ପୁନାଦ୍ ଆର୍ର୍
ମାତିଉ 19:26
Verse 26 is marked below, with the whole chapter around it. Read from the start
ୱିଡ଼୍ସାନ୍ ସମ୍ପର୍କତେ ଜିସୁନ୍ ଶିକ୍ଷା
(ମାର୍କ ୧୦:୧-୧୨)
ଜିସୁ ଆୱୁସାରେ ଗଟି କେସ୍ ତେର୍ତେ ପେର୍କେ ଗାଲିଲୀ ୱିଡ଼୍ସି ଯର୍ଦ୍ଦନ୍ ଚାଉଡ଼େତ୍ ମେଣ୍ଡନ୍ ପାକେ ଯିହୁଦା ନାର୍ ଆତ୍ତନ୍ । ନାର୍ଗେ ନାରୁଡ଼୍ ଅନ୍ ପେର୍କେ ୱାତ୍ତଡ଼୍ ନୁ ଅନ୍ ନାର୍ଗେ ରଗିଡ଼୍କ୍ ସୁସ୍ଥ ମାଡ଼୍ତଣ୍ଡ୍ ।
ବେସ୍କ୍ତୁଡ଼୍ ପାରୂଶୀଡ଼୍ ଅନ୍ଗାରେ ୱାସ୍ ଅଂକିଙ୍କ୍ ଉଡ଼ୀଇଦାଗ୍ ୱାଟାଙ୍କ୍ ଆଲ୍ସି ମାଡ଼୍ତଡ଼୍ । ଅଡ଼୍ ଅଂକିଙ୍କ୍ କେତ୍ତଡ଼୍, “ମା ଦର୍ମତେ ନିୟମ୍ ଲେକାମ୍ ୱେରନ୍ ଯେ ବାତ୍ଆଇ କାରନ୍ ସେଙ୍ଗେ ତାନ୍ ମୁତେଙ୍କ୍ ୱିଡ଼୍ସିଦ୍ତନ୍ କି ?”
ଜିସୁ କେତ୍ତନ୍, “ଶାସ୍ତ୍ରତାଗ୍ କାର୍ୱିଡ଼୍ କି, ମୁନେଙ୍କ୍ ସୃଷ୍ଟି କର୍ତ୍ତାଲ୍ ମାନେଇ ନୁ ନାଟାଡ଼୍ତିଙ୍କ୍ ତିଆର୍ ମାଡ଼୍ତଣ୍ଡ୍ ? ଆସୁଙ୍କ୍ ଜିସୁ କେତ୍ତନ୍, ‘ଇଦିନ୍ ସେଙ୍ଗେ ମାନେଇ ତାନ୍’ ୟାୟ୍ ବାବାଙ୍କ୍ ୱିଡ଼୍ସି ତାନ୍ ମୁଦ୍ପାନ୍ ତଡ଼୍ କାଇଲିମାନ୍ତେ ନୁ ଅଡ଼୍ ଇର୍ୱୁଡ଼୍ ୱେରନ୍ ଇନା ମାନ୍ତଡ଼୍ । ଅଡ଼୍ ମେଣ୍ଡେ ଇର୍ୱୁଡ଼୍ ଆୟ୍ୟଡ଼୍, ଅଡ଼୍ ମେଣ୍ଡେ ୱେରନ୍ ଇନା ମାନ୍ତଡ଼୍ । ବେନଡ଼୍କ୍ ଇଶ୍ୱର୍ କାଲ୍ପି ମିନ୍ଦେଣ୍ଡ୍, ନାରୁଡ଼୍ ଅଡ଼୍କିଂଙ୍କ୍ ୱେରେ ୱେରେ ମାଡ଼ାନାଦ୍ ଟିକ୍ ଆୟ୍ୟ ।” 1
ପାରୂଶୀଡ଼୍ ମେଣ୍ଡେ କେତ୍ତଡ଼୍, “ଆଲେକେ ନାଟାଡ଼୍ ତିଙ୍କ୍ ୱିଡ଼୍ସିଦାଙ୍କ୍ ସେଙ୍ଗେ ମଶାଲ୍ ବାତ୍ତିଙ୍କ୍ କାଇଦେ ଏର୍ ବ୍ୟବସ୍ତା ମାଡ଼୍ତଣ୍ଡ୍ ।”
