ପୁନାଦ୍ ଆର୍ର୍
ଏବ୍ରୀ 12:1
Verse 1 is marked below, with the whole chapter around it. Read from the start
ଇଶ୍ୱର ଆଦୁତନ୍ ମାନ୍ ବାବାଲ୍
ଇଦ୍ଲେକେନ୍ ସାକ୍ଷିନଡ୍ ଅଣ୍ଡୟ୍ ବାଡ଼ିୟା ମାନ୍ଦେ ମାନ୍ ନାଲୁପାକା କେପିମିନ୍ତେର୍ । ଆଦିନ୍ମାଇଦିଙ୍କ୍ ୱାଡାଟୁ, ବେନ୍ ସାର୍ରେ ବିଷୟ ମାନାଲ୍ ଆଦାନ୍ ଆର୍ଦିନ୍ ବାନ୍ଦ୍ ମାଡ଼ ମିନ୍ଦେ ମେଣ୍ଡେ ବେନ୍ ସାର୍ରେ ପାପାମ୍ ମାନାଙ୍କ୍ ଲାଗି ପଇସ୍ ମିନ୍ଦେ, ଆୱ୍ ସାର୍ରେ ୱିଡ଼୍ସି ମେଣ୍ଡ୍ ଗାଡ଼୍ସ୍ ଆସ୍ ମାନ୍ ମାଇଦିଙ୍କ୍ ତିଆର୍ ଆଦାନାଦିନ୍ ମୁନେ ମିରି ଆନ୍ଦିକାଲ୍ । ବେନନ୍ ପର୍ର ମାନାଦ୍ ଆରାମ୍ ନୁଞ୍ଚ୍ ତେରାନ୍ ବିଶ୍ୱାସ୍ ଆଶା ମାଡ଼ମିନ୍ଦେ, ଆରାମ୍ ନୁଞ୍ଚ ମାଡେଙ୍ଗ୍ ଆନା ବେନଙ୍କ୍ ମାନାଲ୍ ବିଶ୍ୱାସ ୱାଟିତାଲ୍ ଆ ଜିସୁନ୍ ପର୍ର ମାନ୍ କାଣ୍ଡ୍କ୍ ୱାଟିକାଡ୍, ଅଣ୍ଡ୍ କ୍ରୁଶତେ ୱେରେତେ ତାନାଦ୍ ପାଡିୟନୁଞ୍ଚ୍ ୱେର୍ୟ କଟେମ୍ ମାତ୍ତଣ୍ଡ୍, ବଂର ୱାଦାନ୍ ଦିନାମ୍ ଅଣ୍ଡ୍ ମାଇଦିଙ୍କ୍ ନେହ୍ସିସ୍ ମାନ୍ଦାନ୍ ସୁକାମ୍ ମାଇଦିଙ୍କ୍, ସିଲ୍ୱାତାଦ୍ ଡଲାନ୍ ସିଗ୍ତିଙ୍କ୍ ଅଣ୍ଡ୍ ତୁଛଜ୍ଞାନ ମାଡ଼୍ତଣ୍ଡ୍; ଇଞ୍ଜ ଅଣ୍ଡ୍ ଦେଉଡ୍ତ୍ ସିଂହାସନତ୍ ତିନ୍ଦା ପାକା ମିନ୍ଦେଣ୍ଡ୍ । ଆଲ୍ସୁଡାଟ୍, ଅଙ୍କ୍ ବେସର୍ ଦୁକାମ୍ ଆସ୍ମାନ୍ତା; ଅଣ୍ଡ୍ ପାପାମ୍ ନାରୁନାଗାଙ୍କ୍ ବେସର୍ ପିନ୍ଦ୍ଆୟୱା ମାନ୍ତଣ୍ଡ୍ । ଆଦିନ୍ମାଇଦିଙ୍କ୍ ମିଡ଼୍ କଟଆସ୍ ମାନ୍ମାଟ୍ । ବାତିଙ୍ଗ୍ଇତ୍କେ ମିକିଂଙ୍କ୍ ଇଞ୍ଜେ ଆ ପାପାମ୍ ବିରୁଦ୍ଦତେ ଡଲାନ୍ ସାମାନ୍ତାଦ ଯୁଦୁ କିଦାନଙ୍କ୍ ୱେୟ । ଦେଉଡ ତାନ ପିଲାନ୍ ଲେକେନ ମିକିଂଙ୍କ୍ ବେନା ୱେଡ଼୍କେତାୱ୍ ଗଟ କେଞ୍ଜ୍ସ୍ପିମିନ୍ଦେଣ୍ଡ ଆଦ୍ ବେଲା ମିର ମାର୍ଙ୍କ୍ ଆତ୍ତିର୍ ? “ହେ ନା ମାରିଡ଼୍, ଦେଉଡ ନିକିଙ୍କ ଶାସନ୍ ମାଡ଼ାନାସୁଟ କେଞ୍ଜାଟ୍ । ଅଣ୍ଡ୍ ନିକିଙ୍କ ପାସ୍କାନାସୁଟ୍ ଦୁଃକାମ୍ ଆଇମାଟ୍ । ବାତିଙ୍କଇତକେ ଦେଉଡ ବେନଙ୍କ୍ ସାୟେ ଇନ୍ତଣ୍ଡ୍, ଅଙ୍କ୍ ଶାସାନ କିତଣ୍ଡ ମେଣ୍ଡ ବେନଙ୍କ୍ ମାର୍ ଇଞ୍ଜ କେତିତଣ୍ଡ ଅଙ୍କ୍ ତିପାଲ୍ ଇଦ୍ତଣ୍ଡ୍ ।” ନିୟାଦ୍ ଦୁକାମ୍ କାଷ୍ଟାମ୍ତିଙ୍କ୍ ବାବାଲ୍ ଇଦାନ୍ ତିପାଲ୍ ଇଞ୍ଜ ଏର୍କା ମାଡି କଟ ମାନୁଟ୍, ଇଦିନ୍ ଦ୍ୱାରା ଅଣ୍ଡ୍ ମି ସାଙ୍ଗ୍ ମାରିନ୍ ଲେକାମ୍ ବ୍ୟବହାର ମାଡ଼ିମିନ୍ଦେଣ୍ଡ୍ ଇଞ୍ଜ ପୁନ୍ଦାଙ୍କ୍ ଆଦୁତ୍ । ବାବାନାଗାଙ୍କ୍ ବେପଡ଼୍ ତିପାଲ୍ ଦର୍କ, ଆଦ୍ ଲେକେତ୍ ବେନ ମାର୍ ମିନ୍ଦେନ୍ କି ? ତାନ୍ ୱେରେ ମାର୍କିନ୍ ଲେକାମ୍ ମିକିନ୍ ଯଦି ମି ବାବାଲ୍ ଶାସନ୍ କେଞ୍ଜକଟେ ମାନ୍ତଣ୍ଡ୍, ଆଲେଇତ୍ଏ ମିଡ଼୍ ନିଜାମ୍ ମାର୍ ଆୟୱିଡ୍ । ମିଡ଼୍ ଦାରି ମୁତେନ୍ ମାରିଡ଼୍ । ମାନା ଇଦୁନିଆତ ବାବାଲ୍ ମାନାଙ୍କ୍ ତିପାଲ ଇତ୍କେବା ମାନାଲ୍ ଉକିଙ୍କ୍ ପ୍ରେମ୍ ମାଡ଼ିତାଲ୍ । ଆଲେକିତ୍କେ ମାନ ସ୍ୱର୍ଗତେ ବାବାଲ୍ ଶାସନ୍ତା ମାନେମ୍ ଆସ ମାନ୍ଦାନାଦ୍ ବେଚର୍ ନାରଗେ ସାୟାତାଦ ଜୀୱାଦରକିତା ! ମାନ ଦୁନିଆତା ବାବାଲଡ଼୍ କାଣ୍ଡକିନେ ବାତା ସାୟେତାଦ୍, ଆଦିନସାରେ ମାନାଙ୍କ୍ ଚୁଦୁର କାଲାମ ମାଇଦିଙ୍କ ଶାସନ ମାଡ଼ିତେ; କିନ୍ତୁ ମାନାଲ୍ ବେଲା ତାନ ପବିତ୍ରତାତେ କାୟିଲି ପାରଦିତାଲ, ଇଦ୍ ବିଷୟଦ୍ ମାୟିଦୀଙ୍କ ଦେଉଡ ମାନ ମଙ୍ଗଲତିଙ୍ଗ୍ ମାନାଙ୍କ୍ ଶାସନ କିତଣ୍ଡ୍ । ତିପାଲ ଦରକାନ୍ ଆସୁଟ ମାନ୍ନାଙ୍କ୍ ଆଦ୍ କାଷ୍ଟାମ୍ ଆଦାନ୍ ଲେକେମ୍ ମନେ ଆତା, ଆସ୍କେ ବା ସୁକାମତାଦ୍ ଆୟ କିନ୍ତୁ ଶାସ୍ତି ମାୟିଦୀଙ୍କ ଅଡ଼ାଦ୍ ଜୀୱା ସାୟେ ଆତ୍ତା, ଅଡ଼୍କ୍ ପେର୍କେ ଦରକାନ୍ ଦାର୍ମିକ୍ ଜୀୱାତ୍ ଲେକେତ୍ ପୁରସ୍କାର୍ ଦରକୀତର ।
ଉପଦେଶ୍ ଓ ସତର୍କଗଟ୍
ଆଦିଙ୍କ୍ ମାୟାଦ୍ ସାତ୍ୱାମ୍ ଇଲ୍ୱା କାୟି ତେଏମୁଟ୍ ମେଣ୍ଡେ ୱାଡ଼୍କମାନ୍ଦାନ୍ ବଟ୍ମିଣ୍ଡା ସାତ୍ୱାମ୍ ମାଡ଼ାଟ୍ । ତିନାଙ୍ଗ୍ ଆର୍ଦାଗ୍ ତାକାଟ୍; ଆଲେଆତ୍କେ, ମିୟାଦ୍ ତାକପାର୍ୱ କଟ ମାନ୍ଦାନ୍ କୁଟଡେକା ସାୟ୍ ଆଦ୍ତା । ସାର୍ରେତର୍ ସାଙ୍ଗ୍ ଶାନ୍ତିତେ ବାଦ୍କାନଙ୍କ୍ ନୁ ପବିତ୍ର ଜିୱା ବାଦ୍କାନଙ୍କ୍ ଉଦ୍ୟମ୍ ମାଡ଼ାଟ୍, ବାତାଙ୍କ୍ଇତ୍କେ ଆଦିଙ୍କ୍ ୱିଡ୍ସିତ୍କେ ବେନବା ପ୍ରବୁଙ୍କ୍ ଉଡ଼େପାର୍ଣ୍ଡ୍ । ସାବ୍ଦାନ୍, ବେଲାକି ଦେଉଡ୍ ଅନୁଗ୍ରମାମେ ଅନ୍ୟାୟ୍ତେ ବଞ୍ଚେମ୍ ଆୟ୍ମାଟ୍ । କାୟ୍ତେ ମାଡ଼େ ଲେକାମ୍ ଆୟ୍ମାଟ୍ । କାୟ୍ତେ ମାଡ଼େ ପେର୍ସ୍କେ, ତାନ୍ ୱିସାମ୍ତେ ନାର୍ଗେ କାରାପ୍ ଆଦ୍ତା । ଏଷୌ ଲେକେ ବେନ କାରାପ୍ ବା ଅଦର୍ମ ନାରୁଣ୍ଡ୍ ଇନା ଆୟ୍ମାଟ୍; ଅଣ୍ଡ୍ ତ ଅଣ୍ଡୟ୍ ଅଲ୍ତେ କାଦି ସେଙ୍ଗେ ବେଡ଼୍ୟ୍ ଦାଦାନ୍ ଅଦିକାର୍ଦିଙ୍କ୍ ୱାମି ମାତ୍ତଣ୍ଡ୍ । ତାନ୍ପେର୍କେ ଅଣ୍ଡ୍ ବାବାନ୍ ଆର୍ଶିବାଦ୍ ପାଏମ୍ ଆଦାନଙ୍କ୍ ଇଚ୍ଛା ମାଡ଼୍ତଣ୍ଡ୍, ଇତ୍କେ ପାଏମ୍ ଆଦେ ପାର୍ୱଣ୍ଡ୍ । ନାର୍ଗେ କାଣ୍ଡେଡ଼୍ ରାପି ଅଣ୍ଡ୍ ନିଜର୍ ମାଡ଼୍ତେ ପାଡ଼୍ୟିଦିଙ୍କ୍ ବଦ୍ଲା ମାଡ଼େ ପାର୍ୱମାତ୍ତଣ୍ଡ୍ । ଇସ୍ରାଏଲୀୟଡ଼୍ ଲେକେ ମିଡ଼୍ ସିନାଇ ମେଟେତ୍ ପର ନିଡ଼୍ତାନ୍ କିସ୍, ଗାଟି ଇକାଡ଼୍, ଗାଲ୍ୱାର୍ସାମ୍, ମଇର୍ ନେକାନାଲ୍ଦ୍ ଲେଙ୍ଗ୍ ନୁ ପାୟୁର୍ତେ ଲେଙ୍ଗ୍ ଏୱୟେ । ଇଶ୍ରାଏଲୀୟଡ଼୍ ଆଦ୍ ଲେଙ୍ଗ୍ କେଞ୍ଜୀ କେସ୍ ମାତ୍ତଡ଼୍, ବେଲାକି ଅଡ଼୍ ମେଣ୍ଡେ ଆଗାକନ୍ସ୍ ଅଣ୍ଡ୍ପଦ୍ ଗଟ୍ବା କେଞ୍ଜଡ଼୍, ବାତେଙ୍କ୍ ଇତ୍କେ “ପଶୁ ଗାଲା ଆଦ୍ ମେଟେତିଙ୍କ୍ ଇଟ୍କେ, ଆଦିଙ୍କ୍ କାଲ୍କିନ୍ ତଡ଼୍ ଆୱୁକିତଡ଼୍,” ଇଦ୍ କଷ୍ଟ ଆଦେଶ୍ ଅଡ଼୍ ଇଚ୍ଛା ମାଡ଼େ ପାର୍ୱମାତ୍ତଡ଼୍ । ଆଦ୍ ଦୃଶ୍ୟ ଉଡ଼ାନଙ୍କ୍ ଗାଟି ୱେର୍ରେ ମାତ୍ତେ, ମଶାଲ୍ କେତ୍ତଣ୍ଡ୍, “ନାନ୍ ୱେର୍ରେତେ ୱାଡ଼୍କୁତାନ୍ ।” ଇତ୍କେ ମିଡ଼୍ ୱାତ୍ତିଡ଼୍ ସିୟୋନ୍ ମେଟେତାଗ୍, ଜିୱେତାଦ୍ ଇଶ୍ୱର୍ତେ ନଗରୀ ସ୍ୱର୍ଗତାଦ୍ ଯିରୁଶାଲେମ୍ତାଗ୍, ବେଗେ ହଜାର୍ ହଜାର୍ ସ୍ୱର୍ଗଦୂତଡ଼ାଦ୍ ମାନ୍ଦ୍ ଗୁଡ଼ିତଡ଼୍ । ଇଶ୍ୱର୍ତାଦ୍ ମୁନେନ୍ ପୁଟ୍ତେ ପିଲାନ୍ ପେଦେର୍ ସ୍ୱର୍ଗତାଗ୍ ଲେକାଆତ୍ତେ, ମିଡ଼୍ ଅଡ଼୍ୱାଦ୍ ୱେଡ଼୍କେ ମାଡ଼ାନାଗ୍ ୱାତ୍ତିଡ଼୍ । ସାର୍ରେ ମାନେୟ୍ ଜାତିତ୍ ବିଚାର୍ ଇଶ୍ୱର୍ତେ ଗାର୍ରେ ନୁ ସାୟେ ଦାର୍ମାମ୍ ନାରୁଡ଼ାଦ୍ ଆତ୍ମାକିନ୍ ଗାର୍ରେ ମିଡ଼୍ ୱାତ୍ତିଡ଼୍ । ମେଣ୍ଡେ, ପୁନା ନିୟମ୍ ତିୟାର୍ ମାଡ଼୍ତେ ଜିସୁନ୍ ଗାର୍ରେ ନୁ ବେନନ୍ ନେତୁର୍ ହେବଲ୍ତେ ନେତୁର୍ ତାଗାଙ୍କ୍ ବାଡ଼୍ୟେ ବିଷୟ୍ ଇଦ୍ତଣ୍ଡ୍ ଇଞ୍ଜ ଆଶେ ମାଡ଼ୁତମ୍, ଆଦ୍ ନେତୁର୍ତେ ଗାର୍ରେ ୱାସ୍ମିନ୍ଦେଡ଼ି । ଉଡ଼ାଟ୍ ସାବ୍ଦାନ୍, ଅନ୍ ଗଟ୍ତିଙ୍କ୍ ଆସାମ୍ ଇଞ୍ଜ ଆଲ୍ସ୍ମାଟ୍ । ସ୍ୱର୍ଗତାଗାଙ୍କ୍ କାବୁର୍ ଆସ୍ ୱାସ୍ ପୃତିବିତାଗ୍ କେତ୍ତେନଣ୍ଡ୍ ନାରୁଣ୍ଡ୍ତିଙ୍କ୍ ବେନଡ଼୍ କେଞ୍ଜଡ଼୍, ଅଡ଼୍ ବେନଡ଼୍ ବା ରକ୍ଷା ପାଏମ୍ ଆୟଡ଼୍ । ଆଲାଇତ୍କେ, ଇଞ୍ଜେ ବେନ ସ୍ୱର୍ଗତାଗ୍ ମାଞ୍ଜ୍ ଗଟି କେତୁତଣ୍ଡ୍, ଅଂକିଙ୍କ୍ ପାସ୍କେ ମାନାଡ଼୍ ବାତ୍ ରକ୍ଷା ପାଏମ୍ ଆଦ୍ତାଡ଼୍ ? ଆସୁଟ୍ ଅନ୍ ଲେଙ୍ଗ୍ ପୃତିବିତିଙ୍କ୍ ୱାଡ଼୍ସ୍କିସ୍ ମାତ୍ତେ । ଇଞ୍ଜେ ଅଣ୍ଡ୍ ପ୍ରତିଜ୍ଞା ମାଡ଼ି ମିନ୍ଦେଣ୍ଡ୍, “ନାନ୍ ମେଣ୍ଡଅନ୍ଦାମ୍ ପୃତିବିତିଙ୍କ୍ ଆୟ, ମୟଲ୍ତିଙ୍କ୍ ଗାଲା ୱାଡ଼୍ସ୍କିଦ୍ତାନ୍ ।” ଇଗାଙ୍କ୍ ନିଜାମ୍ ଯେ, ଅଣ୍ଡ୍ “ମେଣ୍ଡଅନ୍ଦାମ୍,” ବାତ୍ ମାଡ଼ିତଣ୍ଡ୍, ଅଦିନ୍ତଡ଼୍ ସୃଷ୍ଟିତାଦ୍ ସାର୍ରେ ବିଷୟ୍ ୱାଡ଼୍କି ଦଂସ ଆଦ୍ତା । ବେନ୍ସାର୍ରେ ବିଷୟ୍ ୱାଡ଼୍ସ୍କାନଙ୍କ୍ ଆୟ, ଆୱୁ ଗାଡ଼୍ସ୍ ଆସ୍ ମାନ୍ତା । ଆଦିଙ୍କ୍ ୱାଡ଼ାଟ୍, ମାନାଡ଼୍ ରାଜି ଆଦିତାଡ଼୍, ବାତେଙ୍କ୍ଇତ୍କେ ମାନାଡ଼୍ ସାର୍ରେଦିନାତାଦ୍ ରାଜ୍ୟ ପାଏମ୍ ଆଦ୍ତାଡ଼୍ । ୱାଡ଼ାଟ୍, ମାନାଡ଼୍ ଦନ୍ୟବାଦ୍ ଇଦ୍ତାଡ଼୍ ମେଣ୍ଡେ ବକ୍ତି ନୁ ୱେର୍ସ୍ ଇଶ୍ୱର୍ତିଙ୍କ୍ ୱେଡ଼୍କେ ଆସ୍ ପୁଜେ ମାଡ଼ିତାଡ଼୍ । ବାତେଙ୍କ୍ଇତ୍କେ ନିଜାମ୍ ମାନ୍ ଇଶ୍ୱର୍ ଅଣ୍ଡୟ୍ ଦଂସମାଡ଼ାନ୍ କିସ୍ ଲେକେତଣ୍ଡ୍ ।
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.