ପୁନାଦ୍ ଆର୍ର୍
ଫିଲିପିୟ 2:3
Verse 3 is marked below, with the whole chapter around it. Read from the start
କ୍ରିଷ୍ଟନାଦ୍ ନମ୍ରତା ନୁ ଆଦର୍ଶ
କ୍ରିଷ୍ଟନ୍ତଡ଼୍ କାଇଲି ମାନ୍ଦାନ୍ ନଡ଼୍ ମିଇ ଜିୱେତାଗ୍ ଡାଟାମ୍ ଆଦ୍ତିଡ଼୍, ମେଣ୍ଡେ ଅନାଦ୍ ପ୍ରେମ ମିକିଂଙ୍କ୍ ସାନ୍ତନା ଇଦୁତ୍ । ମିଡ଼୍ ପବିତ୍ର ଆତ୍ମାତଡ଼୍ ସାହାସ୍ତେ କଷ୍ଟ ମାଡ଼ୁତିଡ଼୍ ନୁ ନିଜେ ନିଜେ ଲୋପେ ମିୟାଦ୍ ପ୍ରେମ ନୁ ଦୟା ମିନ୍ଦେ । ଆଦିଙ୍କ୍ ନାନ୍ ମିକିଂଙ୍କ୍ ଅନୁରଦ୍ ମାଡ଼ୁତାନ୍, ୱେରଡ଼୍ ଚିନ୍ତାତଡ଼୍ ଆଲ୍ସି ମିକା, ୱେରଡ଼୍ ପ୍ରେମତେ କାଇଲି ମିକା ମନ୍ ନୁ ଆତ୍ମାତେ ଅଣ୍ଡୟ୍ ଆସ୍ ମିଡ଼୍ ନାକିଂଙ୍କ୍ ଆଦ୍ଲେକାମ୍ ସୁକାମ୍ତେ କାଟେମ୍ ଆୟ୍ମୁଟ୍ । ନିଜେତ୍ ଉର୍ଗାଡ଼୍ ସେଙ୍ଗେ ବା ଶକ୍ତି ତଅତାନ୍ ସେଙ୍ଗେ ବେନେମିକା ପାଡ଼୍ୟି ମାଡ଼୍ମାଟ୍ । ବାତ୍ଇତ୍କେ ବାଗାତଡ଼୍କ୍ ନିଜେତଣ୍ଡ୍ ଲେକାମ୍ ଆଲ୍ସି ନିଜେ ନିଜେ ସେଙ୍ଗେ ନମ୍ର ବ୍ୟବହାର୍ ମାଡ଼ାଟ୍ । ମାତର୍ ନିଜେତ୍ ଉର୍ଗାଡ଼୍ ସେଙ୍ଗେ ମାନେମ୍ ଆୟ୍ୟକଟ ବାଗାତଡ଼୍ ସେଙ୍ଗେ ମନ୍ ଆୟ୍ମୁଟ୍ । କ୍ରିଷ୍ଟ ଜିସୁନାଦ୍ ମାନ୍ହେର୍କା ବେଦ୍ଲେକାମ୍ ମାତ୍ତେ, ମିୟାଦ୍ ଆଦ୍ଲେକାମ୍ ଆୟି । ଅନାଗେ ସାରେଏକାମ୍ ଐଶର୍ଯ୍ୟ ଲେକାମ୍ ମାଇମାତ୍କେ ମିକା, ଅଣ୍ଡ୍ ଆଦ୍ ଅଦିକାର୍ତେ ଇଶ୍ୱର୍ତଡ଼୍ ସାମାନ୍ ଆସ୍ ମାନ୍ଦାନଙ୍କ୍ ଆଲ୍ସି ମାଡ଼୍ୱେ ମାତ୍ତଡ଼୍ । ଆଲେକେ ନିଜେତ୍ ଇଚ୍ଛାତେ ଅନାଦ୍ ସାରେ ୱିଡ଼୍ସି ମିକା ଦାସଲେକାମ୍ ଆତ୍କେ । ନାରୁନ୍ ଲେକାମ୍ ଆସ୍ ନାରୁନ୍ ଲେକାମ୍ ତିଆର୍ ଆତ୍ତେ । ଅଣ୍ଡ୍ ବିନୟ ନୁ ନମ୍ର ଆସ୍ ଡଲାନ୍ ଯାକ, କ୍ରୁଶତାଗ୍ ଡଲାନ୍ ଯାକ ଗଟ୍ ପାଲନ୍ ମାଡ଼୍ତଣ୍ଡ୍ । ଆଦିନ୍ ସେଙ୍ଗେ ଇଶ୍ୱର୍ ଅଂକିଙ୍କ୍ ସାରେତିଙ୍ଗ୍ ଡେଙ୍ଗ୍ ପଡ଼ିୟେତାଗ୍ ପରୁ ତେତ୍ତଣ୍ଡ୍ ନୁ ବାଗାତ୍ ସାରେତଡ଼ାଦ୍ ପେଦେର୍କିନାଗାଙ୍କ୍ ଲେକେତ୍ ପେଦେର୍ ଅଂକିଙ୍କ୍ ଇତ୍ତନ୍ । ଆଦିଙ୍କ୍ ସ୍ୱର୍ଗ, ମର୍ତ୍ତ୍ୟ ନୁ ପାତାଲ୍ତେ ସାରେ ନାରୁଡ଼୍ ଅନ୍ ମୁନେ ଜିସୁନାଦ୍ ପେଦେର୍ତେ ମର୍ମିଣ୍ଡା ଉୱୁସିତା । ମେଣ୍ଡେ ସାରେ ଜିୱାକ୍ ଜିସୁ କ୍ରିଷ୍ଟକେ ପ୍ରବୁ ଇଞ୍ଜ କେସ୍ ମିକା ବାବାଲ୍ ଇଶ୍ୱର୍ତିଙ୍ଗ୍ ଗୌରବ୍ ମାଡ଼ିତିଡ଼୍ ।
ପୃତିବିତାଗ୍ ୱେସ୍ ଲେକାମ୍ ତନ୍ଦାଟ୍
ଆଦିଙ୍କ୍ ପ୍ରିୟ ସାଙ୍ଗନଡ଼ି, ନାନ୍ ମିଇତଡ଼୍ ମାନ୍ଦାନ୍ ୱେଲେ ମିଇଡ଼୍ ବେଲାନ୍ ସାରେଦାମ୍ ନାୟାଦ୍ ଆଜ୍ଞାଦିନାମ୍ ମାଡ଼ିତିଡ଼୍, ଇଞ୍ଜେ ନାନ୍ ମିୟାଗାଙ୍କ୍ ଯେକା ମାନ୍ଦାନ୍ ୱେଲେ ଅଦିକ୍ ବିଶ୍ୱାସ୍ତେ ନାୟାଦ୍ ବାଦ୍ୟ ଆଦାନାଦ୍ ମିୟାଦ୍ ପାଡ଼୍ୟି । ମିୟାଦ୍ ମୁକ୍ତି ବେଲା ସାରେ ଆଦ୍ତେ, ଆଦିନ୍ ସେଙ୍ଗେ ୱେର୍ସ୍ ନୁ ୱାଡ଼୍କାନ୍ ପାଡ଼୍ୟି ମାଡ଼ଡ଼୍ ଆନୁଟ୍ । ବାତେଙ୍କ୍ ମିୟାଦ୍ ନୁ ଅନ୍ଲେକାମ୍ ପାଲନ୍ ମାଡ଼ାନ୍ ସେଙ୍ଗେ ତିଆର୍ ନୁ ସମର୍ତନ୍ ମାଡ଼ାନଙ୍କ୍ ସ୍ୱୟଂ ଇଶ୍ୱର୍ ମିୟାଗେ ସାରେଦାମ୍ ପାଡ଼୍ୟି ମାଡ଼ୁତଣ୍ଡ୍ । ଆପତ୍ତି ବା ଗଲକ୍ ମାଡ଼କଟ୍ ସାରେ କାମ୍ ମାଡ଼ାଟ୍ । ଆଲେକେ, ଇଦ୍ ଦୁର୍ନିତି ପେଇତାନାଦ୍ ନୁ ପାପ୍ ସାରେ ଜଗତ୍ତାଗ୍ ମିଡ଼୍ ଇଶ୍ୱର୍ତେ ପବିତ୍ର ମାର୍ ମାୟାକ୍ସ୍ ଲେକାମ୍ ନିର୍ଦୋଷ୍ ନୁ ପବିତ୍ର ଲେକାମ୍ ବାଦ୍କେ ପାର୍ତିଡ଼୍ । ବାଗାତଡ଼୍ ପାକେ ଜିୱେଇଦାନ୍ ଗଟି ପ୍ରଚାର୍ ମାଡ଼ାନ୍ୱେଲେ ମିଇ ବାଗାତାଗ୍ ୱେସ୍ଇଦାନ୍ ଉକାକିନ୍ ଲେକାମ୍ ୱେସ୍ ଆଦାନାଦ୍ ସାୟେ । ମିଡ଼୍ ଯଦି ଇଦ୍ଲେକାମ୍ ଆଦ୍ତିଡ଼୍, “କ୍ରିଷ୍ଟନ୍ ଦିନାତେ,” ମିଇ ବିଷୟ୍ତେ ନାନ୍ ଗର୍ବ ମାଡ଼ିତାନ୍, ବାତେଙ୍କ୍ ଇତ୍କେ ଇଗାଙ୍କ୍ ପ୍ରମାଣ୍ ଆଦିକାଡ଼୍ ଯେ, ନାୟାଦ୍ ତାଲେ ଉଦ୍ୟାମ ନୁ ପାଡ଼୍ୟି ଆଙ୍ଗ୍ଡ଼ାମ୍ ଆୟ୍ୟ । ଇଶ୍ୱର୍ତେ ଗଟ୍ତେ ମିୟାଦ୍ ବିଶ୍ୱାସ୍ ଲେକାମ୍ ବଲିଦାନତାଗ୍ ଆଲେକେ ବା ନାୟାଦ୍ ଜିୱୁନ୍ ନେତୁର୍ଇସ୍ ତସିଦାଙ୍କ୍ ଆଦ୍ତେ । ଆଦିନ୍ ସେଙ୍ଗେ ନାନ୍ ୱେଡ଼େକେ ନୁ ନାୟାଦ୍ ଇଦ୍ ୱେଡ଼୍କେତେ ମିଇ ତଡ଼୍ ମାଡ଼ାନଙ୍କ୍ ନାନ୍ ଇଚ୍ଛାମାଡ଼ୁତାନ୍ । ମିଇଡ଼୍ ମିକା ଆଦ୍ଲେକାମ୍ ୱେଡ଼୍କ୍ ମାଡ଼ାନାଦ୍ ସାରେ ନୁ ଆଦ୍ ୱେଡ଼୍କେତେ ନାକିଂଙ୍କ୍ ମିକା ତଡ଼୍ ମାଡ଼ାଟ୍ ।
ତିମତି ନୁ ଏପାପ୍ରଦିତ୍
ପ୍ରବୁନାଦ୍ ଇଚ୍ଛା ମାଡ଼୍ତେ, ମିଇପାକେ ତିମତିଙ୍କ୍ ଯାପେ ରହତେ ପାର୍ତାନ୍ ଇଞ୍ଜ ନାନ୍ ଆଶେ ମାଡ଼୍ତାନ୍ । ଆଲେକେ, ମିୟାଦ୍ କବର୍ ସେଙ୍ଗେ ନାନ୍ ଉତ୍ସାହିତ ଆଦ୍ତନ୍ । ମାତର୍ ଅନାଦ୍ ନା ଲେକାମ୍ ମାନ୍ ଏର୍କା ନୁ ଅଣ୍ଡ୍ ନିଜାମ୍ ମିଇ ସେଙ୍ଗେ ମାନ୍ଦେ ମିନ୍ଦେନ୍ । ବାଗାତ୍ ସାରେତଡ଼୍ ଜିସୁ କ୍ରିଷ୍ଟନ୍ ସେଙ୍ଗେ ମନ୍ଇୱକଟ ମାତର୍ ନିଜେତ୍ ଉର୍ଗାଡ଼୍ ସେଙ୍ଗେ ଦାନ୍ଦେ । ମିଡ଼୍ ପୁତ୍ତିଡ଼୍, ତିମତି ବେଲାନ୍ ଅନାଦ୍ ଯୋଗ୍ୟତା ପ୍ରମାଣ ମାଡ଼୍ତଣ୍ଡ୍, ବେଲାନ୍ ଅଣ୍ଡ୍ ମେଣ୍ଡେ ନାନ୍ ମାର୍ ନୁ ବାବାନ୍ ଲେକାମ୍ ସୁସମାଚାର୍ ପ୍ରଚାର୍ ପାଡ଼ିୟିଦାଗ୍ କାଇଲିମିକା ସେବା କାମ୍ ମାଡ଼ୁତମ୍ । ନା ସେଙ୍ଗେ ବାତ୍ ଗଟେମ୍ ଆଦାଙ୍କ୍ ଆଦୁତ୍, ପୁନ୍ଦାନ୍ ୱେଲେ ନାନ୍ ଅଂକିଙ୍କ୍ ମିଇ ପାକେ ରତିତାନ୍ ଇଞ୍ଜ ଆଶେ ମାଡ଼ୁତାନ୍ । ଆଦେଲେକାମ୍ ପ୍ରବୁନାଗେ ନାନ୍ ବିଶ୍ୱାସ୍ ମାଡ଼ୁତାନ୍ ଯେ, ନାନ୍ ନିଜେ ଯାପେ ମୀଇପାକେ ୱାଦେ ପାର୍ତାନ୍ ।
