ପୁନାଦ୍ ଆର୍ର୍
ପ୍ରକାଶିତ୍ ବାକ୍ୟ 14
ମେଣ୍ଢା ନୁ ଆୱିଙ୍କ୍ ଉଡ଼ାନଣ୍ଡ୍
ତାନ୍ପେର୍କେ ନାନେ ଉଡ଼୍ତାନ୍, ମେଣ୍ଢା ସିୟୋନ୍ ମେଟେତ୍ ପରୁ ନିସ୍ମିନ୍ଦେ । ଆୱିନ୍ତଡ଼୍ ଅଣ୍ଡୟ୍ ଲକ୍ଷ ଚରାଳିଶ୍ ହଜାର୍ ଜାନ୍ ନାରୁଡ଼୍ ମାତ୍ତଡ଼୍ । ଅଡ଼୍ ମୁଞ୍ଜିନାଗ୍ ମେଣ୍ଢା ନୁ ତାମ୍ ବାବାନ୍ ପେଦେର୍ ଲେକିମାତ୍ତଡ଼୍ । ତାନ୍ପେର୍କେ ନାନେ କେଞ୍ଜ୍ତାନ୍, ଏର୍ ପ୍ରପାତ୍ ନୁ ବଜ୍ରନାଦ୍ ଲେକାମ୍ ସ୍ୱର୍ଗତାଗାଙ୍କ୍ ୱେରଡ଼୍ ଲେଙ୍ଗ୍ । ଡ଼ଲା ପେଞ୍ଚ ମାନ୍ଦାନ୍ ବିଣା ଜଙ୍କାର୍ ଲେକାମ୍ ମିକା ଆଗ୍ କେଞ୍ଜାନଙ୍କ୍ ଆୟନୁଡ଼୍ । ପୃତିବିତେ ଆ ଅଣ୍ଡୟ୍ ଲକ୍ଷ ଚରାଳିଶ୍ ହଜାର୍ ଜାନ୍ ସ୍ୱର୍ଗସିଂହାସନ୍, ନାଆଲୁ ପଶୁ ନୁ ମଣ୍ଡଲିତେ ବୟସ୍ତେ ନେତାଲଡ଼୍ ମୁନେ ନିତ୍ତଡ଼୍ । ଅଡ଼୍ ପୁନେ ପାଟେ ପାରାନଙ୍କ୍ ପାର୍ୱେ ମାତ୍ତଡ଼୍ । ସାରେ ମାନବ୍ ଜାତି ନାଗାଙ୍କ୍ ମାତର୍ ଅଡ଼୍କେ ମୁକ୍ତି ପାଏମ୍ ଆତ୍ତଡ଼୍ । ଅଡ଼୍ ମୁତେନ୍ ସଂସର୍ଗ ତଡ଼୍ ନିଜେତିଙ୍ଗ୍ ବେସୁଙ୍କ୍ କଲୁସିତ ମାଡ଼୍ୱେ ମାତ୍ତଡ଼୍ ଅଡ଼୍ ପବିତ୍ର ମାତ୍ତଡ଼୍ । ଅଡ଼୍ ସାରେଦାମ୍ ମେଣ୍ଢାକିନ୍ ପେର୍କେ ଆଞ୍ଜମାତ୍ତଡ଼୍ । ଅଡ଼୍ ନାରୁଡ଼୍ ଆଗାଙ୍କ୍ ମୁନେ ମୁକ୍ତି ସେଙ୍ଗେ ଇଶ୍ୱର୍ ନୁ ମେଣ୍ଢାକିନ୍ ପାକେ ଉତ୍ସର୍ଗିତ ଆସ୍ ମିନ୍ଦେଡ଼୍ । ଅଡ଼୍ ବେସୁଙ୍କ୍ ମିଚ୍ କେତାନାଦ୍ ତନ୍ନ୍ଦ, ଅଡ଼୍ ସମ୍ପର୍ଣ୍ଣତେ ନିର୍ଦୋଷ୍ ।
ମୁଣ୍ଡ୍ ଦୂତ
ତାନ୍ପେର୍କେ ନାନେ ମେଣ୍ଡେ ଉଡ଼୍ତାନ୍, ମେଣ୍ଡେ ୱେରଡ଼୍ ଦୂତ ମାବ୍ତାଗ୍ ଗାଟି ଲେଙ୍ଗ୍ଦେ ପାର୍ସ ପାର୍ସ, ପୃତିବିତେ ସାରେ ଜାତିନାକ୍, ବାଷାବାସି ନୁ ରାଷ୍ଟତେ ନାରୁଡ଼୍ତେ ପାକେ ଇଶ୍ୱର୍ତେ ଆଦ୍ ସାରେଦିନାତ୍ ସୁସମାଚାର୍ ଗଟ୍ କେସମିନ୍ଦେ । ଆଦ୍ ଗାଟି ଲେଙ୍ଗ୍ଦେ କେସମାନ୍ନୁଡ଼୍, “ଇଶ୍ୱର୍ତିଙ୍କ୍ ୱେର୍ମୁଟ୍, ତାନ୍ ଆତ୍ମାତେ ପ୍ରସଂଶା ମାଡ଼ାଟ୍, ବାତିଙ୍କ୍ ଇତ୍କେ ନାରୁଡ଼୍ତେ ବିଚାର୍ ୱାସ୍ ଏୱୁତେ । ସ୍ୱର୍ଗ, ପୃତିବି, ସମୁଦ୍ର ନୁ ସାରେ ଏର୍ଦିଙ୍କ୍ ତିଆର୍ ମାଡ଼୍ତେ ସୃଷ୍ଟି କର୍ତାଙ୍କ୍ ପୁଜା ମାଡ଼ାଟ୍ ।” 2
