ପୁନାଦ୍ ଆର୍ର୍
୧ କରନ୍ତିୟ 16:14
Verse 14 is marked below, with the whole chapter around it. Read from the start
ଇଶ୍ୱର୍ତେ ନାରୁଡ଼୍ ଡାବ୍କ୍ ସେଙ୍ଗେ ସାହାଯ୍ୟ
ଯିହୁଦାତାଗ୍ ମାନ୍ଦାନ୍ ପବିତ୍ର ମଣ୍ଡଲିତେ ବିଶ୍ୱାସୀଡ଼୍ ସେଙ୍ଗେ ଡାବ୍କ୍ ସାହାଯ୍ୟ ଇଦାନ୍ ବିଷୟ୍ତେ ନାୟାଦ୍ ମତାମତ୍, ନାନ୍ ଗାଲାତୀୟ ଆଞ୍ଚିନାଗ୍ ମାନ୍ଦାନ୍ ମଣ୍ଡଲିତିଙ୍କ୍ ବାତ୍ ମାଡ଼ାନଙ୍କ୍ ନିର୍ଦେଶ୍ ଇତ୍ତାନ୍, ଆଦ୍ ଲେକାମ୍ ପାଲନ୍ ମାଡ଼ାଟ୍ । ମିୟାଦ୍ ନିଜେତ୍ ରଜ୍ଗାର୍ ଲେକାମ୍ ସାର୍ରେ ରବ୍ବାର୍ ଦିନ୍ ସେଙ୍ଗେ ବେସ୍କ୍ ଡାବ୍କ୍ ୱେରେ ନେଃଏସ୍ ମାନୁଟ୍ । ଆଲାଆତ୍କେ, ନାନ୍ ଆତ୍ତେୱେଲେ ମିକିଂଙ୍କ୍ ମେଣ୍ଡେ ଡାବ୍କ୍ ତାଲ୍କାନଙ୍କ୍ ୱେୟ୍ । ନାନ୍ ୱାସ୍ ସାୟେ ହେର୍କା ମାଡ଼ମାନ୍ଦାନ୍ ନାରୁଡ଼୍କିଂଙ୍କ୍ ପରିଚୟ୍ ଚିଟି ଇଦ୍ତାନ୍ ନୁ ଅଡ଼୍ ମିୟାଦ୍ ଦାନ ତଡ଼୍ ଯିରୁଶାଲେମ୍ ଆଦ୍ତଡ଼୍ । ଇତ୍କେ ନାୟାଦ୍ ଆଦାନାଦ୍ ଦର୍କାର୍ ଆତ୍କେ, ଅଡ଼୍ ନା ତଡ଼୍ ଆଦେପାର୍ଦ୍ତଡ଼୍ ।
ପାଉଲ୍ତାଦ୍ ଯୋଜନା
ନାନ୍ ମାସିଦୋନିଆତା ଆଞ୍ଜମିନ୍ଦେନ୍ । ଆଞ୍ଜ୍ ୱାଦାନାଦ୍ ତେର୍ସ୍ପି ନାନ୍ନେ ମିଇ ବକେତ୍ ମାଲ୍ସ୍ ୱାଦ୍ତାନ୍ । ନାନ୍ ଆତ୍କେ, ମିଇ ତଡ଼୍ ବେସ୍କେ ଦିନା ମାନ୍ତାନ୍, ଆତ୍କେ ଶାଲ୍ କାଲାମ୍ ମାନ୍ତାନ୍ । ତାନ୍ପେର୍କେ ବେଗେ ଆଦାନ୍ ସେଙ୍ଗେ ଆଲ୍ସିତାନ୍, ମିଡ଼୍ ନାକିଂଙ୍କ୍ ଆଗେ ଆଦାନ୍ ସେଙ୍ଗେ ସାହାଯ୍ୟ ମାଡ଼ିତିଡ଼୍ । ବାତେଙ୍କ୍ଇତ୍କେ ଆଦାନ୍ ଆର୍ର୍ଦାଗ୍ ମିଇ ତଡ଼୍ ମାତର୍ ନାର୍ଗେଦିନା କାୟ୍ଲାନାଦ୍ ନାୟାଦ୍ ଇଚ୍ଛା ଆୟ୍ୟ । ନାନ୍ ଆଶେ ମାଡ଼ୁତାନ୍, ପ୍ରବୁନାଦ୍ ଇଚ୍ଛା ଆତ୍କେ, ନାନ୍ ମିଇ ତଡ଼୍ ଇଦାମ୍ ଗାଟି ଜେଲ୍ ମାନ୍ତାନ୍ । 3