ଜିସୁ କେତ୍ତନ୍, “ମିଇ ହୃଦୟ୍ତେ କଷ୍ଟ ସେଙ୍ଗେ ମଶାଲ୍ ଆଦ୍ ଲେକାମ୍ ମାଡ଼ି ମାତ୍ତନ୍ । ବାତେଙ୍କ୍ ଇତ୍କେ ମୁନେଙ୍କ୍ ତିଆର୍ ୱେଲେ ଇଦ୍ଲେକାମ୍ ବ୍ୟବସ୍ଥା ଇଲ୍ୱେ ମାତ୍ତେ । 2ମାତର୍ ନାନ୍ ମିକିଂଙ୍କ୍ କେତୁତାନ୍ ଯେ, ବେନ ଅନ୍ ମୁତେଙ୍କ୍ ବ୍ୟବିଚାର୍ କାରାପ୍ ୱିଡ଼୍ସି ମେଣ୍ଡେ ବାତ୍ତାୟି ଆଂକାର୍ ତିଙ୍କ୍ ୱିଡ଼୍ସି ମେଣ୍ଡେଅନ୍ ମୁତେଙ୍କ୍ ପେଣ୍ଡୁଲ୍ ଆତ୍କେ, ଅଣ୍ଡ୍ ନିଜେ ବ୍ୟବିଚାର୍ ଆଦ୍ତନ୍ ।”
ଜିସୁନ୍ ଶିଷ୍ୟନଡ଼୍ କେତ୍ତଡ଼୍, “ମୁତେନ୍ ତଡ଼୍ ମାନେଇତାଦ୍ ଇଦ୍ ଲେକାମ୍ ସମ୍ପର୍କ ମାତ୍କେ, ଆଲେକେ ପେଣ୍ଡୁଲ୍ ଆଦାନାଦ୍ ସାୟେ ଆୟ୍ୟ ।”
ଜିସୁ କେତ୍ତାନ୍, “ଇ ଶିକ୍ଷା ସାରେତଡ଼୍ ସେଙ୍ଗେ ଉଦ୍ଦିଷ୍ଟ ଆୟ୍ୟ । ଇଶ୍ୱର୍ତେ ତଡ଼୍ ବେନଡ଼୍କ୍ ଇଦ୍ କେସ୍ମିନ୍ଦେନ୍ ଆସ୍ମିନ୍ଦେ, ମାତର୍ ଅଡ଼୍ ଇଦ୍ ଗ୍ରହନ୍ ମାଡ଼େ ପାର୍ୱଡ଼୍ । ନାର୍ଗେ ବାତେଙ୍କ୍ ଇତ୍କେ ମାଇଦିଙ୍କ୍ ନାରୁଡ଼୍ ପେଣ୍ଡୁଲ୍ ଆସ୍ ମାନ୍ତଡ଼୍ । ବେସ୍କ୍ ତଡ଼୍ ଜନମ୍ତାଗାଙ୍କ୍ ପେଣ୍ଡୁଲ୍ ସେଙ୍ଗେ ଅନୁପଯୁକ୍ତ, ବେସ୍କ୍ତଡ଼୍କିଙ୍କ୍ ନାରୁଡ଼୍ ଆଦେଲେକାମ୍ ମାଡ଼୍ତଡ଼୍, ମେଣ୍ଡେ ବେସ୍କ୍ତୁଡ଼୍ ସ୍ୱର୍ଗରାଜ୍ୟ ସେଙ୍ଗେ ପାଡ଼୍ୟି ମାଡ଼ାଙ୍କ୍ ପେଣ୍ଡୁଲ୍ ଆୟ୍ୟକଟ ମାତ୍ତନ୍ । ବେନଆଇ ଶିକ୍ଷାତେ ଅର୍ତ ବୁଜେମ୍ ଆଦୁତ୍ତେ, ଅଡ଼୍ ଆଦ୍ ଗ୍ରହନ୍ ମାଡ଼ିଡ଼୍ ।”
ଜିସୁ ପିଲାକିଙ୍କ୍ ଆର୍ଶିବାଦ୍ ମାଡ଼୍ତଣ୍ଡ୍
(ମାର୍କ ୧୦:୧୩-୧୬; ଲୁକ ୧୮:୧୫-୧୭)
ପିଲାନ୍ ପର୍ର କାୟ୍ ୱାଟି ପ୍ରାର୍ତନା ମାଡ଼ାଙ୍କ୍ ସେଙ୍ଗେ ବେସ୍କ୍ ତଡ଼୍ ନାରୁଡ଼୍ ପିଲାଙ୍କ୍ ଜିସୁନ୍ ପାକେ ତାତାଙ୍କ୍ ପସ୍ପ୍ତ୍ତଡ଼୍ । ଆଦ୍ ନାରୁଡ଼୍କ୍ ଶିଷ୍ୟନଡ଼୍ ଦମକ୍ ଇତ୍ତଡ଼୍ । ବାତେଙ୍କ୍ ଇତ୍କେ ଜିସୁ କେତ୍ତାନ୍, “ପିଲାଙ୍କ୍ ନାୟା ୱାଦାଙ୍କ୍ ଇମୁଟ୍ । ଅଡ଼୍କ୍ ମନା ମାଡ଼୍ମାଟ୍ । ବାତେଙ୍କ୍ ଇତ୍କେ ଇଡ଼୍ ସ୍ୱର୍ଗରାଜ୍ୟ ତେ ଅଦିକାରିଡ଼୍ ।”
ଅଡ଼୍ପରୁ କାଇୱାଟି ଆର୍ଶିବାଦ୍ ମାଡ଼୍ତେ ପେର୍କେ ଅଡ଼୍ ଆଗାଙ୍କ୍ ଆତ୍ତଡ଼୍ ।
ୱେରଣ୍ଡ୍ ସାଉକାର୍ ପେକାଲ୍
(ମାର୍କ ୧୦:୧୭-୩୧; ଲୁକ ୧୮:୧୮-୩୦)