ଆଦ୍ ମୁନେତ୍ ଦୂତତେ ପେର୍କେ ମେଣ୍ଡନ୍ ଦୂତ ୱାସ୍ କେତ୍ତେ, “ତାନାଦ୍ ପତନ୍ ଗଟେମ୍ଆତ୍ତେ । ମହାନ୍ ବାବିଲନ୍ ଦଂସ ଆତ୍ତେ । ଅଣ୍ଡ୍ ତାନ୍ ମାଡ଼ମାନ୍ଦାନ୍ କାମ୍ ଲେକାମ୍ କାଲ୍ ଉସ୍ପିମିକା ସାରେତଡ଼୍କ୍ ମାତ୍ୱାର୍ ମାଡ଼ିମାତ୍ତେ ।”
ଆୱୁ ରେଣ୍ଡ୍ ଦୂତନ୍ ପେର୍କେ ମେଣ୍ଡେ ୱେରଡ଼୍ ଦୂତ ୱାସ୍ ଗାଟିଲେଙ୍ଗ୍ଦେ କେତାନଙ୍କ ପସ୍ପ୍ତେ, “ବେନବା ପଶୁ ନୁ ତାନ୍ ସାରେମୁର୍ତ୍ତିଙ୍କ୍ ପୁଜାମାଡ଼ିତନ୍ ନୁ ନିଜେତ୍ ମୁଞ୍ଜ୍ ବା କାଇଦାଗ୍ ଅନ୍ ତଡ଼୍ ଦାରଣା ମାଡ଼ିତନ୍, ଅଣ୍ଡ୍ ଇଶ୍ୱର୍ତେ କପାମ୍ ଲେକା କୁଣ୍ଡେତାଗ୍ ତସିମାନ୍ଦାନ୍ ତାନ୍ ଗାଟି କପାମ୍ତେ ସୁରାମ୍ ଉନ୍ନ୍ତନ୍ । ବେନଡ଼୍ ଇଦ୍କାମ୍ ମାଡ଼ିତଡ଼୍, ଅଡ଼୍ସାରେତଡ଼୍, ମେଣ୍ଢାଗଲାଲ୍ ନୁ ପବିତ୍ର ଦୂତକିନ୍ ମୁନେ କିସ୍ ନୁ ତାଡ଼୍ମିନାଗ୍ କାର୍ୱିତଡ଼୍ । ନିଡ଼୍ତାନ୍ କିସ୍ ଉମେ ଯୁଗ୍ଯୁଗ୍ ନିଡ଼୍ସ ମାନ୍ନ୍ତେ । ବେନଡ଼୍ ପଶୁ ନୁ ଆୱିନ୍ ସାରେ ମୁର୍ତ୍ତିକିଙ୍କ୍ ପୁଜା ମାଡ଼ିତଣ୍ଡ୍, ବା ଆୱିନ୍ ତଡ଼୍ ଆଦ୍ତନ୍, ଅଡ଼୍ ନାର୍କା ପାୟାଲ୍ ସାରେଦାମ୍ ଅଶାନ୍ତି କଷ୍ଟ ଆସମାନ୍ନ୍ତଡ଼୍ ।”
ବେନଡ଼୍ ଇଶ୍ୱର୍ତେ ଆଦେଶ୍ ପାଲନ୍ ମାଡ଼ୁତନ୍ ନୁ ଜିସୁନ୍ ପରୁ ବିଶ୍ୱାସ୍ତଣ୍ଡ୍, ଇଶ୍ୱର୍ତେ ଆ ନାରିଡ଼୍ ପାକେ ସହିଷ୍ଣତା ନିଜାମ୍ ଦର୍କାର୍ ।
ତାନ୍ ପେର୍କେ ନାନେ କେଞ୍ଜ୍ତାନ୍, ସ୍ୱର୍ଗତାଗାଙ୍କ୍ ୱେରଡ଼୍ ଗଟ୍ କେସମିନ୍ଦେଡ଼୍; “ଇଦ୍ଗଟ୍ ଲେକାଟ୍, ବେନଡ଼୍ ଇଗେ ପ୍ରବୁନ୍ ସେବା ମାଡ଼ି ଡଲିତଡ଼୍, ଅଡ଼୍ ଦନ୍ୟ ।” ମେଣ୍ଡେ ନାନେ କେଞ୍ଜ୍ତାନ୍, ପରଆତ୍ମାକେତୁତେ, “ଇଦ୍ ନିଜାମ୍ ଗଟେମ୍ ଆଦ୍ତେ । ଗାଟି କଷ୍ଟ ତଡ଼୍ ସେବାତେ କାୟେ ଲେକାମ୍, ଅଡ଼୍ ବିଶ୍ରାମ ଆଦ୍ତଡ଼୍ ।”
ପସଲ୍ ପାଣ୍ଡ୍ତେ