ନାୟାଦ୍ ପ୍ରେରିତ ପାଡ଼୍ୟି ନୁ ଯୁଦ୍ତାଗେ ଜିଡ଼ାନାଦ୍ ନୁ ମିୟାଦ୍ କେତ୍ତାନ୍ ଲେକାମ୍ ନାକିଂଙ୍କ୍ ତଡ଼୍ ଆସ ୱାସମାନ୍ଦାନ୍ ଏପାପ୍ରଦିତଙ୍କ୍ ମିକା ମିଇ ପାକେ ରଅତାନଙ୍କ୍ ମାନ୍ ମାଡ଼ୁତାନ୍ । ଅଣ୍ଡ୍ ମିକ୍ ସାରେତଡ଼୍କ୍ ଉଡ଼ାନ୍ ସେଙ୍ଗେ ସୁକାମ୍ତେ ନୁ ମିଡ଼୍ ଅନାଦ୍ ରଗାମ୍ ଗଟ୍ କେଞ୍ଜି ମାନ୍ନାଙ୍କ୍ ଅଣ୍ଡ୍ ଦୁଃକାମ୍ । ମୁନେଙ୍କ୍ କଞ୍ଜ୍ ଅଣ୍ଡ୍ ରଗାମ୍ ଆସ୍ ଡଲାନ୍ ଲେକାମ୍ ଆସ୍ ମାତ୍ତଣ୍ଡ୍ । ବାତେଙ୍କ୍ଇତ୍କେ ଅଂକିଙ୍କ୍ ଇଶ୍ୱର୍ ଆର୍ଶିବାଦ୍ ମାଡ଼୍ତଣ୍ଡ୍ । ମାତର୍ ଅନ୍ ସେଙ୍ଗେ ଆୟ୍ୟ, ନା ସେଙ୍ଗେ ମିକା ଅନାଦ୍ ଆର୍ଶିବାଦ୍ ମାଡ଼ାନଙ୍କ୍ ନାକିଂଙ୍କ୍ ଦୁଃକାମ୍ ତିପାଲ୍ ଆତ୍ତାଙ୍କ୍ ଇୱଣ୍ଡ୍ । ନାନ୍ ଅଂକିଙ୍କ୍ ମୀଇପାକେ ରତ୍ତାନ୍ ସେଙ୍ଗେ ତିଆର୍, ବାତେଙ୍କ୍ଇତ୍କେ ଅଂକିଙ୍କ୍ ଉଡ଼୍କେ, ମିଡ଼୍ ମେଣ୍ଡନ୍ନ୍ଦାମ୍ ୱେଡ଼୍କା ଆଦ୍ତିଡ଼୍ ନୁ ନାୟାଦ୍ ଦୁଃକାମ୍ ମିକା କମ୍ ଆଦ୍ତେ । ଆଦିଙ୍କ୍ ୱେରଣ୍ଡ୍ କ୍ରିଷ୍ଟ ବିଶ୍ୱାସ୍ ଦାଦାନ୍ ଲେକାମ୍ ମିଡ଼୍ ଅଂକିଙ୍କ୍ ୱେଡ଼୍କେତେ ଗ୍ରହନ୍ ମାଡ଼ାଟ୍ ନୁ ଇଦ୍ ଲେକାମ୍ ସାରେ ଗୁଣତଡ଼୍ ନାରୁଡ଼୍କ୍ ବକ୍ତି ମାଡ଼ାଟ୍, ବାତେଙ୍କ୍ଇତ୍କେ ମିଡ଼୍ ନାକିଂଙ୍କ୍ ବେନ୍ ସାହାଯ୍ୟ ଇଦେପାର୍ୱିଡ଼୍, କ୍ରିଷ୍ଟନାଦ୍ ପାଡ଼୍ୟି ସିଦ୍ଦ ସେଙ୍ଗେ ଅଣ୍ଡ୍ ଆଦ୍ ନା ସେଙ୍ଗେ ମାଡ଼ାନଙ୍କ୍ ଆଞ୍ଜ୍ ନିଜେତ୍ ଜିୱୁଣ୍ଡ୍ତିଙ୍କ୍ ଇତ୍ତନ୍ ନୁ ଡଲାନ୍ ଦିନ୍ତେ ମୁନେଆସ୍ ମାତ୍ତନ୍ ।
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.