ପୁନାଦ୍ ଆର୍ର୍
ଯୋହନ୍ 20
ବେନ ହିଲ୍ୱାଦ୍ ସମାଦି
(ମାତିଉ ୨୮:୧-୮; ମାର୍କ ୧୬:୧-୮; ଲୁକ ୨୪:୧-୧୨)
ସାପ୍ତାତେ ପ୍ରତମ୍ ଦିନ୍ ନାର୍କା ଇକାଡ଼୍ ମାନ୍ଦାନ୍ ୱେଲେ ମଗ୍ଦଲୀନି ମରୀୟମ୍ ଜିସୁନ୍ ସମାଦି ଗାର୍ରେ ୱାସ୍ ଆଗେ କାଲ୍ଦିଙ୍କ୍ ଟେଣ୍ଡିମାନ୍ଦାନାଦ୍ ଉଡ଼୍ତେ । ଆଦିଙ୍କ୍ ଆଦ୍ ମିରିଆଞ୍ଜ୍ ଶିମୋନ୍ ପିତର୍ ନୁ ଜିସୁ ବେନଙ୍କ୍ ଗାଟି ପ୍ରେମ ମାଡ଼ମାତ୍ତଣ୍ଡ୍, ଆ ଶିଷ୍ୟନ୍ ଗାର୍ରେ ୱାତ୍ତା ନୁ ଅଂକିଙ୍କ୍ କେତ୍ତା, “ଅଡ଼୍ ସମାଦି କନ୍ସ୍ ପ୍ରବୁଙ୍କ୍ ଆତ୍ତଡ଼୍, ମେଣ୍ଡେ ଅଂକିଙ୍କ୍ ବେଗେ ୱାଟ୍ତଡ଼୍ ମାମ୍ମେ ପୁନମ୍ ।”
ଆଗାଙ୍କ୍ ପିତର୍ ନୁ ବାଗାତ୍ ଶିଷ୍ୟ ସମାଦିତା ଆଦାନଙ୍କ୍ ପେଇତ୍ତଡ଼୍ । ଅଡ଼୍ ଇର୍ୱୁଡ଼୍ ଅଣ୍ଡୟ୍ତଡ଼୍ ମିରାନଙ୍କ୍ ପସ୍ପ୍ତ୍ତଡ଼୍, ମେଣ୍ଡେ ଅଣ୍ଡ୍ ବାଗାତ୍ ଶିଷ୍ୟ ପିତର୍ତିଙ୍କ୍ ପେର୍କେ ୱାଟି ମୁନେନ୍ ସମାଦିତ୍ ଗାର୍ରେ ହେୱୁତ୍ତଣ୍ଡ୍, ଅଣ୍ଡ୍ ହାଡ଼୍କିମିକା ଲୋପେ ଉଡ଼୍ତଣ୍ଡ୍ ବେନ୍ ସରୁ ସିଲେସାରେ ଜିସୁନ୍ ମେନ୍ଦୁଲ୍ତିଙ୍କ୍ ମୁସିସ୍ ମାତ୍ତଡ଼୍ ଆଦ୍ ରାୟିମାତ୍ତା, ମିକା ଅଣ୍ଡ୍ ଲୋପେ ହସଣ୍ଡ୍ । ଆସୁଟେ ଶିମୋନ୍ ପିତର୍ ମିକା ଅନ୍ ପେର୍କେ ପେର୍କେ ୱାସ୍ ହେୱୁତ୍ତଣ୍ଡ୍ ନୁ ସମାଦି ଲୋପେ ହସି ଉଡ଼୍ତଣ୍ଡ୍ ଯେ, ସରୁ ସିଲେ ରାୟିମିନ୍ଦେ, ଜିସୁନ୍ ତାଲେତାଗ୍ ବେନ୍ ତୁୱାଲ୍ ତଅସ୍ ମାତ୍ତଡ଼୍, ଆଦ୍ ସରୁ ସିଲେତଡ଼୍ ମାନକଟ୍ ମେଣ୍ଡେଅନ୍ ପଡ଼ିୟେତାଗ୍ ଉତ୍ତି ମାତ୍ତା । ଆସୁଣ୍ଟ୍ ବେନ ବାଗାତ୍ ଶିଷ୍ୟ ଆଗେ ବେନ ସମାଦି ଗାର୍ରେ ୱାସ୍ ମୁନେନ୍ ହେଉସ୍ ମାତ୍ତଣ୍ଡ୍, ଅଣ୍ଡ୍ ମିକା ଲୋପେ ହସି ଉଡ଼୍ତଣ୍ଡ୍ ନୁ ବିଶ୍ଵାସ୍ ମାଡ଼୍ତଣ୍ଡ୍; ଦର୍ମଶାସ୍ତ୍ର ଲେକାମ୍, “ଜିସୁ ଡଲ୍ନାଦ୍ କନ୍ସ୍ ମେଣ୍ଡଅନ୍ଦାମ୍ ତେଦିତଣ୍ଡ୍,” ଇଦିନାଦ୍ ଇତ୍କେ ଆଦ୍ ଶିଷ୍ୟଡ଼୍ ଆସୁଙ୍କ୍ ହେୱୁନା ପୁନ୍ୱକଟ୍ ମାତ୍ତଡ଼୍ । ତାନ୍ପେର୍କେ ଶିଷ୍ୟଡ଼୍ ମେଣ୍ଡଅନ୍ଦାମ୍ ତାମ୍ ଲୋକ୍ ଆଦ୍ତଡ଼୍ ।
ଜିସୁ ମରିୟମ୍ତିଙ୍କ୍ ତଅନ୍ଦତଣ୍ଡ୍
(ମାତିଉ ୨୮:୯-୧୦; ମାର୍କ ୧୬:୯-୧୧)
ବାତେଙ୍କ୍ ଇତ୍କେ ମରୀୟମ୍ କେୟକେୟ ସମାଦି ବାଇଦେ ନିସ୍ମାତ୍ତା; ମେଣ୍ଡେ ଆଦ୍ କେୟକେୟ ଅଡ଼୍କିଂଙ୍କ୍ ସମାଦି ଲୋପେ ଉଡ଼୍ତା, ଜିସୁନ୍ ମେନ୍ଦୁଲ୍ତିଙ୍କ୍ ବେନ୍ ପଡ଼ିୟେତାଗ୍ ୱାଟିମାତ୍ତଡ଼୍, ଆଗେ ତାଲେତ୍ ପାକ୍ ୱେରଣ୍ଡ୍ ନୁ ଡେକେତ୍ ପାକ୍ ୱେରଣ୍ଡ୍, ପାଣ୍ଡେ ସିଲେ କେର୍ସ୍ ଇର୍ୱୁଡ଼୍ ଦୂତ କୁଦିମାନ୍ଦାନାଦ୍ ଉଡ଼୍ତା । ଆଦ୍ ଦୂତଡ଼୍ ଆଦିଙ୍କ୍ କେତ୍ତା, “ହଁ ୟାୟ୍, ବାତେଙ୍କ୍ କେୟୁତିନ୍ ?” ଆଦ୍ ନାଟାଡ଼୍ କେତ୍ତେ, “ବେନଡ଼୍ ନା ପ୍ରବୁଙ୍କ୍ ହତ୍ତଡ଼୍, ମେଣ୍ଡେ ଅଂକିଙ୍କ୍ ବେନ୍ ପଡ଼ିୟେତାଗ୍ ୱାଟ୍ତଡ଼୍, ଆଦ୍ ନାନ୍ ପୁନନ୍ ।”