ଅଣ୍ଡ୍ ଦିନ୍ ୱେରଣ୍ଡ୍ ପେକାଲ୍ ଜିସୁନ୍ ପାକେ ୱାସ୍ କେତ୍ତନ୍, “ଗୁରୁ ସାରେଦିନାତ୍ ଜିୱୁନ୍ ଲାବ୍ ମାଡ଼ାଙ୍କ୍ ସେଙ୍ଗେ ବାତ୍ ଲେକେତ୍ ମାଡ଼େ ୱେଇତିତ୍ ?”
ଜିସୁ ଅକିଂଙ୍କ୍ କେତ୍ତନ୍, “ସତ୍କାମ୍ ବିଷୟ୍ତେ ନାକିଂଙ୍କ୍ ବାତ୍ତିଙ୍କ୍ କେତୁତିନ୍ ? ଇଶ୍ୱର୍ କେ ସତ୍ । ଅନ୍ ଗଟ୍ ପାଲନ୍ ମାଡ଼୍କେ, ସାରେ ଦିନା ଲେକେତ୍ମାନ୍ଦ୍ ପାର୍ତିନ୍ ।”
ଅଣ୍ଡ୍ କେତ୍ତାନ୍, “ବେନ୍ ସାରେ ଗଟ୍ ?” ଜିସୁ କେତ୍ତାନ୍, “ଆୱୁକାନାଦ୍ ମାଡ଼୍ମାଟ୍, ବ୍ୟବିଚାର୍ ମାଡ଼୍ମାଟ୍ । ଡଙ୍ଗ୍ମାଟ୍, ବେନନ୍ ବିରୁଦ୍ତେ ଅବିଯଗ୍ ମାଡ଼୍ମାଟ୍ । ୟାୟ୍ ବାବାଙ୍କ୍ ସନ୍ମାନ୍ ମାଡ଼ାଟ୍ ନୁ ମିଇ ଗାର୍ରେତଡ଼୍କ୍ ଆତ୍ମାତେ ପ୍ରେମ ମାଡ଼ାଟ୍ ।”
ପେକାଲ୍ କେତ୍ତନ୍, “ଇଉସାରେ ଗଟି ପାଲନ୍ ମାଡ଼୍ତାନ୍ । ନାକିଂଙ୍କ୍ ମେଣ୍ଡେ ବାତେଏ ମାଡ଼ାନାଦ୍ ଦର୍କାର୍ ?”
ଜିସୁଅଙ୍କ୍ ଉତ୍ତର୍ କେତ୍ତାନ୍, “ଯଦି ନିମ୍ ସାରେଦିନାତ୍ ଜିୱୁନ୍ ଦର୍କାନଙ୍କ୍ ଇଚ୍ଛା, ଅନ୍ ମିୟାଦ୍ ସାରେ ସମ୍ପତି ୱାମିମିକା ଡାବ୍କ୍ ଗରିବ୍ ନାରୁଡ଼୍କ୍ ଦାନ ମାଡ଼େ । ଆଲା ମାଡ଼୍କେ ନିମ୍ ସ୍ୱର୍ଗତାଗ୍ ସମ୍ପତି ଦର୍କିତ୍ ହାଉସାରେ ମାଡ଼ିମେଣ୍ଡେ ନା ପେର୍କେ ପେର୍କେ ୱାଡ଼ା ।”
ଆଦ୍ ପେକାଲ୍ କେଞ୍ଜି ମୁର୍ମୁରା ଆସ୍ ଆତ୍ତନ୍, ବାତେଙ୍କ୍ ଇତ୍କେ ଅଣ୍ଡ୍ ବେଡ଼ିଇ ସାଉକାର୍ ମାତ୍ତଣ୍ଡ୍ ।
ଜିସୁ ଶିଷ୍ୟଡ଼୍କ୍ କେତ୍ତନ୍, “ନାନ୍ ମିକିଂଙ୍କ୍ ସତ୍ କେତୁତାନ୍, ସାଉକାର୍ ନାରୁଡ଼୍ ସେଙ୍ଗେ ସ୍ୱର୍ଗତାଗ୍ ଆଦ୍ଦାଙ୍କ୍ ଗାଟି ତିପାଲ୍ତେ ବିଷୟ । ମେଣ୍ଡନ୍ଦାମ୍ କେସ୍ମିନ୍ଦେନ୍, ସୁଜ୍ବସ୍ ଇସ୍ ଉଟ୍ ଆଦାନ୍ ୱିଡ଼୍ସି ସାଉକାର୍ ନାରୁଡ଼୍ ସ୍ୱର୍ଗରାଜ୍ୟତା ଆତ୍ତାଙ୍କ୍ ଅଦିକ୍ କଷ୍ଟ ।”
ଶିଷ୍ୟଡ଼୍ ଇଦ୍ କେଞ୍ଜି ବାକ୍ୱା ଆସ୍ କେତ୍ତଡ଼୍, “ବେନ୍ ଆଲେକେ ମୁକ୍ତି ପାଏମ୍ ଆଦ୍ତନ୍ ?”
