ପୁନାଦ୍ ଆର୍ର୍
୧ ଯୋହନ୍ 4:19
Verse 19 is marked below, with the whole chapter around it. Read from the start
ଇଶ୍ୱର୍ତେ ଆତ୍ମା ନୁ ମିଚ୍ ଆତ୍ମା
ପ୍ରିୟ ସାଙ୍ଗନଡ଼ି ! ଇଶ୍ୱର୍ତେ ଆତ୍ମା ପାହେମ୍ ଆସ୍ମିନ୍ତେ ଇଞ୍ଜ୍ ବେନଡ଼୍ କେତୁତଡ଼୍, ଅଡ଼୍ ସାରେତଡ଼୍କ୍ ବିଶ୍ୱାସ୍ ମାଡ଼୍ମାଟ୍; ଅଡ଼୍ ପାଃଏମ୍ ଆସ୍ମାନ୍ଦାନ୍ ଆତ୍ମା, ସତ୍ତେ ଇଶ୍ୱର୍ତାଗେ ଆଗାତ୍ କି ଆୟ, ମୁନେ ପରିକ୍ଷା ମାଡ଼ି ଉଡ଼ାଟ୍ । ବାତେଙ୍କ୍ ଇତ୍କେ ଇଞ୍ଜେ ନାର୍ଗେ ବଣ୍ଡବାବବାଦିଡ଼୍ ସାରେତାକ୍ ବିଚରଣ୍ ମାଡ଼ୁତଡ଼୍ । ଅଡ଼୍ ଇଶ୍ୱର୍ତେ ଆତ୍ମା ପାହେମ୍ ଆସ୍ମିନ୍ଦେଡ଼୍ କି ଇଲେ, ତାନାଦ୍ ପୁନ୍ଦାନାଦ୍ ଉପାୟ ଅଦୁତ୍, ବେନ୍ ନାରୁନାଗେ ଇଶ୍ୱର୍ତେ ଆତ୍ମା ଅଦିଷ୍ଠତ, ଅଣ୍ଡ୍ କୁଲେମ୍ ଲେଙ୍ଗ୍ଦେ ସ୍ୱୀକାର୍ ମାଡ଼ିତନ୍ ଯେ, ଜିସୁ କ୍ରିଷ୍ଟ ନାରୁନ୍ ଲେକାମ୍ ୱାସ୍ମାତ୍ତଣ୍ଡ୍ । କିନ୍ତୁ ବେନ୍ ଜିସୁନ୍ ବିଷୟତେ ଇଦ୍ ଗଟ୍ ସ୍ୱୀକାର୍ ମାଡ଼ଣ୍ଡ୍, ଅଣ୍ଡ୍ ବେସୁଙ୍କ୍ ମିକା ଇଶ୍ୱର୍ତେ ଆତ୍ମା ଲାବ୍ ମାଡ଼ଣ୍ଡ୍, କ୍ରିଷ୍ଟନ୍ ଶତ୍ରୁନାଗାଙ୍କ୍ ଅଣ୍ଡ୍ ଆଦ୍ ଆତ୍ମା ପାଏମ୍ ଆତ୍ତଣ୍ଡ୍, ଇଦ୍ ଆତ୍ମାତେ ଆଗମନ୍ ବିଷୟତେ ମିଡ଼୍ କେଞ୍ଜ୍ତିଡ଼୍ ଆଦ୍ ଇଞ୍ଜେ ଇଦ୍ ଜଗତ୍ତାଗେ ମିନ୍ଦେ ।
