙ୍କ୍ ନେକା ନେଲା ପୁତ୍ତଡ଼୍ । ଆଗେକ୍ବା ଅଡ଼୍ ବିଶ୍ୱାସ୍ ଆରାମାଡ଼୍ତଡ଼୍, ଆଦିଙ୍କ୍ ଅଡ଼୍ ମେଣ୍ଡନ୍ଦାମ୍ ଅନୁତାପ୍ ମାଡ଼ାନ୍ ସେଙ୍ଗେ ଅଡ଼୍କିଂଙ୍କ୍ କେତେ ପାର୍ନାୟ । ବାତାଙ୍କ୍ଇତ୍କେ ଅଡ଼୍ ମାନ୍ ପରମେଶ୍ୱରନ୍ ମାରିଙ୍କ୍ ମେଣ୍ଡେ କୃଶତାଗ୍ କୁଟି କଟି ଅଂକିଙ୍କ୍ ପରିହାସ୍ ମାଡ଼ୁତଡ଼୍ । ବେନା ବୂମ୍ ମୁସୁର୍ ଏର୍ ଗ୍ରହନ୍ ମାଡ଼ି ଚାଷୀନ୍ ସେଙ୍ଗେ ସାୟେ ପାଣ୍ଡି ଆଦ୍ସ୍ପିତା, ଆ ବୂମ୍ତିଙ୍କ୍ ଇଶ୍ୱର ଆର୍ଶିବାଦ୍ ମାଡ଼ିତଣ୍ଡ୍ । ଇତ୍କେ ଆ ବୁମ୍ ଯଦି କୟେ ପଦ୍ଲା ନୁ ଟଣ୍ଡା ପଦ୍ଲା ପେୟ୍ତିତା ଆଲାଇତ୍କେ ଆଦିନାଦ୍ ବାତେ ମୁଲ୍ୟ ଇଲେ । ଆଦ୍ ଇଶ୍ୱର୍ତେ ଅବିସାପ୍ ପାଏମ୍ଆଦ୍ତେ ନୁ କିସ୍ତାଗ୍ ଦଂସ୍ ପାଏମ୍ଆଦ୍ତେ । ଆ ନା ପ୍ରିୟ ଏଲାଡ଼୍ତାମୁଣ୍ଡ୍, ମାନାଡ଼୍ ଇଦ୍ଲେକାମ୍ ଗଟି କେତକେ ଗାଲେୟ୍ ମି ପର ମାୱାଦ୍ ଆଶେ ମିନ୍ଦେ; ମିଡ଼୍ ପରିତ୍ରାଣ ପାଏମ୍ ଆଦାନ୍ ସେଙ୍ଗେ ଆର୍ଶିବାଦ୍ ପାତ୍ର ଆତ୍ତିଡ଼୍ । ଇଶ୍ୱର କାରାପ୍ ମାଡ଼ଣ୍ଡ୍, ମିୟାଦ୍ ପାଡ଼୍ୟି, ବିଶେଷ୍ ମାଡ଼ି ଆନ୍ୱେ ନାରୁଡ୍କିଙ୍କ୍ ସାହାଯ୍ୟ ମାଡ଼ି ଇଶ୍ୱରନ୍ ପର୍ର ମିଡ଼୍ ବେନ୍ ପ୍ରେମାମ୍ ତଅସ୍ ମିନ୍ଦେଡ଼ି, ଆଦ୍ ଅଣ୍ଡ୍ ମାର୍ଗଣ୍ଡ୍ । କିନ୍ତୁ ମାନ୍ ଅଣ୍ଡୟ୍ ଇଚ୍ଛା ମାଡ଼େଙ୍ଗ୍ ଆୟନା ଆନ୍ୱେ ନାରୁଡ଼୍ ପ୍ରତି ନିୟାଦ୍ ୱେଡ଼୍କା ମାନି, ଆଲେକେ ମିଡ଼୍ ବାତ୍ ଆଶେ ମାଡ଼୍ତିଡ଼୍ ଆଦ୍ ପୁରା ଆଦ୍ତେ । ଆଲାଇତ୍କେ ମିଡ଼୍ ବେସୁଟ୍ବା ରମୱାକଟ୍ ଦୃଡ଼ ବିଶ୍ୱାସୀ ନୁ ଶକ୍ତି ନାରୁଡ୍ ପେର୍କେ ଆନୁଟ୍, ମେଣ୍ଡେ ଇଶ୍ୱର ପ୍ରତିଜ୍ଞା ମାଡ଼ିମାନ୍ଦାନ୍ ସାର୍ରେ ବିଷୟ୍ ପାଏମ୍ ଆୟ୍ମୁଟ୍ ।
ଇଶ୍ୱରନ୍ ପ୍ରତିଜ୍ଞା ନିଜାମ୍
