Koya Bible
୧ କରନ୍ତିୟ 2
କ୍ରୁଶବିଦ୍ଦ କ୍ରିଷ୍ଟନ୍ ବିଷୟ୍ତେ କାବୁର୍
ଦାଦାଲରି ନୁ ଏଲାସ୍କ୍, ନାନ୍ ମିୟାଗା ଇଶ୍ୱରନ୍ ସାୟେ କାବୁର୍ କେତାଙ୍କ୍ ମାଇଦିଙ୍କ୍ ଆଞ୍ଜମାନ୍ଦାନ୍ୱେଲେ ବାକ୍ୟନମ୍ବର ବା ପାଣ୍ଡିତ୍ୟ ତୱେ ମାତ୍ତାନ୍ । ମିଇ ସାଙ୍ଗ୍ ମାନ୍ଦାନ୍ୱେଲେ ମାତର୍ ଜିସୁ କ୍ରିଷ୍ଟ ନୁ କ୍ରୁଶତ୍ ପର୍ର ଅନ୍ୱାଦ୍ ଡଲ୍ନାଦ୍ ୱିଡ଼୍ସ୍କେ ମେଣ୍ଡେ ବାତା ବିଷୟ ବା ପୁନ୍ଦାନ୍ ମାଇଦିଙ୍କ୍ ଇଷ୍ଟାମ୍ ଇଲ୍ୱାମାତ୍ତା । 1ଆସୁଟ୍ ନାନ୍ ଲାୱୁ ଇଲ୍ୱା ମାତ୍ତାନ୍, ଆମ୍ତେ ୱେର୍ସ ମାତ୍ତାନ୍ । ନାୟାଦ୍ ଶିକ୍ଷା ନୁ କାବୁର୍, ନାରୁଡ଼୍ ବୁଦ୍ତେ ଗଟିନ୍ ଚାଲାକ୍ତେ ଆୟାୱା ମାତ୍ତା । ଆଦ୍ ଇଶ୍ୱରନ୍ ଆତ୍ମାତ୍ ଶାତ୍ୱାମ୍ତଡ଼୍ ନିଞ୍ଜାମ୍ ପ୍ରମାନ୍ ତଡ଼୍ ପ୍ରଚାର୍ ଆସ୍ମାତ୍ତା । ଆଦିନ୍ ମାଇଦିଙ୍କ୍ ମିୟାଦ୍ ବିଶ୍ୱାସ୍ ନାରୁଡ଼୍ ବୁଦ୍ତେ ପର୍ର ଆଦାରିତ୍ ଆୟ୍ୟ, ଆଦ୍ ଇଶ୍ୱରନ୍ ବପୁତେ ଆସ୍ମାତ୍ତା ।
ଇଶ୍ୱର୍ତେ ବୁଦ୍
ଇତ୍କେ ବାଡ଼େ ମାମ୍ମେ ବେଡ଼ିୟଡ଼୍ ନାରୁଡ଼୍ ନାଡ଼୍ମେ ବୁଦ୍ତାଦ୍ ଗଟ୍ କେତୁତମ୍, ବାତେଙ୍କ୍ ଇତ୍କେ ଆଦ୍ ଇଦ୍ ଜୁଗ୍ତାଦ୍ ବୁଦ୍ ଇଲ୍ଲା ବା ଇଦ୍ ଜୁଗ୍ତାଦ୍ ନଷ୍ଟାମ୍ ଆଦାନ୍ ନେତାନଡ଼ାଦ୍ ବୁଦ୍ ଇଲ୍ଲା, ମାତର୍ ମାମ୍ମେ ବିଶ୍ୱାସ୍ତେ ଲେକାମ୍ ଇଶ୍ୱରତେ ବୁଦ୍ତାଦ୍ ଗଟି କେତୁତମ୍; ଆଦ୍ ବୁଦ୍ ନାରୁଡ଼ାଗାଙ୍କ୍ ମିସି ନେଃଏତଡ଼୍, ଇଶ୍ୱର୍ ମାନାକିନ୍ ଗୌରବ୍ ମାଇଦିଙ୍କ୍ ବୁମ୍ ତିୟାର୍ ଆତ୍ତେ ମୁନେଙ୍କ୍ ଏଞ୍ଚିମାତ୍ତଣ୍ଡ୍ । ଇ ଜୁଗ୍ତଡ଼୍ ନେତା ନାରୁଡ଼୍ ଲୋପେ ବେନ ଆଦ୍ ପୁନଣ୍ଡ୍, ବାତେଙ୍କ୍ଇତ୍କେ ଅଡ଼୍ ଆଦ୍ ପୁଞ୍ଜ୍ ମାତ୍କେ ଗୌରବମୟ ପ୍ରବୁଙ୍କ୍ କ୍ରୁଶତାଗ୍ ରେହ୍ୱେ ମାନେଡ଼୍; ବେଲାକି ବାଇବଲ୍ତାଗ ଲେକ୍ତାଦ୍ ମିନ୍ଦେ, “ବାତା ବେନ ବେସୁଙ୍କ୍ ଉଡ଼୍ଇଲେଣ୍ଡ୍ ବା କେଞ୍ଜ୍ ଇଲେଣ୍ଡ୍, ବାତା ଗଟେମ୍ ଆଦାନାଦ୍ ବେନନ୍ ଆଲ୍ସଣ୍ଡ୍, ଅନ୍ ପ୍ରେମ୍ ମାଡ଼ାନ୍ ନାରୁଡ଼୍କ୍ ମାଇଦିଙ୍କ୍ ଇଶ୍ୱର୍ ଆୱ୍ ସାର୍ରେ ତିଆର୍ କିସ୍ମିନ୍ଦେଣ୍ଡ୍ ।” ବାତେଙ୍କ୍ ଇତ୍କେ ଇଶ୍ୱର୍ ତାନ୍ ଆତ୍ମାତେ ତଡ଼୍ ଆଦ୍ ମିଞ୍ଜ୍ତାୱ୍ ବିଷୟ ମାକିଂଙ୍କ୍ କେସ୍ମିନ୍ଦେଣ୍ଡ୍ । ଆଦ୍ ପରମଆତ୍ମା କେ ଇଶ୍ୱରତାଦ୍ ଲୋପେତ୍ ଏର୍କାତିଙ୍କ୍ ମେଦ୍କି ମିନ୍ଦେଣ୍ଡ୍ । ନାରୁଡ଼୍ତାଦ୍ ସାର୍ରେକିଚି ଅରଟ୍ ତାମାଦ୍ ଲପାତ୍ ଆତ୍ମା ପୁନ୍ତା । ଆଲେନେ ମାତର୍ ଇଶ୍ୱରନ୍ ଆତ୍ମା ଇଶ୍ୱର୍ତେ ବିଷୟ୍ତେ ସାର୍ରେକିଚି ପୁନ୍ତା । ମାମ୍ମେ ବୁଦ୍ତାଦ୍ ଆତ୍ମାତ୍ ଦର୍କାକିୱମ୍ । ବାତେଙ୍କ୍ ଇତ୍କେ ଇଶ୍ୱର୍ ଇତ୍ତାଦ୍ ସାର୍ରେ ବିଷୟ ପୁନ୍ଦାନ୍ ମାଇଦିଙ୍କ୍ ଇଶ୍ୱର୍ ରହ୍ତାଦ୍ ଆତ୍ମା ଆସ୍ମିନ୍ଦେମ୍ ।
ଆଦିଙ୍କ୍ ଦାର୍ମାମ୍ ନାରୁଡ଼୍ ବକେତ୍ ନିଜାତାଦ୍ ଦାର୍ମାମ୍ କେତ୍ତାନ୍ ୱେଲେ ମାମ୍ମେ ବୁମ୍ତାୱୁ ବୁଦ୍ ଗଟି କେଲମ୍; ପବିତ୍ର ଆତ୍ମାତେ ଶିକ୍ଷା ଲେକାମ୍ ଆୱ୍ ସାର୍ରେ ନିଜାତାୱୁ କେତିତମ୍ । ବେନ୍ ନାରୁଡ଼୍ ମେଲ୍ତେ ଇସାପ୍ତେ ଇଲଣ୍ଡ୍, ଅଣ୍ଡ୍ ପରମେଶ୍ୱରତାଦ୍ ଆତ୍ମିକ ସାୟାତାୱ୍ ଆଦା ପାର୍ୱଣ୍ଡ୍ । ଅଣ୍ଡ୍ ଆତ୍ମାତ୍ ସାତ୍ ସାର୍ରେ ବୁଜେମ୍ ଆୟା ପାର୍ୱଣ୍ଡ୍ । ଆୱୁସାର୍ରେ ଅନ୍ ସେଙ୍ଗେ ପୁନ୍ୱାଦ୍; ବାତେଙ୍କ୍ ଇତ୍କେ ଆୱ୍ ସାର୍ରେ ଆଦ୍ୟାତ୍ମିକ ଇସାବ୍ତେ ବିଚାର୍ କିଦାନଙ୍କ୍ ଆତା । ବାତେଙ୍କ୍ ଇତ୍କେ ୱେରଣ୍ଡ୍ ଇଶ୍ୱର୍ ଆତ୍ମାମାନ୍ଦାନ୍ ନାରୁଣ୍ଡ୍ ସାର୍ରେ ବିଷୟ୍ତେ ନେଲ୍ଲା ବୁଜେମ୍ ଆଦ୍ ପାର୍ଦାତଣ୍ଡ୍; ମାତର୍ ଅଣ୍ଡ୍ ନିଜେ ମେଣ୍ଡେଆର୍ତୁନ୍ ତଡ଼୍ ବିଚାର୍ ଆଦ୍ଦା ପାର୍ୱଣ୍ଡ୍ । ଦର୍ମଶାସ୍ତ୍ରତାଗ୍ ଲେକା ମିନ୍ଦେ, “ବେନଣ୍ଡ୍ ଇଶ୍ୱର ଆଲ୍ସାନାଦ୍ ବୁଜେମ୍ ଆଦ୍ଦା ପାର୍ଦାତଣ୍ଡ୍ ? ବେନଣ୍ଡ୍ ଅଂକିଙ୍କ୍ କେତାପାର୍ଦ୍ତଣ୍ଡ୍ ?” ଆଦ୍ ବେଲାଆୟି, ମାମ୍ମେ କ୍ରିଷ୍ଟନ୍ ମାନ୍ଦିଙ୍କ୍ ଦର୍ସିକି ଆତ୍ତମ୍ ।
Source notes (1)
- Cross-reference ପ୍ରେରିତ ୧୮:୯.
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.