କିନ୍ତୁ ପିଲାନଡ଼ି ! ମିଡ଼୍ ଇଶ୍ୱର୍ତେ ପିଲା । ଆ ବୁସା ମାଡ଼ାନ୍ ବାବବାଦୀଡ଼୍କ୍ ମିଡ଼୍ ଆରା ମାଡ଼୍ତିଡ଼୍, ବାତେଙ୍କ୍ଇତ୍କ ମୀଇ ହୃଦୟତାଗ୍ ବାସେ ମାଡ଼ମାନ୍ଦାନ୍ ଇଶ୍ୱର୍ତେ ଆତ୍ମା, ସଂସାର୍ତେ ନାରୁଡ଼୍ ଆତ୍ମାତାଗାଙ୍କ୍ ଅଦିକ୍ ଶକ୍ତିଶାଳି । ବୁସା ମାଡ଼ାନ୍ ବାବବାଦୀଡ଼୍ ସଂସାର୍ତେ ଗଟି କେସ ଉଡୁତଡ଼୍ ନୁ ସାଂସାରିକ୍ ନାରୁଡ଼୍ ଅଡ଼୍ ଗଟି କେଞ୍ଜୁତଡ଼୍ । କିନ୍ତୁ ମାନାଡ଼୍ ଇଶ୍ୱର୍ତେ ନାରୁଡ଼୍ । ବେନ ଆୟି ଇଶ୍ୱର୍ତିଙ୍କ୍ ପୁତ୍ତଣ୍ଡ୍, ଅଣ୍ଡ୍ ମାନ୍ ସେଙ୍ଗେ କେଞ୍ଜିତନ୍ । ବେନଡ଼୍ ଇଶ୍ୱର୍ତଡ଼୍ ଆୟଡ଼୍, ଅଡ଼୍ ମାନ୍ ଗଟି କେଞ୍ଜଡ଼୍ । ସତ୍ ଆତ୍ମା ନୁ ମିଚ୍ ଆତ୍ମା ଲୋପେ ଇଦ୍ ୱେରେ ମାନାଡ଼୍ ଉଡ଼େ ପାର୍ତାଡ଼୍ ।
ଇଶ୍ୱର୍ ପ୍ରେମମୟ
ଆ ନା ପ୍ରିୟ ସାଙ୍ଗନଡ଼ି ! ନିଜର୍ ନିଜର୍ ଲୋପେ ପ୍ରେମ ମାଡ଼ାଟ୍, ବାତେଙ୍କ୍ଇତ୍କେ ପ୍ରେମ ଇଶ୍ୱର୍ତାଗାଙ୍କ୍ ୱାତ୍ତେ । ବେନନ୍ ହୃଦୟତାଗ୍ ପ୍ରେମ ମିନ୍ଦେ, ଅଣ୍ଡ୍ ଇଶ୍ୱର୍ତେ ପିଲା, ଅଣ୍ଡ୍ ଇଶ୍ୱର୍ତିଙ୍ଗ୍ ପୁତ୍ତଣ୍ଡ୍ । ବେନ ପ୍ରେମ ମାଡ଼ଣ୍ଡ୍, ଅଣ୍ଡ୍ ଇଶ୍ୱର୍ତିଙ୍କ୍ ପୁନଣ୍ଡ୍, ବାତେଙ୍କ୍ଇତ୍କେ ଇଶ୍ୱର୍ ପ୍ରେମମୟ । ଇଶ୍ୱର୍ ତାନ୍ ୱେରଣ୍ଡେ ଇଞ୍ଜ ମାର୍ ଜିସୁଙ୍କ୍ ଜଗତ୍ତାଗ୍ ରସ୍ମିକା ମାନ୍ ସେଙ୍ଗ୍ ଅନାଦ୍ ପ୍ରେମ କେସ୍ ମିନ୍ତେନ୍, ଆ ଜିସୁନ୍ ତଡ଼୍ ମାନ୍ଡ଼୍ ଅନନ୍ତ ଜିୱେ ପାଏମ୍ ଆଦ୍ତାଡ଼୍ । ଇଦ୍ କେ ନିଜାତାଦ୍ ପ୍ରେମ, ମାନାଡ଼୍ ଇଶ୍ୱର୍ତିଙ୍କ୍ ପ୍ରେମ ମାଡ଼୍ୱାଡ଼୍, ଅଣ୍ଡ୍ ମାନାଙ୍କ୍ ପ୍ରେମ ମାଡ଼ି, ମାନ୍ ପାପାମ୍ କାଞ୍ଜି ଆଦାନ୍ ସେଙ୍ଗେ ତାନ୍ ମାରିଙ୍କ୍ ରଅତଣ୍ଡ୍ ।