ଆଦ୍ ଇଲା କେସ୍ ପେର୍କେ ତିଡ଼ିଇପାକା ଜିସୁଙ୍କ୍ ନିସ୍ ମାନ୍ଦାନାଦ୍ ଉଡ଼୍ତା, ବାତେଙ୍କ୍ ଇତ୍କେ ଅଣ୍ଡ୍ ଜିସୁ ଇଞ୍ଜ ଆଦ୍ ପୁନ୍ଦାଙ୍କ୍ ପାର୍ୱ । ଜିସୁ ଆଦିଙ୍କ୍ କେତ୍ତଣ୍ଡ୍, “ହଁ ୟାୟ୍, ବାତେଙ୍କ୍ କେୟୁତିନ୍ ? ବେନଙ୍କ୍ ମେହେକୁତିନ୍ ?” ଆଦ୍ ଅଂକିଙ୍କ୍ ବଗିଚାତଣ୍ଡ୍ ଗତିଆଲ୍ ଇଞ୍ଜ ହେର୍କା ମାଡ଼ି କେତ୍ତା, “ଗଟ୍ ନିମ୍ ଯଦି ଜିସୁଙ୍କ୍ ହତ୍ତି, ଆଲେକେ ଅଂକିଙ୍କ୍ ବେଗେ ୱାଟ୍ତି ନାକିଂଙ୍କ୍ କେଲ୍ମ୍, ନାନ୍ ଅଂକିଙ୍କ୍ ଆଦ୍ତାନ୍ ।”
ଜିସୁ ଆଦିଙ୍କ୍ କେତ୍ତଣ୍ଡ୍, “ମରୀୟମ୍ !” ଆଦ୍ ତିଡ଼ିଇମିକା ଏବ୍ରି ଗଟ୍ତେ ଅଂକିଙ୍କ୍ କେତ୍ତା, “ରାବ୍ବୂନୀ,” ଇତ୍କେ, “ହଁ ଗୁର ।”
ଜିସୁ ଆଦିଙ୍କ୍ କେତ୍ତଣ୍ଡ୍, “ନାକିଂଙ୍କ୍ ପଇସ୍ ନେହେମା, ବାତେଙ୍କ୍ ଇତ୍କେ ନାନ୍ ଇଞ୍ଜେକ୍ ଅନ୍ପାକେ ବାବାନାଗ୍ ଆନନେ; ନା ତାମୁଣ୍ଡ୍କିଡ଼୍ କେଲ୍ଲା, ନାନ୍ ନା ବାବାଲ୍ ନୁ ଅଡ଼୍ ବାବାଲ୍, ନା ଇଶ୍ୱର୍ ନୁ ଅଡ଼୍ ଇଶ୍ୱର୍ତେ ଗାର୍ରେ ଆଦୁତାନ୍ ।”
ମଗ୍ଦଲୀନି ମରୀୟମ୍ ଆଞ୍ଜ୍, ନାନ୍ ପ୍ରବୁଙ୍କ୍ ଉଡ଼୍ତାନ୍, ମେଣ୍ଡେ ଅଣ୍ଡ୍ ନାକିଂଙ୍କ୍ ଇୱୁସାରେ କେତ୍ତଣ୍ଡ୍ ଇଞ୍ଜ ଶିଷ୍ୟଡ଼କ୍ କବର୍ ଇତ୍ତା ।
ଜିସୁଙ୍କ୍ ତାନ୍ ଶିଷ୍ୟଡ଼୍ ଉଡ଼୍ତଡ଼୍
(ମାତିଉ ୨୮:୧୬-୨୦; ମାର୍କ ୧୬:୧୪-୧୮; ଲୁକ ୨୪:୩୬-୪୯)
