ପୁନାଦ୍ ଆର୍ର୍
୧ ଥେସଲନିୟ 2
ଥେସଲନିତାଗ୍ ପାଉଲ୍ତେ ପାଡ଼୍ୟି
ହୋ ଦାଦାନଡ଼ି ନୁ ଏଲାସ୍କ୍ ! ମିଡ଼୍ ନିଜେ ପୁତ୍ତିଡ଼୍ ଯେ, ମିଇ ପାକେ ମାୟାଦ୍ ୱାଦାନାଦ୍ ବ୍ୟର୍ତ ଆୟ୍ୟ । 1ଥେସଲନିତାଗ୍ ମିଇ ପାକେ ୱାଦାନ୍ ମୁନେ ଫିଲିପୀତାଗ୍ ମା ସେଙ୍ଗେ ବେଦ୍ଲେକାମ୍ ତିପାଲ୍ ନୁ କାରାପ୍ ପାଡ଼୍ୟି ମାଡ଼ମାତ୍ତଡ଼୍, ଆଦ୍ ମିଡ଼୍ ପୁତ୍ତିଡ଼୍ । ଇଶ୍ୱର୍ତାଗାଙ୍କ୍ ଦର୍କିମାନ୍ଦାନ୍ ସୁସମାଚାର୍ ମିକିଂଙ୍କ୍ କେଞ୍ଜ୍ପାଙ୍କ୍ ସେଙ୍ଗେ ଅଣ୍ଡ୍ ମାନ୍ନାଙ୍କ୍ ଶକ୍ତି ଇସ୍ମାତ୍ତନ୍ । ବାତେବା କାରାପ୍ ବା ପିନ୍ଦ ଲେକାମ୍ ଆସ୍ ମାମ୍ମେ ମିଇ ପାକେ ମାୟାଦ୍ ମାଟେ କେଲ୍ୱେ ମାତ୍ତମ୍, ମିକିଂଙ୍କ୍ ଟକାମାଡ଼ାଙ୍କ୍ ବାତେବା କାରାପ୍ ଚିନ୍ତେ ମାଡ଼ମ୍ । ବାତେଙ୍କ୍ଇତ୍କେ ଇଶ୍ୱର୍ତେ ଇଚ୍ଛା ଲେକାମ୍ ଗଟ୍ ମାମ୍ମେ ସାରେଦାମ୍ କେତିତମ୍; ଅଣ୍ଡ୍ ମାକିଂଙ୍କ୍ ସାୟେ ଏର୍କା ମାଡ଼ି ମା ପର୍ର ସୁସମାଚାର୍ ପ୍ରଚାର୍ତେ ଦାୟିତ୍ୱ ୱିଡ଼୍ସିତ୍ତନ୍ । ନାରୁଡ଼୍କିଂଙ୍କ୍ ଶାନ୍ତି ମାଡ଼ାନାଦ୍ ମାୟାଦ୍ ପାଡ଼୍ୟି ଆୟ୍ୟ । ବେନ୍ ଇଶ୍ୱର୍ ମାନ୍ ମନ୍ତେ ସାରେ ପରିକ୍ଷା ମାଡ଼ି ଉଡ଼ିତନ୍, ମାତର୍ ଅଂକିଙ୍କ୍ ଶାନ୍ତି ମାଡ଼ାନ୍ ସେଙ୍ଗେ ମାୟାଦ୍ ଇଚ୍ଛା । ମିଡ଼୍ ସାୟେ ପୁତ୍ତିଡ଼୍ ଯେ, ମାମ୍ମେ କାରାପ୍ ଗଟି କେସ୍ ମିଇ ବକେତ୍ ୱାଡ଼ମ୍ ବା ଆଶେତଡ଼୍ ମିଇ ପାକେଙ୍କ୍ ଚଲ ବ୍ୟବହାର୍ ମାଡ଼୍ୱେ ମାତ୍ତମ୍, ଇଦ୍ ବିଷୟ୍ତେ ଇଶ୍ୱର୍ ମା ସାକ୍ଷି । ମାମ୍ମେ ବେନଡ଼ାଗାଙ୍କ୍ ସମ୍ମାନ୍ ପାଏମ୍ ଆଦ୍ଦାନ୍ ସେଙ୍ଗେ ଇଚ୍ଛା ମାଡ଼୍ୱେ ମାତ୍ତମ୍ । ମିୟାଗାଙ୍କ୍ ବା ବାଗାତ୍ ନାରୁଡ଼ାଗାଙ୍କ୍ ମାମ୍ମେ ଆଶେ ମାଡ଼୍ୱେ ମାତ୍ତମ୍, ଯଦି କ୍ରିଷ୍ଟନ୍ ପ୍ରେରିତ୍ ଶିଷ୍ୟଡ଼୍ ଲେକାମ୍ ମାମ୍ମେ ମିୟାଗାଙ୍କ୍ ଆଦ୍ ଦାବୀ ମାଡ଼େ ପାର୍ୱେମ୍, ବାତେଙ୍କ୍ ଇତ୍କେ ୟାୟ୍ ବେଦ୍ଲେକାମ୍ ନିଜେତ୍ ପିଲାଙ୍କ୍ ଯତନ୍ ଆଦ୍ତେ, ମିଇ ପାକେ ମାନ୍ଦାନ୍ ୱେଲେ ମାମ୍ମେ ମିଇ ସେଙ୍ଗେ ଆଦେଲେକାମ୍ ଲେକେତ୍ ବ୍ୟବହାର୍ ମାଡ଼ିମାତ୍ତମ୍ । ମିଇ ସେଙ୍ଗେ ମାୟାଦ୍ ପ୍ରେମ ମାନ୍ନାଙ୍କ୍ ମାମ୍ମେ ଆଦ୍ଲେକାମ୍ ମିକିଂଙ୍କ୍ ଇଶ୍ୱର୍ତେ ସୁସମାଚାର୍ କାଲ୍ପ୍ୱେ ମାତ୍ତମ୍, ନିଜେତ୍ ନିଜେତ୍ ଜିୱୁନ୍ ହିଦାଙ୍କ୍ ତିୟାର୍ ମାତ୍ତମ୍ । ମିଡ଼୍ ମା ଲେକେତ୍ ସାଙ୍ଗ ମାତ୍ତିଡ଼୍ । ହୋ ଦାଦାନଡ଼ି ନୁ ଏଲାସ୍କ୍, ମିୟାଦ୍ ନିଜାମ୍ ହେର୍କା ମାନ୍ତେ; ମାନାଡ଼୍ ବେଲାନ୍ ଗାଟି ତିପାଲ୍ତେ ସ୍ୱୀକାର୍ ମାଡ଼ି ପାଡ଼୍ୟି ମାଡ଼ମାତ୍ତମ୍; ବେଲାନ୍ ମିଇ ପାକେ ଇଶ୍ୱର୍ତେ ସୁସମାଚାର୍ ପ୍ରଚାର୍ ମାଡ଼ାନ୍ ୱେଲେ ମିଇ ପର୍ର ବୋଜ୍ ଆୟ୍ମାକି ହିଞ୍ଜ ମାମ୍ମେ ନାର୍କେତ୍ ପାୟାଲ୍ ତିପାଲ୍ ମାଡ଼ିମାତ୍ତମ୍ । ମିଡ଼୍ ନୁ ନିଜେ ଇଶ୍ୱର୍ ମାନ୍ ସାକ୍ଷି ମିଇ ଲେକାମ୍ ବିଶ୍ୱାସିନଡ଼୍ ପାକେ ମାୟାଦ୍ ବ୍ୟବହାର୍ ନିର୍ମଲ୍, ନ୍ୟାୟସଙ୍ଗାତେ ନୁ ନିର୍ଦୋଷ୍ ମାତ୍ତା । ମିଡ଼୍ ପୁତ୍ତିଡ଼୍, ବାବାଲ୍ ବେଲାନ୍ ନିଜେତ୍ ପିଲାନ୍ ସେଙ୍ଗେ ବ୍ୟବହାର୍ ମାଡ଼ାନ୍ ମାତ୍ତେ, ମାମ୍ମେ ମିଇସେଙ୍ଗେ ଟିକ୍ ଆଦେଲେକାମ୍ ବ୍ୟବହାର୍ ମାଡ଼ିମାତ୍ତମ୍ । ମାମ୍ମେ ମିକିଂଙ୍କ୍ ଉତ୍ସାହିତ ମାଡ଼ିମାତ୍ତମ୍, ସାନ୍ୱନା ଇସ୍ ମାତ୍ତମ୍, ମେଣ୍ଡେ ମୀଇଡ଼୍ ବେଲାନ୍ ଇଶ୍ୱର୍ତେ ଯୋଗ୍ୟ ଆଚରନ୍ ମାଡ଼ାନ୍ ମାୟ୍ଦିଙ୍କ୍ କେସ୍ ମାତ୍ତଣ୍ଡ୍ ।