ଜିସୁ ଅଡ଼୍ପାକେ ଉଡ଼ି କେତ୍ତନ୍, “ନାରୁଡ଼୍ ମୁନେ ଇଦ୍ ସତ୍ ଆଦେପାର୍ୱ, ବାତେଙ୍କ୍ ଇତ୍କେ ଇଶ୍ୱର୍ତେ ମୁନେ ସାରେ ମିକା ସତ୍ ।”
ଆଦ୍ କେଞ୍ଜି ପିତର୍ କେତ୍ତନ୍, “ଉଡ଼େ, ମାମ୍ମେ ସାରେ ୱିଡ଼୍ସି ନି ପେର୍କେ ୱାଦ୍ତମ୍ । ମାକିଂଙ୍କ୍ ବାତେଏ ଦର୍କିତ୍ ?” 3
ଜିସୁ ଉତ୍ତର୍ କେତ୍ତନ୍, “ଇଦ୍ ଗଟ୍ ସତ୍ ଇଞ୍ଜ୍ ଆଲ୍ସି ତିଡ଼୍, ପୁଃନେ ଯୁଗ୍ତେ ବେସୁଙ୍କ୍ ନାରୁଡ଼୍ପିଲେ ଅନ୍ ଗୌରବ୍ ସିଂହାସନ୍ତାଗ୍ କୁଦିତିତନ୍, ଆସୁଙ୍କ୍ ନାୟାଦ୍ ଇ ବାରଜାନ୍ ଶିଷ୍ୟମିକା ବାର୍ଟାନ୍ ସିଂହାସନ୍ତାଗ୍ କୁଦି ଇଶ୍ରାଏଲ୍ତେ ବାର୍ଟାନ୍ ନାର୍କିନ୍ ପର୍ର ରାଜତ୍ୱ ମାଡ଼ିତଡ଼୍ । ବେନଡ଼୍ ନା ସେଙ୍ଗେ ନିଜେତ୍ ଲୋନ୍, ତାମୁଣ୍ଡ୍ ଏଲାସ୍କ୍, ୟାୟବାବାଲ୍, ପିଲାଜିଲା ନୁ ବୁମ୍ନେଲ୍ ୱିଡ଼୍ସିତଡ଼୍, ଅଡ଼୍ ଆୱୁ ଶହେଗୁନ୍ ଦର୍କିତ୍; ମେଣ୍ଡେ ସାରେଦିନାତ୍ ଜିୱୁନ୍ ମିକା ଦର୍କିତ୍ ।” 4“ଇଞ୍ଜେ ବେନଡ଼୍ ମୁନେ ମିନ୍ଦେ, ଅଡ଼୍ଆଗାଙ୍ଗ୍ ନାର୍ଗେ ପେର୍କେ ୱାଦ୍ତଣ୍ଡ୍ ନୁ ବେନଡ଼୍ ମୁନେ ମିନ୍ଦେ, ଅଡ଼୍ ତାଗାଙ୍କ୍ ନାର୍ଗେ ମୁନେ ଆଦ୍ତଡ଼୍ ।”
Source notes (4)
- Cross-reference ମାତିଉ ୫:3୧.
- Cross-reference ମାତିଉ ୫:3୨; ୧ କରନ୍ତିୟ ୭:୧୦,୧୧.
- Cross-reference ମାତିଉ ୨୫:3୧; ଲୁକ ୨୨:3୦.
- Cross-reference ମାତିଉ ୨୦:୧୬; ଲୁକ ୧3:3୦.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.