ଅବ୍ରାହାମ୍ତିଙ୍କ୍ ପରମେଶ୍ୱର ବେସୁଟ୍ ପ୍ରତିଶୃତି ଇତ୍ତଣ୍ଡ୍, ଆସୁଟ୍ ଅଣ୍ଡ୍ ପ୍ରତିଶୃତି ରକ୍ଷା ମାଡ଼ିତଣ୍ଡ୍ ଇଞ୍ଜ ଶପତ୍ ମାଡ଼ିମାତ୍ତଣ୍ଡ୍ । ଅନାଗାଙ୍କ୍ ଶ୍ରେଷ୍ଠ ବେନ ଇଲ୍ୱାଙ୍କ୍ ଅଣ୍ଡ୍ ନିଜର୍ ପେଦେର୍ତେ ଶପତ୍ ମାଡ଼ିମାତ୍ତଣ୍ଡ୍ । ଅଣ୍ଡ୍ କେତ୍ତଣ୍ଡ୍, “ନାନ୍ ନିକିନ୍ ନିଜାମ୍ ଆର୍ଶିବାଦ୍ ମାଡ଼ିତାନ୍ ମେଣ୍ଡେ ନି ବଂଶତିଙ୍କ୍ ନାର୍ଗେ ପିଲୁଡ଼୍ ଇଦ୍ତାନ୍ ।” ଅବ୍ରାହାମ୍ ଗାଡ଼୍ସ୍ ଆସ୍ କେପିମାତ୍ତଣ୍ଡ୍ । ନାରୁଡ଼୍ ଶପତ୍ ମାଡ଼୍ତେୱେଲେ ନିଜର୍ତାଗାଙ୍କ୍ ମହାନ୍ ନାରୁଣ୍ଡ୍ତେ ପେଦେର୍ତେ ଶପତ୍ ମାଡ଼ିତଡ଼୍, ଇଦ୍ ରକମ୍ ଶପତ୍ ମାଡ଼ାନ୍ ଦ୍ୱାରା ସାର୍ରେ ତିପାଲ୍ ତେରିଆଦ୍ତେ । ଇଶ୍ୱର୍ ବେନଡ଼୍କିଂଙ୍କ୍ ଆୱୁସାର୍ରେ ବିଷୟ୍ ଦାନ ମାଡ଼ିତଣ୍ଡ୍ ଇଞ୍ଜ ପ୍ରତିଜ୍ଞା ମାଡ଼ିମାତ୍ତଣ୍ଡ୍, ଆଦ୍ ପ୍ରତିଜ୍ଞାତାଗ୍ ଅଣ୍ଡ୍ କଟମାନ୍ତଣ୍ଡ୍ ଇଞ୍ଜ ଅଡ଼୍କିଂଙ୍କ୍ ଲେକେତ୍ ବାବେ କେତାନଙ୍କ୍ ଅଣ୍ଡ୍ ତାନ୍ ପ୍ରତିଜ୍ଞା ତଡ଼୍ ଶପତ୍ କାଲ୍ପିମାତ୍ତଣ୍ଡ୍ । ଅନ୍ ପ୍ରତିଜ୍ଞା ନୁ ଶପତ ବାଦ୍ଲେମ୍ ଆୟ, ଆଦ୍ ଉହୁସ୍ ଇଶ୍ୱର୍ ବୁସାତାଦ୍ ଆୟଣ୍ଡ୍ । ଇତ୍କେ ଅନ୍ ଅଶ୍ରିତ ମାନାଡ଼୍, ମୁନେ ମାନ୍ଦାନ୍ ଆଶେତିଙ୍କ୍ ଡାଟୁମ୍ ପଇସ୍ ମାନ୍ଦାନ୍ ମାଇଦିଙ୍କ୍ ନେକେ ୱେଡ଼୍କେ ଆଦୁତମ୍ । ଇଦ୍ ଆଶେ ମାନ୍ ଜିୱୁଣ୍ଡ୍ତାଗ୍ ଲଙ୍ଗର୍1 ଲେକାମ୍ । ଇଦ୍ ଆଶେ ମାଡ଼ାନାଦ୍ ନୁ ବିପଦ୍ ଇଲ୍ୱାଦ୍ ମେଣ୍ଡେ ସ୍ୱର୍ଗତ୍ ମନ୍ଦିର୍ତେ ପର୍ଦା ତେର୍ସ୍ ମହା ପବିତ୍ର ପଡ଼୍ୟେତାଗ୍ ଏୱୁତେ । ମାନ୍ ପ୍ରତିନିଦି ଲେକାମ୍ ଜିସୁ ମୁନେନ୍ ଆଗେ ଆତ୍ତଣ୍ଡ୍ । ଅଣ୍ଡ୍ ମଲ୍କିସେଦକନ୍ ଉତ୍ତରାଦିକାରୀ ଲେକାମ୍ ସାରେଦିନାତ୍ ସେଙ୍ଗେ ବେଡ଼୍ୟେ ପୁଜାରି ଆତ୍ତଣ୍ଡ୍ ।
Source notes (1)
- Footnote ଓଡେତିଙ୍କ୍ ମାଲ୍ପାନାଦ୍ ଲୋପେତାଦ୍ ଉକୁଡ଼୍
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.