ମାନାଡ଼୍ ବାତ୍ତିଙ୍କ୍ ସାରେଦାମ୍ ଇଶ୍ୱର୍ତିଙ୍କ୍ ଦନ୍ୟବାଦ୍ ହିସମାନ୍ତାଡ଼୍ ଆଦିନ୍ ମେଣ୍ଡନ୍ କାରନ୍ ମିନ୍ତେ । ମାମ୍ମେ ବେସୁଙ୍କ୍ ମିଇ ପାକେ ଇଶ୍ୱର୍ତେ ସତ୍ କାବୁର୍ ତାସ୍ମାତ୍ତମ୍, ମିଡ଼୍ ଆଦ୍ ନାରୁନ କାବୁର୍ ହିଞ୍ଜ ହେର୍କା ମାଡ଼କଟ୍, ଇଶ୍ୱର୍ତେ କାବୁର୍ ହିନା କେଞ୍ଜ୍ତିଡ଼୍ ନୁ ଗ୍ରହନ୍ ମାଡ଼୍ତିଡ଼୍ । ମୁନେଙ୍କ୍ କଞ୍ଜ୍ ଆଦ୍ ଇଶ୍ୱର୍ତେ କାବୁର୍ ନୁ ମିଇ ଲେକାମ୍ ବିଶ୍ୱାସୀନଡ଼୍ ମନ୍ଦାଗ୍ ଆଦ୍ ଗେଲ୍ସି ମାନ୍ତେ । 2ହୋ ଦାଦାନଡ଼ି ନୁ ଏଲାସ୍କ୍, ମିଡ଼୍ ଯିହୂଦା ଦେଶ୍ତାଗ୍ ମାନ୍ଦାନ୍ କ୍ରିଷ୍ଟ ଜିସୁନାଗ୍ ପରମେଶ୍ୱର୍ ମଣ୍ଡଲିତେ ନାରୁଡ଼୍ ସେଙ୍ଗେ ବାତ୍ ଗଟେମ୍ ହାସ୍ମିନ୍ତେ । ଯିହୂଦା ପରମେଶ୍ୱର୍ତେ ନାରୁଡ଼୍ ବାଗାତ୍ ଯିହୁଦିନଡ଼ାଗ୍ ଦୁଃକାମ୍ କଷ୍ଟ ଆସ୍ମିନ୍ତେ । ମିଡ଼୍ ନିଜେତ୍ ଦେଶ୍ତେ ନାରୁଡ଼ାଗାଙ୍କ୍ ମିକା ଆଦେଲେକାମ୍ ଦୁଃକାମ୍ କଷ୍ଟ ଦର୍କିତ୍ । 3ଆଦ୍ ଯିହୁଦିନଡ଼୍ ପ୍ରବୁ ଜିସୁଙ୍କ୍ ନୁ ବାବବାଦୀନଡ଼୍କ୍ ଆୱୁକି ମାତ୍ତଡ଼୍ ନୁ ମାନ୍ ମିକା ଆଦେଲେକାମ୍ ତାଡ଼୍ନା ମାଡ଼ିତଡ଼୍ । ଅଡ଼୍ ସେଙ୍ଗେ ଇଶ୍ୱର୍ ବେସର୍ ଅସନ୍ତୁଷ୍ଟ ! ସାରେ ନାରୁଡ଼୍ତେ ଅଡ଼୍ ଶତ୍ରୁଡ଼୍ । ଇଦ୍ ରକମ୍ କି ବେନ୍ ସୁସମାଚାର୍ ପ୍ରଚାର୍ ତଡ଼୍ ଅଣଯିହୁଦୀଡ଼ାଦ୍ ପରିତ୍ରାଣ୍ ଆଦ୍ପାର୍ତେ, ଆଗାଙ୍କ୍ ଅଡ଼୍ ମାନ୍ ନିବୃତ ମାଡ଼ାନଙ୍କ୍ ଆଲ୍ସି ମାଡ଼ୁତଡ଼୍ । ଇଦ୍ ରକମ୍ ଅଡ଼୍ ଅନବରତ ମାଡ଼ମାନ୍ଦାନ୍ ପାପ୍ ମାତର୍ ଚରମ୍ ସୀମାତାଗ୍ ୱାସ୍ ଏୱୁତ୍ତେ । ସାରେ ମାଡ଼େଙ୍ଗ୍ ଅଡ଼୍ ବିରୁଦ୍ତେ ଇଶ୍ୱର୍ତେ କପାମ୍ ନାର୍ଗେ ଆତ୍ତେ ।
ମେଣ୍ଡେ ଆଦାନ୍ ସେଙ୍ଗେ ପାଉଲ୍ତେ ଇଚ୍ଛା
ହୋ ଦାଦାନଡ଼ି ନୁ ଏଲାସ୍କ୍, ମାମ୍ମେ ହୃଦୟ୍ତାଗ୍ ଆୟ୍ୟ, ମାତର୍ ମେନ୍ଦୁଲ୍ ତାଗାଙ୍କ୍ ସୁଦୁଟ୍ ଦିନାମ୍ ସେଙ୍ଗେ ମିୟାଗାଙ୍କ୍ ଯେକା ମାତ୍ତମ୍, ମିଇ ମୋକମ୍ ଉଡ଼ାନ୍ ସେଙ୍ଗେ ଅଦିକ୍ ଇଚ୍ଛା ମାଡ଼ୁତମ୍ । ଆଦିଙ୍କ୍ ମିୟାଗାଙ୍କ୍ ମାଲ୍ସ୍ ଆଦାନ୍ ସେଙ୍ଗେ ଅଣ୍ଡୟ୍ଦାମ୍ ଆଲ୍ସି ମାଡ଼୍ତାନ୍, ନାନ୍ ନିଜେ ପାଉଲ୍ ମାଲ୍ସ୍ ଆଦାନ୍ ସେଙ୍ଗେ ନାର୍ଗେଦାମ୍ ଆଲ୍ସି ମାଡ଼ମାତ୍ତାନ୍, ବାତେଙ୍କ୍ ଇତ୍କେ ଶୟ୍ତାନ୍ ମାନ୍ ଇଗାଙ୍କ୍ ଆଡ଼ାମ୍ ଆତ୍ତେ । ଆଦ୍ ବାତ୍ଆଇ, ନାୟାଦ୍ ବିଶ୍ୱାସ୍, ମାନ୍ ପ୍ରବୁ ଜିସୁ ୱାଦାନ୍ ୱେଲେ ଅନ୍ ମୁନେ ବାଗାତଡ଼୍ ଲେକାମ୍ ମୀଇଡ଼୍ ମିକା ମାୟାଦ୍ ଆଶେ, ୱେଡ଼୍କ୍ ନୁ ଗର୍ବ ମାଡ଼ାନାଦ୍ ସହଜ୍ ବାତେଙ୍କ୍ ଆଦ୍ତେ । ନିଜାମ୍ ମିଡ଼୍ ମାନ୍ ଗୌରବ୍ ନୁ ୱେଡ଼୍କା ।
Source notes (3)
- Cross-reference ପ୍ରେରିତ ୧୬:୧୯-୨୪; ପ୍ରେରିତ ୧୭:୧-୯.
- Cross-reference ପ୍ରେରିତ ୧୭:୫.
- Cross-reference ପ୍ରେରିତ ୯:୨3,୨୯; ୧3:୪୫,୫୦; ୧୪:୨,୫,୧୯; ୧୭:୫,୧3; ୧୮:୧୨.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.