ଆଦ୍ ଦିନ୍ ଇତ୍କେ ସାପ୍ତାହତେ ପ୍ରତମ୍ ଦିନ୍ ମୁଲ୍ପୁଟ୍ ଶିଷ୍ୟଡ଼୍ ବେନ୍ ଲୋନ୍ ମାତ୍ତଡ଼୍, ଆଦ୍ ଲୋତ୍ତା କାପାଟ୍ ସାରେ ଯିହୁଦୀଡ଼୍ ୱେରେତେ ସେଙ୍ଗେ ବନ୍ଦ୍ ମାତ୍ତା, ଆସୁଟେ ଜିସୁ ୱାସ୍ ନାଡ଼୍ମେ ନିସ୍ କେତ୍ତଣ୍ଡ୍, “ମିୟାଦ୍ ଶାନ୍ତି ଆୟି ।” ଇଦ୍ କେସ୍ ଜିସୁ ଶିଷ୍ୟଡ଼କ୍ ତାନ୍ କାଇକ୍ ନୁ ଗୁଣ୍ଡେତିଙ୍କ୍ ତଅତ୍ତଣ୍ଡ୍ । ଆଗାଙ୍କ୍ ଶିଷ୍ୟଡ଼୍ ପ୍ରବୁଙ୍କ୍ ଉଡ଼ି ୱେଡ଼୍କ୍ ଆଦ୍ତଡ଼୍ । ଜିସୁ ଅଡ଼୍କିଂଙ୍କ୍ ମେଣ୍ଡେ ଅନ୍ଦାମ୍ କେତ୍ତଣ୍ଡ୍, “ମିୟାଦ୍ ଶାନ୍ତି ଆୟି; ବାବାଲ୍ ନିକିଂଙ୍କ୍ ବେଦ୍ ରକମ୍ ରହତଣ୍ଡ୍, ଆଦେ ପୁଟୁଙ୍କ୍ ନାନ୍ ମିକା ମିକିଂଙ୍କ୍ ରହତୁତାନ୍ ।” ଜିସୁ ଇଲା କେସ୍ ଅଡ଼୍ ପର୍ର ନେହେସ୍କି କେତ୍ତଣ୍ଡ୍, “ପବିତ୍ର ଆତ୍ମାତିଙ୍କ୍ ଗ୍ରହନ୍ ମାଡ଼ାଟ୍ । 1ମିଡ଼୍ ଯଦି ବେନନାଦ୍ ପାପ୍ କ୍ଷମା ମାଡ଼ିତିଡ଼୍, ଅନାଦ୍ ପାପ୍ କ୍ଷମା ଆଦ୍ତେ; ମେଣ୍ଡେ ବେନନାଦ୍ ପାପ୍ କ୍ଷମା ମାଡ଼କ୍, ଅନାଦ୍ ପାପ୍ କ୍ଷମା ଆୟ୍ୟ ।”
ଜିସୁ ନୁ ତୋମା
ଜିସୁ ବେସୁଟ୍ ୱାସ୍ ମାତ୍ତଣ୍ଡ୍, ଆସୁଟେ ବାରଜାନ୍ ଶିଷ୍ୟଡ଼୍ ଲୋପେ ତୋମା ପେଦେର୍ତଣ୍ଡ୍ ବେନଙ୍କ୍ “ଦିଦୁମ୍,” ଇଞ୍ଜ କେତିତଡ଼୍, ଅଣ୍ଡ୍ ଅଡ଼୍ତଡ଼୍ ହିଲ୍ୱାମାତ୍ତଣ୍ଡ୍ । ବାଗାତ୍ ଶିଷ୍ୟଡ଼୍ ଅଂକିଙ୍କ୍ କେତ୍ତଡ଼୍, “ମାମ୍ମେ ପ୍ରବୁଙ୍କ୍ ଉଡ଼୍ତମ୍ ।” ବାତେଙ୍କ୍ ଇତ୍କେ ତୋମା ଅଡ଼୍କିଂଙ୍କ୍ କେତ୍ତଣ୍ଡ୍, “ଅନାଦ୍ କାଇକିନାଗ୍ କୋୟେତ୍ ଚିହିହ୍ନେ ଉଡ଼କ୍ ନୁ ଆଗେ ନା ୱାଡ଼ଞ୍ଜ୍ ହିଟ୍ହକ୍ ନୁ ଅନାଦ୍ ଗୁଣ୍ଡେତାଗ୍ ନା କାୟ୍ ହିଟ୍ହକ୍ ନାନ୍ ବେସୁଟେ ବିଶ୍ୱାସ୍ ମାଡ଼ନ୍ ।”