ଆ ନା ପ୍ରିୟ ସାଙ୍ଗନଡ଼ି, ଯଦି ଇଶ୍ୱର୍ ମାନାଙ୍କ୍ ଇଦ୍ଲେକାମ୍ ପ୍ରେମ ମାଡ଼୍ତନ୍, ମାନାଡ଼୍ ମିକା ନିଜେ ନିଜେତିଙ୍ଗ୍ ପ୍ରେମ ମାଡ଼ାନ୍ ଦର୍କାର୍ । 1ବେନ ବେସୁଙ୍କ୍ ଇଶ୍ୱର୍ତିଙ୍କ୍ ଉଡ଼ଣ୍ଡ୍, କିନ୍ତୁ ମାନାଡ଼୍ ଯଦି ନିଜେ ନିଜେତିଙ୍ଗ୍ ପ୍ରେମ ମାଡ଼ିତାଡ଼୍, ଇଶ୍ୱର୍ ମାନାଗେ ମାନ୍ତଣ୍ଡ୍ ନୁ ମାନାଗେ ଅନାଦ୍ ପ୍ରେମ ପୁରାପୁରି ଲାବ୍ ମାଡ଼ିତଣ୍ଡ୍ ।
ମାନାଡ଼୍ ଯେ ଇଶ୍ୱର୍ ତଡ଼୍ କାଇଲି ନୁ ଇଶ୍ୱର୍ ମାନ୍ ହୃଦୟତାଗ୍ ମାନ୍ତନ୍, ଇଦିନ୍ ନିଦର୍ଶନ୍ ଅଦୁତ୍, ଅଣ୍ଡ୍ ପବିତ୍ରଆତ୍ମାଙ୍କ୍ ମାନାଙ୍କ୍ ଇତ୍ତନ୍ । ଜଗତ୍ତେ ତ୍ରାଣକର୍ତ୍ତାଲ୍ ଲେକାମ୍ ଇଶ୍ୱର୍ ରସ୍ମାନ୍ଦାନ୍ ତାନ୍ ମାରିଙ୍କ୍ ନିଜର୍ କଣ୍ଡେତେ ଉଡ଼ି ଅନ୍ ବିଷୟ୍ତେ ମାମେ ୱେରେତଡ଼୍କିଙ୍କ୍ କେତୁତମ୍ । ବେନାୟି ଜିସୁଙ୍କ୍ ଇଶ୍ୱର୍ତେ ମାର୍ ଇଞ୍ଜ ବେନ ସ୍ୱୀକାର୍ ମାଡ଼ିତନ୍, ଇଶ୍ୱର୍ ଅନ୍ ହୃଦୟତାଗ୍ ମାନ୍ତନ୍ ନୁ ଅଣ୍ଡ୍ ଇଶ୍ୱର୍ତାଗ୍ ମିନ୍ଦେଣ୍ଡ୍ । ମାନ୍ ସେଙ୍ଗେ ଇଶ୍ୱର୍ତେ ପ୍ରେମତାଦ୍ ନିଜାମ୍ ମାମେ ପୁତ୍ତମ୍, ଇଗେ ମାୟାଦ୍ ପୁରା ବିଶ୍ୱାସ୍ ମିନ୍ଦେ । ଇଶ୍ୱର୍ ପ୍ରେମମୟ । ବେନନ୍ ଜିୱେତାଗ୍ ପ୍ରେମ ବର୍ତ୍ତି ଆସ୍ ମିନ୍ଦେ, ଅଣ୍ଡ୍ ଇଶ୍ୱର୍ ତଡ଼୍ କାୟ୍ଲ୍ତଣ୍ଡ୍ ନୁ ଇଶ୍ୱର୍ ଅନାଗ୍ ମିନ୍ଦେଣ୍ଡ୍ ।
