ପୁନାଦ୍ ଆର୍ର୍
ଗାଲାତୀୟ 5:22
Verse 22 is marked below, with the whole chapter around it. Read from the start
ମିୟାଦ୍ ସ୍ୱାଦିନତାତିଙ୍କ୍ ସାୟେ ନେଏମୁଟ୍
ମାନାଡ଼୍ ସ୍ୱାଦିନ୍, ସ୍ୱାଦିନତା ମାଇଦିଙ୍କ୍ କ୍ରିଷ୍ଟ ମାନାଙ୍କ୍ ମୁକ୍ତି ମାଡ଼ିମିନ୍ଦେଣ୍ଡ୍; ଆଦିଙ୍କ୍ ଗାଡ଼୍ସ୍ ଆସ୍ ମାନୁଟ୍ ନୁ ଦାସ ଯୁଆଡ଼ିତାଗ୍ ମେଣ୍ଡେ ଯଡ଼େମ୍ ଆୟ୍ମାଟ୍ ।
କେଞ୍ଜାଟ୍, ନାନ୍ ପାଉଲ୍ ମିକିଙ୍କ୍ କେତୁତାନ୍, ଯଦି ମିଡ଼୍ ସୁନ୍ନତ ଆଦ୍ତିଡ଼୍, ଆଲେକେ କ୍ରିଷ୍ଟଟନ୍ ତଡ଼୍ ମିୟାଦ୍ ବାତ୍ ଲାବ୍ ଆୟ । ନାନ୍ ସୁନ୍ନତ ପାଏମ୍ ଆଦାନଡ଼୍ ସାରେ ତଡ଼୍କିଙ୍କ୍ ମେଣ୍ଡନ୍ଦାମ୍ କେତୁତାନ୍ ଯେ, ମୋଶାନ୍ ନିୟମ୍ ସାରେ ପାଲନ୍ ମାଡ଼ାନ୍ ସେଙ୍ଗେ ଅଡ଼ାଦ୍ ଦାୟିତ୍ୱ । ମିଇ ଲୋପେଙ୍କ୍ ବେସ୍କ୍ତୁଡ଼୍ ନିୟମ୍ ତଡ଼୍ ଦାର୍ମାମ୍ ଆଦାନଙ୍କ୍ ଆଲ୍ସୁତିଡ଼୍, ମିଡ଼୍ କ୍ରିଷ୍ଟନାଗାଙ୍କ୍ ୱେରେ ଆତ୍ତିଡ଼୍, ମିଡ଼୍ ଇଶ୍ୱରତେ ଅନୁଗ୍ରହ ତାଗାଙ୍କ୍ ୱେରେ ଆତ୍ତିଡ଼୍ । ଇତ୍କେ ମାନାଡ଼୍ ଆଶେ ନେଃଏସ୍ ମିନ୍ଦେଡ଼୍ ଯେ, ଇଶ୍ୱର୍ ମାନାଙ୍କ୍ ନିର୍ଦୋଷ୍ ମାଡ଼ିତଣ୍ଡ୍, ମାନ୍ୱାଦ୍ ବିଶ୍ୱାସ୍ ଲେକାମ୍, ମାନ୍ ଲୋପେ ପାଡ଼୍ୟି ମାଡ଼ମାନ୍ଦାନ୍ ପବିତ୍ର ଆତ୍ମାନ୍ ଶକ୍ତିତଡ଼୍ ବିଶ୍ୱାସ୍ ମାଡ଼ ମାନ୍ଦାନ୍ ସେଙ୍ଗେ ଦାର୍ମାମ୍ ପାଏମ୍ ଆଦାନ୍ ଆସେତିଙ୍କ୍ କେପମିନ୍ଦେମ୍ । ଆଦିଙ୍କ୍ କ୍ରିଷ୍ଟ ଜିସୁନ୍ ତଡ଼୍ ଜିୱୁଣ୍ଡ୍ ବାଦ୍କେ ସୁନ୍ନତ କି ଅସୁନ୍ନତ ବାତେବା ୱେରେ ମାନ, ଇତ୍କେ ବିଶ୍ୱାସ୍ତାଗ୍ ଗାଡ଼୍ସ୍ ମାଞ୍ଜ୍ ପ୍ରେମତଡ଼୍ ପାଡ଼୍ୟି ମାଡ଼ାନାଦ୍ ସାୟେ ।
ମିଡ଼୍ ସାୟେ ଲେକାମ୍ ପାଡ଼ିୟି ମାଡ଼ମାତ୍ତିଡ଼୍, ସତ୍ ଆର୍ତାଗ୍ ଆଦାନ୍ୱେଲେ ବେନ ମିକିଙ୍କ୍ ମନାମାଡ଼୍ତଣ୍ଡ୍ ? ଅଣ୍ଡ୍ ବେଲା ସତ୍ ଆର୍ଦାଗ୍ ଆନ୍ମାଟ୍ ଇଞ୍ଜ କେତ୍ତଣ୍ଡ୍ ? ମିକିଙ୍କ୍ କାର୍ଙ୍ଗ୍ତେ ଇଶ୍ୱର୍ତାଗାଙ୍କ୍ ଇଦ୍ ଗଟ୍ ୱାଡ଼ । 1ଗଟ୍ତାଗ୍ ମିନ୍ଦେ, “ପିସ୍କ୍ତେ ମଇଦାତିଙ୍କ୍ ତୟ୍ସ୍ପାନ୍ ମାଇଦିଙ୍କ୍ ସୁଦୁଟ୍ ଇନା କମିର2 ଦର୍କାର୍ ।” ଆଦ୍ ବାତ୍ ଆୟି, ଇଞ୍ଜେକ୍ଆନା ମୀଇ ମିଡ଼୍ ଯେ ମେଣ୍ଡନ୍ରକମ୍ ବିଚାର୍ ମାଡ଼୍ୱିଡ଼୍, ଇଦ୍ ନାୟାଦ୍ ମି ବିଷୟ୍ତେ ପ୍ରବୁନାଗ୍ ଗାଟି ବିଶ୍ୱାସ୍ ମିନ୍ଦେ; ଇତ୍କେ ମିଡ଼୍ ଗାଟି ଦାନ୍ଦେ ଆଦୁତିଡ଼୍, ଅଣ୍ଡ୍ ବେନବା ଆୟିଣ୍ଡ୍, ତାନ୍ ଦଣ୍ଡ୍ ପାଏମ୍ ଆଦ୍ତଣ୍ଡ୍ ।
ଆଦିଙ୍କ୍ ଆ ଦାଦାଲଡ଼ି ନୁ ହେଲାସ୍କ୍ ନଡ଼ି, ଯଦି ନାନ୍ ଇଞ୍ଜେ ଗାଲା ସୁନ୍ନତବିଦି ପ୍ରଚାର୍ ମାଡ଼ୁତାନ୍, ଆଲେକେ ବାତେଙ୍କ୍ ନାନ୍ ଇଞ୍ଜେ ଗାଲା ତାଡ଼ନା ପାଏମ୍ ଆଦୁତାନ୍ ? ଆଲେକେ କ୍ରିଷ୍ଟନ୍ କ୍ରୁଶ ତ ଇଞ୍ଜେ ଅସୁବିଦାତେ ବିଷୟ ଆୟ । ବେନଡ଼୍ ମିକିଙ୍କ୍ ଇଞ୍ଜେ ଗାଲା ଦାନ୍ଦେ ମାଡ଼ୁତଡ଼୍, ଅଡ଼୍କିଂଙ୍କ୍ ମଦଲ୍ କଞ୍ଚ୍ ଯୌନଆଙ୍ଗ କୟ୍କେ, ସାୟେ ଆୟେଡ଼୍ ।
ଆ ଦାଦାଲଡ଼ି ନୁ ହେଲାସ୍କ୍ ନଡ଼ି, ମିଡ଼୍ ସ୍ୱାଦିନତା ସେଙ୍ଗେ ୱାତ୍ତିଡ଼୍; ଆଦିଙ୍କ୍ ମେନ୍ଦୁଲ୍ତେ ଆଶେ ପୁରା ମାଡ଼ାନ୍ ସେଙ୍ଗେ ମଜା ମାଡ଼୍ମାଟ୍, ମିଡ଼୍ ମି ଲୋପେ ପ୍ରେମତେ ଦାସ ଆୟ୍ମୁଟ୍ । ବାତେଙ୍କ୍ଇତ୍କେ ସାରେ ନିୟମ୍ ଇଦ୍ ଅଣ୍ଡୟ୍ ବାକ୍ୟତଡ଼୍ ପୁରା ଆତ୍ତେ, “ମିଡ଼୍ ମିୱଡ଼୍ ଗାରେତଡ଼୍କିଂଙ୍କ୍ ଜିୱୁଣ୍ଡ୍ ଲେକାମ୍ ପ୍ରେମ ମାଡ଼ାଟ୍ ।” ମିଡ଼୍ ଯଦି କାସାକାଚି ଆସ୍ ମି ମିଲୋପେ ପୟ୍ତିତିଡ଼୍, ଆଲେକେ ସତର୍କ ଆୟ୍ମୁଟ୍, ବେଲାକି ମିଡ଼୍ ମି ଲୋପେ ନସ୍ଟ ଆୟ୍ୱିଡ଼୍ ।
ମେଲ୍ତେ ଜିୱେ ନୁ ମାନେୟ୍ତେ ବ୍ୟବହାର୍
ନାନ୍ କେତାନାଦ୍ ଗଟ୍ ଅଦୁତ୍, ପବିତ୍ର ଆତ୍ମା ମିୟାଦ୍ ଆତ୍ମାତିଙ୍କ୍ ଚାଲେମ୍ ମାଡ଼ି, ଆଲେକେ ମିଡ଼୍ ନାରୁଡ଼ାଦ୍ ମେନ୍ଦୁଲ୍ ଲାଲ୍ସାତିଙ୍କ୍ ମେଣ୍ଡେପୁରା ମାଡ଼୍ୱିଡ଼୍ । 