ଇତ୍କେ ପେଣ୍ଟିକଷ୍ଟ୍ ପାଣ୍ଡୁମ୍ଦିନେ ଏୱୁନା ନାନ୍ ଇଗେ ଏପିସୀତାଗ୍ ମାନ୍ତାନ୍ । ଇଗେ ନା ବିରୁଦ୍ତେ ନାର୍ଗେ ନାରୁଡ଼୍ ମାତ୍କେ ଗାଲା, ସାୟେତାୱୁ ପାଡ଼୍ୟି ମାଡ଼ାନ୍ ସେଙ୍ଗେ ନାକିଂଙ୍କ୍ ଆସର୍ ଆର୍ଙ୍ଗ ମିନ୍ଦେ । 4
ତୀମତି ମିଇ ବକେତ୍ ୱାତ୍କେ, ଅଂକିଙ୍କ୍ ସ୍ୱାଗତ୍ ମାଡ଼ାଟ୍ । ବାତେଙ୍କ୍ଇତ୍କେ ଅଣ୍ଡ୍ ମିକା ନା ଲେକାମ୍ ପ୍ରବୁନ୍ ପାଡ଼୍ୟି ମାଡ଼ୁତଣ୍ଡ୍ । ବେନ ଅଂକିଙ୍କ୍ ତୁଚ୍ଛ ବୁଦ୍ତେ ମାଡ଼୍ମାକିଡ଼୍ । ଶାନ୍ତିତଡ଼୍ ଆଦାନ୍ ସେଙ୍ଗେ ମିଡ଼୍ ଅଂକିଙ୍କ୍ ନିଜାମ୍ ସାହାଯ୍ୟ ମାଡ଼ିତିଡ଼୍ । ଆଲାଇତ୍କେ, ଅଣ୍ଡ୍ ଦାଦାଲଡ଼୍ ତଡ଼୍ ନା ବକେତ୍ ମାଲ୍ସ୍ ୱାଦ୍ତଣ୍ଡ୍ । ଅଡ଼୍କିଂଙ୍କ୍ ନାନ୍ କେପି ମାନ୍ତାନ୍ ।
ଦାଦାଲ୍ ଆପୋଲ୍ଲୋନ୍ ବିଷୟ୍ତେ କେତୁତାନ୍ ଜେ, ବାଗାତ୍ ଦାଦାଲଡ଼୍ ତଡ଼୍ ମିଇ ବକେତ୍ ଆଦାନ୍ ସେଙ୍ଗେ ନାନ୍ ଅଂକିଙ୍କ୍ ନାର୍ଗେ ଦାମ୍ କେତ୍ତାନ୍ । ଇତ୍କେ ଇଞ୍ଜେ ଆଦାନ୍ ସେଙ୍ଗେ ବେଲାମେଣ୍ଡେ ରାଜି ଇଲେଣ୍ଡ୍ । ପେର୍କେ ସୁଯୋଗ୍ ଦର୍କେ, ଅଣ୍ଡ୍ ନିଜାମ୍ ମିଇ ବକେତ୍ ଆଦ୍ତନ୍ ।
ମାଡ଼େଙ୍କ୍ତାଦ୍ ଗଟ୍
ମିଡ଼୍ ନାଆକି କେପି ମାନୁଟ୍, ବିଶ୍ୱାସ୍ତାଗ୍ ଗାଡ଼୍ସ୍ ଆୟ୍ମୁଟ୍, ସାହାସ୍ ନୁ ବଲ୍ବାନ୍ ଆୟ୍ମୁଟ୍ । ମିୟାଦ୍ ସାର୍ରେ ପାଡ଼୍ୟି ପ୍ରେମତଡ଼୍ ଆୟି । 5
ମିଡ଼୍ ସ୍ତିଫାନ୍ ନୁ ତାନ୍ ପରିବାର୍ ବିଷୟ୍ ପୁତ୍ତିଡ଼୍ । ଅଡ଼୍ ଆକାୟାତେ ପ୍ରର୍ତୁମ୍ ପବିତ୍ର କ୍ରିଷ୍ଟିୟାନ୍ । ଅଡ଼୍ ଇଶ୍ୱର୍ତେ ନାରୁଡ଼୍ ସେବା ପାଡ଼୍ୟିତାଗ୍ ନିଜେତିଙ୍କ୍ ସମର୍ପଣ୍ ମାଡ଼୍ତଡ଼୍ । ଦାଦାଲଡ଼ି ନୁ ଏଲାସ୍କ୍; ନାନ୍ ମିକିଂଙ୍କ୍ ଅନୁରୋଦ୍ ମାଡ଼ୁତାନ୍, ମିଡ଼୍ ଇଡ଼ାଦ୍ ନୁ ଇଡ଼୍ତଡ଼୍ ପାଡ଼୍ୟି ନୁ ସେବା ମାଡ଼ମାନ୍ଦାନ୍ ନାରୁଡ଼୍ତେ ଗଟି କେଞ୍ଜାଟ୍ ।