ଇଶ୍ୱର୍ତେ ପାକେ ଜିୱୁଣ୍ଡ୍ ବାଦ୍କାନ୍ ତଡ଼୍ ମାନ୍ ଜିୱେତାଗ୍ ଇଦ୍ ପ୍ରେମ ସିଦ୍ଦ ଆତ୍କେ, ମାମେ ୱେର୍ୱେକଞ୍ଚ୍ ବିଚାର୍ ଦିନେ ମୁନେ ୱାଦେପାର୍ଦ୍ତାଡ଼୍, ବାତେଙ୍କ୍ଇତ୍କେ ଇଦ୍ ଜଗତ୍ତେ ମାଞ୍ଜ ମାମେ କ୍ରିଷ୍ଟନ୍ ଲେକାମ୍ ଜିବନ୍ ଜାପନ୍ ମାଡ଼ୁତମ୍ । ବେଗେ ପ୍ରେମ ମାନ୍ତେ, ଆଗେ ୱେର୍ରେ ମାନ । ସାୟେ ପ୍ରେମ ସାରେ ୱେର୍ରେ ଦୂରାମ୍ ମାଡ଼ିତ୍ । ବେନ ୱେର୍ତଣ୍ଡ୍, ଅନାଗେ ପ୍ରେମ ସଫଳ ଆୟ; ବାତେଙ୍କ୍ଇତ୍କେ ଦଣ୍ଡ୍ ଦର୍କାନାଦ୍ ୱେର୍ରେ ଅନାଦ୍ ମେଣ୍ଡେ ମିନ୍ତେ ।
ଅଣ୍ଡ୍ ମୁନେନ୍ ମାନାଙ୍କ୍ ପ୍ରେମ ମାଡ଼୍ତାଙ୍କ୍ ମାନାଡ଼୍ ପ୍ରେମ ମାଡ଼ାନଙ୍କ୍ ନାଡ଼୍ସ୍ତମ୍ । ଯଦି ବେନ କେତିତନ୍ ଯେ, ଅଣ୍ଡ୍ ଇଶ୍ୱର୍ତିଙ୍କ୍ ପ୍ରେମ ମାଡ଼ୁତଣ୍ଡ୍, ଆଲେକ୍ ଅଣ୍ଡ୍ ତାନ୍ ବିଶ୍ୱାସୀ ଏଲାଡ଼୍ତାମୁଙ୍କ୍ ଗୃଣା ମାଡ଼ିତଣ୍ଡ୍, ଅଣ୍ଡ୍ ମିତ୍ୟାବାଦି । ବାତେଙ୍କ୍ଇତ୍କେ ନିଜାମ୍ ଉଡ଼ ମାନ୍ଦାନ୍ ୱେରଣ୍ଡ୍ ତାମୁଙ୍କ୍ ବେନ ଆୟି ସ୍ନେହ ମାଡ଼େ ପାର୍ୱନ୍, ଅଣ୍ଡ୍ ତନ୍ଦ୍ୱେ ଇଶ୍ୱର୍ତିଙ୍କ୍ ବେସୁଙ୍କ୍ ପ୍ରେମ ମାଡ଼େ ପାର୍ୱନ୍ । ଇଦ୍ ଆଦେଶ୍ କ୍ରିଷ୍ଟ ମାକିଙ୍କ୍ ଇତ୍ତନ୍, ବେନ ଇଶ୍ୱର୍ତିଙ୍ଗ୍ ପ୍ରେମ ମାଡ଼ିତନ୍, ଅଣ୍ଡ୍ ନିଜାମ୍ ତାନ୍ ବିଶ୍ୱାସୀ ଏଲାଡ଼୍ତାମୁଙ୍କ୍ ପ୍ରେମ ମାଡ଼ିତନ୍ ।
Source notes (1)
- Cross-reference ଯୋହନ୍ ୧:୧୮.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.