ପୁନାଦ୍ ଆର୍ର୍
ପ୍ରକାଶିତ୍ ବାକ୍ୟ 10
ସ୍ୱର୍ଗଦୂତ ନୁ ସୁଦୁରାଦ୍ ବଇ
ତାନ୍ପେର୍କ ନାନେ ଉଡ଼୍ତାନ୍, ମେଣ୍ଡ୍ ଅର୍ତୁନ୍ ପରାକ୍ରାନ୍ତ ଦୂତ ସ୍ୱର୍ଗତାଗାଙ୍କ୍ ଡ଼ିଗ୍ଗି ୱାଦୁତନ୍ । ଅଣ୍ଡ୍ ମାବ୍ତାଗ୍ ଲେକେତ୍ ଆସ୍ମାନ୍ନୁନ୍ ନୁ ମାବ୍ତେ ବିମିନ୍ ୱିଲ୍ ତାନ୍ ତାଲେତିଙ୍ଗ୍ ତିଡ଼ିଇ ମାନ୍ନୁଡ଼୍ । ଅନ୍ ମକମ୍ ପଡ଼ଦ୍ ଲେକାମ୍ ନୁ ଡ଼େକା କିସ୍ ଗୁଞ୍ଜେ ଇନା ତନ୍ଦମାନ୍ନୁ । ତାନ୍ କାଇତାଗ୍ ୱେରଡ଼୍ ସୁଦୁରାଦ୍ କୁଲେମ୍ ଆସ୍ମାନ୍ଦାନ୍ ବଇ ମାତ୍ତେ । ଅଣ୍ଡ୍ ତାନ୍ ତିନ୍ଦେ ଡ଼େକେ ସମୁଦ୍ର ପରୁ ନୁ ତିନ୍ଦେ ଡ଼େକେ ବୁମ୍ଦେ ପରୁ ୱାଟିମାତ୍ତନ୍ । ଗଣ୍ଡ୍ରାସ୍ କିଡ଼୍କ୍ତେ ଲେକମ୍ ଉଙ୍କାର୍ ମାଡ଼ି ଅଡ଼୍ କେତ୍ତନ୍, ଟିକ୍ ଆଦେଲେକାମ୍ ଉଙ୍କାର୍ ମାଡ଼ି ସାତ୍ଟାନ୍ ମାବ୍ ଇଦ୍ କାର୍ଙ୍କତେ ଉତ୍ତର୍ ଇତ୍ତା । ଅଡ଼୍ ବାତେ କେତା କେତି ଆତ୍ତଡ଼୍, ଆଦ୍ ନାନେ ଲେକାନଙ୍କ୍ ଆଞ୍ଜମାତ୍ତାନ୍, କିନ୍ତୁ ସ୍ୱର୍ଗତାଗାଙ୍କ୍ ୱେରଡ଼୍ ଲେଙ୍ଗ୍ କେଞ୍ଜ୍ତାନ୍ । ଆଦ୍ ଲେଙ୍ଗ୍ ନ୍ନାକିଙ୍କ୍ କେତ୍ତେ, “ମାବ୍ ନେକ୍ତେ ୱେଲେ ବାତ୍କେଞ୍ଜୁତିନ୍, ଆଦ୍ ମାନ୍ଦାଗ୍ ନେଏମୁଟ୍; ଲେକ୍ମାଟ୍ ।”
ତାନ୍ପେର୍କେ ବେନ୍ ଦୂତଙ୍କ୍ ସମୁଦ୍ର ନୁ ବୁମ୍ଦେ ପରୁ ନିସ୍ମାନ୍ଦାନାଦ୍ ନାନେ ଉଡ଼୍ତାନ୍, ଅଣ୍ଡ୍ ତାନ୍ ତିନ୍ଦେକାଇ ସ୍ୱର୍ଗତାକେ ତେତ୍ତନ୍, ସସାଗରା, ବୂମ୍, ସ୍ୱର୍ଗ ନୁ ଇଡ଼୍ ସାରେତଡ଼୍ ବିଷୟତେ ସୃଷ୍ଟିକର୍ତାଲ୍ ଚିରଜିବି ଇଶ୍ୱର୍ତେ ପେର୍ଦେତେ ଶପତ୍ ମାଡ଼ି କେତ୍ତଡ଼୍, “ମେଣ୍ଡେ ୱାଡ଼୍ଷା ଲେଟ୍ ଆୟ । ବେସୁଙ୍କ୍ ସପ୍ତମ୍ ଦୂତ ତୁରି ଉଦିତା, ଇଶ୍ୱର୍ ତାନ୍ ସେବକ୍ ବାବବାଦିନ୍ ପାକେ ବେନ୍ ମିଞ୍ଜ୍ପି ସଂକଲ୍ପ ତିଆର୍ ମାଡ଼ିମାତ୍ତନ୍, ଆଦ୍ ସମ୍ପାଦନା ମାଡ଼ିତଡ଼୍ ।”
ତାନ୍ପେର୍କେ ସ୍ୱର୍ଗତେ ଆଦ୍ ଲେଙ୍ଗ୍ ନାକିଙ୍କ୍ ମେଣ୍ଡେ କେତ୍ତେ, “ଅନ୍, ସମୁଦ୍ର ନୁ ବୁମ୍ଦେ ପରୁ ନିସ୍ମାନ୍ଦାନ୍ ଦୂତନ୍ କାଇଦାଗାଙ୍କ୍ କୁଲେମ୍ ଆସ୍ମାନ୍ଦାନ୍ ବଇ ଆୟମ୍ ।”
ନାନେ ଦୂତନ୍ ପାକେ ଆଞ୍ଜ୍ ଆଦ୍ ବଇତିଙ୍କ୍ ତାଲ୍କ୍ତାନ୍ । ଅଣ୍ଡ୍ ନାକିଙ୍କ୍ କେତ୍ତନ୍, “ଆସ୍ ତିନ୍ । ନି ଉଦର୍ ସେଙ୍ଗେ ଇଦ୍ ତିକ୍ତ, ଇତ୍କେ ନି ମକତାଗ୍ ଇଦ୍ ଉର୍ୱେ ଲେକାମ୍ ମିଙ୍ଗିତେ ।”
ନାନେ ଆଦ୍ ସୁଦୁରାଦ୍ ବଇତିଙ୍କ୍ ଦୂତନ୍ କାଇଦାଗାଙ୍କ୍ ଆସ୍ ତିତ୍ତାନ୍ । ଆଦ୍ ନା ପାୟୁତାଗ୍ ତେନା ଲେକାମ୍ ମିଙ୍ଗିମାତ୍ତେ, ମାତର୍ ଲୋପ୍ତେ ପେର୍କେ ଡଙ୍କକେତ୍ ଲୋପେ କାଇସ୍ ଆତ୍ତେ । ତାନ୍ପେର୍କେ ବେନ ନାକ୍ କେତ୍ତନ୍, “ନାର୍ଗେ ଦେଶ୍କ୍, ଜାତି, ବାଷାବାଦି ନୁ ରାଜାନଡ଼୍ ସମ୍ପର୍କତେ ଇଶ୍ୱର୍ତେ ଗଟି ମିଡ଼୍ ଆଞ୍ଜ୍ ମେଣ୍ଡନ୍ଦାମ୍ କେଲ୍ମୁଟ୍ ।”
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.