3ବାତେଙ୍କ୍ଇତ୍କେ ମେନ୍ଦୁଲ୍ ଲାଲ୍ସା ଜିୱୁଣ୍ଡ୍ତିଙ୍କ୍ ବିରୁଦ୍ ମାଡ଼ିତ୍, ମେଣ୍ଡେ ଜିୱୁଣ୍ଡ୍ତାଦ୍ ଲାଲ୍ସା ମେନ୍ଦୁଲ୍ତିଙ୍କ୍ ବିରୁଦ୍ ମାଡ଼ିତ୍, ଆଦିଙ୍କ୍ ଇୱୁ ରେଣ୍ଡ୍ ଇପାକ୍ ନୁ ଆପାକ୍; ଆଦିଙ୍କ୍ ମିଡ଼୍ ବାତ୍ ବାତ୍ ଇଚ୍ଚା ମାଡ଼ିତିଡ଼୍, ଆୱୁ ସାରେ ମାଡ଼ାନଙ୍କ୍ ପାର୍ୱିଡ଼୍ । ମିଡ଼୍ ଯଦି ପବିତ୍ର ଆତ୍ମା ତଡ଼୍ ଚାଲେମ୍ ଆଦ୍ତିଡ଼୍, ଆଲେକ୍ ନିୟମ୍ ଅଦିନ୍ତେ ଆୟ୍ୱିଡ଼୍ ।
ମେନ୍ଦୁଲ୍ତାୱୁ ପାଡ଼୍ୟି ସାରେ ତ ସାୟେ ପୁତ୍ତାଡ଼୍, ଦାରି ପାଡ଼୍ୟି, ଅଶୁଚି, କାମନା ବା କାରାପ୍ ପାଡ଼୍ୟି, ପୁତ୍ଲାମ୍ପୁଜା, ୱାଡେ ବିଦ୍ୟା, ଶତ୍ରୁତା, ଗଲ୍କ୍, ଆଂକାର୍, କପାମ୍, ସ୍ୱାର୍ତପର, ମାନ୍ଦେବିରୁଦ୍, ଗଟ୍ବିରୁଦ୍, ଇର୍ସା, ମାତ୍ୱାରି, ରଙ୍ଗରସ, ଇଦ୍ଲେକେତ୍ କାମ୍ସାରେ; ନାନ୍ ମୁନେଙ୍କ୍ ବେଲାନ୍ କେସ୍ମାତ୍ତାନ୍, ଆଦେଲେକାମ୍ ମୁନେନ୍ କେତୁତାନ୍ ଯେ, ବେନଡ଼୍ ଇୱୁ ସାରେ କାମ୍ ମାଡ଼ିତନ୍, ଅଡ଼୍ ଇଶ୍ୱର୍ତେ ରାଜ୍ୟତାଗ୍ ଅଦିକାରି ଆୟଡ଼୍ ।
ଇତ୍କେ ପବିତ୍ର ଆତ୍ମାନ୍ ଦାନ ଆଦୁତ୍ ପ୍ରେମ, ୱେଡ଼୍କେ, ଶାନ୍ତି, ଦର୍ଯ୍ୟ, ଉପକାର୍, ସାୟେତଣ୍ଡ୍, ବିଶ୍ୱାସ୍ତଣ୍ଡ୍ ନମ୍ର ନୁ ଆତ୍ମସଂଯମ୍; ଇୱୁ ସାରେ ବିରୁଦ୍ତେ ବାତେ ନିୟମ୍ ଇଲ୍ଲେ । ବେନଡ଼୍ କ୍ରିଷ୍ଟ ଜିସୁନ୍ ନାରୁଡ଼୍, ଅଡ଼୍ ମେନ୍ଦୁଲ୍ତିଙ୍କ୍ ଆଦିନ୍ ଇଚ୍ଚା ନୁ ଆଶେ ତଡ଼୍ କ୍ରୁଶତାଗ୍ ଆୱୁକ୍ତଡ଼୍ । ଯଦି ମାନାଡ଼୍ ପବିତ୍ର ଆତ୍ମାତଡ଼୍ ଜିୱୁଣ୍ଡ୍ ପାଏମ୍ ଆତ୍ତାଡ଼୍, ଆଲେକେ ଅଣ୍ଡ୍ ମାନ୍ ଜିୱେତିଙ୍କ୍ ମିକା ଚାଲା ମାଡ଼ିଣ୍ଡ୍ । ମାନାଡ଼୍ ଆଙ୍ଗ୍ଡ଼ାମ୍ ଗର୍ବ ତଅସ୍ ମାନ୍ ମାନ୍ଲୋପେ କପାମ୍ ଆୟ୍ୱାଡ଼୍ ନୁ ମାନ୍ ମାନ୍ଲୋପେ ଇର୍ସା ଆୟ୍ୱାଡ଼୍ ।
Source notes (3)
- Cross-reference ୧ କରନ୍ତିୟ ୫:୬.
- Footnote କମିର ଇତ୍କେ ରୂଟିତିଙ୍କ୍ ତୟପ୍ସାନାଦ୍ ଗୁଣ୍ଡାଲ୍
- Cross-reference ରୋମୀୟ ୭:୧୫-୨3.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.