ଆଟ୍ ଦିନାତ୍ ପେର୍କେ ତାନ୍ ଶିଷ୍ୟଡ଼୍ ମେଣ୍ଡଅନ୍ଦାମ୍ ଲୋପେ ମାତ୍ତଡ଼୍ ନୁ ତୋମାଲ୍ ଅଡ଼୍ତଡ଼୍ ମାତ୍ତଣ୍ଡ୍ । ହାର୍ ବନ୍ଦ୍ ମାତ୍ତା ୱେଲେ ଜିସୁ ୱାସ୍ ନାଡ଼୍ମେ ନିସ୍ କେତ୍ତଣ୍ଡ୍, “ମିୟାଦ୍ ଶାନ୍ତି ଆୟି ।” ପେର୍କେ ଜିସୁ ତୋମାଙ୍କ୍ କେତ୍ତଣ୍ଡ୍, “ଇଗେ ୱାଡ଼୍ଞ୍ଜ୍ ତାସ୍ ନା କାଇକିଂଙ୍କ୍ ଉଡ଼େ ନୁ କାୟ୍ ହାହାସ୍ ନା ଗୁଣ୍ଡେତାଗ୍ ହିଟ୍ତା; ଅବିଶ୍ୱାସୀ ଆୟିୱେକନ୍ସ୍ ବିଶ୍ୱାସୀ ଆୟିମ୍ ।”
ତୋମା ଜିସୁଙ୍କ୍ କେତ୍ତଣ୍ଡ୍, “ନା ପ୍ରବୁ ନା ଇଶ୍ୱର୍ !”
ଜିସୁ ତୋମାଙ୍କ୍ କେତ୍ତଣ୍ଡ୍, “ନିମ୍ ନାକିଂଙ୍କ୍ ଉଡ଼୍ତାଙ୍କ୍ ବିଶ୍ୱାସ୍ ମାଡ଼୍ତି, ବେନଡ଼୍ ଉଡ଼୍ୱାକନ୍ସ୍ ବିଶ୍ୱାସ୍ ମାଡ଼ିମିନ୍ଦେଡ଼୍, ଅଡ଼୍ ଦନ୍ୟ !”
ଇଦ୍ ବଇତ୍ ଲେକାମ୍
ଜିସୁ ଶିଷ୍ୟଡ଼କ୍ ଉପସ୍ଥିତ୍ତେ ନାର୍ଗେ ବାକ୍ୱା ପାଡ଼୍ୟି ମାଡ଼୍ତଣ୍ଡ୍, ଆୱୁସାରେ ଇଦ୍ ବଇତାଗ୍ ଲେକ୍ତାଦ୍ ଇଲେ; ବାତେଙ୍କ୍ ଇତ୍କେ ମିଡ଼୍ ବିଶ୍ୱାସ୍ ମାଡ଼ିତିଡ଼୍ ଯେ, ଜିସୁ ଆଦୁତନ୍ ଇଶ୍ୱର୍ତେ ମାର୍ ମସିହ, ମେଣ୍ଡେ ଅନାଗ୍ ବିଶ୍ୱାସ୍ ମାଡ଼ି ମିଡ଼୍ ବେଲା ଜିୱୁଣ୍ଡ୍ ଦର୍କିତ୍, ଇଦିନ୍ ସେଙ୍ଗେ ଇୱୁସାରେ ଲେକ୍ତାଦ୍ ଆସ୍ମିନ୍ଦେ ।
Source notes (1)
- Cross-reference ମାତିଉ ୧୬:୧୯; ୧୮:୧୮.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.