ତାନ୍ପେର୍କେ ନାନେ ଉଡ଼୍ତାନ୍, ସୁଦୁଟ୍ ପାଣ୍ଡେ ମାବ୍ ନୁ ତାନ୍ପରୁ କୁଦ୍ତଡ଼୍ ନାରୁନ୍ ପିଲେ ଲେକାମ୍ ୱେରଣ୍ଡ୍; ତାନ୍ ତାଲେତାଗ୍ ଲେକେତାଦ୍ ମୁକୁଟ୍ ନୁ କାଇଦାଗ୍ ସୁଦୁଟ୍ ସୂଜେଲାଦ୍ ଏଟାକେସେର୍ । ୱେରଣ୍ଡ୍ ଦୂତ ମନ୍ଦିର୍ତାଗାଙ୍କ୍ ପେଇସ୍ ମାବ୍ତେ ପରୁ କୁଦ୍ତେ ନାରୁଙ୍କ୍ ଗାଟି ଲେଙ୍ଗ୍ଦେ କେତ୍ତନ୍, “ନିୟାଦ୍ ଏଟାକେସେର୍ ୱାୟେ ମାଡ଼ି ପସଲ୍ କଇମ୍ । ପୃତିବିତେ ପସଲ୍ ପାଣ୍ଡାନ୍ ସେଙ୍ଗେ ଲେକେତ୍ ସମୟ ୱାସ୍ ଏୱୁତେ ।” ଆଦ୍ କେଞ୍ଜି ମାବ୍ତାଗ୍ କୁଦିମାନ୍ଦାନ୍ ନାରୁଣ୍ଡ୍ ଅନାଦ୍ ଏଟାକେସେର୍ ଚାଲାମାଡ଼୍ତନ୍ ନୁ ପୃତିବିତେ ପସଲ୍ ସାରେ ଅଣ୍ଡୟ୍ତାଗ୍ ଦିବେ ଆତ୍ତେ ।
ତାନ୍ପେର୍କେ ନାନେ ଉଡ଼୍ତାନ୍, ମେଣ୍ଡେ ୱେରର୍ଡ଼୍ ଦୂତ ସ୍ୱର୍ଗତେ ମନ୍ଦିର୍ତାଗାଙ୍କ୍ ୱାସମିନ୍ଦେ; ତାନ୍ କାଇଦାଗ୍ ମିକା ୱେରଡ଼୍ ଲାଟିଲାଦ୍ ଏଟାକେସେର୍ ।
ତାନ୍ପେର୍କେ ବେଦୀତେ କିସ୍ତେ ମାନ୍ଦାନ୍ ୱେରଡ଼୍ ଦୂତ କେସେର୍ ପଇସ୍ ମାନ୍ଦାନ୍ ଦ୍ୱିତିୟ ଦୂତତିଙ୍କ୍ ମର୍ତେ କେତ୍ତେ, “ଏଟାକେସେର୍ ତଡ଼୍ ପୃତିବିତେ ଅଙ୍ଗୁର୍ ୱାୟେତାଗାଙ୍କ୍ ପସଲ୍ ସାରେ କୟ୍ମ୍; ଆୱୁସାରେ ପାଣ୍ଡ୍ତା ।” ଆଦିଙ୍କ୍ ଦୂତ ପୃତିବିତାଗ୍ ତାନ୍ ଏଟାକେସେର୍ ଚାଲାମାଡ଼ି ପସଲ୍ତାଗାଙ୍କ୍ କଇତ୍ତନ୍ ନୁ ଆୱିଙ୍କ୍ ଇଶ୍ୱର୍ତେ ଗାଟିକପାମ୍ତେ ଅଙ୍ଗୁର୍ ପସଲ୍ ୱାଟାନ୍ କୁଣ୍ଡତାଗ୍ ୱାଟିତ୍ତେ । 3ନାର୍ଦେ ବାଇଦେ ମାନ୍ଦାନ୍ ଆଦ୍ କୁଣ୍ଡତାଗ୍ ଦ୍ରାକ୍ଷାକିଙ୍କ୍ ଆଦ୍ମିତ୍ତଡ଼୍ ନୁ ଆଗାଙ୍କ୍ ୩୦୦ କିଲମିଟର୍ ଯେକା ନୁ ରେଣ୍ଡ୍ ମିଟର୍ ପର୍ରକଞ୍ଜ ନେତୁର୍ ୱାତ୍ତେ ।
Source notes (3)
- Cross-reference ପ୍ରକାଶିତ୍ ବାକ୍ୟ ୭:3.
- Cross-reference ପ୍ରକାଶିତ୍ ବାକ୍ୟ ୧୮:୨.
- Cross-reference ପ୍ରକାଶିତ୍ ବାକ୍ୟ ୧୯:୧୫.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.