ସ୍ତିଫାନ୍, ଫର୍ତୁନାତ ନୁ ଆକାୟିକ ଇଗେ ୱାତ୍ତାଙ୍କ୍ ନାନ୍ ଗାଟି ୱେଡ଼୍କ୍ ଆତ୍ତାନ୍ । ମିଡ଼୍ ଇଲ୍ୱାଙ୍କ୍ ଅଡ଼୍ ମିୟାଦ୍ ପଡ଼୍ୟେ ସାରେ ମାଡ଼୍ତଡ଼୍ । ଅଡ଼୍ ମିକିଂଙ୍କ୍ ନୁ ନାକିଂଙ୍କ୍ ୱେଡ଼୍କ୍ ମାଡ଼୍ତଡ଼୍ । ଇଦ୍ରକମ୍ ନାରୁଡ଼୍ ସମ୍ମାନ୍ ପାଏମ୍ ଆଦ୍ତଡ଼୍ । 6
ଏସିଆ ଆଞ୍ଚିନ୍ ମଣ୍ଡଲି ମିକିଂଙ୍କ୍ ଅବିନନ୍ଦନ୍ ମାଡ଼ୁତା । ଆକ୍ୱିଲା, ପ୍ରିସ୍କିଲା ନୁ ଅଡ଼ାଦ୍ ଲୋନ୍ ଉପବାସ୍ ମାଡ଼ମାନ୍ଦାନ୍ ମଣ୍ଡଲି, ପ୍ରବୁନ୍ ପେଦେର୍ତେ ମିକିଂଙ୍କ୍ ଲୋପେକନ୍ସ୍ ନମସ୍କାର୍ ମାଡ଼ୁତା । ଇଗେତଡ଼୍ ଦାଦାଲଡ଼୍ ନୁ ଏଲାସ୍କ୍ ମିକିଂଙ୍କ୍ ସାର୍ରେତଡ଼୍ ନମସ୍କାର୍ କେତୁତଡ଼୍ । ମିଡ଼୍ ପବିତ୍ର କ୍ରିଷ୍ଟନ୍ ପ୍ରେମ ତଡ଼୍ ମିଡ଼୍ ମିଇ ଲୋପେ ନମସ୍କାର୍ ମାଡ଼ାଟ୍ ।
ନାନ୍ ପାଉଲ୍ ନିଜେତ୍ କାୟ୍ଦେ ଇୱୁସାର୍ରେ ଶୁଭେଚ୍ଛା ଲେକୁତାନ୍ ।
ବେନ ପ୍ରବୁଙ୍କ୍ ପ୍ରେମ ମାଡ଼ଣ୍ଡ୍, ଅଣ୍ଡ୍ ଅବିଶାପ୍ ଆୟିଣ୍ଡ୍, “ମାରାନାତା,” ମାନ୍ ପ୍ରବୁ ୱାଡ଼ିଣ୍ଡ୍ ।
ପ୍ରବୁ ଜିସୁନ୍ ଅନୁଗ୍ରହ୍ ମିଇ ଲୋପେ ବିରାଜ୍ମାନ୍ ଆୟି ।
କ୍ରିଷ୍ଟ ଜିସୁନ୍ ତଡ଼୍ କାୟ୍ଲିମାନ୍ଦାନଡ଼ି ମିଡ଼୍ ସାର୍ରେତଡ଼୍ ନା ଜିୱୁତେ ପ୍ରେମ ଗ୍ରହନ୍ ମାଡ଼ାଟ୍ ।
Source notes (6)
- Cross-reference ରୋମୀୟ ୧୫:୨୫,୨୬.
- Cross-reference ପ୍ରେରିତ ୧୯:୨୧.
- Cross-reference ପ୍ରେରିତ ୧୯:୮-୧୦.
- Cross-reference ୧ କରନ୍ତିୟ ୪:୧୭.
- Cross-reference ୧ କରନ୍ତିୟ ୧:୧୬.
- Cross-reference ପ୍ରେରିତ ୧୮:୨.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.